کراچی: جامعہ کراچی نےجعلی مارکس شیٹ جمع کرانے کی بناء پرمارننگ پروگرام کےطالبعلم کا داخلہ منسوخ کردیا۔

انچارج ڈائریکٹوریٹ آف ایڈمیشنز جامعہ کراچی ڈاکٹر صائمہ اختر کے مطابق بورڈ آف انٹرمیڈیٹ ایجوکیشن کراچی سے تصدیق کرانے پرمارننگ پروگرام داخلے برائے سال 2023 ء کے شعبہ ایگریکلچر اینڈ ایگری بزنس مینجمنٹ کےطالبعلم فہد رسول ولد رسول بخش فارم نمبر632367 کی مارکس شیٹ جعلی ثابت ہوئی جس کی بناء پر ان کا داخلہ فوری طور پر منسوخ کردیاگیاہے۔

اسلام آباد : کوئٹہ گلیڈی ایٹرز اور پشاور زلمی کےدرمیان 5 فروری کو ہونے والے نمائشی میچ کے حوالے سے اسکواڈز کو حتمی شکل دےدی گئی۔

ذرائع کے مطابق نمائشی میچ کیلئے بابراعظم پشاور زلمی کی اور سرفراز احمد کوئٹہ گلیڈی ایٹرز کی کپتانی کریں گے، پشاور زلمی اور کوئٹہ گلیڈی ایٹرز میں دیگر فرنچائزز کے کھلاڑیوں کو بھی شامل کیا گیا ہے۔

پشاور زلمی کا اسکواڈ
پشاور زلمی کے اسکواڈ میں شاہد آفریدی، وہاب ریاض، حسیب اللہ، دانش عزیز ، محمد حارث، اعظم خان، حیدرعلی، عامر ممال اور اسامہ میر شامل ہیں جب کہ صفیان مقیم، سلمان ارشاد، صائم ایوب اور عثمان قادر بھی نمائشی میچ میں پشاورزلمی کی نمائندگی کریں گے۔

کوئٹہ گلیڈی ایٹرز کا اسکواڈ
دوسری جانب کوئٹہ گلیڈی ایٹرز کے اسکواڈ میں عمراکمل، بسم اللّٰہ خان، سعودشکیل، احسن علی، نسیم شاہ، افتخار احمد، محمد نواز، محمد حسنین، خوشدل شاہ، عبدالواحد بنگلزائی، عمیدآصف، عمیربن یوسف اور اعمل خان شامل ہیں۔

نمائشی میچ میں کوئٹہ گلیڈی ایٹرز کے معین خان اور پشاورزلمی کے لیے کامران اکمل ہیڈکوچ ہوں گے، انضمام الحق پشاورزلمی کے ڈگ آؤٹ میں بطور مینٹور دکھائی دیں گے۔

بنگلہ دیش پریمیئر لیگ میں چند کھلاڑیوں کی شمولیت کے باعث دونوں فرنچائز کے اسکواڈز 14 ، 14 ممبران پر مشتمل ہے۔

واضح رہے کہ کوئٹہ گلیڈ ی ایٹرز اور پشاور زلمی کے درمیان نمائشی میچ 5 فروری کو بگٹی اسٹیڈیم کوئٹہ میں کھیلا جائےگا۔

کراچی: کورنگی کے نجی اسکول میں طالبعلم کے ساتھ تشددکےمعاملےپر محکمہ تعلیم سندھ نے ایکشن لے لیا۔

ڈائریکٹوریٹ کی تین رکنی کمیٹی نے انکوائری کے بعد رپورٹ پیش کردیا۔

کتاب نہ کھولنے پر کم عمر طالب علم کو بدترین تشدد

انکوائری مکمل ہونے پر محکمہ تعلیم سندھ نےنجی اسکول کی رجسٹریشن معطل اور 25ہزار جرمانہ عائد کردیا ہے۔

واضح رہےوزیر تعلیم و ثقافت سندھ سید سردار علی شاہ نے واقعے کا نوٹس لے کر انکوائری کے احکامات جاری کیئے تھے۔

ڈھاکا: بنگلہ دیش پریمیئر لیگ( بی پی ایل) میں شریک پاکستانی کرکٹرکو ایونٹ کھیلنے کی مشروط اجازت مل گئی۔

میڈیا رپورٹس کے مطابق پاکستان سپر لیگ (پی ایس ایل) کھیلنے والے وہ قومی کرکٹرز جو 5 فروری کے نمائشی میچ کا حصہ نہیں ہیں انہیں 8 فروری تک لیگ کھیلنے کی اجازت دیدی گئی ہے تاہم نمائشی میچ کھیلنے والے تمام کھلاڑیوں کو 2 فروری تک طلب کرلیا گیا ہے۔

قبل ازیں پی سی بی مینجمنٹ کمیٹی کے چیئرمین نجم سیٹھی نے بنگلہ دیش پریمئیر لیگ میں شریک کرکٹرز نمائشی میچ شرکت کیلئے وطن واپس آجائیں تاہم کچھ کرکٹرز نے معذرت کرلی تھی جس پر تمام کھلاڑیوں کی درخواست مسترد کردی گئی تھی اور کہا گیا تھا کہ ملک کی خاطر غیرملکی لیگ چھوڑنی پڑے گی۔

تاہم پی سی بی نے واپس بلانے کی پالیسی کا از سر نو جائزہ لیا جس کے بعد فیصلہ کیا گیا کہ پی ایس ایل نہ کھیلنے والے کرکٹرز پر وطن واپسی کی کوئی پابندی نہیں ہوگی۔

واضح رہے کہ پاکستان سپر لیگ کے 8 ویں ایڈیشن کے میچز 13 فروری سے شروع ہوں گے جبکہ کوئٹہ گلیڈی ایٹرز اور پشاور زلمی کے مابین نمائشی میچ 5 فروری کو بلوچستان کے بگٹی کرکٹ اسٹیڈیم میں کھیلا جائے گا۔

ویب ڈیسک : ٹوئٹر کی جانب سے سوشل میڈیاپلیٹ فارم پر پیمنٹ فیچر متعارف کرانے کے منصوبے پر پیشرفت کی گئی ہے۔

فنانشنل ٹائمز کی ایک رپورٹ میں کمپنی ذرائع کے حوالے سے بتایا گیا کہ ٹوئٹر کے سی ای او ایلون مسک ٹوئٹر کی آمدنی میں اضافے کے لیے نئے منصوبوں پر کام کررہے ہیں۔

رپورٹ کے مطابق پیمنٹ سروسز کو ایپ کا حصہ بنانے کے لیے ٹوئٹر کی جانب سے امریکا میں ریگولیٹری لائسنس کے حصول پر کام کیا جارہا ہے۔

اس سے قبل ٹوئٹر نے نومبر 2022 میں پیمنٹ سروسز کے لیے امریکی محکمہ خزانہ میں رجسٹریشن کرائی تھی اور اب لائسنس کے حصول کے لیے کام کیا جارہا ہے۔

رپورٹ میں بتایا گیا کہ کمپنی کو توقع ہے کہ لائسنس کا عمل ایک سال کے اندر مکمل ہوجائے گا۔
خیال رہے کہ ایلون مسک نے نومبر 2022 میں پیمنٹ سسٹم کو ٹوئٹر کا حصہ بنانے پر بات کی تھی۔

اس موقع پر ان کا کہنا تھا کہ ٹوئٹر کا پیمنٹ سسٹم بینک اکاؤنٹس اور ڈیبٹ کارڈ سے منسلک ہوگا۔

ایلون مسک نے کہا کہ ٹوئٹر بلیو سبسکرپشن پلان سے صارفین اس پلیٹ فارم کو پیمنٹس کے لیے استعمال کرسکیں گے اور ایک دوسرے کو رقوم بھیج سکیں گے۔

انہوں نے مزید بتایا کہ صارفین اپنے بینک اکاؤنٹس کو ٹوئٹر سے لنک کرسکیں گے اور اگلے مرحلے میں ہم انہیں زیادہ فیچرز فراہم کریں گے جبکہ ڈیبٹ کارڈز اور چیکس کا اضافہ بھی کیا جائے گا۔ایلون مسک معروف سروس پے پال کے شریک بانی بھی رہے ہیں اور انہیں اس طرح کے پیمنٹ سسٹم کے بارے میں کافی کچھ معلوم ہے۔

اگر یہ منصوبہ کامیاب ہوتا ہے تو یہ ایلون مسک کی جانب سے ٹوئٹر کو سپر ایپ میں تبدیل کرنے کے حوالے سے پیشرفت ہوگی۔

وہ کافی عرصے سے ٹوئٹر کو ایک سپر ایپ میں تبدیل کرنے کی بات کررہے ہیں جہاں صارفین کو ایک ہی جگہ ای کامرس، فنانس اور دیگر سروسز مل سکیں۔

کراچی: ڈاؤ یونیورسٹی آف ہیلتھ سائنسِس کے ماہرین نے کراچی میں کورونا وائرس کے نئے ویریئنٹ (جینیاتی طور پر تبدیل شدہ وائرس) کی موجودگی کی تصدیق کردی ہے۔

پاکستان میں کورونا وائرس کی اس تبدیل شدہ قسم واقعہ رونما ہوا ہے جو اس سے قبل چین میں لوگوں کو بڑے پیمانے پر متاثر کرچکا ہے۔

واضح رہے کہ اس کا نام بی ایف 7 رکھا گیا تھا جو پہلے ہی چین میں بڑے پیمانے پر متاثرکرچکا ہے اور اب بھی وہاں موجود ہے۔ ماہرین نے اس نئے ویریئنٹ کی جینیاتی سیکوئینسنگ کی تصدیق کی ہے۔ اس طرح یہ پاکستان میں رونما یا پہنچنے والا بی ایف سیون کا پہلا کیس بھی ہے۔

ڈاؤ یونیورسٹی سے وابستہ ڈاکٹر پروفیسر سعید خاں نے کہا ہے کہ ان کی جدید تجربہ گاہ میں نت نئے ویریئنٹ کی مسلسل سیکویئنسنگ کی جاتی ہے۔ اس تناظر میں ہدایات دی گئی ہیں کہ تمام شہری کورونا سے وابستہ تمام حفاظتی اقدامات (ایس او پیز) کی پر عملدرآمد کرے۔

ڈاکٹر سعید خان نے کہا کہ اس نئے تبدیل شدہ وائرس کے پھیلاؤ پر غور کرنا ہے۔ شہری سماجی فاصلے، ماسک لگانے اور بوسٹرڈوز سے خود کو محفوظ بناسکتےہیں۔ شہری اگر اپنے اندر علامات محسوس کریں تو خود کو فوری طور پر قرنطینہ کریں۔

اسلام آباد: رواں مالی سال (2022-23) کے پہلے 6مہینوں کے دوران امریکا پاکستانی مصنوعات کی برآمدات میں سرفہرست رہا۔

تازہ اعدادو شمار کے مطابق رواں مالی سال کی پہلی ششماہی کے دوران پاکستان سے سب سے زیادہ مصنوعات امریکا اسکے بعد چین اور برطانیہ بھیجی گئیں۔

جولائی تا دسمبر (2022-23) کے دوران امریکا کو کل برآمدات3065.989 ملین ڈالر ریکارڈ کی گئیں جو کہ جولائی تا دسمبر (2021-22) کے دوران 3323.470 ملین امریکی ڈالر کی برآمدات کے مقابلے میں 7.74 فیصد کی کمی کو ظاہر کرتی ہیں۔

بینک آف پاکستان کے مطابق امریکا کے بعد چین کا نمبر آیا جہاں پاکستان نے 1058.055 ملین ڈالر کی اشیا برآمد کیں جو کہ 20.61 فیصد کمی کو ظاہر کرتی ہیں۔ کاروں کی درآمدات میں جاری مالی سال کے پہلے چھ ماہ میں سالانہ بنیادوں پرکمی ریکارڈ کی گئی ہے۔

کراچی: کورنگی میں اسکول ٹیچرنےمتعلقہ مضمون کی کتاب نہ کھولنے پر کم عمر طالب علم کو بدترین تشدد کا نشانہ بناکر ہاتھ توڑ دیا۔

ذرائع کے مطابق کراچی کے علاقے کورنگی کے نجی اسکول میں خاتون ٹیچر کی جانب سے طالب علم پر تشدد کا واقعہ پیش آیا، تشدد کے نتیجے میں 13 سالہ طالب علم عبدالرافع کو بازو پر شدید چوٹیں آئی ہیں اور ہاتھ فریکچر ہوگیا، جس کی رپورٹ متعلقہ پولیس اسٹیشن میں کرادی گئی ہے۔

طالب علم کے بیان اور دیگر ذرائع کے مطابق متعلقہ مضمون کے برعکس دوسرے مضمون کی کتاب کھولنے پر طالب علم پر تشدد کیا گیا اور ابتداء میں تقریبا دو گھنٹے تک والدین کو اس واقعہ کی اطلاع بھی نہیں دی گئی تاہم چوٹ کی شدت اور تکلیف کے بعد طالب علم کے والد کو بلایا گیا۔
ادھر ڈائریکٹوریٹ آف پرائیویٹ انسٹیٹیوشنز سندھ نے اس واقعہ کا نوٹس لیتے ہوئے سہ رکنی تحقیقاتی کمیٹی تشکیل دی ہے۔

ایڈیشنل ڈائریکٹر پرائیویٹ انسٹیٹیوشنز پروفیسر رفعیہ ملاح کے مطابق ڈائریکٹوریٹ کے افسران گلاب رائے، ریاض حسین اور رفیع الدین پر مشتمل کمیٹی بدھ کو السحر اسکول کورنگی نمبر 3 کا دورہ کرکے معاملے کی چھان بین کرے گی اور اس سلسلے میں مزید کارروائی کے لیے اپنی رپورٹ ڈائریکٹوریٹ کو پیش کرے گی۔

رفعیہ ملاح کا کہنا تھا کہ اسکولوں میں انسداد جسمانی تشدد کے حوالے سے محکمہ اسکول ایجوکیشن سندھ کئی تربیتی ورکشاپ اور سیمینار منعقد کراچکا جس میں اساتذہ کو کئی بار اس امر کی ہدایت کی گئی ہے کہ تعلیمی اداروں میں طلبہ پر جسمانی تشدد ناصرف غیر اخلاقی بلکہ غیر قانونی بھی ہے، لہذا اس عمل سے اجتناب کیا جائے تاہم اس کے باوجود اس طرح کے واقعات سامنے آرہے ہیں جو کسی بھی صورت قابل قبول نہیں ہیں اور ڈائریکٹوریٹ اس معاملے پر سخت کارروائی کرے گا۔

کراچی: جامعہ کراچی نےبی کام ریگولرکےامتحانی فارم جمع کرانےکی تاریخ کااعلان کردیا۔

ناظم امتحانات جامعہ کراچی ڈاکٹر سید ظفر حسین کے مطابق بی کام ریگولر سال اول،دوئم اور باہم سالانہ امتحانات برائے 2022 ء کے امتحانی فارم جمع کرانے کی تاریخ کا اعلان کردیاگیا ہے۔

طلباوطالبات اپنے امتحانی فارم 20 فروری 2023 ء تک جمع کراسکتے ہیں۔تفصیلات کے مطابق بی کام سال اول(فیل ہونے والے) اوربی کام سال دوئم کے طلبہ اپنے امتحانی فارم 7700 روپے فیس کے ساتھ جبکہ بی کام باہم کے طلبہ اپنے امتحانی فارم 15400 روپے فیس کے ساتھ متعلقہ کالجز میں جمع کراسکتے ہیں۔

واضح رہے کہ 2016 ء یا اس سے قبل کی انرولمنٹ کے حامل طلبہ 3000 روپے اضافی فیس کے ساتھ امتحانی فارم جمع کراسکتے ہیں۔

کراچی: سندھ حکومت، یونیسکو اور اٹالین ایجنسی فار ڈولپمینٹ کارپوریشن اسلام آباد کے مشترکہ تعاون سے “پرائمری، مڈل اور سیکنڈری کلاس میں ورثے کے موضوعات پر تیار ہونے والے فریم ورک” پر ورکشاپ منعقد کی گئی۔

وزیر تعلیم و ثقافت سندھ سید سردار شاہ نے کہا ہے کہ سندھ نے نصاب سے تیاری کے حوالے ملک میں بہت سی مثالیں قائم کی ہیں، ہمارہ بچہ جس معاشرے کا فرد بننے جا رہا ہے اس کو اپنی تاریخ اور ورثے سے وابستہ موضوعات پر تعلیم دینے سے وہ اپنے سماج کو آگے لے جانے میں اپنا کردار بہتر طریقے سے ادا کر سکتا ہے۔

اس موقع پر اٹلی قونصل جنرل Danilo Giurdanella, یونیسکو کے نمائندے Youssef Filali-Meknassi, سیکریٹری تعلیم غلام اکبر لغاری، نامور اسکالر جامی چانڈیو، تعلیمی ماہرین اور دیگر نے شرکت کی۔

صوبائی وزیر سید سردار شاہ نے کہا کہ سندھ میں نصاب کی تیاری کے سلسلے میں تاریخی ورثے کے موضوعات شامل کرنے کے حوالے سے فریم ورک بنانا ایک اہم پیش رفت ہے، سندھ نے نصاب سے تیاری کے حوالے ملک میں بہت سی مثالیں قائم کی ہیں، ہمارہ بچہ جس معاشرے کا حصہ ہے اسے اس کے بابت علم ہونا لازمی ہے۔ انہوں نے کہا کہ نصاب کی تیاری ایک دن کا معاملہ نہیں ہے، تجربات اور تجاویز کی بنیاد پر نصاب کو بہتر سے بہتر کرنے کی کوشش جاری رکھی جائےگی۔

سردار شاہ نے کہا کہ ہماری تاریخ اور ورثہ بلکل اس حیثیت کا حامل ہے کہ ہم اس پر فخر کریں اور اپنی آئیندہ نسلوں کو اس متعلق آگاہی دیں۔ انہوں نے کہا کہ تاریخ، تہذیب، آثار قدیمہ اور ماضی کے متعلق معلومات دینے سے تحقیق اور اس کی حفاظت کو یقینی بنانے میں مدد ملے گی۔ صوبائی وزیر نے کہا کہ سسٹینیبل ڈولپمینٹ گول (SDG) چار کے مطابق سال 2030 تک تعلیم کی ترقی کے لئے کام کرنا ہے اور اس سلسلے میں ثقافت اور ہریٹیج کو بھی نصاب کا حصہ بنانا ہے۔

انہوں نے اس بات پر خوشی کا اظہار کیا کہ غیر جانبدار اور مختلف بین الاقومی ادارو نے دیگر صوبوں کے مقابلے میں سندھ کے نصاب کو بہتر قرار دیا ہے۔ وزیر تعلیم نے کہا کہ ہم نے اپنی سطح پر بہت سے ریفارمز متعارف کروائےہیں، اسکولز میں کتابوں کی فراہمی کو یقنینی بنانے کے ساتھ اساتذہ کی کمی کو بھی پورا کیا ہے۔

انہوں نے کہا کہ اس وقت سب سے بڑا چیلینج بارشوں سے متاثرہ اسکولز کا ہے، تدریسی عمل کو ٹینٹ کلاسز کی صورت میں بحال کرنے کی کوشش کی جا رہی ہے۔ اس ضمن میں نصاب کے جائزے کے لئے مقرر کردہ ماہر جامی چانڈیو نے نصاب میں ورثے کے موضوعات شامل کرنے کے حوالے سے اپنی تجاویز پیش کیں۔ تعلیم کا مقصد صرف نوکری حاصل کرنے کا نام نہیں، سماج کو چلانے کے لیے بہت سے عوامل کا عمل حاصل ہونا بھی ضروری ہے، انہوں نے کہا کہ بچوں کو اپنی تحصیل سے جوڑنے سے لے کر دنیا کے ساتھ لنک کرنے سے وہ اپنے ساتھ اپنے سماج کو آگے لے کر چلے گا۔

قبل ازیں تعلیم ماہرین، دانشورو اور تعلیم کے شعبے کے کیے کام کرنے والے مختلف افراد اپنی نصاب میں تاریخی اور ورثے کے حوالے سے موضوعات شامل کرنے کے سلسلے میں اپنی تجاویز پیش کیں۔