ایمزٹی وی(گلگت بلتستان)پیپلزپارٹی گلگت بلتستان کے صدر امجد حسین ایڈووکیٹ نے کہا ہے کہ یکم نومبر کو (ن)لیگ کے تمام دعوﺅں کا پول کھل جائے گا، 26اکتوبر کو چین سے جو کنٹینرز آ رہے ہیں ان کا سی پیک سے کوئی تعلق نہیں، کچھ کاروباری افراد کے کنٹینرز آ رہے ہیں جسے گورنر سی پیک سے جوڑنا چاہتے ہیں۔
انہوں نے کہا کہ گلگت بلتستان میں ریڑھی بانوں ، موچیوں اور تندور مالکان پر بھی ٹیکس لگایا گیا ہے جو غریب عوام پر ظلم کی انتہا ہے۔ امجد ایڈووکیٹ نے میڈیا سے گفتگو کرتے ہوئے کہا کہ یکم نومبر کے جلسے میں شرکت کیلئے تمام سیاسی جماعتوں کو دعوت دی گئی ہے ۔
ہم عوامی ایشوز کی بات کر رہے ہیں اور عوام کے حقوق کیلئے سڑکوں پر نکلنے کا فیصلہ کیا ہے یکم نومبر کا جلسہ تاریخی ہو گا اس جلسے میں گلگت بلتستان کے تمام اضلاع سے جیالے شرکت کریں گے۔
جلسے میں گلگت بلتستان کے حقوق کیلئے آواز اٹھائی جائے گی اور حکومت سے ٹیکس کے نفاذ کا فیصلہ واپس لینے کا بھی مطالبہ کیا جائے گا۔ انہوں نے کہا عوامی تحریک اب رکنے والی نہیں حکومت کی ناانصافیوں کے خلاف عوام کمربستہ ہو چکے ہیں اب عوام کسی قسم کا سمجھوتہ کرنے کیلئے تیار نہیں ہیں، حکومت کو اب اپنی پوزیشن واضح کرنی ہو گی اور عوام کے مسائل کے حل کیلئے عملی اقدامات اٹھانا ہونگے۔

ایمزٹی وی(اسپورٹس) ورلڈ اینٹی ڈوپنگ ایجنسی کی شائع ہونے والی رپورٹ میں کہا گیا ہے کہ 2016کے ریوڈی جنیرو اولمپکس میں سنجیدہ انتظامی ناکامیاں پائی گئیں جس سے اینٹی ڈوپنگ اقدامات کو فرق پڑا، انٹرنیشنل اولمپک کمیٹی کی دعوت پر واڈا کو یہ رپورٹ آزادانہ مشاہدہ کرنے والے ادارے کی جانب سے موصول ہوئی، اس میں ان ایتھلیٹس کی وضاحت پیش کی گئی جو ٹیسٹنگ کا ہدف تھے تاہم ان تک رسائی ہی نہ ہوسکی، اس کی وجہ تربیت یافتہ اینٹی ڈوپنگ اہلکاروں کی کمی اور آؤٹ آف کمپی ٹیشن ٹیسٹ کیلیے ایتھلیٹس ولیج میں روزانہ کے اہداف حاصل کرنے کی نااہلیت بنی۔

رپورٹ کے مطابق حقیقت میں جس حساب سے منصوبہ ترتیب دیا گیا اس کے محض50فیصد یا اس سے بھی کم ٹیسٹ لیے گئے، مقابلوں میں وینیوز کے حوالے سے بھی مسائل سامنے آئے، اینٹی ڈوپنگ نگہبانوں کو بعض دفعہ ان ایریاز تک رسائی ہی نہیں ملی جہاں ایتھلیٹس موجود تھے جس کی وجہ سے وہ ٹیسٹ کا عمل انجام نہیں دے پائے، ڈوپنگ کنٹرول آفیسرز کو بھی سیمپلز جمع کرنے اور دوسرے طریقہ کار کے حوالے سے ناکافی ٹریننگ دی گئی، ان نقائص کے باوجود آفیشل جوناتھن ٹیلر کا کہنا ہے کہ ریو اینٹی ڈوپنگ پروگرام نے چیلنجنگ صورتحال کا سامنا کرنے کے باوجود مثبت نتائج حاصل کیے۔

جوناتھن ٹیلر نے کہا کہ اسٹاف کے مسائل ذرائع کی کمی اور دیگر انتظامی مشکلات کے باوجود پروگرام کے ٹاسک پر عمل درآمد کیا گیا، خاص طور پر رضاکار تعریف کے مستحق ہیں جنھوں نے صاف ستھرے ایتھلیٹس کے حقوق کا تحفظ یقینی بنایا، انھوں نے انٹرنیشنل اولمپک کمیٹی کو بھی سراہا جس نے نئی تکنیک کا استعمال کرتے ہوئے گیمز سے قبل ٹیسٹ کا انعقاد کیا۔

ادارے نے معلومات جمع کرتے ہوئے کھیلوں کی نئی عدالت بھی قائم کی جس کے تحت پہلی ترجیح اینٹی ڈوپنگ کیسز کو دیکھنا تھا، رپورٹ میں ریوڈی جنیرو اینٹی ڈوپنگ لیبارٹری میں بہتری کو بھی سراہا گیا جسے اولمپکس کے انعقاد سے صرف6ہفتے پہلے معطل کردیا گیا تھا۔

ایمزٹی وی(اسپورٹس) مصباح الحق نے ’’پش اپس‘‘ پر اعتراض مسترد کردیا،
تفصیلات کے مطابق گذشتہ روز شارجہ ٹیسٹ کے حوالے سے پریس کانفرنس میں کپتان مصباح الحق نے اس حوالے سے سوال پر کہا کہ اس انداز میں جشن کا مقصد حریف ٹیم کا مذاق اڑانا نہیں تھا، نہ ہی اس کے پیچھے کوئی غلط مقصد کارفرما تھا، سادہ سی بات تھی کہ کھلاڑیوں نے فٹنس بہتر بنانے کیلیے محنت کرنے والے پاکستان آرمی کے ٹرینرز سے کیا گیا وعدہ پورا کرتے ہوئے انھیں خراج تحسین پیش کیا

اس حوالے سے ان کا مزید کہنا تھا کہ کرکٹرز کے ذہن میں کوئی متنازع یا منفی سوچ نہیں تھی، کھلاڑی جس طرح بھی چاہے جشن یا خوشی منا سکتا ہے، صرف یہ بات ذہن میں رکھنا ضروری ہے کہ اس سے کھیل کی اور کسی دوسری ٹیم کی دل آزاری نہ ہو۔

کپتان نے کہا کہ پی سی بی کی طرف سے ’’پش اپس‘‘ پر پابندی کے بارے میں کوئی ہدایت ٹیم کو نہیں دی گئی، نجم سیٹھی سماجی رابطے کی ویب سائٹ پر اپنے پیغام میں اس معاملے پر واضح موقف بیان کر چکے ہیں.

واضح رہے چند روز قبل قومی اسمبلی کی قائمہ کمیٹی برائے رابطہ امور کے اجلاس میں ایک رکن رانا افضل نے انگلینڈمیں پاکستانی ٹیم کے پش اپس پر سخت اعتراض کیا تھا۔

ایمزٹی وی(اسلام آباد)نجی دورے پر گزشتہ روز اہل خانہ کے ساتھ دبئی جانے والے وزیر دفاع خواجہ آصف وطن واپس پہنچ گئے جس کے بعدتمام قیاس آرائیاں دم توڑ گئی ہیں۔
وطن واپس پہنچتے ہی خواجہ آصف کا کہنا تھا ”الحمداللہ وواپس آگیا ہوں ،اب تیرا کیا بنے گا کالیا) ۔ یاد رہے کہ خواجہ آصف عزیز کی شادی میں شرکت کے لئے گزشتہ روزاہل خانہ کے ساتھ دبئی گئے تھے۔
وزیر ملک کی سیاسی صورتحال کے تناظر میں وزیر دفاع کی اچانک دبئی روانگی کے بعد قیاس آرائیاں بھی زور پکڑ گئی تھیں تاہم ان کی واپسی کے بعد تمام افواہوں نے دم توڑ دیا ہے۔

ایمزٹی وی(اسلام آباد)قومی سلامتی کے خلاف خبر لیک ہونے کے بعد وزیر اطلاعات پرویز رشید کو عہدے سے ہٹانے کے بعد حکومت نے وفاقی وزیر ریلوے خواجہ سعد رفیق کو وفاقی وزیر اطلاعات کا قلمدان سونپنے پر غور شروع کردیا ہے ۔ذرائع کے مطابق خواجہ سعدر فیق کو وزارت اطلاعات کا اضافی چارج دئیے جانے کا امکان ہے۔

واضح رہے کہ گزشتہ روز وفاقی وزیر اطلاعات پرویز رشید کو نجی اخبار میں شائع ہونے والی متنازعہ خبر کو لیک کرنے پر عہدے سے ہٹا دیا گیا تھا ۔ مبصرین کا کہنا ہے کہ قومی سلامتی کے اجلاس کی اس خبر کے لیک ہونے کے بعد سول حکومت اور فوج کے تعلقات خراب ہو گئے ہیں جنہیں ٹھیک کرنے کے لیے حکومت کو خبر لیک کرنے والے ذمے داران کے خلاف کارروائی کرنی ہو گی ۔

ایمزٹی وی(اسلام آباد)عوامی مسلم لیگ کے سربراہ شیخ رشید احمد نے کہا ہے کہ پرویز رشید کو ہٹا کر نواز شریف نے صدقہ دیا ہے ،ابھی بھی قربانی دینا ہو گی ۔ان کا کہنا ہے کہ پرویز رشید کے ہٹنے سے نواز شریف کو ریکٹر سکیل پر 10شدت کا جھٹکا لگا ہے ۔
ایک ویڈیو پیغام میں انہوں نے کہا کہ قومی سلامتی کا راز فاش کرنے والے اپنے انجام کو پہنچیں گے ،پرویز رشید کو ہٹا کر نواز شریف نے صرف صدقہ دیا ہے ،انہیں ابھی بھی قربانی دینا ہوگی

۔ان کا کہنا تھا کہ سیاسی کفن میں سیاسی مردہ دفن ہو گا ،انشااللہ عنقریب جشن ہو گا۔شیخ رشید نے کہا کہ عدم اعتماد سے یا استعفے سے نواز شریف کا جلد صفا یا ہوگا ۔انہوں نے مزید کہا کہ عوام نکمے لوگوں کو اٹھا کر باہر پھینکیں گے ۔

ایمزٹی وی(اسلام آباد)وزیراعظم نوازشریف نے کراچی میں فائرنگ کے واقعہ کی مذمت کرتے ہوئے اس میں ملوث دہشت گردوں کو جلد از جلد کیفر کردار تک پہنچانے کا حکم دیا ہے۔

ذرائع کےمطابق وزیراعظم نوازشریف نے کراچی کے علاقے ناظم آباد میں مجلس پر فائرنگ کے واقعے کی شدید مذمت اور اس میں بے گناہ شہریوں کے جانی نقصان پر افسوس کا اظہار کیا ہے۔

وزیراعظم نوازشریف نے اپنے مذمتی بیان میں کہا کہ دہشت گردوں کو کراچی کا امن خراب نہیں کرنے دیں گے، واقعہ میں ملوث دہشت گرد کسی طور رحم کے مستحق نہیں، سنگین جرائم کا ارتکاب کرنے والے سزا سے نہیں بچ سکیں گے۔ وزیراعظم نے متعلقہ حکام کو واقعہ میں ملوث دہشت گردوں کو جلد از جلد کیفر کردار تک پہنچانے کے احکامات دیئے۔

ایمزٹی وی(اسپورٹس)پاکستان دوسرے سیمی فائنل میں ملائیشیا کو شکست دے کر ایشین ہاکی چیمینیز ٹرافی کے فائنل میں پہنچ گیا۔چوتھی ایشین مینز ہاکی چیمپئنز ٹرافی کے دوسرے سیمی فائنل نے پاکستان کو ملائیشیا کو شکست دے کر فائنل میں رسائی حاصل کرلی ہے۔

پاکستان نے پنلٹی شوٹ آوٹ پر ملائیشیا کو 2-3 سے شکست دی جب کہ فائنل میں آج پاکستان اور بھارت کے درمیان دلچسپ ٹاکرا ہوگا۔

واضح رہے پاکستان کو 2012 اور2013 میں ٹائٹل اپنے نام کرنے کا اعزاز حاصل ہے، اگر گرین شرٹس نے یہ ایونٹ بھی جیت لیا تو ٹیم فتوحات کی ہیٹ ٹرک بھی مکمل کرلے گی جب کہ بھارتی ٹیم آخری بار 2011 میں چیمپئنز ٹرافی میں گولڈ میڈل جیتنے میں کامیاب رہی تھی۔

ایمزٹی وی(اسپورٹس)پاکستان اور ویسٹ انڈیز کے دوران تیسرا ٹیسٹ آج سے کھیلا جارہا ہے،پاکستان نے ٹاس جیت کر کالی آندھی کے خلاف بیٹنگ کا فیصلہ کیا ہے۔

قومی ٹیم میں دو تبدیلیاں کی گئی ہیں، محمد عامر اور وہاب ریاض کو ٹیم میں شامل کیا گیا ہے ۔مصباح الحق انچاسویں ٹیسٹ میچ کی کپتانی کررہے ہیں اس طرح انہوں نے عمران خان کا ریکارڈ بھی توڑ دیا ہے۔عمرا ن خان نے اپنے کیریئر میں 48ٹیسٹ میچوں میں پاکستانی ٹیم کی قیادت کی تھی ۔

ایمزٹی وی(اسلام آباد)بنی گالہ میں میڈیا سے بات کرتے ہوئے عمران خان کا کہنا تھا کہ آج تین روز سے پولیس نے بنی گالہ کا محاصرہ کر رکھا ہے، نہ تو ہمارے کارکنوں کو اندر آنے دیا جا رہا ہے اور نا ہی کھانا اندر لانے کی اجازت دی جا رہی ہے، پولیس خواتین کے ساتھ بھی بدتمیزی کر رہی ہے جب کہ ہمارے کارکنوں کی جیبوں سے پیسے بھی نکالے جا رہے ہیں۔

ان کا کہنا تھا کہ نواز شریف کی کرپشن پکڑی گئی ہے اور وزیراعظم کی کرپشن سے متعلق پوچھنا میرا جمہوری اور آئینی حق ہے، حکومت نے عدالتی احکامات کے باوجود اسلام آباد کو کنٹینر لگا کر بند کر رکھا ہے، بنی گالہ کی چار دیواری کے اندر بھی سیکشن 144 نافذ کر رکھی ہے جب کہ دفاع پاکستان کونسل اور نواز شریف جلسے کرتے پھر رہے ہیں، کیا اس ملک میں ہمارے لئے الگ اور دوسروں کے لئے الگ قانون ہے، یہ میرا نہیں عدلیہ کا ٹرائل ہے۔

عمران خان کا کہنا تھا کہ قومی سلامتی کی خبر لیک کرنے پر پرویز رشید کو قربانی کا بکرا بنایا گیا ہے لیکن وہ تو درباری ہے اور بادشاہ کی اجازت کے بغیر ایک لفظ بھی نہیں بول سکتا، قوم کو گدھے کی نہیں بکرے کی قربانی چاہیئے، نواز شریف کے دن ختم ہو چکے ہیں، ایک چوہا پکڑا گیا اور اب باقیوں کی باری ہے۔ ان کا کہنا تھا کہ قومی سلامتی کی خبر لیک کر کے مغل خاندان کے افراد پاک فوج کو بدنام کرنے کے لئے وہی کام کر رہے ہیں جو نریندر مودی کر رہا ہے، نواز شریف آمریت کی پیداوار ہیں اور جنرل جیلانی نے انہیں دودھ پلا کر پالا ہے، نواز شریف کو کو جمہوریت کی اسپیلنگ بھی نہیں آتی، وہ جمہوریت کے نام پر اپنے بچوں کو اقتدار کے لئے تیار کر رہے ہیں لیکن اب ان کا اصل چہرہ قوم کے سامنے آ چکا ہے۔ خواجہ آصف کی وطن واپسی سے متعلق پوچھے گئے سوال پر عمران خان کا کہنا تھا کہ جب گیڈر کی موت آتی ہے تو وہ شہر کی طرف دوڑتا ہے۔

چیرمین تحریک انصاف نے ایک بار پھر کارکنوں کو ہر صورت بنی گالہ پہنچنے کی ہدایت کرتے ہوئے کہا کہ جب ملک جس کی لاٹھی اس کی بھینس والا قانون ہے تو کارکن جس طرح بھی ممکن ہو، رکاوٹیں ہٹاتے ہوئے کل ہی بنی گالہ پہنچیں، بنی گالہ سے ہی اسلام آباد پہنچیں گے۔ انہوں نے کہا کہ اسلام آباد ہائی کورٹ میں تو ان کے ججز پیش ہوں گے جب کہ سپریم کورٹ میں خود پیش ہوں گا۔