ایمزٹی وی(اسلام آباد) وزیر داخلہ چوہدری نثارعلی خان نے وزیراعظم نواز شریف سے ملاقات کی اور قومی سلامتی کے اجلاس کی خبر لیک ہونے پر بریفنگ دی۔
ذرائع کے مطابق وزیر داخلہ چوہدری نثار علی خان نے وزیراعظم نواز شریف سے ملاقات کی اور ملکی امور سمیت اہم قومی معاملات پر تبادلہ خیال کیا۔ اس کے علاوہ وزیر داخلہ چوہدری نثار نے وزیراعظم نواز شریف کو قومی سلامتی کمیٹی کے اجلاس کی خبر لیک ہونے کے حوالے سے انکوائری پر بریفنگ بھی دی اور انہیں یقین دہانی کرائی کہ ان کے دورہ آزربائیجان سے واپسی تک معاملے کی انکوائری مکمل کر لی جائے گی۔
واضح رہے کہ چند روز قبل وزیراعظم کی زیرصدارت ایک اعلیٰ سطح کا اجلاس منعقد ہوا جس میں قومی سلامتی کمیٹی کے اجلاس سے متعلق نجی اخبار میں شائع ہونے والی من گھڑت خبر پر تشویش کا اظہارکیا گیا۔

شرکا نے اس خبر کو رپورٹنگ کے عالمی اصولوں کی خلاف ورزی قراردیتے ہوئے کہا کہ خبرمیں غیرمستند اور گمراہ کن مواد شامل کرکے قومی سلامتی سے متعلق ریاستی مفادات کوخطرے میں ڈالا گیا۔ وزیر اعظم نے خبر کا نوٹس لیتے ہوئے ذمہ داروں کے تعین اور ان کےخلاف سخت کارروائی کی ہدایت کی۔

ایمزٹی وی(راولپنڈی)آرمی چیف جنرل راحیل شریف نے 10 دہشت گردوں کی سزائے موت کی توثیق کردی، آئی ایس پی آر کے مطابق یہ دہشت گرد معصوم شہریوں اور خواتین پولیو ورکرز کے قتل میں ملوث تھے۔

آئی ایس پی آر کا یہ بھی کہنا ہے کہ سزائے موت پانے والے دہشت گرد پولیس آفیشل اور مسلح افواج کے اہلکاروں کے قتل میں بھی ملوث تھے

ایمزٹی و(اسلام آباد)دنیا کے 118بھوکے ترین ممالک کی فہرست جاری کر دی گئی ہے جس میں پاکستان کا 107واں نمبر ہونے کا انکشاف ہو اہے۔

رپورٹ کے مطابق” 2016ءگلوبل ہنگر انڈیکس“کے سروے میں انکشاف کیا گیا ہے کہ پاکستان میں 22فیصد عوام کو ضرورت سے بھی کم غذا میسر ہے اوربھوک پر قابو پانے کیلئے دیگر ایشائی ممالک کی نسبت پاکستان کی کارکردگی انتہائی خراب ہے ۔

انڈیکس میں بھوکے ممالک کی کارکردگی کا موازنہ صفر سے 100پوائنٹس کی بنیا د پر کیا گیا تھا جس میں سے پاکستان کو 33.4پوائنٹس دیے گئے ہیں تاہم 2008 ءمیں بھوک پر ہونے والے سروے میں پاکستان کے 35.1پوائنٹس تھے ۔

دنیا کے بھوکے ترین ممالک میں بھارت کو97، افغانستان 111اور چین کم ترین بھوک کے سطح کے ساتھ 29ویں نمبر پر رکھا گیا ہے ۔
فہرست کے مطابق تنزلی کی موجودہ شرح کے لحاظ سے2030 ءمیں پاکستان ، ہیٹی ، یمن ، افغانستان اور بھارت سمیت 45سے زائد ممالک میں بھوک کی صورت حال مزید خطرناک ہو جائے گی ۔

ایمز ٹی وی (صحت)آنکھوں کے نیچے سیاہ حلقے آپ کی شخصیت کا ایک برا تاثر چھوڑتے ہیں۔ یہ آپ کی غیر صحت مند طرز زندگی کو ظاہر کرتے ہیں۔ مرد و خواتین دونوں ہی اس سے متاثر ہوتے ہیں۔
ایک عام خیال یہ ہے کہ یہ عموماً نیند کی کمی کی وجہ سے ہوتے ہیں۔ یہ خیال کسی حد تک درست بھی ہے، لیکن اس کے علاہ بھی اس کی کئی وجوہات ہیں۔ آئیے پہلے ان وجوہات کو جانتے ہیں۔
:نیند کی کمی

ہر شخص کے لیے 8 گھنٹے کی نیند از حد ضروری ہے۔ اگر نیند پوری نہیں ہوگی تو سب سے پہلے آنکھوں کے نیچے حلقے ظاہر ہونا شروع ہوتے ہیں۔ اس کے بعد یہ آپ کی دماغی صحت کو متاثر کرنا شروع کرتی ہے اور آپ چڑچڑاہٹ اور تھکن کا شکار ہوجاتے ہیں۔
ان تمام مسائل سے بچنے کا حل یہ ہے کہ تمام کام وقت پر مکمل کیے جائیں اور جلدی سویا اور جلدی اٹھا جائے تاکہ نیند پوری ہوسکے
:ذہنی تناؤ

مستقل ذہنی تناؤ میں مبتلا رہنے کے باعث آپ کی نیند بھی متاثر ہوتی ہے اور یہ آپ کی آنکھوں کے نیچے سیاہ حلقوں کا سبب بھی بنتا ہے 

پانی کی کمی:آنکھوں کے نیچے حلقوں کی ایک اہم وجہ پانی کی کمی ہے۔ دن میں 8 گلاس پانی پینا مختلف جسمانی مسائل سے محفوظ رکھتا ہے۔

ہارمونز میں تبدیلی:
جسم میں مختلف اقسام کی ہارمونل تبدیلیاں بعض اوقت جسم پر منفی اثرات بھی مرتب کرتی ہیں جن میں سے ایک آنکھوں کے نیچے سیاہ حلقے ہونا ہے

سیاہ حلقے ختم کرنے کے لیے تجاویز:
آنکھوں کے نیچے سیاہ حلقے ختم کرنے کے لیے سب سے پہلے تو نیند پوری کریں۔
جسم میں پانی کی کمی نہ ہونے دیں۔
کمپیوٹر، موبائل اور ٹی وی کا استعمال کم کریں۔ ان سے نکلنے والی نیلی روشنی آنکھوں کے لیے بے حد نقصان دہ ہے۔
متوازن غذا کا استعمال کریں۔ آنکھوں کے لیے مفید غذائیں جیسے گاجر، کھیرا وغیرہ کا استعمال بڑھا دیں۔
آنکھوں کے سیاہ حلقے ختم کرنے کے لیے کھیرا سب سے بہترین نسخہ ہے۔ کھیرے کے ٹکڑے کاٹ کر آنکھوں پر رکھیں۔ اس سے نہ صرف آنکھوں کے حلقے ختم ہوں گے بلکہ آنکھوں کی چمک میں بھی اضافہ ہوگا۔ایک اور ترکیب ٹی بیگز استعمال کرنے کی ہے۔ ٹی بیگز کو پانی میں بھگو کر فریج میں رکھ دیں۔ ٹھنڈا ہونے پر آنکھوں پر رکھیں۔ اس کے باقاعدہ استعمال سے آپ کو واضح فرق نظر آئے گا۔

آفس میں کمپیوٹر پر کام کرنے کے دوران ہر 20 منٹ بعد 20 سیکنڈ کے لیے اسکرین سے نظر ہٹا کر 20 فٹ دور دیکھیں۔ یہ آنکھوں کے تمام مسائل کے ایک بہترین ورزش ہے۔

فرصت کے اوقات میں دونوں ہتھیلیوں کو رگڑ کر گرم کریں اور انہیں اپنی آنکھوں پر رکھیں۔ اس سے آپ کی آنکھوں کی تھکن دور ہوجائے گی۔

ایمز ٹی وی ( تعلیم) اعلیٰ ثانوی تعلیمی بورڈ کراچی کے ناظم امتحانات محمد عمران خان چشتی نے انٹرمیڈیٹ کے تمام گروپس کیلئے ضمنی امتحانات برائے 2016 کے امتحانی فارمز جمع کروانے کی تاریخوں کااعلان کردیا ہے۔

محمد عمران خان چشتی نے بتایا کہ پروگرام کے مطابق سائنس پری میڈیکل،پری انجینئرنگ،سائنس جنرل، کامرس ریگولر،کامرس پرائیویٹ،آرٹس ریگولر،آرٹس پرائیویٹ اور ہوم اکنامکس گروپس سمیت امپروومنٹ آف ڈویژن،بینیفٹ کیسز اورایڈیشنل سبجیکٹس کے ضمنی امتحانات برائے 2016 میں شرکت کے خواہشمند اور اہل ریگولر امیدوار اپنے امتحانی فارم 24 اکتوبر تک اپنے متعلقہ کالجوں میں جمع کرواسکتے ہیں ۔

جبکہ پرائیویٹ امیدوار امتحانی فارم ضروری تصدیق کے بعد انہی تاریخوں میں بورڈ میں واقع بینک برانچ میں جمع کرواسکتے ہیں۔