کراچی: جناح سندھ میڈیکل یونیورسٹی نے بلوچستان سے آنے والے پبلک ہیلتھ کےطلباءکےاعزازمیں استقبالیہ دیا۔

یہ طلباء یو ایس ایڈ کے تعاون سے ایپنا انسٹیٹیوٹ آف پبلک ہیلتھ کے ماسٹرز ان پبلک ہیلتھ پروگرام کے لیے منتخب کیے گئے ہیں۔

صوبائی وزیر برائے جامعات اور بورڈز اسماعیل راہو نے اس موقع پر خطاب کرتے ہوئے یو ایس ایڈ کی مدد سے اس خصوصی پروگرام کے شرکاء طلبہ وطالبات کو خوش آمدید کہا اور پبلک ہیلتھ کے حوالے سے ان کی تربیت کو ملک میں صحت کے شعبے میں ایک اہم قدم قرار دیا۔

امریکی قونصل جنرل مارک سٹرو نے کہا کہ کرونا وبا کے دور میں پبلک ہیلتھ اور باہمی تعاون کی ضرورت دوچند ہو گئی ہے، مجھے پاکستانی پبلک ہیلتھ ماہرین کے ساتھ ان کے ادارے کی وابستگی پر فخر ہے۔

جے ایس ایم یو کےوائس چانسلر پروفیسر شاہد رسول نے تمام مہمانوں کو خوش آمدید کہتے ہوئے کہا کہ یہ پروگرام بین الصوبائی تعاون کی بہترین مثال ہے۔

ایپنا انسٹیٹیوٹ آف پبلک ہیلتھ کی سربراہ پروفیسر لبنیٰ انصاری بیگ نے اس عزم کا اعادہ کیا کہ مشترکہ پروجیکٹس کے ذریعے پبلک ہیلتھ کے شعبے میں ملکی ماہرین کی استعداد بڑھانا ان کے ادارے کے مشن کا حصہ ہے۔

تقریب سے بلوچستان کے پرائمری اور سیکنڈری ہیلتھ کئیر ڈپارٹمنٹ سیکرٹری عزیز احمد جمالی، جان سنو انکارپوریٹڈ سے بابر تسنیم شیخ، ویمن یونیورسٹی سکھر کی وائس چانسلر پروفیسر ثمرین حسین نے بھی خطاب کیا۔تقریب کی نظامت پروگرام ڈائریکٹر زعیمہ احمر نے کی۔

کراچی: سر سید یونیورسٹی آف انجینئرنگ اینڈ ٹیکنالوجی کے سینٹر فار گائیڈنس، کیریئر پلاننگ اینڈپلیسمنٹ کے زیرِ اہتمام لیڈر شپ ڈیولپمنٹ اور نیشن بلڈنگ کے موضوع پر ایک سیشن کا اہتمام کیا گیا جس میں سری لنکا میں تعینات پاکستان کے سابق سفیرمیجر جنرل (ر) محمد سعد خٹک نے زیرِگفتگو موضوع پر اپنے خیالات کا اظہار کیا ۔

اس موقع پر خطاب کرتے ہوئے میجر جنرل (ر) محمد سعد خٹک نے کہا کہ پاکستان ایک نظریاتی ملک ہے مگر ہم بعض وجوہات کی بناء پر اپنی اقدار اور ترجیحات سے روگردانی کر رہے ہیں ۔ تقدیر پر سے ہمارا اعتماد اٹھ گیا ہے ۔

انھوں نے کہا کہ آدمی کو وہی کام کرنا چاہئے جو وہ ٹھیک طریقے سے کرسکتا ہے ۔ ہر کام ہر آدمی نہیں کرسکتا ۔ ہماری لیڈشپ نے نوجوانوں کو بہت مایوس اور نا امید کیا ہے ۔ وہ اپنے مستقبل کے بارے میں غیریقینی کا شکار ہیں ۔ ہمارا قومی المیہ یہ ہے کہ ہم تعلیم پر تو توجہ دیتے ہیں مگر تربیت کو نظرانداز کردیتے ہیں جو کہ انتہائی اہم ہے ۔ یہی وجہ ہے کہ اچھی لیڈر شپ کا فقدان ہے ۔ ہم نے دنیا ہی کو اپنا سب کچھ سمجھ لیا ہے اور ہماری خواہشات بہت زیادہ ہو گئی ہیں ۔ شخصیت سازی کہاں سے ہوگی ۔

سرسیدیونیورسٹی کے وائس چانسلرپروفیسر ڈاکٹر ولی الدین نے کہاکہ ایسے وقت جب برصغیر کے مسلمان سخت مایوسی کی شکار تھے اوربہت ابتر حالت میں تھے، ترقی کے تمام دروازے ان پر بندہوچکے تھے، ایسے میں سرسید احمد خان نے ایک ایسے ادارے کی بنیاد رکھی جہاں مسلمانوں کو تعلیم اور تربیت دونوں ملیں ۔

علیگڑھ مسلم یونیورسٹی کے طلباء نے برصغیرکی کی تاریخ بدل دی اور قیام پاکستان کا سبب بنے ۔سرسیدیونیورسٹی کے رجسٹرار سرفراز علی نے مہمان مقرر کا تعارف پیش کرتے ہوئے کہا کہ میجر جنرل (ر) محمد سعد خٹک نے پینتیس سال تک ملک کے اندر اوربیرونِ ملک مختلف نوعیت کی خدمات انجام دیں ۔

بلوچستان، خیبر پختونخواہ، فاٹا اور اسلام آباد راولپنڈی میں سینئر عہدوں پرفائز رہے ۔ فرنچ آرمی جونیئراسٹاف کورس، ڈیفنس انٹیلیجنس ڈائریکٹر کورس، برطانیہ، کمانڈ اینڈ اسٹاف کالج کوئٹہ اور نیشنل ڈیفنس یونیورسٹی اسلام آباد سے فارغ التحصیل ہیں ۔ میڈیا میں سیکوریٹی کے ماہر کی حیثیت سے شریک ہوتے ہیں۔