کراچی: جامعہ کراچی میں پہلی مرتبہ ایم فل،پی ایچ ڈی،ایم ایس اورایم ڈی کےداخلوں کامرحلہ انٹرپرائزریسورس پلاننگ سسٹم(ای آرپی سسٹم)کےذریعہ مکمل ہوگیا ہے۔

ایم فل، پی ایچ ڈی داخلوں کے حوالے سے اجلاس منعقد کیا گیا۔ اجلاس سے خطاب کرتےہوئےای آرپی کمیٹی کے کنوینر ڈاکٹر عمران صدیقی نے کہا کہ پاکستان میں سرکاری جامعات کی اکثریت اپنے روزمرہ کے اموردستی نظام کے تحت سرانجام دیتی ہیں لیکن جامعہ کراچی ملک کی ان چند جامعات میں سے ہوگی جو عصر حاضرکے جدید تقاضوں سے ہم آہنگ جدید ٹیکنالوجی کو بروئے کار لاتے ہوئے ای آرپی سسٹم پر عملدرآمد کو یقینی بنارہی ہے اور اگلے مرحلے میں جامعہ کراچی کے دیگر شعبہ جات کو بھی ای آرپی سسٹم پر منتقل کردیا جائے گا۔

انہوں نے مزید کہا کہ مذکورہ نظام کے تحت کمپیوٹرائزڈ رول نمبر اور اسمارٹ کارڈ کے اجراء، طلباوطالبات کی حاضری، فیس کی ادائیگی اور امتحانات کے انعقاد کا کام تیزی سے مکمل ہوگابلکہ والدین کو بذریعہ ایس ایم ایس طلباء کی حاضری سے بھی باخبر رکھا جا سکے گا۔مذکورہ سسٹم سے طلباء کا امتحانی ریکارڈ باآسانی مہیا ہو سکے گا، نتائج بر وقت مرتب ہوں گے اور والدین کو امتحان میں اپنے بچوں کی کارکردگی آن لائن دستیاب ہوگی۔ سمارٹ سسٹم سے حاضری کا خود کار ڈیٹا مرتب ہوگا جس کی اطلاع والدین کو بھی ہوگی۔فیس واؤچر گھر بیٹھے حاصل کئے جا سکیں گے اورکسی ناگہانی صورت حال سے نمٹنے کیلئے طلباء کا بلڈ گروپ، گھر کا پتہ اور والدین کا رابطہ نمبر بھی سمارٹ کارڈ میں موجود ہوگا۔

اجلاس کے شرکاء کو بتایا گیا کہ شیخ الجامعہ پروفیسر ڈاکٹر خالد محمود عراقی کی ذاتی دلچسپی کی وجہ سے کلیہ قانون کی نئی عمارت کی تعمیر کے لئے سوائل ٹیسٹنگ کاکام شروع ہوچکا ہے اور عید کے بعد تعمیراتی کام کا آغاز ہوجائے گا۔ جامعہ کراچی کے ایک دیرینہ منصوبے جس کے تحت جامعہ کراچی میں ٹیچنگ اسپتال کا قیام عمل میں لانا ہے کو عملی جامہ پہنانے کے لئے وفاقی اور صوبائی حکومت کے ساتھ ساتھ پبلک پرائیوٹ پارٹنرشپ پر غورکرنا بھی شامل ہے۔

جامعہ کراچی وسائل کی کمی کے باوجود پائیدار اور دیرپامنصوبوں کو پایہ تکمیل تک پہنچانے کے لئے کوشاں ہے جامعہ کراچی کے اساتذہ اور غیر تدریسی عملے کی سہولت کے پیش نظر بہت جلد ایک معیاری اسکول اور اسٹیٹ آف دی آرٹ ڈے کیئرسینٹر کا قیام عمل میں لایاجائے گا۔

کراچی: بین الاقوامی مرکز برائے کیمیائی و حیاتیاتی علوم (آئی سی سی بی ایس) جامعہ کراچی میں ایم فل اور پی ایچ ڈی پروگرام برائے 2021ء کے تحت اتوار (18جولائی(کو داخلہ ٹیسٹ کا انعقاد کیا جائے گا۔

داخلہ ٹیسٹ اور انٹرویو میں کامیاب امیدواروں کو جامعہ کراچی کے بین الاقومی شہرت یافتہ تحقیقی ادارے ڈاکٹر پنجوانی سینٹر برائے مالیکیو لر میڈیسن اور ڈرگ ریسرچ (پی سی ایم ڈی) اور ایچ ای جے ریسرچ انسٹی ٹیوٹ آف کیمسٹری میں داخلہ دیا جائے گا۔

آئی سی سی بی ایس جامعہ کراچی کے ترجمان کے مطابق ٹیسٹ کا آغاز صبح 10 بجے بین الاقوامی مرکز کے پروفیسر سلیم الزماں صدیقی آڈیٹوریم اور ایل ای جے نیشنل سائنس انفارمیشن سینٹر جامعہ کراچی میں ہوگا۔ اعلیٰ تعلیمی پروگرام کے سینکٹروں اُمیدوار تحریری اور زبانی امتحان میں شرکت کریں گے، یہ پروگرام مختلف کلیات میں وضع کیا گیا ہے جس میں نامیاتی کیمیاء، تجزیاتی کیمیاء، طبعیاتی کیمیاء، غیر نامیاتی کیمیاء، حیاتی نامیاتی کیمیاء، فارماکولوجی، اور مالیکیولر میڈیسن شامل ہیں۔

ٹیسٹ کا آغاز صبح دس بجے ہوگا جبکہ اُمیدواروں کو ایڈمٹ کارڈ اور قومی شناختی کارڈ کے ہمراہ 9 بجکر20 منٹ پر آئی سی سی بی ایس جامعہ کراچی میں رپورٹ کرنا ہوگا، داخلہ امتحانی نتائج کا اعلان25جولائی کو بین الاقوامی مرکز اور جامعہ کراچی کی آفیشل ویب سائٹ پر کیا جائے گا، جبکہ فائنل میرٹ لسٹ کا اعلان بھی جلد کیاجائے گا۔

اُمیدواروں کی سہولت کے لیے جامعہ کراچی کے مسکن گیٹ اور کیمپس گیٹ (نزد شیخ زید اسلامک سینٹر) سے آئی سی سی بی ایس جامعہ کراچی تک صبح9بجےسے ساڑھے9بجے تک شٹل بس چلائی جائے گی جبکہ ٹیسٹ کے بعد اسی روٹ پر دوپہرایک بجے سے ڈیڑھ بجے تک یہی سروس روانگی کے لیے چلائی جائی گی۔

کراچی: سندھ مدرستہ الاسلام یونیورسٹی (ایس ایم آئی یو) اور بلوچستان یونیورسٹی آف انجینئرنگ اینڈ ٹکنالوجی (بی یو ای ٹی) خضدار نے دونوں یونیورسٹیز کے درمیان تعلقات کو مستحکم کرنے کے لئے مفاہمت کی یادداشت پر دستخط کردیے ہیں۔

ایس ایم آئی یو کے وائس چانسلر پروفیسر ڈاکٹر مجیب الدین صحرائی میمن اوبلوچستان یونیورسٹی آف انجینئرنگ اینڈ ٹکنالوجی (بی یو ای ٹی) خضدار کے وائس چانسلر ڈاکٹر احسان اللہ خان کاکڑ نے معاہدے کی یاداشت پر دستخط کیے۔

بلوچستان یونیورسٹی آف انجنیئرنگ اینڈ ٹیکنالوجی کے وائس چانسلر ڈاکٹراحسان اللہ کاکڑ نے یونیورسٹی کے مختلف حصوں کا دورہ کیا اور جامعہ کے فن تعمیر، تعلیمی ماحول کی تعریف کی۔ انہوں نے کہا کہ پاکستان کے تاریخی ادارے کا دورہ کرنا ان کیلئے ایک اعزاز کی بات ہے۔ اس ادارے کا پاکستان کی تعمیر میں تمام اہم کردار رہا ہے۔

دستخط کی تقریب میں ایس ایم آئی یو کے ڈینز جن میں ڈاکٹر پروفیسر آصف علی سید، پروفیسر ڈاکٹر زاہد علی چنڑ، پروفیسر ڈاکٹر جمشید عادل ، پروفیسر ڈاکٹر آفتاب احمد اور رجسٹرار غلام مصطفیٰ شیخ بھی شامل تھے جبکہ بلوچستان یونیورسٹی آف انجنیئرنگ اینڈ ٹیکنالوجی خضدار کے حامد طارق اور اسلم زیب نے بھی موجود تھے۔

ایم او یو کے مطابق ، دونوں ادارے مشترکہ طور پر تعلیم، تربیت اور تحقیقی سرگرمیوں میں ایک دوسرے کے ساتھ تعاون کریں گے اور طلباء اور فیکلٹی اراکین کی تربیت کے لئے بھی مناسب انتظامات کریں گے۔

کراچی: بین الاقوامی مرکز برائے کیمیائی و حیاتیاتی علوم (آئی سی سی بی ایس) جامعہ کراچی کے سربراہ اور کامسٹیک کے کوارڈینیٹر جنرل پروفیسر ڈاکٹر محمد اقبال چوہدری نے کہا ہے کہ ڈاکٹر پنجوانی سینٹر برائے مالیکیولر میڈیسن اور ڈرگ ریسرچ، جامعہ کراچی کے تحت چلنے والے نیشنل انسٹی ٹیوٹ آف وائرولوجی کے ماہرین نے مزید65 ڈیلٹا ویرینٹ کی موجودگی کا انکشاف کیا ہے، بھارت میں تباہی پھیلانے والے ڈیلٹا ویرینٹ کی سندھ میں موجودگی پہلے ہی تحقیق سے ثابت ہوچکی ہے۔

یہ بات انہوں نے جمعرات کو ڈاکٹر پنجوانی سینٹر میں ایک اجلاس کی صدارت کے دوران کہی۔ پروفیسر اقبال چوہدری نے کہا کہ نیشنل انسٹی ٹیوٹ آف وائرولوجی نے صرف دو دنوں میں یعنی12تا13جولائی کے دوران شعبہئ صحت سندھ سے ملنے والے2062نموے ٹیسٹ ہوئے جن میں سے تقریبا94 مثبت نمونوں کی جینوٹائپنگ سے معلوم ہوا کہ ان میں 65 ڈیلٹا ویرینٹ، دو ساوتھ افریقی ویرینٹ،25 نامعلوم ویرینٹ اور جبکہ دو وائلڈ ٹائپ ویرینٹ ہیں۔ انہوں نے کہا کہ 25 نامعلوم ویرینٹ کو بھی ڈیلٹا ویرینٹ سمجھا جاسکتا ہے۔

۔ انہوں نے کہا بھارت میں تباہی پھیلانے والے ڈیلٹا ویرینٹ کی سندھ میں موجودگی تحقیق سے ثابت ہے، یہ ڈیلٹا ویرینٹ شہر کے مختلف علاقوں میں مشخص ہوئے ہیں۔ انہوں نے کہا نیشنل انسٹی ٹیوٹ آف وائرولوجی کے ماہرین کراچی شہر میں اس وائرس کے پھیلاو کا مسلسل مشاہدہ کر رہے ہیں۔

انہوں نے کہا گزشتہ دنوں بھی جینوٹائپ کیے گئے نمونوں میں سے15فیصد نمونے ڈیلٹا ویرینٹ کے پائے گئے تھے۔ پروفیسر اقبال چوہدری نے شہریوں کو آگاہ کیا کہ وہ احتیاطی تدابیر کا دامن ہاتھ سے نہ چھوڑیں، شہر میں اس خطرناک ویرینٹ کے پھیلاو کو روکنے کے لیے خصوصی احتیاطی تدابیر اختیار کرنے کی فوری ضرورت ہے۔

اس ویرینٹ کی نمایاں خصوصیات میں مرض کا تیزی سے پھیلنا، مرض کی شدت، گزشتہ انفیکشن یا ویکسین سے پیدا شدہ اینٹی باڈیز کا خاتمہ جبکہ علاج اور ویکسین کی تاثیر کوکم کرنا شامل ہے۔ واض رہے کہ متعلقہ ویرینٹ اکتوبر2020ء میں بھارت میں مشخص ہوا تھا۔ انہوں نے کہا اگر احتیاطی تدابیر پر عمل نہیں کیا گیا تو متعلقہ وائرس بہت طاقتور ہے جو بہت مختصر وقت میں ملک کی بڑی آبادی کو اپنی لپیٹ میں لے سکتا ہے۔