ایمزٹی وی(آزاد کشمیر)آزاد کشمیر کے علاقے دھیر کورٹ میں مسلم لیگ (ن) کے ورکرز کنونشن کی تقریب سے خطاب کرتے ہوئے وزیراطلاعات پرویز رشید نے کہا کہ عمران خان اور طاہر قادری 2018 تک دھرنے دیتے رہیں لیکن ان کا ترقی کا سفر روکنے کا خواب پورا نہیں ہوگا جب کہ عمران خان اورطاہر القادری بار بار ملک سےغداری کے مرتکب ہورہے ہیں۔ انہوں نے کہا کہ پاکستان دنیا کے بہترین معیشت والے ممالک میں شامل ہورہا ہے جب کہ ملک دشمن عناصر قادری اورعمران کے ذریعے ملکی ترقی پرحملہ آور ہوتے ہیں۔ پرویز رشید کا کہنا تھا کہ عوام کی خدمت مسلم لیگ (ن) کے منشور کا حصہ ہے اور اپنے منشور پرعمل کرکے کشمیر کو حقیقی معنوں میں جنت نظیر بنائیں گے۔ انہوں نے مسلم لیگ (ن) میں شامل ہونے والوں کو خوش آمدید کہتے ہوئے کہا کہ ماضی میں مسلم کانفرنس اور پیپلز پارٹی کی حکومتیں رہیں لیکن دونوں پارٹیوں کی قیادت نہیں بتاسکتی کہ آزاد کشمیر کےعوام کی زندگی میں کیا تبدیلی آئی جب کہ مسلم لیگ (ن) کی حکومتوں نے عوامی فلاح کے اقدامات کئےجائیں گے۔

ایمزٹی وی(آزادکشمیر)وزیراعظم آزادکشمیر چوہدری عبدالمجیدنےحلقہ انتخاب میں مختلف مقامات پر عوامی اجتماعات سے خطاب کرتے ہوئےکہا کہ آزادکشمیر کے انتخابات اہمیت کے حامل ہیں،تحریک آزادی کے بیس کیمپ میں آزادانہ ومنصفانہ اور غیر جانبدارانہ انتخابات کا انعقاد ناگزیر ہے ، آزادکشمیر انتخابات فوج کی نگرانی میں کرائے جائیں، اس حوالے سے وفاقی حکومت کی بھی کچھ ذمہ داریاں ہیں مگر وہ اپنی ذمہ داریاں پوری کرنے کے بجائے ن لیگ کی حکومت قائم کرنے کے لئے پری پول رگنگ کررہی ہے ،جعلی اسکیموں اور ہوائی اعلانات کے ذریعے عوامی رائے پر اثر انداز ہورہی ہے ،وفاقی وزراء کو معلوم ہونا چاہئے کہ آزادکشمیرگلگت بلتستان نہیں ، یہاں پرکسی کو ڈرامہ اسٹیج نہیں کرنے دیں گے ،وفاقی وزراء کے یہاں من پسند حکومت قائم کرنے کے عزائم ناکام بنائیں گے ان کا مزید کہنا تھاکہ اقتدار پیپلزپارٹی کا کبھی مقصد نہیں رہا اقتدارخدمت خلق کا ذریعہ ہے 2016کے انتخابات میں کلین سویپ کریں گے اور ریت کے پہاڑ ریزہ ریزہ ہوں گے ،جعلی اور ہوائی اعلانات دھوکہ نہیں دے سکتے،عوام کو دھوکہ دینے والے ان مفاد پرست سیاستدانوں کی ضمانتیں ضبط کرائیں گے ۔ اس موقع پرپیپلزپارٹی کے ضلعی صدر چوہدری مشتاق ،تحصیل صدر ندیم روپیال،سابق مشیر فارو ق زرگر،سوار خان،ناظم حسین،قاضی محمود ،قاسم مجید اوریاسر ممتاز بھی نے بھی خطاب کیا۔

ایمزٹی وی(کراچی) پیپلزپارٹی کے چیرمین بلاول بھٹو زرداری نے ایک بار پھر مسلم لیگ (ن) کو اپنی تنقید کا نشانہ بناتے ہوئے پرویز رشید اور خورشید شاہ کی تصویر بھی اپنے ٹوئٹر اکاؤنٹ پر پوسٹ کی ہے جب کہ ان کا کہنا ہےکہ وزیراعظم اور ان کے خاندان کو احتساب کے عمل سے گزرنا ہوگا۔

پیپلزپارٹی کے چیرمین بلاول بھٹو زرداری نے حکمران جماعت مسلم لیگ (ن) کو اپنے نشانے پر رکھا ہوا ہے جہاں وہ ایسے میں مسلم لیگ (ن) پر تنقید کا کوئی بھی موقع ہاتھ سے جانے نہیں دیتے، جلسے جلوس میں بھی بلاول بھٹو زرداری نہ صرف حکمران جماعت کو نشانہ بناتے ہیں بلکہ وزیراعظم نوازشریف پر بھی کڑی تنقید کرتے ہیں جب کہ پاناما لیکس کے معاملے پر وہ وزیراعظم سے کئی بار استعفے کا مطالبہ بھی کرچکے ہیں۔ اب کی بار اپنی ایک تازہ ٹوئٹ میں بلاول بھٹو نے (ن) لیگ پر تنقید کے نشتر برسادیئے ہیں۔

سماجی رابطے کی ویب سائٹ ٹوئٹر پر بلاول بھٹو زرداری نے وفاقی وزیر اطلاعات پرویز رشید اور خورشید شاہ کی ایسی تصویر پوسٹ کی ہے جس میں پرویز رشید اپوزیشن لیڈر خورشید شاہ سے جھک کر مل رہے ہیں۔ اپنی ٹوئٹر پوسٹ پر بلاول بھٹو نے ہیش ٹیگ میں مسلم لیگ (ن) کو ’’ناکام لیگ‘‘ کا نام دیتے ہوئے کہا ہے کہ جب یہ لوگ مشکل میں ہوتے ہیں تو پاؤں پکڑتے ہیں اور جب مشکل سے نکلتے ہیں تو گلا پکڑتے ہیں۔

اپنے ایک بیان میں بلاول بھٹو کا کہنا تھا کہ حکومت پاناما لیکس پر اِدھر اُدھر ہونا بند کرے اور بلا تاخیراپوزیشن کے مجوزہ ٹی او آرز قبول کرے کیونکہ پاناما لیکس سے فرار کا کوئی راستہ نہیں ہے۔ انہوں نے کہا کہ حکومت ٹی او آرز پر ہٹ دھرمی سے اپنے پاؤں پر کلہاڑی ماررہی ہے اور اپوزیشن کو اجلاس سے بائیکاٹ پر بھی مجبور کررہی ہے، ہم اس معاملے کو انجام تک پہنچانے کے لیے اپوزیشن کو ساتھ لے کر چلیں گے۔ چیرمین پیپلزپارٹی نے کہا کہ احتساب کے سوا وزیراعظم کے پاس کوئی اور راستہ نہیں، انہیں اور ان کے خاندان کو احتساب کے عمل سے گزرنا ہوگا جب کہ ملک میں کرپشن کے معاملے کو سب کے لیے حل کرنا ہوگا۔

دوسری جانب بلاول بھٹو کے اس بیان اور تصویر پر مسلم لیگ (ن) کے رہنما طلال چوہدری کا کہنا تھا کہ بلاول بھٹو کے اس طرح کے بیانات سے ہیڈ لائن تو بن سکتی ہے لیکن وہ خود لیڈر نہیں بن سکتے

ایمزٹی وی(آزادکشمیر)نیوسٹی اسلام گڑھ میں پارٹی کارکنوں سے خطاب کرتے ہوئےوزیر اعظم آزادکشمیر چوہدری عبدالمجید نے کہاکہ مخالفین کو اندازہ ہو گیا پیپلز پارٹی دوبارہ حکومت بنانے جا رہی ہے ،مخالفین کی سازشیں اور گٹھ جوڑہمارا راستہ نہیں روک سکتے ، اقتدار پرستوں کے عزائم ناکام اور تمام ارمان ادھورے رہیں گے ،عوام نے وفاقی وزراء کی منفی سیاست کو مسترد کر دیا ،انھوں نے آزادکشمیر کو گلگت بلتستان سمجھ لیا تھا ، وفاقی وزراء کے ہوائی اعلانات پیپلز پارٹی کا راستہ نہیں روک سکتے وزیر اعظم نے کہا کہ پیپلز پارٹی عقیدے اور نظیر یہ کی سیاست کر رہی ہے ، ہارس ٹریڈنگ کی سیاست پر لعنت بھیجتے ہیں،دریں اثنا ء چکسواری میں افطارپارٹی سے خطاب کرتے ہوئے انہوں نے کہا کہ عوام کے حقوق پر کبھی کمپرو مائز نہیں کیا ،کسی کی غیر قانونی بات مانوں گا نہ کوئی ڈکٹیشن قبول کروں گا، سیاسی سوداگروں نے میرے خلاف جو گٹھ جوڑ بنا رکھے ہیں عوام کی طاقت سے ریت کے ان بتوں کو ریزہ ریزہ کر دیں گے ،جب تک زندہ ہوں عوام کی خدمت کرتا رہوں گا ہماری موجودگی میں کوئی مائی کا لعل عوامی حقوق پر شب خون نہیں مار سکتا ۔ اس موقع پر سابق ایڈ منسٹریٹر ضلع کونسل چوہدری مشتاق احمد ، سابق چیئر مین چوہدری سوار خان ، سابق ایڈ منسٹریٹر چوہدری خالد حسین ، پیپلز پارٹی کے مرکزی رہنما ندیم روپیال ، سابق ممبر ضلع کونسل چوہدری ناظم حسن اور دیگر بھی موجود تھے

ایمز ٹی وی(کراچی) ایم کیو ایم کے رہنما ڈاکٹر فاروق ستار کا کہنا ہے کہ سندھ کا نئے مالی سال کا بجٹ عوام دشمن ہے جس میں شہری علاقوں کو مکمل طور پر نظرانداز کیا گیا ہے۔

متحدہ قومی موومنٹ کے رہنما ڈاکٹرفاروق ستار نے کہا کہ سندھ کا نئے مالی سال کا بجٹ عوام دشمن ہے جس میں شہری علاقوں کومکمل نظرانداز کیا گیا ہے۔ انہوں نے کہا کہ سندھ حکومت کے اس عمل کے خلاف ایم کیوایم بھرپورعوامی احتجاجی کرے گی جب کہ عوام کے ساتھ وفاق اورسندھ میں ایک جیسا سلوک حیرت انگیز ہے۔

ڈاکٹر فاروق ستار کا کہنا تھا کہ ایم کیو ایم حکومت کی تجاویز آنے کے بعد سائیں سرکار کو مجبور کرے گی کہ وہ اپنی غلط پالیسیوں سے عوام کا جینا حرام نہ کریں اور اگر حکومت عوام کو ریلیف فراہم نہیں کرسکتی تو اپنی غلط پالیسیوں سے ان پرمزیدعذاب مسلط نہ کریں۔ انہوں نے کہا کہ سندھ کے شہری علاقوں کے ساتھ رواں مالی سال کا بجٹ اعداد وشمار کا گورکھ دھندا ہے جسے ایم کیوایم مسترد کرتی ہے

ایمز ٹی وی(کراچی) سندھ اسمبلی میں قائد حزب اختلاف خواجہ اظہار الحسن نے كہا ہے كہ سندھ حكومت کسی خوش فہمی میں نہ رہے یہ سال ان کے لیے اچھا نہیں ہوگا۔

ایم کیوایم کی پارلیمانی پارٹی کے اجلاس کے بعد سندھ اسمبلی کے باہر میڈیا سے بات کرتے ہوئے اپوزیشن لیڈر خواجہ اظہار الحسن نے کہا کہ صوبائی بجٹ سن كراپنا ردعمل دیں گے اور اس میں یہ دیكھیں گے كہ عوام كے لیے كیا كچھ ہے، اگر سندھ بجٹ میں عوام كے ریلیف كے لیے كوئی اعلان نہ ہوا تو بھرپوراحتجاج كریں گے۔ انہوں نے کہا کہ سندھ حكومت خوش فہمی اور خوش گپیوں میں مصروف ہے اورسب اچھا ہے كا راگ الاپ رہی ہے لیكن انہیں یہ اندازہ نہیں كہ رواں سال ان کے لیے اچھا نہیں ہوگا یہ سال ان کے لیے مشکل ترین ہوگا۔ ان کا کہنا تھا کہ سندھ حکومت کسی خوش فہمی میں نہ رہے، چراغ سب کے بجھیں گے کیونکہ ہوا کسی کی نہیں ہے۔

خواجہ اظہار الحسن کا کہنا تھا کہ ہرمحكمہ كا وزیركرپشن كا سردارہے، پیپلزپارٹی كی حكومت نواں بجٹ پیش كرنے كے باوجود سندھ كے مسائل حل نہیں كرسكی، اپوزیشن كرپٹ عناصر كو بجٹ اجلاس میں بے نقاب كرے گی، كمیشن مافیا اوركرپٹ مافیا كے خلاف مل كركام كریں گے۔ انہوں نے کہا کہ ہمارے خلاف ایك نہیں 10 مقدمات مزید درج كرنے كی تیاری كریں لیكن عوامی مسائل كے حل كے لیے ہرروز احتجاج كریں گے

ایمزٹی وی(اسلام آباد)سینٹ میں اپوزیشن لیڈر اور ٹی او آر کمیٹی کے رکن اعتزاز احسن کا کہنا ہے کہ سب کا یکساں احتساب چاہتے ہیں لیکن اپنے مؤقف پر آج بھی قائم ہیں کہ احتساب کا عمل وزیراعظم اور ان کے خاندان سے شروع ہونا چاہیے۔
اعتزاز احسن کا کہنا تھا کہ ہم ہر وقت پر امید رہنے والے ہیں کبھی ناامید نہیں ہوئے ہیں حکومت سے مثبت رویہ اختیار کرنے کی توقع ہے اگر پیشرفت کے تھوڑے سے امکان ہوئے تو ہم بھی بھرپور طریقے سے آگے بڑھیں گے۔
اعتزاز احسن نے کہا کہ یہ وقت مناسب نہیں کہ بتاسکیں کہ اس وقت مذاکرات کس مرحلے میں ہیں، مناسب وقت پر ٹی او آرز کے سارے معاملات اور تمام اختلافی نکات قوم کے سامنے آئیں گے اوراگر ضروی ہوا تو مذاکرات کے تمام مراحل پر قوم کو اعتماد میں بھی لیا جائے گا۔
قائد حزب اختلاف کا کہنا تھا کہ ٹی او آرز پر اگر کوئی فیصلہ نہ ہوسکا تو اپوزیشن سرجوڑ کر بیٹھے گی اور سڑکوں پر جانے کا فیصلہ بھی مشاورت سے کریں گے۔

ایمزٹی وی(کلرسیداں) وفاقی وزیر داخلہ چودھری نثار علی خان نے کہا ہے کہ بلاول بھٹو زرداری اب بچے نہیں ہیں مگر وہ سیاست سے نابلد ہیں۔ تفصیلات کے مطابق کلر سیداں میں میڈیا سے بات کرتے ہوئے چودھری نثار نے کہا کہ ضروری نہیں کہ ہر غیرسنجیدہ بیان پر تبصرہ کیا جائے۔ پارلیمانی نظام میں وزیراعظم کی جگہ کوئی اور نہیں لے سکتا۔ دنیا بھر کے سربراہان مملکت ہفتوں چھٹیوں پر جاتے ہیں لیکن وہاں انتظامی نظام اسی طرح چلتا رہتا ہے۔ اسی طرح پاکستان میں بھی وفاقی کابینہ کام کررہی ہے۔ چودھری نثار علی خان نے کہا کہ وہ پاکستان کی پارلیمنٹ یا مقننہ کے سامنے جوابدہ ہیں امریکا کے نہیں۔ ہمیں ہر رپورٹ کو سنجیدگی سے نہیں لینا چاہئے۔ دہشت گردوں کےخلاف کامیابی کسی رپورٹ کی محتاج نہیں۔ حقیقت یہ ہے کہ ملک میں 2013ءکے مقابلے میں حالات کافی بہتر ہوئے ہیں۔ نیکٹا فعال ہے لیکن اس کے کام میں وسعت کی ضرورت ہے۔ چودھری نثار نے مزیدکہا کہ انہوں نے جب سے وزارت کی ذمہ داری سنبھالی ہے نادرا میں کرپشن کے خلاف کارروائی کی جارہی ہے۔ نادرا میں کسی کرپٹ آدمی کی کوئی گنجائش نہیں ہے۔ ڈھائی برسوں میں ڈھائی لاکھ سے زیادہ شناختی کارڈ بلاک اور 39 لاکھ پاسپورٹ بلیک لسٹ ہوئے اور یہ سب کچھ ملا اختر منصور کی ہلاکت سے پہلے ہوا ہے،۔

ایمزٹی ی(میرپور)وزیرا عظم چوہدری عبدالمجید نے کہاکہ پیپلز پارٹی سے خوف زدہ عناصر نے حکومت پر بے بنیاد الزامات کو مشغلہ بنا لیا ہے ۔وفاقی وزرا ء روزانہ کوئی نہ کوئی نیا منصوبہ بناتے ہیں اور طرح طرح کی کہانیاں سناتے ہیں ان کے تمام منصوبے خاک میں ملا دیں گے ۔ان خیالات کا اظہار انھوں نے یہاں وزیر اعظم ہائوس میں ملاقات کرنیوالے وفود سے بات چیت کرتے ہوئے کیا۔ اس حوالے سے انہوں نے مزیدکہا کہ وزیر امور کشمیر، کشمیر کونسل کے فنڈز ن لیگ کے امیدواروں کی الیکشن مہم پرخرچ کررہے ہیں قبل ازیں افسران سے گفتگو کرتے ہوئے چوہدری عبدالمجید نے کہا کہ ترقیاتی منصوبوں کی مانیٹرنگ کی جائے اس میں کسی قسم کی سستی یا لاپرواہی برداشت نہیں کی جائے گی ۔

ایمزٹی وی (اسلام آباد) قومی اسمبلی میں اپوزیشن لیڈر خورشید شاہ نے آئندہ مالی سال کا بجٹ مسترد کرتے ہوئے کہا کہ عوام کے لیے بجٹ میں کچھ بھی نہیں ہے۔ ذرائع کے مطابق قومی اسمبلی میں اپوزیشن لیڈر خورشید شاہ نے آئندہ مالی سال کا بجٹ مسترد کرتے ہوئے کہا کہ پچھلے سال کے بجٹ کے چند اعداد وشمار تبدیل کیے گئے ہیں، یہ کسی بھی طرح سے عوامی بجٹ نہیں کیوں کہ اس میں عوام کے لیے کچھ بھی نہیں ہے۔ دوسری جانب پی ٹی آئی کے وائس چیرمین شاہ محمود قریشی نے کہا کہ حکومت نے خواہشات پر مبنی بجٹ پیش کیا، اسد عمر کا کہنا تھا کہ آئی ایم ایف کے لیے حکومت کا چوتھا بجٹ تھا، منصوبوں کے اعلان کے باوجود سرماریہ کاری کم ترین رہی اور عوام آج بھی اپنی فلاح و بہبود کے ضامن بجٹ کے منتظر ہیں۔ عوامی مسلم لیگ کے سربراہ شیخ رشید کا کہنا تھا کہ حساب کے ہیر پھیر میں اسحاق ڈار کا کوئی مقابل نہیں ہے، سراج الحق نے کہا کہ بجٹ مفروضوں پر مشتمل ہے اور موجودہ حکومت آئینی تقاضوں کو پورا نہیں کرسکی جب کہ ایم کیوایم نے بجٹ کو امیر دوست قرار دے کر مسترد کردیا۔