ایمزٹی وی(گلگت بلتستان)گلگت بلتستان جشن بہاراں پولو ٹورنامنٹ کا آغاز ہوگیا ہے ۔پولو ٹورنامنٹ کا مقصد گلگت بلتستان میں کھیلوں اور ثقافت کی ترویج ہے۔ تفصیلات کے مطابق گلگت بلتستان میں جشن بہاراں کا آغاز کردیا گیا ہے جس میں ابتدائی طور پرپولو ٹورنامنٹ منعقد کیا گیا ہے۔ ٹورنامنٹ میں 8 سینئر اور 19جونیئر پولو ٹیموں سمیت مجموعی طور پر27 ٹیمیں اس مقابلے میں حصہ لیں گی ٹورنامنٹ رواں ماہ کی 15تاریخ تک جاری رہے گا۔ٹورنامنٹ کے افتتاح کے موقع پر رنگا رنگ تقریب منعقد کی گئی جس میں علاقائی رقص اور موسیقی کا اہتمام بھی کیا گیا۔

ایمزٹی وی(انٹرٹینمنٹ)معروف ستار نواز استاد رئیس خان عارضہ قلب کے باعث 77سال کی عمر میں انتقال کر گئے، استاد رئیس خان کے سوگواروں میں اہلیہ اور 2بیٹے شامل ہیں۔ تفصیلات کے مطابق ستار نوازی میں نام کمانے والے استاد رئیس خان کچھ عرصے سے عارضہ قلب میں مبتلا تھے۔ جس کے باعث گذشتہ روز ان کا انتقال ہوگیا ۔ وہ ہندوستان کے شہر اندور میں 25 نومبر 1939ءکو پیدا ہوئے۔ انہوں نے برصغیر کے بڑے ستارنوازوں میں شامل اپنے نانا عنایت علی خان سے ہی ستار نوازی کی تعلیم حاصل کی۔موسیقی سے تعلق ہونے کے باعث بچپن میں ہی انہوں نے اپنے بڑوں سے ستار نوازی کی تعلیم حاصل کرنا شروع کردی تھی۔ استاد رئیس کو حکومت پاکستان کی جانب سے صدارتی تمغہ حسن کارکردگی سے بھی نوازا جا چکا ہے جبکہ ان کے صاحبزادے فرحان بھی موسیقار اور فن ستارنوازی میں ماہر ہیں۔

ایمزٹی وی(فرانس)فرانس میں صدارتی انتخابات کے دوسرے مرحلے کے لئے پولنگ آج ہو رہی ہے جس میں لی پین کے مقابلے میں میکرون کی جیت کے امکانات ظاہر کئے جا رہے ہیں۔ غیر ملکی خبر رساں ادارے کے مطابق فرانس میں صدارتی انتخابات کے دوسرے مرحلے کیلئے پولنگ آج ہو رہی ہے جس میں فرانسیسی شہری اپنے صدر کا انتخاب کریں گے۔ قوم پرست خاتون سیاست دان مارین لی پین اور آزاد امیدوار ایمنوئیل میکرون کے درمیان سخت مقابلے کی توقع ظاہر کی جا رہی ہے۔ تازہ پولز کے مطابق 49 سالہ مارین لی پین کی عوامی مقبولیت میں کمی آئی ہے جس کی وجہ سے انتخابات میں ان کی جیت کے 38 فیصد امکانات ہیں جب کہ 39 سالہ ایمنوئیل میکرون کی کامیابی کے امکانات 62 فیصد ہیں۔ انتخابی مہم کے آخری ہفتے کے دوران دونوں امیدواروں نے ایک دوسرے کے خلاف خوب الزامات لگائے۔ میکرون نے گزشتہ روز اپنی انتخابی مہم ہائی جیک ہونے کا دعویٰ بھی کیا تھا۔ دوسری جانب فرانس میں سکیورٹی ہائی الرٹ ہے اور عوامی مقامات سمیت اہم عمارتوں پر سکیورٹی اہلکاروں کی بھاری نفری تعینات ہے۔ واضح رہے کہ دنیا کے دیگر ممالک میں مقیم فرانسیسی شہریوں نے ایک روز قبل ہی ووٹ ڈال دئیے تھے، وہاں ووٹوں کی گنتی کا عمل جاری ہے۔