Reporter SS
ایمز ٹی وی (تجارت) سپریم کورٹ نے سندھ تھر کول اتھارٹی میں کنٹرکٹ پر رکھے گئے تمام ملازمین کو ہٹانے اور اتھارٹی کے جاری تمام منصوبوں کی تفصیلات طلب کر لیں۔ جسٹس امیر ہانی مسلم کہتے ہیں تماشہ نہ لگائیں، گھر صاف کریں،عدالت مزید وقت نہیں دے گی۔
عدالت عظمی کے دو رکنی بنچ نے سندھ تھرکول اتھارٹی میں ڈیپوٹیشن پر کرپٹ افراد کی تعیناتی سے متعلق ازخودنوٹس کی سماعت کی۔ ایڈووکیٹ جنرل سندھ نے بتایا کہ اتھارٹی کے چیف انجینئر کو کنٹرکیٹ پر رکھا گیا ہے۔
جسٹس امیر ہانی مسلم نے کہا کنٹریکٹ پر ملازمین کو نہ رکھنے کا عدالتی فیصلہ موجود ہے۔ اداروں میں کنٹریکٹ پر رکھے گئے تمام ملازمین فوری ہٹائے جائیں۔
عدالت کو بتایا گیا کہ تھرکول اتھارٹی کے چیئرمین کو وزیراعلی نے تعینات کیا ہے، جس عدالت نے برہمی کا اظہار کرتے ہوئے کہا کہ اتھارٹی بورڈ کی موجودگی میں وزیراعلی کیسے تعیناتی کر سکتے ہیں۔
جسٹس قاضی فائز عیسیٰ نے کہا آپ کی باتیں ہماری سمجھ سے بالاتر ہیں۔ جسٹس امیر ہانی مسلم نے کہا کہ اب تماشے لگانے بند کریں اور اپنے گھر کو صاف کریں۔عدالت مزید وقت نہیں دے سکتی کیس کی آئندہ سماعت کراچی رجسٹری میں ہوگی۔
ایمزٹی وی (اسلام آباد)چیف جسٹس آف پاکستان جسٹس ثاقب نثار نے جڑواں شہر وں میں خواتین کی خریدوفروخت کو نوٹس لیتے ہوئے آئی جیز اسلام آباد اور پنجاب سے 3 دن میں رپورٹ طلب کرلی ہے۔
تفصیلات کے مطابق چیف جسٹس سپریم کورٹ نے خواتین کے بارے اخبار میں شائع ہونے والی خبر پر نوٹس لیتے ہوئے حکم جاری کیا۔ ترجمان سپریم کورٹ کے مطابق 40 سالہ خاتون کو مبینہ طور پر متعدد بار فروخت کیا گیا ۔
خبر کے مطابق اگروہ اب تک 150 سے زائد خواتین کو فروخت کرچکا ہے جن میں صوابی کی ایک خاتون بھی سرگرمیوں میں ملوث ہے اور خواتین کی فروخت جعلی نکاح ڈیڈ کے ذریعے ہوتی ہے۔
ترجمان نے مزید کہا کہ رپورٹس کے مطابق پولیس نے کارروائی پر معذوری کا اظہار کیا۔
ایمز ٹی وی (تعلیم /اسلام آباد ) پولی کلینک اسلام آبادتقرریاں و تبادلے کئے گئے ۔ فارماسسٹ آمنہ بی بی کو اسسٹنٹ ایگزیکٹو ڈائریکٹر میڈسن سے ہٹاکر ڈاکٹر جی ایم سولنگی کو تعینات کر دیا گیا ۔
پولی کلینک میں ادویات کی چوری کے متعدد اسکینڈلزسامنے آنے کے بعد فارماسسٹ آمنہ بی بی کو بطور اسسٹنٹ ایگزیکٹو ڈائریکٹر میڈسن تعینات کیا گیا تھا۔
جنھوں نے نہ صرف ادویات کی چوری کو روکا بلکہ ڈاکٹر کی تحریری ایڈوائس کے بغیر کسی کو بھی ادویات جاری نہیں کی جاتی تھیں ۔
اس ضمن میں ای ڈی پولی کلینک ڈاکٹر شاہد حنیف کی جانب سے جاری ہونے والے نوٹیفیکشن کے مطابق ڈاکٹر اعجاز احمد کو پی بلاک ڈسپنسری سے پارلیمنٹ لاجز ڈسپنسری ، ڈاکٹر نوشین خالد کو اے بلا ک ڈسپنسری ، ڈاکٹر عمر نجم کو پارلیمنٹ لاجز ڈسپنسری سے شعبہ کارڈیالوجی ،ڈاکٹر حمید سومرو کو ایوننگ اوپی ڈی سے پارلیمنٹ لاجز
ڈسپنسری میں ایم او، ڈاکٹر معاز مبشر کو پارلیمنٹ لاجز ڈسپنسری سے گردوں کے شعبے میں اور ڈاکٹر مہوش کو نیورلوجی سے ایوننگ او پی ڈی میں تعینات کر دیا گیا ہے ۔
ای ڈی پولی کلینک ڈاکٹر شاہد حنیف نے کہا کہ فارماسسٹ آمنہ بی بی کی کارکردگی بہت اچھی ہے وہ اپنی ذمہ داریاں ادا کرتی رہیں گی صرف اتنی تبدیلی کی گئی ہے کہ فارمیسی میں مریضوں کو جو ادویات جاری ہوتی ہیں اْنہیں ڈاکٹر جی ایم سولنگی دیکھیں گے ۔
ایمز ٹی وی (تعلیم /اسلام آباد ) ضلع راولپنڈی میں ایجوکیٹر زکی بھرتی کے دوران میرٹ لسٹ تیار کرنے کے دوران گھپلے سامنے آئے ہیں جس پر امیدوارسراپا احتجاج بن گئے۔
حاصل شدہ نمبر کم لکھ کر امیدواروں کا میرٹ تبدیل کیا جاتا ہے اورکچھ افراد کو میرٹ پر اوپر لائےجانے کا انکشاف ہوا ہے۔
گورنمنٹ گرلز ہائی اسکول بھاٹہ کی لسٹ میں ایک امیدوار مریم احمد کو حاصل شدہ نمبروں کو جمع کرتے ہوئے کم رکھ کر میرٹ پر پیچھے کر دیا گیا اور اس کو نوکری سے محروم کرنے کی کوشش کی گئی۔
مریم کے والدین کو گزشتہ روز اس بات کا علم ہوا تو انہوں نے متعلقہ اداروں سے بات کی جس پر انہوں نے کہا کہ نمبر جمع کرتے ہوئے غلطی ہوئی ہوگئی ہے امیدوار کے کل نمبر54.518 بنتے ہیں۔
دی گئی مگرلسٹ کے مطابق اس کو جمع کر کے38.852 ظاہر کر کے میرٹ میں آخری نمبر پر ڈال دیا گیا۔ امیدوار کے والدین نے وزیراعلیٰ، وزیر تعلیم اور اعلیٰ حکام وضلعی انتظامیہ سےمطالبہ کیا ہے کہ وہ اس زیادتی کا فوری نوٹس لے کر میرٹ کے مطابق نوکری دی جائے ۔
ایمز ٹی وی(اسپورٹس) پاکستان کرکٹ بورڈ (پی سی بی) کے چیئرمین شہریار خان نے فکسنگ کھلاڑیوں کو لاعلم قرار دیدیا ہے اور کہا ہے کہ انہیں یہ معلوم نہیں تھا کہ وہ جس شخص سے ملاقات کر رہے ہیں وہ کوئی پرستار ہے یا پھر بکی ہے۔ دونوں کھلاڑیوں کو چارج شیٹ دیدی ہے اور اب جواب کا انتظار کر رہے ہیں۔
تفصیلات کے مطابق شہریار خان نے کہا کہ میچ فکسنگ پوری دنیا میں ہوتی ہے اور جہاں ٹی 20 میچ ہوتے ہیں وہاں بکی آ جاتے ہیں۔ ہندوستان، بنگلہ دیش اور سری لنکا میں بھی بکی آتے ہیں اور پی ایس ایل کا پہلا سیزن کامیاب ہوا تو دوسرے سیزن میں بکی آ گئے۔
ان کا کہنا تھا کہ بکی کھلاڑیوں سے براہ راست رابطہ نہیں کرتے بلکہ رشتہ داروں یا سابق کھلاڑیوں کے ذریعے رابطہ کرتے ہیں۔ انہوں نے مزید کہا کہ ناصر جمشید نے کھلاڑیوں سے کہا کہ یہ شخص آپ سے ملنا چاہتا ہے جبکہ پی سی بی کے اینٹی کرپشن یونٹ کو علم تھا کہ ایسا ہونے والا ہے، خالد لطیف اور شرجیل خان کے خلاف ثبوت موجود ہیں تاہم دونوں کھلاڑیوں کو تحریری جواب دینے کیلئے 14 روز دئیے ہیں ۔
شہریار خان نے کہا کہ دونوں کھلاڑیوں نے جو بیان ریکارڈ کرایا ہے وہ پہلے سے مختلف ہے تاہم دونوں کھلاڑیوں نے بکی سے ملاقات کا اعتراف کیا ہے۔
ایمز ٹی وی ( صحت /عمرکوٹ )ڈپٹی کمشنر عمرکوٹ ندیم الرحمان میمن کی صدارت میں ہونے والے اجلاس سے خطاب کرتے ہوئے ڈپٹی کمشنر نے کہا ہے کہ جو بچے ضلع سے باہر چلے گئے ہیں۔
ان کی تصدیق کر کے ان بچوں کی فہرستیں تیار کی جائے اور 6مارچ سے شروع ہونے والی انسداد پولیو مہم کو عمرکوٹ ضلع میں سو فیصد کامیاب دیکھنا چاہتا ہوں۔
ہیلتھ والے اپنا کردار نیک نیتی سے ادا کریں ڈسٹرکٹ ہیلتھ آفیسر عمرکوٹ ڈاکٹروں کو ہدایت کی جو بھی ڈاکٹر ،میڈیکل آفیسر ،ویکسینٹر ڈیوٹی سے غیر حاضر ہیں ان کو معطل کر کے گھر بھیج دیں اور ان کے آرڈر کی کاپی مجھے بھیج دیں اگر ایسا نہیں کیا تو ہم ڈی ایچ او کو نااہل سمجھتے ہوئے ان کے خلاف کارروائی کرینگے۔
ایمز ٹی وی ( تعلیم /لاہور) بی اے /بی ایس سی پارٹ ون اور ٹو سالانہ امتحانات 2017ء بالترتیب 19اپریل ء اور5اپریل ء سے شروع ہوں گے۔
جبکہ بی اے /بی ایس سی (کمپوزٹ)سالانہ 2017ء کے امتحان بھی 5اپریل2017ء سے شروع ہوں گے۔
ایمز ٹی وی(اسپورٹس) اسٹار آل راؤنڈر اور کراچی کنگز کے کھلاڑی شعیب ملک کا کہنا ہے کہ وہ غیر ملکی کھلاڑیوں کو پاکستان سپر لیگ (پی ایس ایل) کا فائنل لاہور میں کھیلنے کے لیے رضامند کرنے کی کوششیں کر رہے ہیں۔
رپورٹ کے مطابق رائٹ ہینڈ بیٹسمین شعیب ملک نے بتایا، 'میں پاکستان میں اپنے ساتھ سیکیورٹی نہیں رکھتا، میں نے کھلاڑیوں کو بتایا کہ میری اہلیہ ہندوستانی ہیں اور وہ بھی جب پاکستان آتی ہیں تو اپنے ساتھ سیکیورٹی نہیں رکھتیں'۔
جب ان سے پی ایس ایل کے دیگر ٹی 20 انٹرنینشل لیگز سے موازنے سے متعلق سوال پوچھا گیا تو شعیب ملک نے بتایا، 'اگرچہ میں نہیں سمجھتا کہ لیگز کا ایک دوسرے سے موازنہ کرنا چاہیے، لیکن میرا خیال ہے کہ پی ایس ایل نے کرکٹ کے اسٹینڈرڈ کے لحاظ سے ایک بڑا اسٹینڈ لیا ہے اور اللہ کی رحمت سے اس میں دن بدن بہتری آرہی ہے'۔
انھوں نے پیش گوئی کہ آنے والے دنوں میں پی ایس ایل کو مزید کامیابیاں ملیں گی لیکن ساتھ ہی انھوں نے کہا کہ اس حوالے سے کھلاڑیوں، میڈیا اور پاکستانی عوام پر بھاری ذمہ داری عائد ہوتی ہے۔
نئے کھلاڑیوں کی شاندار کارکردگی کے حوالے سے سوال پر شعیب ملک کا کہنا تھا کہ ٹورنامنٹ میں شامل نئے کھلاڑیوں میں بے پناہ ٹیلنٹ ہے، تاہم انھوں نے ہمیشہ ان سے یہی کہا ہے کہ ایک کھلاڑی صرف ٹیلنٹ کی بناء پر ہی نہیں چل سکتا بلکہ اسے بہتری کی جانب مسلسل گامزن رہنا چاہیے۔
شعیب ملک نے نئے کھلاڑیوں پر پی ایس ایل میں بہترین پرفارمنس دکھانے پر زور دیتے ہوئے کہا، 'اگر آپ کے پاس فزیکل فٹنس ہے تو آپ کی پرفارمنس مستحکم رہے گی'۔
اپنی ٹیم کی پرفارمنس پر اطمینان کا اظہار کرتے ہوئے شعیب نے کہا کہ رواں سیزن میں کراچی کنگز کی کارگردگی نسبتاً بہتر ہے، ساتھ ہی ان کا کہنا تھا، 'لیکن یہ اب بھی کچھ بہت زیادہ بہتر نہیں ہے'۔
واضح رہے کہ پاکستان کرکٹ بورڈ کی جانب سے 5 مارچ کو دبئی کی جگہ لاہور میں پی ایس ایل فائنل کے انعقاد کے اعلان کے ساتھ ہی لاہور سمیت ملک کے دیگر شہروں میں دہشت گرد حملوں کا سلسلہ شروع ہو گیا جس سے سیکیورٹی ایجنسیز کے لیے نئے چیلنج کھڑے ہو گئے ہیں۔
دوسری جانب شائقین کرکٹ لاہور میں فائنل کے انعقاد کے اعلان کے بعد سے انتہائی پرجوش ہیں اور اس سلسلے میں کسی بھی قسم کی پیشرفت میں انتہائی دلچسپی لے رہے ہیں۔
ایمزٹی وی (اسلام آباد)وزیر اعظم نوازشریف ترکی سے وطن واپسی کیلئے روانہ ہو گئے ۔
زرائع کے مطابق وزیر اعظم پاکستان ترکی کا تین روزہ کامیاب سرکاری دورے کرنے کے بعد پاکستان کیلئے روانہ ہو گئے ہیں ۔وفد میں انکے ہمراہ اعلیٰ حکومتی ارکان بھی شامل ہیں۔
روانگی سے قبل انہوں نے دارالحکومت انقرہ میں میڈیا کے نمائندوں سے گفتگو بھی کی جس میں انکا کہنا تھا کہ وسط ایشیائی ریاستیں اور ترکی ملکر سی پیک کو مزید فروغ دے سکتے ہیں۔
ایمز ٹی وی(مانیٹرنگ ڈیسک) خبریں ہیں کہ نوکیا 3310 ایک بار پھر واپس آرہا ہے یا کم از کم بہت جلد متعارف کروا دیا جائے گا۔
آئیکون کا درجہ رکھنے والے اس فون کو 26 فروری کو بارسلونا میں موبائل ورلڈ کانگریس کے موقع پر متعارف کرائے جانے کا امکان ہے اور یہ ماضی کے مقابلے اب کچھ مختلف ڈیزائن کا ہوسکتا ہے۔
آج کے اسمارٹ فونز کے کمالات یعنی فور جی انٹرنیٹ کنکشن، ٹچ اسکرین اور لاتعداد ایپس سے محروم سترہ سال پہلے موبائل فون مارکیٹ پر راج کرنے والا 3310 اب بھی متعدد افراد کے دلوں میں خاص جگہ رکھتا ہے۔
ماضی میں نوکیا نے اس فون کے 10 کروڑ سے زائد سیٹس فروخت کیے تھے جبکہ اس کے نئے ورژن کی قیمت 63 ڈالرز (6603 پاکستانی روپے) ہوسکتی ہے، مگر یہ آج تک لوگوں کو پسند کیوں ہے؟
اس کی چند وجوہات ہیں۔
بہترین بیٹری لائف
اگر آپ خوش قسمت ہوں تو آج کل کے اسمارٹ فون کی بیٹری ایک دن تک ہی چل پاتی ہے، جبکہ 3310 کو ایک ہفتے سے زائد عرصے تک بھی استعمال کیا جاسکتا تھا، اس کی اسکرین کے دائیں جانب اوپر بنے چار سیاہ نقطے طویل عرصے تک برقرار رہتے تھے (اور آج کے فونز کی طرح گھبراہٹ میں مبتلا نہیں کرتے تھے)، چونکہ یہ اپنے دور کا مقبول ترین فون تھا تو ہر ایک کے پاس موجود چارجر اس کے لیے کارآمد تھا۔
ٹوٹنا لگ بھگ ناممکن تھا
اگر کبھی آپ کے اسمارٹ فون کی اسکرین ٹوٹی ہو یا ہوم بٹن خراب ہوگیا ہو تو آپ کو نوکیا 3310 کے وہ دن آتے ہوں گے جب فون کو کئی منزلہ عمارت سے بھی نیچے پھینکا جاتا تو بھی اس پر کوئی فرق نہیں پڑتا تھا، 3310 کے پلاسٹک کور اور بٹن کو جب مرضی نکال کر بدلا جاسکتا تھا، جو اسے مضبوطی فراہم کرتے تھے۔
فون کال کا بہتر معیار
ایپل نے ایک تحقیق کے دوران تسلیم کیا تھا کہ اس کی ڈیوائسز کی کالز نئے فونز میں آسانی سے کٹ جاتی ہیں، اسی طرح ایک اور تحقیق میں یہ بات سامنے آئی تھی کہ بیشتر میٹل اور گلاس اسمارٹ فونز فون کال کے سگنلز کو متاثر کرتے ہیں جبکہ نوکیا 3310 میں ایسا کوئی مسئلہ نہیں تھا۔
جب مرضی شکل بدلنا
3310 ایک ایسا فون تھا جس کا رنگ ویسے تو نیوی بلیو تھا مگر جب دل چاہتا کسی نئے کور سے اس کی شکل بدلی جاسکتی تھی اور اپنے مزاج کے مطابق اسے ڈھالا جاسکتا تھا جس سے آج کل کے فونز محروم ہیں۔
اپنے وقت کا اسمارٹ فون
ویسے تو 3310 آج کے فونز کے مقابلے میں 'ڈمب' قرار دیا جاتا ہے مگر اُس وقت کے لحاظ سے یہ اسمارٹ فون تھا، جس میں اسٹاپ واچ، الارم کلاک، کیلکولیٹر اور 140 حروف سے زیادہ کے ایس ایم ایس بھیجنے کی صلاحیت تھی، اسی طرح اس میں موجود گیمز کا آپشن تو سب کو ہی پسند تھا، خاص طور پر اسنیک ٹو، جسے اب ٹچ اسکرین میں دوبارہ تیار کرکے پیش تو کیا گیا ہے مگر 2، 4، 6 اور 8 کے بٹن سے اسے کھیلنے کا مزہ دستیاب نہیں۔
اب یہ کیسا ہوگا؟
ویسے تو جب تک سامنے نہیں آجاتا یہ کہنا مشکل ہے مگر ایک شخص نے یوٹیوب ویڈیو میں اس کا کانسیپٹ ڈیزائن پیش کیا ہے جس میں اس کے بقول ڈیڑھ انچ اسکرین، 256 کے کلرز، کیمرہ، ایف ایم ریڈیو، 8 جی بی اسٹوریج، مائیکرو یو ایس بی پورٹ، 1650 ایم اے ایچ بیٹری جو کہ 235 گھنٹے یا لگ بھگ چوبیس دن کے اسٹینڈ بائی ٹائم کی حامل ہوگی۔