لاہور: سابق قومی فاسٹ بولر شعیب اختر نے آسٹریلیا کے ہاتھوں دوسرے ٹی ٹوئنٹی میچ میں شکست پر پاکستان کرکٹ ٹیم کو کھری کھری سنا دیں۔

سابق فاسٹ باؤلر نے کہا کہ جیت کے باوجود آسٹریلیا بہت زیادہ اچھا نہیں کھیل سکا، اسٹیو اسمتھ نے گو نصف سنچری بنائی لیکن اس کی بیٹنگ میں بھی خاص تکنیک دکھائی نہ دی، اس کی بڑی خوبی یہ ہے کہ وہ دلیر کھلاڑی ہیں اور اس نے محمد عامر کو تین چار چوکے بھی لگائے، محمد عامر کی جگہ میں ہوتا تو کم ازکم تین سے چار باؤنسرز  ضرور مارتا اور اگر بارش نہ ہوتی تو پاکستان میں پہلا ٹی ٹوئنٹی میچ بھی ہار سکتا تھا

سری نگر: دنیا بھر میں کشمیری یوم شہدائے جموں وکشمیر منارہے ہیں اور قابض فوج کے ہاتھوں شہید ہونے والے ہزاروں کشمیریوں کو خراجِ عقیدت پیش کررہے ہیں۔

6 نومبر1947 کو بھارت اور مہاراجہ ہری سنگھ کی افواج نے ہزاروں کشمیریوں کو بے رحمی سے شہید کرکے جموں و کشمیر پر اپنا قبضہ جمایا تھا۔

یوم شہدائے جموں وکشمیر کے موقع پر مقبوضہ اور آزاد کشمیر سمیت دنیا بھر میں دعائیہ تقریبات منعقد کی گئی ہیں۔ شہداء کی یاد میں خصوصی سیمینارز کا انعقادبھی کیا جا رہا ہے۔ انسانی حقوق کی تنظیمیں اورمختلف شعبہ ہائے زندگی سے تعلق رکھنے والے افراد کی جانب سے کشمیریوں کے حق میں صدائے احتجاج بلند کی جا رہی ہے۔

 کراچی: آل پاکستان ٹیکسٹائل ملز ایسوسی ایشن نے ریفنڈ کی عدم ادائیگی کے اور بدترین مالیاتی بحران کے تسلسل کے باعث رواں ماہ کا سیلز ٹیکس ادانہ کرنے کی دھمکی دے دی ہے۔

منگل کے روز اپٹما کے سینٹرل چیئرمین امان اللہ قاسم نے دیگر عہدیداروں کے ہمراہ پریس کانفرنس سے خطاب کرتے ہوئے کہا کہ ٹیکسٹائل سیکٹر کے برآمدکنندگان سنگین مالیاتی بحران میں مبتلا ہونے کی وجہ سے ٹیکسوں کے ساتھ اپنے ورکرز کوتنخواہیں دینے کی بھی سکت نہیں رکھتے ہیں، انھوں نے کہاکہ حکومت نے سیلز ٹیکس ریفنڈ پر بانڈز جاری کیے لیکن دلچسپ امر یہ ہے کہ ان ریفنڈ بانڈز پر حکومت کی کوئی ضمانت نہیں دی گئی، یہی وجہ ہے کہ ان جاری کردہ ریفنڈ بانڈز کو نہ بینک قبول کررہے ہیں اور نہ ہی وہ کیش ہورہے ہیں۔

انھوں نے کہاکہ حکومت کے پاس جب ریفنڈسسٹم ہی نہیں ہے تو اسے فی الفور زیروریٹنگ سہولت بحال کردینا چاہیے، یوں محسوس ہوتاہے کہ حکومت نے اپنے ریونیوجنریشن کے لیے ایس آراو1125ختم کیاہے۔

اسلام آباد:  چیئرمین ایف بی آر شبرزیدی پاکستان ریونیواتھارٹی کے قیام کے معاملے پراپنے ادارے کی سینئربیوروکریسی کوقائل کرنے میں کامیاب نہ ہوسکے۔

ایف بی آرکے چیف کمشنرز کی دو روزہ کانفرنس میں بیوروکریسی کا کہنا تھا ایف بی آرکی جگہ پاکستان ریونیو اتھارٹی کا قیام گھوڑے کوگاڑی کے آگے جوڑنے کے مترادف ہوگا۔ایف بی آرکی عبوری ری اسٹرکچرنگ کے منصوبے کی منظوری وزیراعظم نے دی تھی ۔اس منصوبے کے تحت ملک میں پاکستان ریونیواتھارٹی کے نام سے ادارہ قائم کرنا تھا۔وزیراعظم اس منصوبے پر جی ایچ کیوسے بھی مشاورت کرچکے ہیں۔

اجلاس کے بعد چیئرمین ایف بی آر نے ٹویٹ کیا ہے کہ اس معاملے پرچیف کمشنرز اور دوسرے افسروں سے میٹنگ مفید رہی تاہم اب اس معاملے پر تمام اسٹیک ہولڈرز ،تنظیموں اور اسٹاف لیول کے ملازمین سے فیڈ بیک لینے کا بعد فیصلہ کیا جائیگا

 کراچی:کراچی سمیت سندھ کے مختلف اضلاع میں موٹر سائیکل کی ڈبل سواری پر پابندی عائد کردی گئی۔

محکمہ داخلہ سندھ کے مطابق 6 نومبر کو کراچی سمیت سندھ بھر کے مختلف اضلاع میں موٹرسائیکل کی ڈبل سواری پر پابندی ہوگی جو کہ چپ تعزیہ جلوسوں کے سلسلے میں عائد کی گئی ہے۔ اس حوالے سے محکمہ داخلہ سندھ نے باضابطہ نوٹی فکیشن بھی جاری کردیا ہے۔

 کراچی:بلدیہ عظمیٰ کراچی میں مالی بحران عروج پر پہنچ گیا،کراچی میڈیکل اینڈ ڈینٹل کالج اور عباسی شہید اسپتال کے ملازمین 4 ماہ سے تنخواہوں سے محروم ہیں۔

کراچی میڈیکل اینڈ ڈینٹل کالج اور عباسی شہید اسپتال کے ملازمین کا گزشتہ چار ماہ سے تنخواہوں کی عدم فراہمی پر بلدیہ عظمیٰ کراچی کا احتجاج 19ویں روز میں داخل ہوگیا۔

تنخواہوں سے محروم ملازمین کی تعداد 600 ہے جس میں کے ایم ڈی سی اور عباسی شہید اسپتال کا ٹیچنگ اسٹاف و نان ٹیچنگ اسٹاف شامل ہیں، کے ایم ڈی سی میں 18 اکتوبر سے تدریسی عمل اور ڈینٹل او پی ڈی کا بائیکاٹ جاری ہے، جس کی وجہ سے کالج میں زیر تعلیم 1800 سے زائد طالبعلم اپنے مستقبل کو لے کر پریشانی میں مبتلا ہیں۔

میئر کراچی کے پاس تنخواہیں فراہم کرنے کا کوئی پلان ہی نہیں، ہمیں ہر بار یہی کہا جاتا ہے کہ بجٹ نہیں ہے، 4 ماہ سے تنخواہ نہیں ملی ہے جس کی وجہ سے معمولات زندگی متاثر ہورہی ہے،کے ایم ڈی سی ایکشن کمیٹی میں پروفیسر فریدہ اسلام، پروفیسر آفتاب امتیاز اور ڈاکٹر عقیل شیخ شامل ہیں

 اسلام آباد:اقصی کوثرنے پاکستان کی پہلی خاتون گوگل ڈویلپر ایکسپرٹ بننے کا اعزاز حاصل کرلیا ہے۔

پاکستان کی اقصی کوثرملک کی پہلی خاتون گوگل ڈویلپر ایکسپرٹ بن گئی ہیں۔ اقصی کوثر نے پاکستانی یونیورسٹی سے الیکٹریکل انجینئرنگ میں بیچلرزکی ڈگری حاصل کی ہے۔

آرٹیفیشل انٹیلیجنس پر مہارت رکھنے والی اقصی نے یہ اعزاز گوگل کے لیے مشین لرننگ نامی ایک پروگرام تیار کرنے پر حاصل کیا ہے۔ پروگرام سے سائنسی طور پرکمپیوٹر بغیر ہدایات لیے مخصوص کام انجام دے سکتا ہے۔

کراچی: پاک بحریہ نے زمین سے سمندر میں نشانہ بنانے والے میزائل ‘ ضرب’ کا کامیاب تجربہ کرلیا۔

ساحلی علاقے سے داغے گئے میزائل نے طے شدہ مدار پر سفر کرتے ہوئے کامیابی سے سمندر میں اپنے ہدف کو نشانہ بنایا ۔ چیف آف دی نیول اسٹاف ایڈمرل ظفر محمو دعباسی نے بطو ر مہمان خصوصی مشق کا مشاہدہ کیا۔

نیول چیف نے پاک بحریہ کی جنگی تیاریوں پر بھر پور اطمینان کا اظہار کرتے ہوئے کہا کہ پاکستان کی خطے میں امن و استحکام قائم رکھنے کی کاوش کمزوری نہ سمجھا جائے، پاک بحریہ بطور پیشہ ور اور مضبوط فوج دشمن کی کسی بھی جارحیت کو آہنی ہاتھوں سے نمٹنے کی صلاحیت رکھتی ہے جب کہ ضرب ہتھیاروں کے نظام کی فعالیت پاکستان نیوی کے مضبوط عزم اور تیاری کی اعلیٰ مثال ہے۔

چیف آف دی نیول اسٹاف نے شمالی بحیرہ عرب میں خلیج عدن میں پاک بحریہ کے ریجنل میری ٹائم سیکیورٹی پیٹرول، کثیر ملکی مشترکہ میری ٹائم فورس اور32 ممالک کی بحری افواج پر مشتمل بین العلاقائی میری ٹائم نیٹ ورک میں شمولیت جیسے اقدمات کی اہمیت پر بات کرتے ہوئے کہا کہ ان اقدامات سے میری ٹائم سیکیورٹی میں اضافہ ہوگا۔

بعد ازاں چیف آف دی نیول اسٹاف نے تمام شرکاء بالخصوص میزائل یونٹ کے عملے، سائنسدانوں اور انجینئرز کو ایونٹ کی کامیابی اور پیشہ ورانہ کارکردگی پر مبارک باد دی۔