Reporter SS

پہلے مولانا مدارس کے بچوں کوافغانستان بھیجتے تھے

اسلام آباد: وفاقی وزیر سائنس اینڈ ٹیکنالوجی فواد چوہدری کا کہنا ہے کہ دھرنے سے حکومت اور اسلام آباد کو کوئی خطرہ نہیں، تمام تر منفی کوششوں کے باوجود ملک ترقی کرے گا۔

وفاقی وزیر سائنس اینڈ ٹیکنالوجی فواد چوہدری کا کہنا ہے کہ فضل الرحمان کا ایک بچہ بھی دھرنے میں شریک نہیں ہے، پہلے مولانا مدارس کے بچوں کوافغانستان بھیجتے تھے، آج یہاں لے آئے ہیں، مولانا غفور حیدری بارش میں گھر میں بیٹھے رہے اور شرکاء خوار ہوتے رہے جب کہ کل اقلیتوں اور کرتارپور کے لیے جو زبان استعمال کی گئی وہ سب نے دیکھی تاہم حکومت اور اسلام آباد کو دھرنے سے کوئی خطرہ نہیں، تمام تر منفی کوششوں کے باوجود ملک ترقی کرے گا۔

فواد چوہدری کا کہنا تھا کہ گزشتہ دور میں اشرافیہ نے قوم کے پلیٹ لیٹس کم کیے، نواز شریف نے بھی عوام کے اور ہمارے وائٹ بلڈ سیلز کم کردیے ہیں تاہم ان سے بس یہ چاہتے ہیں کہ وہ عوام کے پیسے واپس کر دیں، نوازشریف واحد شخص ہیں جو تشویشناک حالت میں اسپتال کے بجائے گھر منتقل ہوئے تاہم نوازشریف کی صحت کے لیے دعاگو ہوں

قومی شاہراہ پرایک اور ہولناک حادثےنے11افرادکی جان لےلی

ہالہ:قومی شاہراہ پرکوچ کی رکشہ کوٹکر سے 11 افراد جان کی بازی ہارگئے۔

ذرائع کے مطابق ہالہ میں نیوسعید آباد کے قریب قومی شاہراہ پرکوچ نے رکشہ کوٹکرماردی، جس کے نتیجے میں 11 مسافر جاں بحق جب کہ 6 زخمی ہوگئے۔ مسافرکوچ کراچی سے پنجاب جارہی تھی۔

امدادی ٹیمیں فوری طورپرجائے وقوعہ پہنچیں اورلاشوں اورزخمیوں کو فوری طورپراسپتال منتقل کیا جہاں قانونی کارروائی سمیت زخمیوں کی طبی امداد دی جارہی ہے۔

یخ بستہ ہواوں نےملک بھرکےبیشترشہروں کارخ کرلیا

کوئٹہ:ملک کے مختلف شہروں میں سردی کی شدت میں اضافہ ہوگیا جب کہ کوئٹہ میں درجہ حرارت نقطہ انجماد سے گرگیا۔

ملک کے مختلف شہروں میں سردی کی لہرمیں اضافہ ہوگیا، شدید سردی کے باعث کوئٹہ میں میں درجہ حرارت نقطہ انجماد سے گرگیا۔ ٹھنڈی ہواؤں کی وجہ سے کوئٹہ کے شہری گیس کو ترسنے لگے جب کہ شہربھرمیں گیس پریشر ختم ہونے کی وجہ سے لوگوں کو شدید پریشانی کا سامنا کرنا پڑرہا ہے۔

دوسری جانب پشاور سمیت خیبرپختون خوا کے بالائی علاقوں میں بارشوں کا سلسلہ شروع ہوگیا۔ چترال، دیر، سوات، شانگلہ، مالاکنڈ، بونیر، باجوڑ، شمالی و جنوبی وزیرستان اور دیگر بالائی علاقوں کے پہاڑوں پر برفباری جاری ہے جس کے باعث سردی کی شدت میں اضافہ ہوگیا اورلوگوں نے گرم کپڑے نکال لیے۔

محکمہ موسمیات کے مطابق گزشتہ روز تیمرگرہ میں 10 ملی میٹر، کاکول میں 48، کالام میں 18 ملی میٹر، چترال 8، دیر29، مالم جبہ میں 24 ملی میٹر بارش ریکارڈ کی گئی۔

راولپنڈی مری شاہراہ کشمیرپر شدید بارش کے باعث لینڈ سلائیڈنگ کی وجہ سے بھاری پتھر، چٹانیں، ملبہ روڈپرآگیا اور روڈ بند ہوگیا۔ لینڈسلائیڈنگ کے باعث ملحقہ علاقوں کے رہائشیوں اور مسافروں کو سخت مشکلات کاسامنا ہے

ملک میں ماحول کی حفاظت حکومت پاکستان کی اولین ترجیح ہے

اسلام آباد: وزیراعظم عمران خان نے کہا ہے ملک میں ماحول کی حفاظت حکومت پاکستان کی اولین ترجیح ہے

اسلام آباد میں ساتویں ایشین ریجنل کنزرویشن کانفرنس کے افتتاحی سیشن سے خطاب کرتے ہوئے وزیراعظم عمران خان نے کہا کہ 2013 میں خیبرپختونخوا (کے پی کے) میں بلین ٹری سونامی منصوبے میں ٹمبر مافیا سب سے زیادہ مشکلات کا باعث بنا اور محکمہ جنگلات کے 10 اہلکار قتل کردیے گئے جس پر پہلے ہم نے اس مافیا کو قابو کیا۔

ان کا کہنا تھا کہ لاہور بھی آلودہ شہر بن چکا ہے جہاں 10 سال کے دوران 70 فیصد درخت کاٹ دیے گئے۔

وزیراعظم پاکستان کا کہنا تھا کہ ملک میں ماحول کی حفاظت حکومت پاکستان کی اولین ترجیح ہے، پہلی بار کسی حکومت نے بڑے پیمانے پر ماحولیاتی تحفظ کے لیے قدم اُٹھایا ہے۔

وزیراعظم نے کہاکہ پاکستان ایک متنوع ملک ہے جس کے صحرا سے ہمالیہ کے جنگلات تک 12 ماحولیاتی زون ہیں جو دنیا میں نایاب ہیں تاہم آبادی میں اضافے اور ماضی میں ماحول کے تحفظ میں عدم دلچسپی کے باعث جنگلی حیات اورجنگلات تباہ ہورہے ہیں۔

عمران خان نے کہاکہ پاکستان تحریک انصاف کی وفاقی حکومت نے 10 ارب پودے لگانے کا منصوبہ شروع کیا ہے، اس سال ہم ملک بھر میں شجرکاری کی بڑی مہم شروع کریں گے جس کے لیے پہلے سال میں نرسریوں اور بنیادی ڈھانچے سمیت ضروری منصوبہ بندی کرلی گئی ہے۔

انہوں نے مزید کہا کہ نوجوان اس حوالے سے بڑی مہم چلائیں گے اورماحولیاتی تحفظ کو نصاب کا حصہ بھی بنایا جائے گا

تمام سرکاری اور نجی اسکولوں کو بند رکھنے کا اعلان

لاہور:صوبہ پنجاب کے شہر لاہور میں اسموگ کی شدت میں اضافے کے باعث معمولاتِ زندگی متاثر ہو کر رہ گئی ہے۔

اسموگ کے باعث پنجاب محکمہ تعلیم نے آج لاہور کے تمام سرکاری اور نجی اسکولوں کو بند رکھنے کا اعلان کیا ہے۔

سانحہ تیزگام،مزید40میتیں ورثاء کےحوالے

رحیم یارخان : سانحہ تیز گام میں جاں بحق ہونے والے 30 افراد کی میتیں میر پور خاص جب کہ چار افراد کی میتیں کراچی پہنچا دی گئیں ہیں۔

گزشتہ ہفتے کراچی سے راولپنڈی جانے والی تیزگام ایکسپریس کی تین بوگیوں میں ضلع رحیم یار خان کی تحصیل لیاقت پور کے قریب آگ بھڑک اٹھی تھی جس کے نتیجے میں 75 افراد جاں بحق اور 40 سے زائد زخمی ہو گئے تھے۔

تیزگام ایکسپریس میں آگ لگنے سے جاں بحق ہونے والے 58 افراد کی شناخت نہ ہونے پر ڈی این اے کرانے کا فیصلہ کیا گیا تھا۔

ڈی این اے ٹیسٹ کے ذریعے شناخت کے بعد گزشتہ روز 40 میتیں ورثا کے حوالے کر دی گئیں جس میں 30 افراد کی میتیں میرپور خاص جب کہ 4 افراد کی میتیں کراچی منتقل کی گئیں اس کے علاوہ کچھ میتوں کو عمر کوٹ بھی پہنچایا گیا۔

عمرکوٹ میں تین افراد کی نماز جنازہ ادا کی گئی جب کہ میرپور خاص کے مختلف علاقوں میں تدفین کی تیاریاں جاری ہیں۔

کراچی سے تعلق رکھنے والے ماں بیٹے سمیت 3افراد کی میتیں سہراب گوٹھ کے سردخانے منتقل کی گئیں، ماں بیٹا گلشن حدید اور ایک شخص کورنگی کا رہائشی تھا۔

اسموگ کی شدت میں اضافےکےباعث معمولاتِ زندگی متاثر

لاہور: صوبہ پنجاب کے شہر لاہور میں اسموگ کی شدت میں اضافے کے باعث معمولاتِ زندگی متاثر ہو کر رہ گئی ہے۔

محکمہ ماحولیات کے مطابق لاہور میں اسموگ کی شدت میں اضافہ ہوگیا ہے اور آئندہ 24 گھنٹوں کے دوران اسموگ مزید بڑھنے کا امکان ہے۔

محکمہ ماحولیات کے حکام نے بتایا کہ اسموگ بھارتی شہر جالندھر سے آرہی ہے، جالندھر میں فصلوں کی باقیات جلائی جارہی ہیں جس کی وجہ سے ہوا کا رُخ تبدیل ہو کر بھارت سے لاہور کی طرف آرہا ہے۔

لاہور میں اسموگ کے باعث شہریوں کو سخت پریشانی کا سامنا ہے اور لوگوں کو سانس لینے میں بھی شدید دشواری پیش آرہی ہے۔

شدید اسموگ کے باعث پنجاب محکمہ تعلیم نے آج لاہور کے تمام سرکاری اور نجی اسکولوں کو بند رکھنے کا اعلان کیا ہے۔

دوسری جانب وزیر اعلیٰ پنجاب عثمان بزدار نے بھی اسموگ پر تشویش کا اظہار کرتے ہوئے متعلقہ اداروں کو چوکس رہنے کی ہدایت کی ہے۔

وزیراعلی پنجاب نے محکمہ زراعت کو فصلوں کی باقیات جلانے پر پابندی پر سختی سے عمل درآمد کرنے کا حکم دیا ہے۔

انہوں نے آلودگی پھیلانے والی صنعتوں کے خلاف قواعد و ضوابط کے تحت کارروائی کرنے کی ہدایت بھی کی ہے۔ ادھر محکمہ موسمیات نے بتایا کہ لاہور میں رات گئے ہونے والی بارش سے مزید اسموگ کا خطرہ ٹل گیا ہے۔

محکمہ موسمیات کے مطابق لاہور میں اسموگ نہیں بھارتی علاقے میں فصلوں کے جلنے کا دھواں پھیل رہا ہے تاہم کُھل کر بارش ہونے پر ہی اسموگ کی شدت میں کمی آ سکتی ہے جب کہ آج اور کل بارش کا امکان ہے۔

منہاج یونیورسٹی میں استقبالیہ تقریب منعقد

لاہور:منہاج یونیورسٹی لاہور میں تعلیمی سیشن (2019) موسم خزاں میں داخلہ لینے والے طلبہ کے استقبال کے لئے منہاج یونیورسٹی انتظامیہ نے استقبالیہ اور ظہرانے کا اہتمام کیا ۔

تقریب سے خطاب کرتے ہوئے وائس چانسلر ڈاکٹر محمد اسلم غوری نے کہا منہاج یونیورسٹی کا بنیادی مقصد طلبہ کو بہترین تعلیم کے ساتھ ساتھ معاشرے کا کار آمد فرد بنانا ہے ،طلبہ کو ہمیشہ اپنی منزل کو سامنے رکھ کر محنت کرنا ہو گی۔

تقریب سے ڈائریکٹر اکیڈمکس ڈاکٹر خرم شہزاد،ڈائریکٹر لائبریریز ظہیر احمد،ڈائریکٹر ایڈمنسٹریشن میجر (ر) سلمان جہانگیر، منیجر ایڈمیشن عمیر سلطان ٹیپو،کوآرڈینیٹر سیکرز کلب عمارہ مقصود نے بھی خطاب کیا ۔ طلبا کودستاویزی فلم دکھائی گئی جس میں شعبہ جات،بنیادی ڈھانچے ، درجہ بندی اور یونیورسٹی کی شاندار روایات کے حوالے سے آگاہ کیا گیا۔

اساتذہ کے تبادلوں کے لیے درخواستیں جمع کرانے کی تاریخ میں توسیع

لاہور: محکمہ اسکول ایجوکیشن نے اساتذہ کے تبادلوں کے لیے درخواستیں جمع کرانے کی تاریخ میں توسیع کردی ۔

ذرائع کا کہنا ہے کہ اب اساتذہ 7 سے 15 نومبر تک 6 کیٹگریز کے تبادلوں کے لیے درخواستیں دے سکیں گے ۔ جن اساتذہ نے پہلے درخواستیں جمع کرائی ہیں وہ بھی نئی شامل ہونے والی سیٹوں کے لیے درخواستیں جمع کرا سکیں گے ۔ 16 سے 18 نومبر تک تبادلوں کی درخواستوں کی لسٹ تیار کی جائے گی ،5 دسمبر کو آرڈر آن لائن کردئیے جائیں گے