لودھراں: تحریک انصاف کے رہنما جہانگیر ترین نے کہا ہے کہ ان کے شاہ محمود قریشی سے معاملات ختم ہوگئے ہیں اب ہم مل کر پارٹی کے لیے کام کریں گے۔

لودھراں میں میڈیا سے بات کرتے ہوئے جہانگیر ترین نے کہا کہ شاہ محمود قریشی حج پر جانے سے پہلے ان سے بہت زور سے بغل گیر ہوئے تھے جس سے سب معاملات ختم ہوگئے، اب میں اور شاہ محمود مل کر پارٹی کے لیے کام کریں گے۔

آزادی مارچ کے حوالے سے جہانگیر ترین نے کہا کہ ہمیں سیاست اور عوام کی خدمت کرنی چاہیے، ہمیں پاکستان کا خیال کرنا چاہیے لیکن مولانا فضل الرحمان صرف اپنا خیال کر کے دھرنا دے رہے ہیں، وہ پہلی بار پارلیمنٹ سے باہر ہوئے ہیں، (ن) لیگ بھی مولانا فضل الرحمان کے ساتھ شامل ہونے کے معاملہ پر تقسیم کا شکار ہے۔

جامعہ کراچی: بی ڈی ایس فائنل پروفیشنل کا14 اکتوبر کو ہونے والا پرچہ اب17 اکتوبر کوہوگا

جامعہ کراچی کے ناظم امتحانات پروفیسر ڈاکٹر ارشد اعظمی کے مطابق بی ڈی ایس فائنل پروفیشنل ضمنی امتحانات برائے 2019 ءکا14 اکتوبر 2019 ءکو ہونے والا اورل سرجری کا پرچہ اب 17 اکتوبر 2019 ءکو منعقد ہوگا۔

واضح رہے کہ مقررہ وقت اور امتحانی مرکز میں کوئی تبدیلی نہیں کی گئی ہے۔

جناح سندھ میڈیکل یونیورسٹی بین الاقوامی جامعات کے نیٹ ورک کا حصہ بن گئی جناح سندھ میڈیکل یونیورسٹی نے معاشرے کی ضروریات سے ہم آہنگ تعلیم و تحقیق کی سرگرمیوں کو فروغ دینے کے لیے بین الاقوامی جامعات کے ایک اشتراک بنام ٹیلوارز نیٹ ورک میں شمولیت اختیار کر لی ہے۔

اس نیٹ ورک میں تمام بر اعظموں سے تعلق رکھنے والے اعلی تعلیمی ادارے شامل ہیں۔وائس چانسلر پروفیسر سید محمد طارق رفیع نے بتایا کہ اس ممبرشپ سے یونیورسٹی کے موجودہ پراجیکٹس کو تقویت ملے گی جن میں طبی عملے پر تشدد، شہروں میں ہنگامی صورتحال سے نپٹنے کی تیاری اور غریب آبادیوں تک صحت کی سہولتوں کی فراہمی شامل ہیں۔

ایڈیشنل ڈائریکٹر کوالٹی انہانسمینٹ سیل ثریا خاتون نے بتایا کہ یہ نیٹ ورک جامعات کو پراجیکٹس کے لیے مالی امداد اور تعاون بھی فراہم کرتا ہے۔

 کراچی: اینکر مرید عباس سمیت دو افراد کے قتل سے متعلق کیس میں نئی پیشرفت سامنے آئی ہے۔

مرید عباس قتل کیس میں چند روز قبل گرفتار ہونے والے ملزم عادل زمان کو شناختی پریڈ کے لیے جوڈیشل مجسٹریٹ ساؤتھ کی عدالت میں پیش کیا گیا جہاں دو گواہوں نے مرکزی ملزم عاطف زمان کے بھائی عادل زمان کو پہچان لیا۔

گواہوں نے عدالت میں بتایا کہ خضرت حیات کے ساتھ عاطف زمان سے پیسے لینے بخاری کمرشل گئے تھے، عاطف زمان سفید رنگ کی گاڑی میں آیا، عاطف زمان نے خضر حیات کو اپنی طرف بلایا اور فائرنگ شروع کر دی۔

گواہوں نے یہ بھی بتایا کہ عادل زمان بھی فائرنگ کے دوران موٹر سائیکل سے اترا اور بھاگ کر عاطف زمان کی گاڑی بیٹھ گیا۔

انہوں نے بتایا کہ گولیاں لگنے کے بعد خضر حیات زمین پر لیٹ گیا جب کہ فائرنگ کے بعد دونوں ایک ہی گاڑی میں بیٹھ کر فرار ہو گئے۔

 لاہور:سابق وزیر اعظم نواز شریف نے کہا ہے کہ مجھ پر اور میرے خاندان پر جتنے بھی ظلم کر لیں لیکن ہم سرخرو ہوں گے۔

ذرائع کے مطابق سابق وزیر اعظم نواز شریف کو گزشتہ روز عدالت نے جسمانی ریمانڈ پر نیب کی تحویل میں دیا تھا، انہوں نے نیب کے ڈے کئیر سینٹر میں پہلی رات گزاری۔ نواز شریف نے رات کو گھر سے آئے دال چاول کھائے، وہ رات دیر تک جاگتے رہے، دیر تک جاگنے پر سیکورٹی تعینات افسر نے ان سے خیریت دریافت کی۔

نواز شریف کا کہنا تھا کہ ہمیشہ قوم کی خدمت نیک نیتی سے کی ہے اللہ تعالی اپنا کرم کرے گا، آپ لوگ میرے اور میرے خاندان پر جتنے بھی ظلم کر لیں میں اور میرا خاندان سرخرو ہو گا۔