نیویارک: سائنس و ٹیکنالوجی میں حیرت انگیز ترقی کے باوجود نہ صرف دمے کے مرض کو اچھی طرح سمجھا نہیں گیا بلکہ دمے کے دوران سینے اور پھیھپڑوں میں درد کے دورے بھی پڑتے ہیں اور اس کی وجہ بھی درست انداز سے نہیں سمجھی گئی ہے لیکن اب ایک بہت چھوٹے آلے سے یہ راز فاش کرنے میں مدد ملے گی۔

 

یہ بہت چھوٹا سا آلہ ہے جو عین انسانی سانس کی نالیوں کی نقل کرتا ہے اور ظاہر کرتا ہے کہ ’برونکو اسپیسم‘ یا سانس کی نالیوں میں تکلیف کےدوران آخر کس طرح پٹھے سکڑتے اور پھیلتے ہیں۔ یہ اہم کام رٹگرز یونیورسٹی انسٹی ٹیوٹ فار ٹرانسلیشنل میڈیسن اینڈ سائنس کے پروفیسر رینلڈ پینٹائری اور ان کے ساتھیوں نے انجام دیا ہے۔

 

اس طریقے سے سانس کے امراض کے علاج کے نئے طریقے دریافت ہوں گے۔ برونکو اسپیسم صحت مند افراد اور دمے کے مریضوں کو یکساں طور پر متاثر کرتی ہے۔

علاوہ ازیں کرونک آبسٹرکٹوو پلمونری ڈیزیز(سی او پی ڈی) کے مرض میں اور دمے وغیرہ میں ایسا ہوتا ہے کہ سانس کی نالیوں میں کوئی سوزش نہیں ہوتی اور وہ نارمل ہوتی ہیں لیکن اچانک ہموار پٹھے اس شدت سے سکڑتے ہیں کہ سانس لینا دوبھر ہوجاتاہے۔ اس اہم معاملے کو سمجھنا ضروری ہے اور اسی لیے اب تک کسی جانور پر بھی اس مرض کا ماڈل نہیں بنایا گیا ہے۔

 

اس آلے کو ’برونکائی آن چِپ‘ کا نام دیا گیا ہے جو انسانی بال سے بھی ایک ہزار گنا چھوٹا ہے۔ اس پر صحت مند اور دمے کے شکار افراد کے پھیپھڑوں کے خلیات (سیلز) لگائے گئے ہیں۔ یعنی خلوی سطح پر یہ پھیپھڑوں کا ایک حقیقی مگر مائیکرو ماڈل ہے۔

 

ماہرین نے جب آلے میں پھیپھڑوں کی دمے والی تکلیف یا برونکو اسپیسم متعارف کروائے تو انہوں نے دیکھا کہ پہلے خلیات سکڑے اور ان سے ہارمون جسی کوئی شے خارج ہوئی جس نے یا تو مزید سکڑاؤ پیدا کیا یا پھر وہ آرام کی وجہ بنی۔ پھر ماہرین نے دیکھا کہ جب خلیات میں دمے کا دوسرا دورہ متعارف کرایا گیا تو تمام خلوی پٹھے سکون میں آگئے اور ظاہری طور پر ان کا درد دور ہونے لگا۔

 

اس طرح معلوم ہوا کہ خلیات کی سطح پر کس طرح سکڑاؤ اور پھیلاؤ پیدا ہوتا ہے اور اس طرح کئی اقسام کے امراض کو سمجھنا ممکن ہوگا۔

اسلام آباد الیکٹرک سپلائی کمپنی نے وزیراعظم سیکرٹریٹ کو بجلی منقطع کرنے کا نوٹس بھجوا دیا ہے۔

 

وزیراعظم سیکرٹریٹ اسلام آباد الیکٹرک سپلائی کمپنی کا 41 لاکھ 13 ہزار روپے کا نادہندہ نکلا ہے جس کے بعد آئیسکو کی جانب سے وزیراعظم سیکرٹریٹ کو بجلی منقطع کرنے کا نوٹس بھجوا دیا گیا ہے۔

 

وزیراعظم سیکرٹریٹ کے ذمے 41 لاکھ 13 ہزار 992 روپے واجب الادا ہیں، وزیراعظم سیکرٹریٹ کا رواں ماہ کابجلی بل 35 لاکھ روپے سے زائد ہے جب کہ بل کی موجودہ رقم میں 5 لاکھ 58 ہزار سے زائد کے بقایا جات بھی ہیں، آئیسکو ذرائع کا کہنا ہے کہ وزیراعظم سیکرٹریٹ کا کبھی بل جمع کرایا جاتا ہے اور کسی مہینے نہیں کرایا جاتا۔

گزشتہ روز اداکار حمزہ علی عباسی اور اداکارہ نیمل خاور کی ولیمے کی تقریب منعقد ہوئی جس میں وزیر خارجہ شاہ محمود قریشی، عاطف اسلم سمیت متعدد افراد نے شرکت کرکے تقریب کو چار چاند لگادئیے۔

 

رواں ماہ کی 25 تاریخ کو حمزہ علی عباسی اور نیمل خاور سادہ کی تقریب میں رشتہ ازدواج میں منسلک ہوئے اور گزشتہ روز دونوں کی تقریب ولیمہ منعقد ہوئی جس میں وزیر خارجہ شاہ محمود قریشی، ڈی جی آئی ایس پی آر میجر جنرل آصف غفور، گلوکار عاطف اسلم اوراداکار گوہر رشید سمیت متعدد شخصیات نے شرکت کی۔

 

ولیمے کی تقریب میں نیمل خاور سفید، سنہری اور سلور کام والے عروسی لباس میں نہایت خوبصورت نظر آئیں جب کہ حمزہ علی عباسی نے کالے رنگ کا سوٹ زیب تن کیاتھا۔

 

دونوں تقریب کے دوران ہاتھوں میں ہاتھ ڈالے نہایت خوش نظر آئے۔ نیمل خاور تقریب ولیمہ کے لیے روایتی دلہنوں کے برعکس سادے زیورات میں غضب ڈھارہی تھیں۔

 

حمزہ علی عباسی نے اپنے سوشل میڈیا اکاؤنٹس پر اپنے ولیمے کی تصاویر شیئر کیں جن میں ان کے بہترین دوست اداکار گوہر رشید سب سے زیادہ خوش نظر آئے۔ سوشل میڈیا پر حمزہ اورنیمل کی جوڑی کے لیے نیک تمناؤں کا اظہار کیاجارہاہے۔

کراچی: پی سی بی سے این او سی لینا پلیئرزکیلیے کڑا امتحان بن گیا جب کہ ڈائریکٹر انٹرنیشنل کرکٹ کے رویے سے نالاں ایک کھلاڑی نے ایم ڈی سے شکایت کی تو زیرعتاب آ گیا۔

 

غیرملکی لیگز میں شرکت سے قبل کھلاڑیوں کیلیے ضروری ہے کہ وہ اپنے بورڈز سے این او سی حاصل کریں، البتہ پاکستانی کرکٹرز کیلیے اب یہ آسان کام مشکل بن چکا ہے،انھیں یا تو تاخیر سے اجازت ملتی یا انکار کردیا جاتا ہے۔

 

ذرائع نے بتایا کہ گذشتہ دنوں ایک نوجوان ٹیسٹ کرکٹر نے بورڈ سے رابطہ کر کے انگلش کاؤنٹی کی جانب سے چار روزہ میچز اور کیریبیئن پریمیئر لیگ بھی کھیلنے کی اجازت طلب کی، ان کا ابتدائی معاہدہ ٹی ٹوئنٹی بلاسٹ کیلیے تھا۔

کئی روز گزرنے کے باوجود جواب نہ ملا تو انھوں نے براہ راست ایم ڈی/ سی ای او وسیم خان سے واٹس ایپ پر رابطہ کیا جنھوں نے مسئلہ حل کرانے کی یقین دہانی کرا دی۔ مذکورہ کھلاڑی کو علم نہیں تھا کہ یہ بات ان کیلیے بڑا مسئلہ بن جائے گی کیونکہ اس کے بعد انھیں ذاکر خان کے غصے کا سامنا کرنا پڑا، ڈائریکٹر انٹرنیشنل کرکٹ اس پر ناخوش تھے کہ انھوں نے کیوں براہ راست وسیم خان سے رابطہ کیا، یہ معاملہ اب تک حل نہیں ہو سکا ہے۔ بعض دیگر نوجوان کرکٹرز بھی اسی قسم کے مسائل کا شکار ہوئے۔

 

ذرائع نے مزید بتایا کہ سری لنکا سے سیریز کا شیڈول تبدیل ہونے کی وجہ سے بھی کئی کرکٹرز سی پی ایل میں حصہ نہیں لے سکیں گے، ابتدائی پروگرام کے مطابق پہلے ٹیسٹ اور دسمبر میں محدود اوورزکے میچز ہونے تھے۔ اس سے وائٹ بال سے کھیلنے والوں کو ویسٹ انڈیز جانے کا موقع مل جاتا، مگر اب ستمبر اکتوبر میں ون ڈے اور ٹی ٹوئنٹی ہوں گے،اس لیے صرف وہی کرکٹرز کیریبیئن لیگ کھیل سکیں گے جنھیں قومی ٹیم میں جگہ ملنے کا کوئی امکان نہیں ہے۔ واضح رہے کہ ایونٹ کا آغاز 5 ستمبر کو ہوگا۔

 

دوسری جانب رابطے پر پی سی بی کے میڈیا منیجر نے کہا کہ کسی کھلاڑی کا این او سی نہیں روکا گیا، کیریبیئن لیگ کیلیے بھی شعیب ملک، حفیظ اور شاداب خان سمیت 5 کرکٹرز کو اجازت نامے جاری کر دیے گئے ہیں۔

لاہور: فارم اور فٹنس ثابت کرنے کا عزم لیے شعیب ملک جمعرات کو دبئی سے ویسٹ انڈیز روانہ ہوںگے جب کہ آل راؤنڈر کیریبیئن پریمیئر لیگ میں گیانا ایمازون واریئرز کی قیادت کریں گے۔

 

دبئی میں اہلیہ ثانیہ مرزا کے ہمراہ شعیب ملک نے حال ہی میں شادی کرنے والے حسن علی اور سامیعہ کی میزبانی کرتے ہوئے ان کی آئندہ زندگی کیلیے نیک خواہشات کا اظہار کیا،اب آل راؤنڈر کیریبیئن پریمیئر لیگ میں شرکت کیلیے جمعرات کو ویسٹ انڈیز روانہ ہوںگے۔ ٹرینیڈاڈ میں 4ستمبر کو شروع ہونے والے ایونٹ کا فائنل 12اکتوبر کو کھیلا جائے گا۔

 

گذشتہ سال کی رنرز اپ ایمازون واریئرز کی قیادت کرتے ہوئے شعیب ملک کو اپنی فارم اور فٹنس ثابت کرنے کا موقع ملے گا،گذشتہ دنوں انھوں نے کینیڈا پریمیئر لیگ میں213 کی اوسط اور161 کے اسٹرائیک ریٹ سے رنز بنائے، ایونٹ میں انھوں نے صرف ایک بار وکٹ گنوائی اور وہ بھی رن آؤٹ ہوئے تھے۔

ٹی ٹوئنٹی کرکٹ کے کامیاب ترین کھلاڑیوں میں شمار ہونے والے آل راؤنڈر نے مئی 2015میں زمبابوے کیخلاف ہوم سیریز میں کم بیک کرنے کے بعد مختصر فارمیٹ کے میچز میں مسلسل عمدہ کارکردگی کا مظاہرہ کیا ہے،انھوں نے اس دوران 52میچز میں 40.75 کی اوسط اور 141کے شاندار اسٹرائیک ریٹ سے 1304 رنز بنائے،اس دوران شعیب ملک نے 109چوکے اور 43چھکے لگائے۔

 

تجربہ کار آل راؤنڈر نے ٹیسٹ کرکٹ کو خیر باد کہہ دیا تھا، ورلڈکپ کے بعد ون ڈے سے بھی ریٹائرمنٹ کا اعلان کردیا، وہ مختصر فارمیٹ میں ملک کی نمائندگی جاری رکھتے ہوئے آئندہ سال آسٹریلیا میں ہونے والے ورلڈ ٹی ٹوئنٹی میں بھی شرکت کرنے کی خواہش کا اظہار کر چکے ہیں، پاکستان کو سری لنکا کیخلاف 5،7اور 9اکتوبر کو لاہور میں ٹی ٹوئنٹی میچز کھیلنا ہیں، شعیب ملک کو اس سیریز کیلیے کیریبیئن پریمیئر لیگ ادھوری چھوڑ کر وطن واپس آنا ہوگا۔

 

 

 

 

 

 

واشنگٹن: امریکی صدر ڈونلڈ ٹرمپ نے بہتر حالات میں ایرانی ہم منصب حسن روحانی سے ملاقات کے لیے رضامندی کا اظہار کردیا۔

 

تفصیلات کے مطابق فرانس میں جی سیون اجلاس کے بعد فرانسیسی صدر ایمانوئیل مکرون اور امریکی ہم منصب ڈونلڈ ٹرمپ نے مشترکہ پریس کانفرنس کی۔

 

غیر ملکی خبر رساں ادارے کے مطابق صحافیوں سے گفتگو کرتے ہوئے صدر ٹرمپ کا کہنا تھا کہ اگر حالات سازگار رہے تو حسن روحانی سے ملنے کے لیے تیار ہیں۔

 

انہوں نے ایران سے متعلق کا اظہار کرتے ہوئے کہا کہ مجھے پوری امید ہے ایران ایک عظیم ملک بن سکتا ہے لیکن جوہری ہتھیار نہیں رکھ سکتا۔

 

دریں اثنا فرانسیسی صدر ایمانوئیل میکرون کا کہنا تھا کہ امریکا اور ایران کے سربراہان کے درمیان جلد ملاقات کی امید ہے، تاہم کوئی حتمی تاریخ نہیں بتائی جاسکتی البتہ اس حوالے سے ماحول بنایا جارہا ہے۔

 

 

خیال رہے کہ ایرانی وزیرخارجہ جواد ظریف نے بھی جی سیون اجلاس میں شرکت کی تھی، اس موقع پر ٹرمپ کا کہنا تھا کہ وہ ایرانی وزیرخارجہ جواد ظریف کی جی -7 سربراہی اجلاس میں آمد کو خوش آمدید کہتے ہیں اور ان کی عزت بھی کرتے ہیں۔

 

امریکی صدر نے جی-7 سربراہی اجلاس میں بات چیت کرتے ہوئے دعویٰ کیا کہ فرانس کے صدر نے ایرانی وزیرخارجہ کی آمد سے قبل ان سے اس اقدام کی منظوری لی تھی۔

 

قبل ازیں ایرانی صدر حسن روحانی نے اپنے بیان میں کہا کہ وہ ملکی مفاد اور حالات کی بہتری کے لیے کسی سے بھی ملنے کے لیے تیار ہیں۔

سابق ٹیسٹ کپتان یونس خان کی والدہ علالت کے باعث انتقال کرگئیں۔

 

خاندانی ذرائع کے مطابق یونس خان کی والدہ کچھ عرصے سے علیل تھیں اور کراچی کے نجی اسپتال میں زیرعلاج تھیں۔

 

نجی ٹی وی سے گفتگو کرتے ہوئے یونس خان نے کہا کہ والدہ میرے ساتھ رہتی تھیں، ان کی عمر87 سال تھی۔ والدہ گزشتہ ڈیڑھ ،2 سال سے بیمار تھیں اور ڈائی لیسز پر تھیں۔ یونس خان کی والدہ کی تدفین مردان میں کی جائے گی۔

اسلام آباد: وزیراعظم عمران خان نے سعودی ولی عہد محمد بن سلمان بن عبدالعزیز سے ٹیلی فونک رابطہ کرکے کشمیر کی تازہ ترین صورتحال سے آگاہ کیا۔

 

ذرائع کے مطابق وزیراعظم عمران خان کا سعودی ولی عہد محمد بن سلمان بن عبدالعزیز سے ٹیلی فونک رابطہ ہوا ہے۔ وزیراعظم نے سعودی ولی عہد کو مقبوضہ کشمیر کی تازہ ترین صورتحال سے آگاہ کیا۔ جب کہ دونوں رہنماؤں نے خطے کی حالیہ صورتحال پر بھی تبادلہ خیال کیا۔

 

واضح رہے کہ اس سے قبل 20 اگست کو بھی سعودی عرب کے ولی عہد اور وزیراعظم عمران کے درمیان ٹیلی فونک رابطہ ہوا تھا اور دونوں رہنماؤں کے درمیان کشمیر کے معاملے پر تبادلہ خیال ہوا تھا۔

واشنگٹن: امریکی نمائندہ خصوصی برائے افغان مفاہمتی عمل زلمے خلیل زاد کا کہنا ہے کہ ہم اب افغان فورسز کا دفاع کررہے ہیں اور ہم طالبان سے معاہدے کے بعد اسے جاری رکھیں گے۔

 

سماجی رابطے کی ویب سائٹ ٹویٹر پر زلمے خلیل زاد نے اپنے پیغام میں کہا کہ تمام گروہوں نے تسلیم کیا ہے کہ افغانستان کا مستقبل افغانستان میں اندرونی مذاکرات کے ذریعے طے کیا جائے گا۔

 

زلمے خلیل زاد نے ان رپورٹس کو مسترد کردیا ہے جس میں طالبان کے حوالے سے کہا گیا تھا کہ معاہدے کے مطابق امریکا، افغان حکومت اور اس کی فورسز کی مدد نہیں کرے گا۔

 

امریکی نمائندہ خصوصی برائے افغان مفاہمتی عمل کا کہنا تھا کہ کسی کو بھی حق حاصل نہیں کہ وہ اشتہارات کے ذریعے کسی کو بھی دھمکی دے یا دھوکہ دے۔

 

زلمے خلیل زاد کا کہنا تھا کہ میں یہ واضح کردینا چاہتا ہوں کہ ہم اب افغان فورسز کا دفاع کررہے ہیں اور ہم طالبان سے معاہدے کے بعد اسے جاری رکھیں گے۔

 

 

یاد رہے کہ گزشتہ دنوں امریکی نمائندہ خصوصی برائے افغانستان زلمے خلیل زاد کا کہنا تھا کہ افغان امن معاہدے پر بڑی پیش رفت ہوئی ہے امید ہے کہ طالبان سے امن معاہدہ جلد ہوجائے گا۔

لاہور: مسلم لیگ (ن) کے صدر شہباز شریف نے کہا ہے کہ نواز شریف کو کچھ ہوا تو عمران خان نیازی اور پنجاب حکومت مجرم ہوں گے۔

 

مسلم لیگ (ن) کے صدر شہباز شریف نے سابق وزیراعظم اور پارٹی کے تاحیات قائد نواز شریف کی صحت کو لاحق خطرات کو نظرانداز کرنے کی مذمت اور احتجاج کرتے ہوئے کہا ہے کہ نواز شریف کو دل، ذیابیطس اور گردوں کے علاوہ متعدد امراض کا سامنا ہے، انہیں 24 گھنٹے خصوصی طبی توجہ کی ضرورت ہے لیکن جان بوجھ کر لاپرواہی اور غفلت برتی جارہی ہے، ان کے علاج میں غفلت کے سنگین نتائج برآمد ہوسکتے ہیں۔

 

صدر مسلم لیگ (ن) کا کہنا تھا کہ نوازشریف کی صحت کے لئے معالج اپنی تشویش سے متعلقہ حکام کو مسلسل آگاہ کررہے ہیں، نوازشریف کے معالج نے چیف سیکریٹری پنجاب کو خط لکھ کر صورت حال پر ایک بار پھر اپنی تشویش سے آگاہ کیا ہے، سیاسی مخالفت پر صحت کی سنگین صورتحال سے دوچار شخص سے علاج چھیننا قتل کی سازش ہے۔

شہباز شریف کا کہنا تھا کہ نوازشریف کی صحت کو خطرات پر مطلوبہ ایمبولنس دینے سے انکار کی خبر عمران حکومت کے انتقام اور چھوٹے پن کا واضح ثبوت ہے، خدانخواستہ ہارٹ اٹیک کی صورت میں وینٹی لیٹر اور دیگر ضروری مشینیں دستیاب نہ ہوں تو ایسی ایمبولنس کا کیا فائدہ؟ نواز شریف کو ہنگامی طبی امداد کی فراہمی میں جان بوجھ کر لاپرواہی اور غفلت کا حکومتی رویہ مجرمانہ ہے، 2 سرکاری اسپتالوں کا امراض قلب کی مناسب مشینوں سے لیس ایمبولینس فراہم کرنے سے انکار سیاسی انتقام کی تازہ مثال ہے۔ شواہد کی بنیاد پر کہہ رہے ہیں کہ اگر نواز شریف کو کچھ ہوا تو عمران خان نیازی اور پنجاب حکومت مجرم ہوں گے۔