ایمزٹی وی (انٹرٹینمنٹ)پاکستانی اداکارہ صباقمر کی فلم ’’ہندی میڈیم‘‘ باکس آفس پر کمال نہ دکھا سکی۔ صبا قمر کی پہلی بالی وڈ فلم’’ہندی میڈیم‘‘ اور شردھاکپور کی فلم’’ہاف گرل فرینڈ‘‘ ایک ساتھ نمائش کے لیے پیش کی گئیں جو فلاپ ہوگئی ہے ۔ ذرائع کے مطابق صبا قمر کی فلم پہلے روز باکس آفس پر کوئی خاطر خواہ کمائی نہیں کرسکی اور شردھا کی فلم’’ہاف گرل فرینڈ‘‘ نے باکس آفس پر اسے مات دے دی ۔ عرفان خان اورصباقمر کی فلم 2 بھارتی ریاستوں میں ٹیکس فری ہونے کے باوجود فلم بینوں کی توجہ نہ حاصل کرسکی اور فلم نے پہلے روزصرف 2 کروڑ 81 لاکھ کی کمائی کی اس کے مدمقابل فلم’’ہاف گرل فرینڈ‘‘نے پہلے روز 10 کروڑ 27 لاکھ کا بزنس کیا۔ واضح رہے کہ فلم’’ہندی میڈیم‘‘ میں عرفان خان اور صبا قمر جب کہ ’’ہاف گرل فرینڈ‘‘ میں شردھا کپور اور ارجن کپور نے مرکزی کردار ادا کیا ہے۔

ایمزٹی وی (انٹرٹینمنٹ)ہریتھک روشن کو 2005 کی بلاک بسٹر فلم’’نوانٹری‘‘ کے سیکوئل میں سلمان خان کی جگہ کاسٹ کرلیاگیا۔ ہدایتکار انیس بزمی کی 2005 میں ریلیز ہونے والی فلم’’نو انٹری‘‘ میں سلمان خان ، انیل کپور اور فردین خان نے مرکزی کردار ادا کیا تھا جب کہ کامیڈی فلم کو مداحوں کی جانب سے بے حد پسند کیا گیا اور فلم کے پروڈیوسر بونی کپور اور انیس بزمی نے اسی کاسٹ کے ساتھ فلم کے سیکوئل کا اعلان کیا لیکن اب فلم سے سلمان خان کو آؤٹ کردیا گیا۔ بھارتی میڈیا رپورٹس کے مطابق ہدایت کار انیس بزمی کی جانب سے ’’نوانٹری‘‘ کے سیکوئل کے اعلان کے بعد سے ہی فلم تعطل کا شکار ہے اور اس کی وجہ سلمان خان ہیں جو اپنی فلمی مصروفیات کے باعث فلم کی شوٹنگ کے لئے وقت نہیں نکال پارہے جس کا حل ہدایت کارنے یہ نکالا کہ انہیں فلم کی کاسٹ سے ہی علیحدہ کردیا گیا۔ اوراب فلم کے سیکوئل میں ہریتھک روشن سلومیاں کی جگہ لیں گے اور ڈبل کردار میں نظر آئیں گے جب کہ فلم کی حتمی کاسٹ اور شوٹنگ شیڈول کا اعلان بھی آئندہ چند روز میں کردیا جائے گا۔ واضح رہے کہ سلمان خان نئی آنے والی فلم’’ٹائیگر زندہ ہے‘‘ کی شوٹنگ میں مصروف ہیں جس کے فوری بعد وہ ’’دبنگ 3‘‘ کی شوٹنگ میں مصروف ہوجائیں گے۔

ایمزٹی وی (انٹرٹینمنٹ)بالی ووڈ اداکارہ دپیکا پڈوکون نے اپنا مستقبل بتاتے ہوئے کہا ہے کہ کہ 70 برس کی عمر میں میرا ایک گھر اور بہت سے بچے ہوں گے۔ بین الاقوامی میڈیا کو انٹرویو دیتے ہوئے دپیکا پڈوکون نے اپنی خواہش کا اظہار کرتے ہوئے بتایا ہے کہ وہ پُر امید ہیں کہ 70 برس کی عمر میں اِن کا کسی پرسکون مقام پر ایک خوبصورت گھر ہوگا، جس میں وہ اپنے بہت سے بچوں اور پوتے پوتیوں اور نوانے نواسیوں کے ساتھ ایک خوش و خرم زندگی گزاریں گی۔ ہالی ووڈ میں کام کے تجربے کے حوالے سے دیپیکا کا کہنا تھا کہ ’’ٹرپل ایکس: ریٹرن آف ژینڈر کیج‘‘ میں کام کا تجربہ بہت اچھا رہا، اس کی وجہ فلم میں ان کے مدمقابل اداکار وین ڈیزل ہیں، وہ مجھ سے بہت محبت کرتے ہیں، وہ بہت اچھے اور سخی انسان ہیں۔ اپنی زندگی میں ملنے والے تمام لوگوں میں وہ سب سے منفرد انسان ہیں، ان سے میری دوستی زندگی بھر کے لیے ہوئی ہے۔ یاد رہے کہ وہ 70ویں کینز فلم فیسٹیول کی تقریب میں شریک تھیں جہاں ان کی شاندار آمد نے سب کو اپنی جانب متوجہ کرلیا تھا۔

ایمزٹی وی (تجارت)وزیر اعظم نواز شریف نے صدر ممنون حسین کو وفاقی بجٹ 18-2017 پیش کرنے کے لیے قومی اسمبلی اور سینیٹ کا علیحدہ اجلاس 24 اور 26 مئی کو بلانے کے لیے باضابطہ پیغام بھیجا دیا ہے۔ سرکاری ذرائع کے مطابق وزیر اعظم نواز شریف نے صدر ممنون حسین کو بجٹ سمری بھی ارسال کی ہے جبکہ سالانہ صدارتی خطاب کے لیے ان سے یکم جون کو پارلیمنٹ کا مشترکہ اجلاس بلانے کی بھی درخواست کی ہے۔ خفیہ ذرائع کا کہنا ہے کہ حکومت نے سرکاری ملازمین کی تنخواہوں اور سرکاری ملازمین کی پینش میں اضافہ کرنے کا فیصلہ کر لیا ہے تاہم ابھی تک اس اضافے کی شرح کا فیصلہ نہیں ہوا ہے۔ ذرائع کایہ بھی کہنا ہے کہ آئندہ مالی سال کے بجٹ میں کسی بھی قسم کا ریلیف نظر نہیں آتا جب تک وزیر اعظم خود اس میں مداخلت نہ کریں۔ ذرائع نے بتایا کہ وزیر اعظم نواز شریف سعودی عرب سے واپسی پر بجٹ کے حوالے سے ایک خصوصی اجلاس بلائیں گے۔ ٹیکس حکام نے بتایا کہ وزیر خزانہ کی تقریر کا وہ حصہ جس میں ٹیکس کی شرح اور بنیادی ٹیکس کو وسعت دینے کی بات کی جاتی ہے اس کا ابھی تک فیصلہ نہیں ہوا ہے۔ ذرائع کا کہنا ہے کہ آئندہ مالی سال کے بجٹ میں نئے ٹیکس شامل نہیں کیے جائیں گے بلکہ ان ٹیکس شرح کو معقول بنانے اور مرحلہ وار ٹیکس کو ختم کرنے پر توجہ مرکوز ہوگی۔ ذرائع کے مطابق مقامی صنعت کو مراعات فراہم کر نے کے لیے خام مال پر ٹیکس اور ڈیوٹی کو کم کر دیا جائے گا۔ ٹیرف، ٹیکس اور ڈیوٹی پر تبدیلی کے حوالے سے ایک تفصیلی سمری بھی وزارت تجارت کی جانب سے جمع کرائی گئی ہے جو اسٹیک ہولڈر کی جانب سے موصول ہونے والی تجاویز پر مبنی ہے۔ٹیکس حکام کی جانب سے گزشتہ روز اب تک مکمل ہونے والی سفارشات پر وزیر خزانہ کو ایک خصوصی پریزینٹیشن دی گئی۔ ذرائع کے مطابق یہ فیصلہ ہو چکا ہے کہ حکومت ٹیکسٹائل، چمڑا، کھیل، کارپیٹ اور سرجیکل سامان کی صنعت پر صفر ریٹنگ برقرار رکھے گی۔ ٹیکس حکام کا کہنا تھا کہ وہ چاول، مچھلی، گوشت اور فارماسوٹیکل کے شعبوں کو بھی صفر ریٹنگ میں شامل کرنے پر غور کر رہے ہیں۔ ذرائع کے مطابق اسٹاک مارکیٹ کے لیے ٹیکس میں ایک اہم ریلیف کی توقع ہے جبکہ اسٹاک ایکسچینج میں نئی کمپنیوں کی توجہ حاصل کرنے کے لیے ٹیکس کریڈٹ کی حد کو چار سال تک بڑھایا جاسکتا ہے جو اس وقت 2 سال پر محیط ہے۔ ذرائع کا کہنا ہے کہ اس سال کمیشن اور اسٹاک ایکسچینج سروسز پر ودہولڈنگ ٹیکس کی شرح کو بھی کم کیے جانے کا امکان ہے۔ یہ تجویز بھی زیر غور ہے کہ تنخواہ دار طبقے کے لیے انکم ٹیکس سے مستثنیٰ قرار دینے کی حد کو 4 لاکھ روپے سالانہ تنخواہ سے بڑھا کر 5 لاکھ روپے سالانہ کردیا جائے ۔ ٹیکس حکام رہائشی فرد کی تعریف میں تبدیلی کے لیے بھی ایک تجویز پر کام کر رہے ہیں تاہم اگر حکومت اس پیشکش پر رضا مند ہوتی ہے تو تمام شہریوں کو بیرون ملک اپنے اثاثہ جات کو ظاہر کرنے پر پابند کیا جائے گا۔ یہ تجویز بھی زیر غور ہے کہ ٹیکس گوشوارے جمع کرانے والوں کے گزشتہ 10 برس کے ٹیکس کی تفصیلات کی چھان بین کی جاسکے جبکہ اس وقت یہ حد صرف 5 سال تک محدود ہے۔ ٹیکس گوشوارے جمع نہ کرانے والے افراد کے گزشتہ 10 برس کی ٹیکس تفصیلات کی چھان بین کی جاسکتی ہے۔ ذرائع کے مطابق فیڈرل بورڈ آف ریونیو ( ایف بی آر) دو بڑے کرداروں کی سفارشات پر سگریٹ پر ڈیوٹی ختم کرنا چاہتا ہے جبکہ وزارت صحت نے اس میں اضافے کا مطالبہ کیا ہے۔