ایمزٹی وی (اسپورٹس)پاکستانی نژاد برطانوی باکسر عامر خان کے داتا دربارحاضری کے موقع پر صحافی نے سوال پوچھ لیا کہ بختاور کو باکسنگ سکھائی ،کیا مریم کو بھی سکھائیں گے؟ جس کا جواب دیتے ہوئے باکسر نے کہا کہ نیوٹرل آدمی ہوں اس لئے سب کو باکسنگ سکھاﺅں گا۔ میڈیا ذرائع کے مطابق پاکستان کے دورہ پر آئے ہوئے معروف باکسر عامر خان نے مزید کہا کہ بختاور بھٹو کو باکسنگ کا شوق ہے اور وہ باکسنگ سیکھنا چاہتی ہے جبکہ ان کی خواہش اور شوق پر باکسنگ کے گر سکھائے۔ یاد رہے کہ گزشتہ دنوں سوشل میڈیا پر ایک ویڈیو جاری کی گئی تھی جس میں سابق صدر آصف زرداری کی بیٹی بختاور بھٹو عامر خان سے باکسنگ سیکھتے ہوئے نظر آئی جس کے بعد باکسر کا کہنا تھا کہ بختاور ان کی اہلیہ کی دوست ہیں اور وہ باکسنگ سیکھنا چاہتی ہیں۔
ایمزٹی وی (اسپورٹس)کرکٹر خالد لطیف اور ان کے وکیل بدر عالم نے اسپاٹ فکسنگ اسکینڈل کیس کی سماعت کا بائیکاٹ کرتے ہوئے اس کارروائی کو جانبدارانہ قرار دیدیا ہے۔ ان کا کہنا ہے کہ یہ اینٹی کرپشن ٹربیونل نہیں بلکہ جرگہ ہے کیونکہ تنظیمی کمیٹی کے سربراہ کی ٹربیونل کے انچارج بھی ہیں۔ خالد لطیف نے ٹریبول کے سربراہ جسٹس ریٹائرڈ اصغر حیدر پر بھی عدم اعتماد کا اظہار کیا ہے۔ تفصیلات کے مطابق خالد لطیف اور ان کے وکیل بدر عالم نے اینٹی کرپشن ٹریبونل کی سماعت کا بائیکاٹ کرتے ہوئے اس میں مزید شرکت سے انکار کر دیا ہے۔ خالد لطیف کے وکیل بدر عالم نے کہا کہ ٹریبونل کی کارروائی جانبدارانہ ہے اور 19 مئی کو ہمارے ساتھ بدسلوکی ہوئی۔ ہم نے 19 مئی کی کارروائی کی ویڈیو طلب کی لیکن ٹربیونل نے دینے سے انکار کر دیا ہے اور جب تک ویڈیو نہیں ملے ، ٹربیونل کے سامنے پیش نہیں ہوں گے۔ بدر عالم نے کہا کہ پی سی بی اینٹی کرپشن کے ضابطہ اخلاق کو نہیں مانتے جبکہ اینٹی کرپشن ٹریبونل نہیں بلکہ جرگہ ہے اور عجیب بات ہے کہ تنظیمی کمٹی کے سربراہ ہی ٹریبونل کے چیئرمین بھی ہیں۔ پی سی بی تنظیمی کمیٹی کے چیئرمین کا فیصلہ ہونے تک بائیکاٹ کریں گے اور پی سی بی کو بتا دیا ہے کہ ہم بھاگ نہیں رہے۔
ایمزٹی وی (اسلام آباد)دورہ سعودی عرب کے دوران وزیراعظم نواز شریف اور امریکی صدر ڈونلڈ ٹرمپ کی ملاقات نہیں ہوگی۔ ترجمان دفتر خارجہ نے کہا ہے کہ بعض میڈ یا رپورٹس میں کہا گیا نواز شریف اور ڈونلڈ ٹرمپ سعودی عرب میں ملاقات کریں گے تاہم وزیراعظم نواز شریف کی ریاض میں اسلامک سمٹ کی سائیڈ لائن پر ڈونلڈ ٹرمپ سے ملاقات نہیں ہو گی ۔ انہوں نے کہا کہ طویل سمٹ کا ایجنڈ ہ مکمل ہے جس میں اسلامی دنیا کے 35سربراہان شرکت کر رہے ہیں جس کے باعث سائیڈ لائن پر دو طرفہ ملاقات نہیں ہو گی ۔امریکہ عرب اور اسلامک سمٹ میں او آئی سی ،عرب لیگ اور جی سی سی کے سیکریٹری جنرل بھی شرکت کریں گے ۔ واضح رہے امریکی صدر ڈونلڈ ٹرمپ امریکہ ،عرب اور اسلامی سمٹ میں شرکت کیلئے سعودی عرب پہنچ چکے ہیں اور اہلیہ میلانیا اور ان کی بیٹی ایوانکا ٹرمپ بھی ان کے ہمراہ ہیں جبک وزیراعظم میاں نواز شریف کل سعودی عرب روانہ ہونگے۔
ایمزٹی وی(تجارت)قائداعظم سولر پارک ملکی تاریخ کا مہنگا ترین منصوبہ بن گیا تاہم منصوبے پر200 ارب روپے خرچ کرنے کے بعد صرف 160 میگاواٹ بجلی حاصل ہو سکی۔ ذرائع کے مطابق ابھی تک صرف 400میگاواٹ کے پلانٹس لگائے گئے ہیں جس میں سے 100 میگاواٹ کا ایک پلانٹ پنجاب حکومت نے لگایا اور 300 میگاواٹ کا پلانٹ زونرجی کمپنی نے لگایا، زونرجی نے 900 میگاواٹ کا پلانٹ لگانا تھا تاہم منصوبہ تاخیر کاشکار ہوتا نظر آ رہا ہے، منصوبے کے ٹیرف کے حوالے سے بھی مسئلہ پیدا ہو گیا ہے، کمپنی زیادہ ٹیرف مانگ رہی ہے اورحکومت کم ٹیرف دے رہی ہے۔ واضح رہے کہ منصوبے کا پلانٹ فیکٹر صرف 16 فیصد ہے، منصوبہ زیادہ بجلی پیدا ہی نہیں کر سکتا۔ دوسری جانب ماہرین نے اس نشاندہی کی تھی کہ پلانٹ کی تعمیر سے قبل گرڈ کو بہتر کیا جائے بصورت دیگرمنصوبے سے مطلوبہ نتائج حاصل نہیں ہوسکیں گے تاہم منصوبے سے ایک میگاواٹ بجلی 10کروڑ میں حاصل ہو رہی ہے۔
ایمزٹی وی (تجارت)پاکستان سے آم کی برآمدات آج سے شروع کی جارہی ہیں۔ پاکستان فروٹ اینڈ ویجیٹیبل ایکسپورٹرز امپورٹرز اینڈ مرچنٹس ایسوسی ایشن کے رواں سیزن ایک لاکھ ٹن آم برآمد کرنے کا ہدف مقرر کیا ہے۔ ایسوسی ایشن کے سرپرست اعلیٰ وحید احمد کے مطابق گزشتہ سال پاکستان سے آم کی برآمدات ہدف سے زائد رہی تھیں۔ گزشتہ سیزن کے لیے ایک لاکھ ٹن آم کی برآمد کا ہدف مقرر کیا گیا تھا تاہم سیزن کے اختتام تک ایکسپورٹ ایک لاکھ 28ہزار ٹن تک پہنچ گئی تھی جس سے 68ملین ڈالر کا زرمبادلہ حاصل ہوا۔ وحید احمد کے مطابق رواں سیزن موسمیاتی تغیر کی وجہ سے پنجاب میں آم کی فصل کو شدید نقصان پہنچا ہے جس کی وجہ سے ایکسپورٹ کا ہدف بھی محتاط رہتے ہوئے ایک لاکھ ٹن مقرر کیا گیا ہے۔ پنجاب میں آم کے علاقوں میں دیر تک سردی رہنے، ژالہ باری اور تیز ہواؤں کی وجہ سے پاکستان میں آم کی مجموعی پیداوار 18لاکھ ٹن میں سے 6لاکھ ٹن پیداوار متاثر ہونے کا خدشہ ہے۔ پاکستان میں آم کی مجموعی پیداوار میں پنجاب کا حصہ 67فیصد ہے جہاں سخت موسم کی وجہ سے 50فیصد پیداوار کو نقصان پہنچا ہے جبکہ موسم کے حتمی نتائج جون تک پنجاب کی فصل مارکیٹ میں آنے سے ہوگا۔ انہوں نے بتایا کہ پاکستان سے آم دنیا کے 50ملکوں کو ایکسپورٹ کیا جاتا ہے تاہم رواں سیزن چین، امریکا اور ساؤتھ کوریا پر خصوصی توجہ مرکوز کی جائیگی۔ چین پاکستان کی وسیع منڈی بن سکتا ہے جہاں حکومت کے تعاون سے پاکستانی آم کی تشہیر اور مارکیٹنگ کے لیے خصوصی سرگرمیاں منعقد کی جائیں گی۔ وحید احمد کے مطابق رواں سیزن یورپی ممالک کو بھی پاکستان سے آم کی برآمدات بڑھانے پر توجہ دی جائیگی۔ رواں سیزن آم 650ڈالر فی ٹن قیمت پر ایکسپورٹ کیا جائے گا گزشتہ سیزن 680سے 700ڈالر فی ٹن تک قیمت پرآم ایکسپورٹ کیا گیا تھا۔ رواں سیزن رمضان اور آم کی ایکسپورٹ کا سیزن ایک ساتھ شروع ہورہے ہیں اس وجہ سے پاکستانی آم کے لیے مسلم ممالک سمیت مسلم آبادی والے مغربی ملکوں میں بھی بھرپور امکانات موجود ہیں تاہم پاکستان میں گڈز ٹرانسپورٹ کی طویل ہڑتال اور بندگاہوں پر کنسائمنٹس کی اژدہام کی صورتحال کی وجہ سے بھی آغاز میں ایکسپورٹ دباؤ کا شکار رہنے کا خدشہ ہے۔ وحید احمد کے مطابق کلائمٹ چینج اس وقت ہارٹی کلچر سیکٹر سمیت پورے زرعی شعبے کے لیے سب سے بڑا چیلنج ہے جس کا ٹیکنالوجی میں حل موجود ہے۔ علاوہ ازیں جدید ٹیکنالوجی کے ذریعے فصلوں کو ژالہ باری سے تحفظ فراہم کیا جاسکتا ہے اس مقصد کے لیے ضروری ہے کہ سندھ اور پنجاب کی صوبائی حکومتیں آئندہ بجٹ میں ژالہ باری سے نمٹنے کے لیے ٹیکنالوجی کے لیے خصوصی فنڈز مختص کریں تاکہ زرعی معیشت کو پہنچنے والے اربوں روپے کے نقصان سے بچاجاسکے۔ وحید احمد نے وفاقی حکومت پر زور دیا کہ ہارٹی کلچر ایکسپورٹ کی لاگت کم کرنے کے لیے اپنا وعدہ پورا کرتے ہوئے آئندہ وفاقی بجٹ میں پھل اور سبزیوں کی ایکسپورٹ کے لیے 7فیصد مالی معاونت کا اعلان کیا جائے ساتھ ہی ایک فیصد ودہولڈنگ ٹیکس کا نفاذ سی اینڈ ایف کے بجائے ایف او بی پرائس پر کیا جائے کیونکہ پھل اور سبزیوں کی قیمت سے کہیں زیادہ فریٹ کی لاگت ہے۔ انہوں نے حکومت پر زور دیا کہ فضائی کمپنیوں کی جانب سے پاکستان کے ساتھ امتیازی پالیسی کا بھی سختی سے نوٹس لیتے ہوئے غیرملکی فضائی کمپنیوں کو مناسب فضائی کرایہ مقرر کرنے کا پابند کیا جائے۔ واضح رہے کہ غیرملکی فضائی کمپنیاں بھارت (ممبئی) سے لندن کے لیے آم کا فریٹ 1.26 ڈالر فی کلو گرام جبکہ پاکستان (کراچی) سے لندن کے لیے 1.70 ڈالر فی کلو گرام فریٹ وصول کررہی ہیں جس سے پاکستان کی لاگت میں اضافہ اور مسابقتی صلاحیت میں کمی ہورہی ہے۔
ایمزٹی وی (تجارت)پاکستان کی معاشی ترقی کے چرچے بھارتی اخباروں میں بھی ہونے لگے۔ بھارتی اخبار کے مطابق پاکستانی معیشت عالمی مالیاتی بحران سے پہلے کی رفتار سے ترقی کرنے لگی ہے۔ بھارتی اخبار نے پاکستان کی نیشنل اکاؤنٹ کمیٹی کے اعداد و شمار کا حوالہ دیتے ہوئے کہا کہ پاکستانی معیشت کی شرح نمو رواں مالی سال کے دوران 5 اعشاریہ 3 فیصد رہی جو گزشتہ 10سال کی بلند ترین شرح ہے۔ علاوہ ازیں بھارتی اخبار کے مطابق رواں سال کی معاشی ترقی کے سبب پاکستانی معیشت کا حجم 300ارب ڈالر سے تجاوز کر چکا ہے۔
