بنگلادیش کرکٹ بورڈ نے ہائبرڈ ماڈل کے تحت ایشیا کپ 2023 کے میچز دبئی میں کرانے کی مخالفت کر دی۔

بی سی بی ذرائع کے مطابق ہائبرڈ ماڈل پر کوئی اعتراض نہیں ہے لیکن یو اے ای کا وینیو قبول نہیں، وہاں گرمی بہت زیادہ ہے اس لیے کرکٹرز راضی نہیں ہیں۔

بنگلادیش بورڈ کا کہنا ہے کہ ایونٹ کے سری لنکا میں بھی ہونے پر کوئی اعتراض نہیں، پی سی بی سے اچھے تعلقات ہیں اور پاکستان جانے سے انکار نہیں ہے۔

بی سی بی کے مطابق ایشیاکپ ایک ہی وینیو پر ہو تو یہ زیادہ مناسب بات ہے، پاکستان میزبان ہے، اے سی سی اور پاکستان نے مل کر فیصلہ کرنا ہے۔

ذرائع کا کہنا ہے کہ کچھ لو اور کچھ دو کی بنیاد پر ایونٹ پاکستان کی میزبانی میں نیوٹرل وینیو پر کرانے پر بات ہو گی، اے سی سی کے اہم اجلاس میں تمام تر معاملات پر بات ہوگی۔

بھارت چیمپئنز ٹرافی کے لیے پاکستان آنے کی تحریری حامی بھر سکتا ہے، بھارت کے حامی بھرنے کی صورت میں پاکستان ورلڈ کپ کھیلنے بھارت جاسکتا ہے۔

کراچی: فخر زمان نے نیوزی لینڈ سے ون ڈے سیریز میں میلہ لوٹ لیا۔ فخرزمان 363 رنز بناکر ٹاپ اسکورر ثابت ہوئے۔

انھوں نے 5 مواقع ملنے پر ایک بار ناٹ آؤٹ رہتے ہوئے 90.75 کی اوسط پائی،180 ناٹ آؤٹ ان کی بہترین کاوش شمار ہوئے، انھوں نے سیریز میں لگاتار دو سنچریاں جڑیں۔

کپتان بابراعظم سیریز کے آخری اور کیریئر کے سنچری ون ڈے میچ میں صرف ایک رن بناکر میدان بدر ہوئے، انھوں نے مجموعی طور پر 276 رنز بنائے، ان کی بہترین کاوش 107 رنز رہی۔ امام الحق نے 3 میچز میں 174 رنز اپنے نام درج کرائے۔

پاکستانی وکٹ کیپر بیٹر محمد رضوان نے 161 رنز جوڑے، آغا سلمان نے 5 میچز میں 4 بار بیٹنگ ملنے پر 153 رنز اپنے نام کیے، افتخار احمد 101 رنز بناکر نمایاں رہے۔

شاداب خان نے 35 رنز جوڑے، عبداللہ شفیق 26، شاہین شاہ آفریدی 23 ، اسامہ میر 20، محمد نواز 19اور محمد حارث 17 رنز بنانے میں کامیاب رہے۔

دوسری جانب بولنگ میں پاکستانی فاسٹ بولر حارث رؤف نے سب سے زیادہ 9 وکٹیں اڑائیں، شاہین شاہ آفریدی نے 8 شکار کیے، محمد وسیم اور اسامہ میر نے 6، 6 پلیئرز کو میدان بدر کیا، نسیم شاہ اور ایڈم ملن نے 5،5 وکٹیں اڑائیں، شپلے نے 4 جبکہ شاداب خان نے 3 وکٹیں لیں۔

کراچی: نیوزی لینڈ کرکٹ ٹیم پاکستان میں ٹی ٹوئنٹی اور ون ڈے سیریز کھیلنے کےبعد وطن واپس روانہ ہو گئی۔

سماجی رابطے کی ویب سائٹ ٹوئٹر پر جاری کیے گئے پیغام میں نیوزی لینڈ کرکٹ ٹیم نے کہا ہے کہ لاہور ، کراچی اورپنڈی میں 10 میچز کھیلنے کے بعد اپنے گھر واپس جا رہے ہیں۔ 

کیویز ٹیم نے پاکستان میں مہمان نوازی کا شکریہ بھی ادا کیا۔

کراچی: سندھ میں آج سے گرمی بڑھنے کی پیش گوئی کی گئی ہے۔

بعض علاقوں میں درجہ حرارت 44 ڈگری تک جا نے کا امکان ہے۔

کراچی میں بھی تین دن درجہ حرارت 36 سے 38 ڈگری رہنے کی پیشگوئی کی گئی ہے۔

محکمہ موسمیات کا کہنا ہے کہ اپریل میں ملک میں معمول سے زائد 12.5 فیصد بارش ریکارڈ کی گئی اور اپریل میں سب سےزیادہ بارش دیر میں 191 ملی میٹر ریکارڈ ہوئی۔
اپریل میں دن اور رات کادرجہ حرارت معمول کے اوسط درجےسے 0.26 ڈگری کم رہا۔

دوسری جانب گلگت بلتستان کے ضلع استور کے میدانی علاقوں میں بارش اور بالائی علاقوں میں شدید برفباری جاری ہے۔

کئی بالائی علاقوں سے زمینی رابطہ منقطع ہونے سےمقامی افراد اور سیاحوں کو مشکلات کا سامنا کرنا پڑ رہا ہے۔ اس کے علاوہ غذر کے بالائی علاقوں میں بھی برفباری کا سلسلہ جاری ہے۔

کراچی: سرسید یونیورسٹی آف انجینئرنگ اینڈ ٹیکنالوجی کے زیرِاہتمام کوئٹہ میں ہونے والے چونتیسویں قومی کھیلوں کے سلسلے میں ٹارچ ریلے تقریب کا انعقاد کیا گیا۔

مشعل مزارِ قائد سے ہوتی ہوئی سرسید یونیورسٹی پہنچی ۔ تقریب کے مہمانِ خصوصی کراچی کے ایڈمنسٹریٹر ڈاکٹر سیف الرحمن تھے ۔ تقریب کے شرکاء میں سابق ہاکی اولمپیئن،حنیف خان، ناصر علی، حسیم خان، ہاکی کے بین الاقوامی کھلاڑی محمد علی خان سمیت پاکستان اسپورٹس بورڈ کے ڈائریکٹر جنرل شعیب کھوسہ، بلوچستان اسپورٹس بورڈ کے ڈائریکٹر جنرل درا خان، پاکستان اولمپک ایسوسی ایشن کے سیکریٹری خالد محمود، سندھ اولمپک ایسوسی ایشن کے سیکریٹری احمد علی راجپوت و دیگر شامل تھے ۔2020 میں بابر اعظم نے پاکستان کے ویلیوایبل کرکٹ آف دا ایئر کا ایوارڈ حاصل کیا۔

اس موقع پر خطاب کرتے ہوئے تقریب کے مہمانِ خصوصی کراچی کے ایڈمنسٹریٹرڈاکٹر سیف الرحمن نے کہا کہ ٹارچ ریلے اتحاد ، یکجہتی اورباہمی ہم آہنگی کی علامت ہے۔ قومی کھیل ہمارے ثقافتی ورثے کو اجاگر کرتے ہیں ۔ دو سال بعد سندھ میں قومی کھیلوں کا انعقاد ہوگا ۔

۔ٍتقریب سے خطاب کرتے ہوئے سرسید یونیورسٹی کے وائس چانسلر پروفیسر ڈاکٹر ولی الدین نے کہا کہ یہ بڑے اعزاز کی بات ہے کہ مشعل مزارِ قائد سے سرسید یونیورسٹی پہنچی ہے جس سے سرسید یونیورسٹی کے وقار اور قدر کا بخوبی اندازہ لگایا جاسکتا ہے ۔ قومی کھیلوں کا بنیادی مقصدتعلیمی اداروں میں کھیلوں کو فروغ دینا ہے تاکہ نچلی سطح پر نیا ٹیلنٹ ابھر کر سامنے آئے ۔ کھیل نہ صرف ایک صحتمند معاشرہ کی تشکیل کرتے ہیں بلکہ ذہنی استعداد میں بھی اضافہ کرتے ہیں ۔ اس سے ثقافتی ہم آہنگی پیدا ہوتی ہے ۔

انہوں نے کھیلوں کے فروغ کے لئے جاوید علی میمن اور ہائر ایجوکیشن کی کوششوں کو سراہتے ہوئے کہا کہ جاوید علی میمن، پاکستان میں کھیلوں کی بہتری اور ترقی کے لئے بھرپور کردار ادا کررہے ہیں ، قومی کھیلوں میں حصہ داری کے لئے سرسید یونیورسٹی کا انتخاب کرنے پر ہم ہائر ایجوکیشن کے شکرگزار ہیں ۔

ہائر ایجوکیشن کمیشن کے ڈائریکٹر اسپورٹس جاوید میمن نے کہا کہ ایچ ای سی نے پاکستان میں گراس روٹ لیول پر ٹیلنٹ ڈھونڈنے میں اہم کردار ادا کیا ہے ۔ تعلیمی اور کھیلوں کی سرگرمیوں کے فروغ کے لئے کی جانے والی کوششوں میں سرسید یونیورسٹی ہمیشہ ہائرایجوکیشن کی حصہ دار رہی ہے ۔

سرسید یونیورسٹی کے اسپورٹس ڈائریکٹر مبشر مختار نے کہا کہ کھیلوں کی سرگرمیاں نہ صرف جسمانی نشو نما اور ذہنی صحت کو بہتر بناتی ہیں بلکہ یہ سماجی ہم آہنگی کو فروغ دینے میں بھی کلیدی کردار ادا کرتی ہیں ۔

انہوں نے بتایا کہ سرسید یونیورسٹی کی طالبہ آمنہ فاطمہ ایھ ای سی ہاکی ٹیم کی کھلاڑی ہیں ۔ اسی طرح جامعہ سرسید کے نعمان الدین کو ایچ ای سی والی بال ٹیم کا کوچ مقرر کیا گیا، جبکہ اسپورٹس افسر جاوید اقبال رسہ کشی کھیل کا حصہ ہیں ۔معروف اسپورٹس جرنلسٹ یحییٰ حسینی نے نظامت کے فراءض انجام دئے ۔ یحییٰ حسینی ایک ممتاز اسپورٹس جرنلسٹ ہیں ۔ ایک انگریزی اخبار سے منسلک ہیں اور ٹی وی چینلز پر کھیلوں پر ان کے تبصرے اور تجزیاتی رپورٹس بہت مقبول ہیں ۔

کراچی: پاکستان ٹیم کے کپتان اور تینوں فارمیٹ میں درجنوں اعزاز رکھنے والے بابر اعظم آج نیوزی لینڈ کے خلاف سیریز کے آخری ون ڈے میچ کے ساتھ اپنے ون ڈے کیریئر کی سنچری پوری کرچکے ہیں۔

بابر اعظم کو کرکٹ کیریئر کے دوران ان گنت ریکارڈز اپنے نام کرنے کے ساتھ ان پہاڑوں جیسے رنز کے ذریعے حریف ٹیم کو چاروں چانے شانے چت کردینے کا اعزاز حاصل ہے۔

یہی نہیں پاکستان کو ون ڈے کی نمبر ون ٹیم بنانے والے کپتان کا سہرا بھی حال ہی میں بابر اعظم کے سر سجا ہے۔
بابر اعظم کے 100 ویں ون ڈے کے موقع پر پاکستان کرکٹ بورڈ کی جانب سے بابر اعظم کے ون ڈے اعزازات کی ایک فہرست شیئر کی گئی ہے، آئیے اس فہرست پر ایک نظر ڈالتے ہیں۔

بابر اعظم اپنے پہلے 25 ون ڈے میچز میں کسی بھی بیٹر سے زیادہ (1306 ) رنز بنانے اور کم سے کم 97 اننگز میں 5 ہزار رنز بنانے والے کرکٹر کا اعزاز رکھتے ہیں۔
ون ڈے میچز کی تاریخ میں بابر اعظم وہ واحد بیٹر ہیں جن کی ون ڈے ایوریج 59.85 رہی، ون ڈے میچز میں اب تک یہ اعزاز صرف بابر اعظم کے پاس ہے۔
بطور کپتان 20 ون ڈے میچز میں بابر اعظم کی ایوریج کسی بھی کپتان کے مقابلے سب سے زیادہ75.17 رہی، دوسرے نمبر پر بھارتی ویرات کوہلی ہیں جن کی اوسط 72.65 رہی۔
بابر کی 18 ون ڈے سنچریز کے میچز میں سے 14 میچز میں پاکستان کو فتح ملی،3 میں شکست جبکہ ایک میچ ٹائی ہوا۔
کپتان بابر اعظم وہ واحد بیٹر ہیں جو دو مرتبہ تین لگاتار ون ڈے سنچریز بناچکے ہیں۔
بابر اعظم 757 دن تک ون ڈے بیٹرز رینکنگ میں نمبر ون رہے ہیں۔
2019 کے ون ڈے ورلڈکپ کے دوران بابر اعظم نے بطور پاکستانی بیٹر 474 رنز بنائے اس سے قبل کسی ایک ورلڈکپ میں اتنے رنز بنانے کا اعزاز کسی پاکستانی بیٹر کو حاصل نہیں رہا۔
بابر اعظم آئی سی سی چیمپیئن ٹرافی کی فاتح ٹیم میں شامل تھے۔
بابر وہ واحد پاکستانی بلے باز ہیں جنہیں آئی سی سی مینز اوڈی آئی کرکٹر آف دی ایئر کے اعزاز سے نوازا گیا۔
2022 میں بابر اعظم نے سرگار فیلڈ سوبرز کرکٹر آف دی ایئر 2022 بھی اپنے نام کیا تھا۔

کراچی: ثانوی تعلیم بورڈ کراچی کے تحت نہم ودہم جماعت کے سالانہ امتحانات برائے2023کی تیاریاں مکمل کرلی گئی۔

امتحانات کی تیاری کے حوالے سےنوی تعلیمی بورڈ کے چیئرمین سید شرف علی شاہ نے میڈیا بریفنگ دیتے ہوئے بتایا کہمنگل8 مئی 2023 ء سے شروع ہو رہے ہیں جس کے لئے 524امتحانی مراکز قائم کئے گئے ہیں۔رواں سال مجموعی طور پر 3لاکھ 93ہزار264 طلباء و طالبات سائنس و جنرل گروپ ریگولر اور پرائیویٹ کے امتحانات دیں گے جبکہ بورڈ نے 524 امتحانی مراکز قائم کئے ہیں جس میں طلباء کیلئے 279اور طالبات کیلئے245 امتحانی مراکز بنائے گئے ہیںجبکہ اس دفعہ 19 حب امتحانی سینٹر بنائے گئے ہیں جو کراچی کے مختلف 18 ٹاؤنز میں قائم کئے گئے ہیں وہاں پر بورڈ کے آفیسرز امتحانی پرچوں کی ترسیل پر مامور ہوں گے۔

انہوں نے بتایا کہ ہم نے فول پروف انتظامات کے حوالے سے کمشنر کراچی، ڈی جی رینجرز، ایڈیشنل آئی جی، ڈائریکٹر ایجوکیشن کراچی، ڈائریکٹر پرائیویٹ اسکول سندھ اور دیگر محکموں کو لیٹرز جاری کر دیئے ہیں تمام امتحانی مراکز پر دفعہ 144 نافذ ہوگی جس کے تحت ان مراکز پر بیرونی مداخلت پر پابندی ہو گی ور ان کے اطراف میں کام کرنے والی فوٹو اسٹیٹ کی مشینیں دوران امتحان بند رہیں گی۔

چیئرمین بورڈنے نے بتایا کہ امتحانات کی نگرانی کیلئے بورڈ آفس میں رپورٹنگ سیل قائم کیا جائے گا جہاں نقل کی روک تھام کیلئے بورڈ کی خصوصی ٹیمیں رپورٹ کے حوالے سے اقدامات کریں گی۔ امتحانی پرچوں کی ترسیل کے لئے ایک موثر نظام تشکیل دیا گیا ہے اور یہ پرچے بورڈ کے افسران حب سینٹرز پر پہنچائیں گے جہاں سے سینٹر سپرنٹنڈنٹ یا ان کا نمائندہ اتھارٹی لیٹر کے ساتھ مہر بند پرچے وصول کر کے اپنے امتحانی مرکز پہنچائیں گے اور جوابی کاپیاں اسکول سپرنٹنڈنٹ یا ان کا نمائندہ بورڈ میں جلد از جلد پہنچائیں گے۔

کراچی: آئی بی اے سکھر کا نواں جلسہ تقسیم ِاسناد کی تقریب کا انعقاد کیا گیا۔

تقریب میں مہمانِ خصوصی وزیر اعلیٰ سندھ سردار علی شاہ،وفاقی وزیر سید خورشید شاہ،سندھ کے صوبائی وزیرسید ناصر شاہ ، وائس چانسلر آئی بی اے پروفیسر ڈاکٹر آصف شیخ سمیت فیلکٹی ممبرا ن اور طلبا و طالبات شریک تھے۔کانووکیشن میں 546طلبا و طالبات کو ماسٹرز،ایم فل اور پی ایچ ڈی کی ڈگریاں تفویض کی گئی۔

کانوکیشن کی تقریب سے خطاب کرتے ہوئے وزیرِ اعلیٰ سندھ کا کہنا تھا اس پُرمسرت موقع پر کامیاب طلبہ اور اُن کے والدین کومبارکباد پیش کرتاہوںکہ آج کا دن آپ کی زندگی میں اہم سنگ میل کی حیثیت رکھتا ہے۔قوم کا عظیم سرمایہ ہونے کے ناطے اب آپ پر ایک بہت بڑی ذمہ داری عائد ہوتی ہے ۔امید کرتا ہوں کہ آپ پاکستان کی خوشحالی میں اپنا بھرپورکردار ادا کریں گے۔

انہوں نے کہا کہ کویڈ 19 ہمارے لیے ایک بڑا مسئلہ تھا اس دوران سندھ کے ایک عظیم شخصیت اور رہنما پروفیسر نثار احمد صدیقی بھی ہم سے رخصت ہوگئےصوبے اور ملک کے لیے ان کی گراں قدر خدمات کو کبھی فراموش نہیں کیا جاسکتا۔سکھر آئی بی اے یورنیورسٹی ان کی کاوشوں کو ہمیشہ سرائے گی جنہوں نے پاکستان میں کمیونٹی کالجز کے تصور کی بنیاد ڈالی جوکہ ان کا عظیم کارنامہ ہے۔ہم صدیقی صاحب کی میراث کو ہمیشہ زندہ رکھیں گے۔

انہوں نےکہا کہ میرا سکھر انسٹی ٹیوٹ آف بزنس ایڈمنسٹریشن سے ذاتی مراسم ہیںمجھے تقریباً 25 سال بعد 2017 میں اس انسٹی ٹیوٹ کو ایک مکمل پبلک سیکٹر یونیورسٹی میں اپ گریڈ کرنے کا اعزاز حاصل ہواجوکہ میرے لیے ایک بہت بڑا اعزاز ہے۔ آئی بی اے کو کراچی کے ساتھ منسلک کرنے کی بنیاد پرمیں قائم کیا گیا تھاجس کی منظوری میرے والد سید عبداللہ شاہ نے 1990 کی دہائی میں دی تھی۔

وزیر اعلیٰ سندھ کا مزید کہنا تھاکہ مجھے امید ہے کہ سکھر آئی بی اے یونیورسٹی تعلیم کے معیار کو مزید بہتر بنانے اور یونیورسٹی کو دنیا کے ٹاپ بزنس اسکولوں کے برابر لانے کے لیے اپنی کوششیں جاری رکھے گی۔

تقریب سے خطاب کرتے ہوئےوائس چانسلر پروفیسر ڈاکٹر آصف احمد شیخ نے اپنے خطاب میں تمام کامیاب طلباء اور ان کے والدین کو مبارکباد پیش کی اور کہا کہ "یہ وہ وقت ہے جب آپ اپنی تقدیر کو تلاش کرتے ہیں"۔ انہوں نے طلباء پر زور دیا کہ وہ اپنے مستقبل کو روشن کرنے کی کوششوں کے لیے ہمیشہ اپنے والدین اور اساتذہ کے شکر گزار رہیں۔

وی سی نے مرحوم نثار احمد صدیقی کی خدمات پر بھی روشنی ڈالی اور کہا: "وہ ایک عظیم بصیرت رکھنے والے، ایک مخلص انسان دوست اور ماہر تعلیم تھے جنہوں نے اس عظیم ادارے کی بنیاد رکھی"۔

کراچی: پاکستان اولمپک ایسوسی ایشن (POA) پاکستان کا سب سے بڑا کھیلوں کا مقابلہ بنام "چونتیسویں نیشنل گیمز2023منعقد کرنے جا رہا ہے۔ چونتیسویں نیشنل گیمز کی مشعل کے کراچی پہنچنے پر اقرا یونیورسٹی کراچی اور ہائیر ایجوکیشن کمیشن کے اشتراک سے مشعل برداری کی تقریب بمقام اقرا یونیورسٹی، مین کیمپس کراچی منعقد ہوگی۔

اس پروقار تقریب کے مہما نِ خصوصی صوبۂ سندھ کے وزیر برائے لیبر اور افرادی قوت جناب سعید غنی ہوں گے۔

ان کے ہمراہ اس تقریب میں اسپورٹس ڈائریکٹرز، قونصل جنرل، کھلاڑی، طلبہ اور پاکستان کی مختلف جامعات کے نمائندگان بھی ہوں گے۔

اس تقریب کا مقصد کھیلوں اور صحتمندانہ سرگرمیوں کا فروغ اور اس میں پہلے سے جاری کاوشوں کا تسلسل ہے تاکہ نوجوانوں کو
کھیل کے میدان کی طرف راغب کیا جاسکے۔

واضح رہےیہ مقابلے کوئٹہ میں 22 سے 30 مئی 2023 کے درمیان منعقد ہوں گے۔ ہائیر ایجوکیشن کمیشن، پاکستان بھی نیشنل گیمز کے کئی مقابلوں میں بھرپور شرکت کرے گا۔

کراچی: قومی ٹیم کے کپتان بابر اعظم ون ڈے کرکٹ میں تیز ترین 5000 رنز بنانے والے بلے باز بن گئے۔

قومی کرکٹ ٹیم کے کپتان بابر اعظم نے یہ اعزاز کراچی میں نیوزی لینڈ کے خلاف ہونے والے چوتھے ون ڈے میچ میں حاصل کیا۔

اسٹار بلے باز 100 سے کم اننگز میں یہ کارنامہ انجام دینے والے پہلے بلے باز بھی بن گئے ہیں۔ بابر اعظم نے یہ سنگ میل صرف 97 اننگز میں حاصل کیا۔

اس سے قبل یہ ریکارڈ جنوبی افریقا کے بلے باز ہاشم آملہ کے پاس تھا جنہوں نے 101 اننگز میں پانچ ہزار رنز بنائے تھے جبکہ ویسٹ انڈیز کے سر ووین رچرڈ 114، بھارت کے ویرات کوہلی 114 اور آسٹریلیا کے ڈیوڈ وارنر نے 115 اننگز میں 5 ہزار رنز اسکور کیے تھے۔