ایمزٹی وی(اسلام آباد)وزیراعظم نواز شریف نے پاک فضائیہ کی مشقوں ’ہائی مارک‘ کا جائرہ لیا جس کے بعد انہیں ان مشقوں پر تفصیلی بریفنگ دی گئی۔ پاک فضائیہ کی ہائی مارک مشقوں میں میں ایف 16، جے ایف 17 تھنڈر، ایف 7 اور میراج طیاروں نے حصہ لیا اور پاک فضائیہ کے طیاروں نے وزیراعظم نواز شریف کو سلامی بھی دی۔

اس موقع پر وزیراعظم نواز شریف کا کہنا تھا کہ پاک فضائیہ کے شاہین ہمارا فخر اور قوم کو اپنے شاہینوں پر پورا اعتماد ہے، پاک فضائیہ نے ملکی دفاع کے لیے پاک فوج اور بحریہ کے ساتھ مل کر ملکی دفاع کے لئے مثالی کردار ادا کیا ہے، وطن کی خدمت کے لئے پاک فضائیہ کے جذبے کو خراج تحسین پیش کرتا ہوں۔ ان کا کہنا تھا کہ آپریشن ضرب عضب میں بڑی کامیابیاں حاصل کیں، آپریشن ضرب عضب نے دہشت گردوں کی کمر توڑ دی ہے

ایمزٹی وی(تعلیم)تعلیمی اداروں میں قرآن پاک کی تعلیم لازمی قرار دینے کے متعلق تحریک انصاف نے سندھ اسمبلی مین قرارداد جمع کرادی اس حواے سے تحریک انصاف کے رہنما خرم شیر زمان کہتے ہیں امید ہے کہ سندھ حکومت اس قرارداد کو سنجیدگی سے لے گی

قرارداد تحریک انصاف کے رکن خرم شیرزمان نے سندھ اسمبلی کے سیکرٹری کے پاس جمع کرائی... قرارداد میں مطالبہ کیا گیا ہے کہ سرکاری و نجی تعلیمی اداروں میں پہلی جماعت سے میٹرک تک قرآن پاک کی تعلیم لازمی قرار دی جائے۔

میڈیا سے گفتگو کرتے ہوئے خرم شیر زمان کا کہنا تھا کہ سندھ کے سرکاری و نجی تعلیمی اداروں میں قرآن کی تعلیم شروع کی جائے اور قرآن پاک کا ترجمے کے ساتھ پڑھنے سے والدین کے مسائل بھی دور ہوجائیں گے. تحریک انصاف کے رکن سندھ اسمبلی کا کہنا تھا کہ سندھ حکومت سے گزارش کرونگا کہ اس قرارداد کو منظور کرائیں اور امید ہے کہ سندھ اسمبلی میں حکومتی اراکین اس قرارداد کو سنجیدگی سے لے گی..

ایمزٹی وی(اسلام آباد)صدر مملکت ممنون حسین نے ڈونلڈ ٹرمپ کو امریکی انتخابات میں کامیابی پر مبارکباد دی ہے۔
ذرائع کے مطابق صدر مملکت نے امید ظاہر کی ہے کہ ڈونلڈ ٹرمپ دنیا میں امن کیلئے کردار ادا کریں گے اور بحیثیت امریکی صدر پاک، امریکہ تعلقات وسعت اختیار کریں گے۔

ایمزٹی وی(اسلام آباد)سابق صدر پرویز مشرف نے نو منتخب امریکی صدر ڈونلڈ ٹرمپ کو مبارکباد دیتے ہوئے امید ظاہر کی ہے کہ ٹرمپ دنیا میں امن اور استحکام لانے کی کوشش کریں گے اور پاک، بھارت تنارعات کے حل کیلئے کردار ادا کریں گے۔

پرویز مشرف نے کہا کہ ”میں ڈونلڈ ٹرمپ کو امریکی صدر بننے پر مبارکباد پیش کرتا ہوں اور انہیں دنیا میں امریکہ کے دیرینہ اور آزمائے ہوئے دوستوں کے ساتھ بالخصوص جنوب ایشیاءمیں دوستانہ تعلقات کے نئے باب شروع کرنے میں کامیابی کیلئے نیک تمناﺅں کا اظہار کرتا ہوں۔“

ساب صدر نے کہا کہ ”مجھے امید ہے کہ وہ دنیا میں امن اور استحکام لانے پر بھرپور توجہ دیں گے پاک، بھارت تنازعات کو حل کرنے میں اپنا کردار ادا کریں گے۔ ہمیں دہشت گردی کو کچلنے اور انتہاءپسندی کو ختم کرنے کیلئے باہمی اعتماد کے ساتھ مل کر کام کرنا ہو گا ۔“

پرویز مشرف کا کہنا تھا کہ ”امریکہ کو افغانستان سے نہیں جانا چاہئے۔ افغانستان سے فوجی دستوں کی کمی اثرات سے متعلق ہے وقت سے متعلق نہیں۔“

ایمز ٹی وی (کھیل) پاکستان کرکٹ بورڈ نے پی ایس ایل کو کمپنی بنانے کی منظوری دے دی جس کے بعد پی ایس ایل سے حاصل ہونے والا منافع پی سی بی کی بھی ملکیت ہوگا۔

پاکستان سپر لیگ کے چیئرمین نجم سیٹھی نے گورننگ باڈی کے اجلاس کے بعد میڈیا سے بات کرتے ہوئے کہا کہ پی ایس ایل پرائیوٹ لمیٹیڈ کمپنی پی سی بی کی نگرانی میں کام کرے گی، اس کے 5 میں سے3 ڈائریکٹرزکا تعلق پی سی بی اور2کا نجی سیکٹر سے ہوگا، بورڈ کی طرف سے نجم سیٹھی، منصور خان اور شکیل شیخ جبکہ نجی سیکٹر سے عارف حبیب اور ضیا رضوی شامل ہونگے، پی سی بی کے چیف آپریٹنگ آفیسر اور فنانشل آفیسر نان ووٹنگ ارکان کے طور پر موجود ہوں گے، کمپنی کا چیئرمین انہی ارکان میں سے ہوگا، 3 ڈائریکٹر ہونے کی وجہ سے بورڈ کو فیصلوں پر زیادہ اختیار حاصل رہے گا، منافع بھی پی سی بی کو ہی ملے گا، کمپنی بننے کے بعد بورڈ آف ڈائریکٹرز قوائد و ضوابط کو تشکیل دے گا، معاملات کو شفاف رکھنے کیلیے باقاعدہ آڈٹ بھی ہوگا۔

نجم سیٹھی نے کہا کہ انڈین پریمیئر لیگ کے انتظامی امور میں جو خامیاں سامنے آئی تھیں ان سے گریز کرتے ہوئے پی ایس ایل کمپنی کا بہتر سیٹ اپ تشکیل دیا جائے گا، دنیا کے جتنے بھی بورڈز ہیں وہ سب پرائیویٹ ہیں اس لیے پی ایس ایل کمپنی کو بھی پرائیوٹ کرنے کی ضرورت پڑی، لیگ سے حاصل ہونے والا منافع پی سی بی کی بھی ملکیت ہوگا، ہماری پوری کوشش ہے کہ اگلے ایڈیشن کا فائنل لاہور میں ہو جب کہ سیکیورٹی معاملات کے لئے پنجاب حکومت سے رابطے میں ہیں۔

چیئرمین پی ایس ایل کا کہنا تھا کہ بھارت سے سیریز نہ ہونے پر کرکٹ بورڈ کو نقصان کا سامنا کرنا پڑا جس پر آئی سی سی کو کہا کہ بھارت کے نہ کھیلنے سے ہمارا نقصان کون پورا کرے گا جس پر آئی سی سی کی جانب سے گرانٹ یا قرضے کی آفر کی گئی جسے قبول نہیں کیا جب کہ آئی سی سی نے اس موقف پر کمیٹی بنانے کی بات کی جسے ہم نے مسترد کردیا۔ انہوں نے کہا کہ بی سی سی آئی سیکرٹری انوراگ ٹھاکر سے دو ٹوک الفاظ میں پوچھا کہ ہمارے ساتھ کھیلنا ہے یا نہیں، اگر نہیں کھیلنا تو آئی سی سی ایونٹ میں بھارت کے خلاف میچ کے پوائنٹس ہمیں ملیں گے جس کے بعد انوراگ ٹھاکر سےآفیشل بیان دینے کا کہا جس پروہ خاموش رہے۔

دوسری جانب چیئرمین پی سی بی شہر یار خان نے کہا کہ گورننگ بورڈ کے اجلاس میں قومی ٹیم کی انگلینڈ اور ویسٹ انڈیز کے خلاف سیریز میں کارکردگی کو سراہا گیا، نیوزی لینڈ اور آسٹریلیا میں کنڈیشنز مشکل لیکن امید ہے کہ کھلاڑی اچھی کارکردگی کا مظاہرہ کرینگے۔ اجلاس میں چیئرمین، ڈومیسٹک کرکٹ کمیٹی ،گیم ڈیولپمنٹ کمیٹی، ایچ آر کمیٹی اورآڈٹ کمیٹی کی رپورٹس کا جائزہ بھی لیا گیا، اسکول کرکٹ، پی سی بی کے الیکشن قوائد میں تبدیلی اور دیگر معاملات پر بھی بحث کی گئی، محمد یوسف کے پرانے عدالتی کیس کی رقم معاف کر دی گئی۔ چیئرمین نے بتایا کہ فی الحال ڈومیسٹک کرکٹ کے ڈھانچے میں تبدیلی نہیں کی جارہی، بار بار نظام بدلنے سے کوئی بہتری نہیں آتی، پی سی بی 3 ریجنز فاٹا،آزاد کشمیر اور گلگت بلتستان پر خصوصی توجہ دے رہا ہے۔

ایمز ٹی وی (کھیل) مصباح الحق نے ریٹائرمنٹ پلان فی الحال خارج ازامکان قرار دیدیا۔ ایک انٹرویو میں کپتان نے کہا کہ ابھی ہدف نیوزی لینڈ اور آسٹریلیا میں بہتر کارکردگی ہے، چاہتا ہوں کہ ذاتی اور ٹیم کی پرفارمنس توقعات کے مطابق ہو، اس کے بعد دیکھوں گا کہ میرا جسم کس حد تک انٹرنیشنل کرکٹ کے قابل اور میں کس انداز میں اپنی افادیت ثابت کرسکتا ہوں۔

بطور کپتان ٹیسٹ میچز کی ففٹی مکمل کرنے کے سوال پر انھوں نے کہا کہ ریکارڈز سے زیادہ اہمیت کارکردگی کی ہے، فتوحات اور اس میں بطور کھلاڑی انفرادی کردار سب سے مقدم سمجھا جانا چاہیے تاہم کوئی سنگ میل عبور کرنا باعث فخر ہوتا ہے

ایمز ٹی وی (کھیل) ظہیر عباس نے پی سی بی کا سربراہ کسی کرکٹرکو بنانے کا مشورہ دیدیا، اسلام آباد میں میڈیا سے بات چیت کرتے ہوئے انھوں نے کہا کہ بورڈ نے کئی اچھے اقدامات بھی کیے، میں موجودہ سیٹ اپ پر تنقید نہیں کرنا چاہتا لیکن میرے خیال میں کھیل کوئی بھی ہو اس کا چیف بھی متعلقہ شعبے کا کھلاڑی ہونا چاہیے۔

ایک سوال پر انھوں نے کہا کہ پاکستان میں انٹرنیشنل کرکٹ 2یا 3سال میں بحال ہونے کی امید کرسکتے ہیں، بطور صدر آئی سی سی میٹنگز میں شرکت کے دوران سیکیورٹی پر مختلف ملکوں کے تحفظات سنتا رہا ہوں، یواے ای میں میچز کی میزبانی مہنگی پڑتی ہے، مقامی تماشائی بھی کھلاڑیوں کی حوصلہ افزائی کیلیے موجود نہیں ہوتے، اس کے باوجود پاکستان ٹیم کا عالمی نمبر بننے سے ظاہر ہوتا ہے کہ کھلاڑیوں میں کس قدر صلاحیتیں موجود ہیں۔

ظہیر عباس نے کہا کہ حکومت اور عوام سب ملک میں انٹرنیشنل کرکٹ کی واپسی چاہتے ہیں، امید ہے کہ حالات بہتر اورشائقین کو اپنے ملک میں مقابلے دیکھنے کو ملیں گے۔

ایمز ٹی وی (کھیل) بھارتی کرکٹ بورڈ نے اپنی سپریم کورٹ کو بھی نہ بخشا، انگلینڈ کے خلاف بدھ سے شیڈول پہلا ٹیسٹ منسوخ کرنے کی دھمکی دیکر اپنے اکاؤنٹس کھلوا لیے، عدالت کے مطابق بی سی سی آئی میچ انتظامات کیلیے 58.66 لاکھ روپے استعمال کرسکتا ہے، رقم میزبان ایسوسی ایشن کو منتقل کرنے کے بجائے بورڈ کو خود ادائیگیاں کرنے کا حکم دیدیا، لودھا کمیٹی کو حساب کتاب پر نظر رکھنے کیلیے آڈیٹر اور معاونین کی تقرری کا بھی اختیار سونپ دیا۔

تفصیلات کے مطابق بی سی سی آئی ماضی میں دنیا کے کرکٹ بورڈز کو اپنی مالی پاور کی وجہ سے بلیک میل کرتا رہا،اب اس نے اپنے ملک کی سب سے بڑی عدالت کو بھی نہیں چھوڑا،انگلینڈ کیخلاف پہلے ٹیسٹ سے 24 گھنٹے قبل بی سی سی آئی کی جانب سے سپریم کورٹ میں پٹیشن دائر کی گئی کہ اکاؤنٹس سے رقومات نکالنے پر پابندی کی وجہ سے انکے پاس انگلش سیریزکے انتظامات کیلیے رقم نہیں ہے، لہذا وہ راجکوٹ میں شیڈول پہلا ٹیسٹ منسوخ کرنے والے ہیں، جس پر سپریم کورٹ نے ہنگامی طور پر اکاؤنٹس پر سے پابندی اٹھادی تاہم ساتھ میں بی سی سی آئی کو ہدایت دی کہ وہ ایک میچ کے اخراجات کیلیے 58.66 لاکھ روپے خرچ کرسکتا ہے، مگر یہ رقم میزبان ایسوسی ایشن کو دینے کے بجائے براہ راست کنٹریکٹرزوغیرہ کو دی جائیگی، 17 اور 26 نومبر کو شیڈول دوسرے اور تیسرے میچ کیلیے بھی یہی پالیسی ہوگی جبکہ باقی دو میچز کے بارے میں فیصلہ 5 دسمبر کو کیس کی اگلی سماعت میں کیا جائیگا۔

عدالت نے لودھا کمیٹی کو ہدایت کی کہ وہ آڈیٹر اور معاونین کا تقرر کرے جو بورڈ کے حساب کتاب پر نظر رکھیں گے۔بھارتی بورڈ کے ایک وکیل نے کہاکہ ہمیں سپریم کورٹ کے نئے حکم پر کوئی اعتراض نہیں کیونکہ انگلینڈ سے سیریز پر آنے والے اخراجات کیلیے رقم کی ضرورت تھی،اس کی اجازت ہمیں مل چکی ہے۔

یاد رہے کہ بی سی سی آئی کسی بھی صورت میں سپریم کورٹ کے مقرر کردہ لودھا پینل کی سفارشات پر عملدرآمد کرنے کو تیار نہیں ہے، عدالت کی جانب سے اس حوالے سے ڈیڈ لائن بھی دی جا چکی۔سپریم کورٹ کی جانب سے بھارتی بورڈ پر واضح کیا گیا تھا کہ جب تک ایسوسی ایشنز لودھا سفارشات پر من و عن عملدرآمد نہیںکرتیں انھیں فنڈز فراہم نہ کیے جائیں

ایمزٹی وی(اسلام آباد) اپوزیشن لیڈرخورشید شاہ کا کہنا تھا کہ امریکا کے نومنتخب صدر ڈونلڈ ٹرمپ کی کامیابی کے بعد پوری دنیا میں بڑی تبدیلی آئے گی، تبدیلی کا اثرامریکا میں بھی ہوگا اوردنیا بھی متاثرہوگی جب کہ پاکستان سمیت پوری دنیا کو خارجہ پالیسی پر نظر ثانی کرنا ہوگی۔

ان کا کہنا تھا کہ کلبھوشن یادیو بھارتی فوجی افسرتھا لیکن را کے ایجنٹ کے طور پر پکڑا گیا، وزیرخارجہ کے نہ ہونے کے باعث ہماری خارجہ پالیسی کنفیوژن کا شکار ہے جہاں دنیا کو ہم بھارت کا بھیانک چہرہ نہ دکھا سکے جب کہ لگتا ہے کہ حکومت کے پاس کوئی وزیر خارجہ بننے کے لائق شخص ہی نہیں۔

تحریک انصاف کے سربراہ عمران خان کے حوالے سے قائد حزب اختلاف کا کہنا تھا کہ عمران خان نے نازیبا الفاظ استعمال کئے اورپھر پارلیمان آئے، الزام لگانا اور گالیاں دینا اپوزیشن نہیں، اپوزیشن وہ ہے جو ہم پارلیمنٹ میں رہ کر رہے ہیں،عمران کا پارلیمانی تجربہ ہے نہ ہی سیاست کا، معلوم نہیں تحریک انصاف کیا کھیل کھیل رہی ہے، تحریک انصاف کا قانون و انصاف کمیٹی میں نہ آنا انتہائی تعجب خیزہے۔