ایمز ٹی وی (کراچی ) کراچی کے علاقے پرانی سبزی منڈی اور اس کے اطراف میں آپریشن کیا گیا ،آپریشن میں 30 سے زائد مشتبہ افراد کو حراست میں لے کر اسلحہ برآمد کر لیا ،رینجرز نے صبح سویرے پی آئی بی تھانے کے حدود پرانی سبزی منڈی میں کارروائی کی ،رینجرز کی بھاری نفری نے علاقے کے داخلی اور خارجی راستوں کو سیل کردیا اور گھر گھر تلاشی لی گئی ،حراست میں لیے گئے افراد کو نامعلوم مقام پر منتقل کردیا گیا ہے ، یہ آپریشن 5 گھنٹے جاری رہا جس میں رینجرز کی لیڈی اہلکاروں نے بھی حصہ لیا ۔
ایمز ٹی وی (کراچی ) کراچی فش باربر میں 3 دن سے چینل جام ہونے کی وجہ سے ماہی گیروں کی لانچز کی آمد و رفت معطل ہے ،فشری ذرائع کے مطابق جمعرات کو جیٹی پر آمد و رفت کے دوران لانچیں پھنس گئی تھیں ،جنہیں نکالنے کی اپنی مدد آپ کے تحت کوشش کی گئی جو ناکام ہوئی ،ذرائع کے مطابق ماہی گیروں کی چھوٹی بڑی لگ بھگ 150 لانچیں ماہی گیری پر روانہ ہونے کے لیئے تیار کھڑی ہیں مگر انہیں باہر نکلنے کا رستہ نہیں مل رہا ،ماہی گیروں کے مطابق اسی طرح فشنگ کرکے واپس پہنچنے والی 70 سے زائد لانچز جیٹی پر لگنے کے لیے سمندر میں کھڑی ہیں اور ان میں کروڑوں روپے کی مچھلیاں اورجھینگے خراب ہونے کا خدشہ ہے لانچ مالکان کے مطابق چینل کھولنے کے لیے فشری انتظامیہ اپنا کردار ادا نہیں کررہی ہے ،اس صورتحال سے ماہی گیر سخت پریشان ہیں ۔
ایمزٹی وی(اسلام آباد)واشنگٹن میں چیف آف آرمی جنرل راحیل شریف نے آرمڈ سروسز کمیٹی کے چیئرمین جان مکین سے ملاقات کی۔ذرائع کے مطابق اس ملاقات میں جان مکین کا کہنا تھاکہ کہ جنرل راحیل شریف کی قیادت میں پاکستانی فوج نے دہشت گردوں کو شکست سے دوچار کردیا ہے۔جنرل راحیل شریف کا شکریہ ادا کرتے ہوئے ان کاکہنا تھا کہ دہشت گردی کے خلاف جنگ میں پاکستانی افواج کی قربانیوں کو سلام پیش کرتا ہوں۔اس موقع پر آرمڈ سروسز کے چیئر مین جان مکین کا کہنا تھا کہ یہ ملاقات کمیٹی کے تمام اراکین کے لئے تعمیری اور معلوماتی رہی اور ہم بہت چیلنجنگ اوقات کے دوران پاکستان کے ساتھ تعلقات کی قدر کرتے ہیں اس ملاقات میں پاک افغان تعلقات کو بہتر بنانے کی راہوں پر توجہ مرکوز رہی۔
ایمز ٹی وی (انٹرنیشنل) بیلجیئم پولیس کے سرچ آپریشن میں سولہ مشتبہ افراد کوحراست میں لے لیا گیا،برسلز میں آج اسکول، یونیورسٹیاں اور میٹرو سروس بند رہیں گی برسلز میں شدت پسندوں کیخلاف پولیس آپریشن کے بعد میڈیا بریفنگ میں پراسیکیوٹر نے کہا کہ سرچ آپریشن برسلز اور شارلروا کے مختلف علاقوں میں کیا گیا۔ جس میں سولہ مشتبہ افراد کو حراست میں لے لیا گیا ہے ۔ ان کا کہنا تھا کہ پیرس حملوں میں ملوث شدت پسند صالح عبدالسلام گرفتار ملزمان میں شامل نہیں ہے ۔ اس سے قبل بیلحیئم کے وزیراعظم کا کہنا تھا کہ برسلز میں پیرس حملوں میں جیسی دہشت گردی کی کارروائی کے خدشات کے پیش نظر سکیورٹی ہائی الرٹ رہے گی
ایمزٹی وی(اسلام آباد) الیکشن کمیشن نے آئندہ بلدیاتی انتخابات کاانعقاداپنی نگرانی میں نہ کرانے پر غور شروع کردیاہے، الیکشن کمیشن باضابطہ طور پر انتخابی اصلاحات کمیٹی میں آئین کے آرٹیکل 140 اے اور 219 میں ترمیم کرانے کامطالبہ کرے گا۔ الیکشن کمیشن انتخابات کے انعقاد کے حوالے سے اپنی ذمے داریاں صرف عام انتخابات اور سینیٹ الیکشن تک محدود کرنا چاہتا ہے اور معلوم ہوا ہے کہ الیکشن کمیشن 18 ویں ترمیم کے تحت بلدیاتی انتخاب کے انعقادسے متعلق دی جانے والی ذمے داریوں سے دست بردار ہوناچاہتاہے، حالیہ بلدیاتی انتخابات کے دوران سیاسی جماعتوں نے الیکشن کمیشن پر جانب داری کاالزام لگایاتھاجبکہ الیکشن کمیشن نے خود بھی محسوس کیاہے کہ اتنے بڑے پیمانے پر انتخاب کے انعقاد کے لیے عملہ دستیاب نہیں ہوتااورصوبائی حکومتوں کی جانب سے فراہم کردہ عملہ بھی اس طرح سے ہدایات پر عمل نہیں کرتاجیسا ان کی ذمے داریوں میں شامل ہوتاہے۔الیکشن کمیشن نے فیصلہ کیاہے کہ انتخابی اصلاحات کمیٹی میں یہ مطالبہ کیاجائے گاکہ الیکشن کمیشن کی ذمے داریاں 1973کے آئین کے مطابق واپس کی جائیں اور 18ویں ترمیم میں بلدیاتی انتخابات میں جوذمے داریاں الیکشن کمیشن کو سونپی گئی ہیں وہ واپس صوبائی حکومتوں کوہی دی جائیں۔
ایمز ٹی وی (مانٹر نگ ڈیسک)شاہ عبدللطیف یونیورسٹی خیر پور میں 23 نومبر کو سندھ کی تاریخ و ثقافت پر بین الا اقوامی کانفرنس منعقد ہوگی جس کا اہتمام انسٹی ٹیوٹ آف ہسٹوریکل اینڈ کلچرل ریسرچ سینٹر قائد اعظم یونیورسٹی اسلام آباد ،ہائر ایجوکیشن اسلام آباد اور شاہ عبداللطیف یونیورسٹی خیر پور نے مشترکہ طور پر کیا ہے سیمینار کے منتظمین پروفیسر ڈاکٹر محمد یوسف خشک ،حضور بخش چنہ کی جاری کردہ علامیے کے مطابق سندھ کی تاریخ و ثقافت پر دنیا کے کئی ممالک کے دانشور تحقیقی مکالے پڑھیں گے ۔
ایمز ٹی وی (کراچی ) وفاقی اردو یونیورسٹی کے رجسٹرار آصف علی کے مطابق جامعہ اردو میں ہونے والے ایم ایس / ایم فل و ایم ایس / ایم فل لیڈنگ ٹو پی ایچ ڈی کے شعبہ جاتی انٹری ٹیسٹ کے ایڈمٹ کارڈ ان کے پتوں پر بھیج دیئے گئے ہیں ،شعبہ جاتی انٹری ٹیسٹ اتوار 29 نومبر 2015 کو صبح 9 بجے جامعہ اردو کے گلشن اقبال کیمپس ،بی ایس سی بلاک میں منعقد ہوگا ،جن طلبہ کو ابھی تک ایڈمٹ کارڈ موصول نہیں ہوئے ہیں وہ ایڈمیشن سیل سے رابطہ کرکے اپنے ایڈمٹ کارڈ حاصل کرلیں ۔
ایمز ٹی وی(کراچی ) سر سید یونیورسٹی آف انجینئرنگ اینڈ ٹیکنالوجی نے بی ایس پروگرام میں داخلے کی میرٹ لسٹ سال برائے 2016 ءجاری کردی ہے ،یہ لسٹ دو ماہ کی تاخیر کے بعد جاری کی گئی ہے جس کی وجہ سے شکوک شہبات نے جنم لینا شروع کردیا ہے ،میرٹ لسٹ یونیورسٹی کے نوٹس بورڈ کے علاوہ سر سید یونیورسٹی کی ویب سائٹ www.ssuet.edu.pk پر بھی موجود ہے ۔
