ایمز ٹی وی (ایجوکیشن) ریاضی میں قابل رشک حد تک دسترس رکھنے والے 'میتھس جینئس' ذوہیب احمد نے صرف 14 سال کی عمرمیں برطانوی یونیورسٹی میں داخلہ حاصل کر کے سب کو حیران کر دیا ہے۔
پاکستانی نژاد برطانوی طالب علم ذوہیب احمد برطانوی یونیورسٹی کی تاریخ کے کم عمرترین طالب علموں میں سے ایک ہیں، انھیں 'ساوتھ ہمپٹن یونیورسٹی 'کے رواں برس کے سب سے کم عمرترین طالب علم ہونے کا بھی اعزاز حاصل ہوا ہے جبکہ ان سے پہلے برطانوی یونیورسٹی کے کم عمرترین طالب علم کا ریکارڈ ان کے بڑے بھائی وجیہہ احمد نے قائم کیا تھا۔
ہمپشائر کاونٹی سے تعلق رکھنے والے ذوہیب احمد نے،8 سال کی عمر میں ،جی سی ایس ای (ثانوی بورڈ) کا ریاضی کا امتحان ' اے گریڈ' سے پاس کر لیا تھا اس وقت ذوہیب تیسری جماعت کا طالب علم تھا۔
میتھس جینئیس ذوہیب احمد کو یہ اعزاز بھی حاصل ہے کہ وہ ،اے لیول سطح کے امتحانات میں 'اے گریڈ ' کے ساتھ کامیابی حاصل کرنے والے برطانیہ کم عمر ترین طالب علم ہیں، جنھوں نے 9 سال کی عمر میں اے لیول (اعلی ثانوی بورڈ ) کے 'ریاضی' اور 'ایڈوانسڈ ریاضی 'کے امتحانات میں شاندار نمبروں کے ساتھ اے گریڈ حاصل کیا۔ ان سے پہلے یہ ریکارڈ ہانگ کانگ میں پیدا ہونے والے 'مارچ بوڈی ہارجو' کے پاس تھا جس نے، نو سال تین ماہ کی عمر میں اے لیول پاس کیا تھا۔
ذوہیب اپنی ذہانت اور خداداد صلاحیتوں کو قدرت کا ایک انمول تحفہ سمجھتے ہیں اور کہتے ہیں کہ ان کی کامیابی میں ان کے والدین کی بھر پورتوجہ اور بے مثال قربانیاں شامل ہیں جس کی وجہ سے آج وہ اس مقام پر ہیں۔
ذوہیب احمد کے بڑے بھائی سولہ سالہ وجیہہ احمد ساوتھ ہمپٹن یونیورسٹی میں میتھمیٹیکس اور معاشیات میں بیچلرز کی ڈگری کے آخری سال میں ہیں جبکہ ذوہیب نے ،اپنے بھائی کے نقش قدم پر چلتے ہوئے اسی یونیورسٹی میں داخلہ لیا ہے جہاں وہ ان دنوں 'میتھمیٹیکس 'اور'فنانس' کی تین سالہ بیچلرز ڈگری کی تعلیم حاصل کر رہے ہیں۔
ساوتھ ہمپٹن شہر سے قریب چنڈلر فورڈ کے رہائشی ذوہیب کے والدین کا تعلق پاکستان سے ہے ان کے والد عثمان احمد فزکس میں ڈاکٹریٹ کی ڈگری رکھتے ہیں اور منسٹری آف ڈیفنس سے وابستہ ہیں جبکہ ،والدہ سعدیہ احمد قانون کی ڈگری رکھتی ہیں۔
ایمز ٹی وی ( کراچی) وزیر اعظم کی زیر صدارت ہونے والے مسلم لیگ (ن) کے اجلاس میں سینیٹ انتخابات کیلئے موصول ہونے والی 172 درخواستوں میں سے منتخب امیدواروں کے ناموں کا اعلان کا اعلان کیا گیا جس کے مطابق پنجاب سے جنرل (ر) عبدالقیوم ، مشاہد اللہ خان ، غوث نیازی ، بیگم نجمہ عزیز ،کرن ڈار نہال ہاشمی چودھری تنویر ،آصف کرمانی اور پروفیسر صادق کو ٹکٹ دئے گئے ہیں
ایمز ٹی وی (فارن ڈیسک) لیاری گنگ وار کے اہم ترین کردار عزیر بلوچ کی پاکستان حوالگی کا معاملہ ایک ہفتہ تاخیر کا شکار ایف آئی اے کا کہنا ہے کہ ملزم کو دبئی عدالت کے حکم پر قونصل خانے کے زریعے پاکستان منتقل کیا جائےگا دوسری طرف پولیس اور رینجرز افسران نجی حیثیت سے ٹوریسٹ ویسے پر دبئی کے دورے پر ہیں۔ ایف آئی کا کہنا ہے کہ بیرونی ملک گرفتار افراد کی حوالگی کا معاملہ پیچیدہ ہوتا ہے اس لئے عزیر بلوچ کا معاملہ تخیر کا شکار ہوا ہے ۔
ایمز ٹی وی (انٹرٹینمنٹ) فلم اسپنج آوٹ آف واٹر نے باکس آفس پر امریکن اسنائپر کو پیچھے چھوڑ دیا۔
ہالی ووڈ اینی میٹڈ فلم اسپنج آوٹ آف واٹر پہلے ہفتے ہی نمبر ون پوزیشن پر آگئی، فلم امریکی اسنائپر کا کئی ہفتوں کا راج برقرار رہ نہ سکا، بچوں میں مقبول ہونے کارٹون کیریکٹر اسپنج باکس پانی سے نکل کر انسانوں کی دنیا میں آگئے اورآتے ہی چھا گئے۔ ہالی ووڈ اینیمیٹڈ فلم نے پہلے ہفتے ہی باکس آفس پر پہلی پوزیشن حاصل کر لی، فلم نے پہلے چار دنوں میں چھپن ملین ڈالر سے زائد کا بز نس کرلیا ہے۔
فلم دیکھنے والوں کی اب بھی سینما گھروں میں لائن لگی ہے، فلم اسپنج بوب کا سیکوئل ہے،فلم اسپنج آوٴٹ آف واٹر کی کہانی میں اسپنج بوب اور اس کے دوستوں کی شرارتیں شامل ہیں۔فلم اسپنج آوٴٹ آف واٹر نے آسکرکیلئے نامزد فلم اور باکس آفس پر تین ہفتوں سے کامیاب رہنے والی فلم امریکن اسنائپر کو پیچھے چھوڑدیا۔
ایمز ٹی وی (بزنس) یونائٹیڈ بینک اورالائیڈ بینک کی نجکاری کے بعد حکومت نے حبیب بینک کی نجکاری کی منظوری دے دی۔ حکومت ایچ بی ایل کے ساڑھےاکتالیس فیصد شیئرز فروخت کرے گی۔
وزیر خزانہ اسحاق ڈار کی زیر صدارت کابینہ کی نجکاری کمیٹی کےاجلاس میں حبیب بینک کے پچیس کروڑ شیئرز بک بلڈنگ کے ذریعے جب کہ پینتیس کروڑ تیرانوےلاکھ شیئرز بڑے سرمایہ کاروں کو گرین شو آپشن کے تحت فروخت کرنے کی منظوری دی گئی۔
حبیب بینک کے شئیرز کی فروخت کے لئےکریڈٹ سیویز، ڈوئچے بینک، عارف حبیب اور ایلگزر سیکیورٹیزکو مالیاتی مشیر ہیں۔ اجلاس میں نیشنل پاور کنسٹرکشن کمپنی کی نجکاری کو فی الحال مؤخرکردیا ہے۔
ایمز ٹی وی (ایجوکیشن) ایک امریکی ماہر تعلیم نے کلاس میں طالب علموں کو متاثر کرنےکے لیے اساتذہ کو یوٹیوب استعمال کرنے کا مشورہ دیا ہے۔
امریکہ میں 'میسا چوسٹس انسٹیٹیوٹ آف ٹیکنالوجی 'میں ڈیجیٹل لرننگ کے ڈائریکٹر سنجے شرما کا کہنا ہے کہ اسکولوں اور یونیورسٹیوں میں انٹرنیٹ ایج کو اپنانے کی ضرورت ہے جس کے لیے طالب علموں کو روایتی تدریس کے بجائے ویڈیو اسباق کے ذریعے سکھانا ضروری ہے۔ ماہر تعلیم سنجے شرما کا کہنا ہے کہ اساتذہ کلاس روم میں گھنٹوں اسباق یاد کرانے کے بجائے دس منٹ کی ویڈیو کلپ دکھا کر طالب علموں کے بھٹکتے ہوئے ذہنوں کو متوجہ رکھ سکتے ہیں۔
ان کا کہنا تھا کہ ہمارے روایتی تدریسی طریقے جن میں گھنٹوں تک طالب علموں کی توجہ کی ضرورت ہوتی ہے، اب پرانے ہو چکے ہیں۔ ''ہم جس طریقے سے تعلیم دیتے ہیں وہ لیکچر پر مبنی ہے جو کہ ایک فیکٹری طرز کا نظام ہے۔ لیکن سائنس اور نفسیات کے علوم ہمیں بتاتے ہیں کہ طلبہ بے تکلفی کے طریقے سے صحیح معنوں میں سیکھتے ہیں جو کسی بھی طرح سے لیکچر کے ساتھ ہم آہنگ نہیں ہے۔''
انھوں نے کہا کہ ''انسان کا دماغ جلد بوریت کا شکار ہو جاتا ہےاور روایتی تدریسی طریقے سے ہم انھیں مزید ناخوش بنا دیتے ہیں بلکہ ہونا چاہیئے کہ اساتذہ دس منٹ کے لیکچر کے بعد طالب علموں کو دی گئی معلومات کے بارے میں سوالات پوچھیں کیونکہ یہ طریقہ معلومات کو مختصر مدت کی یاداشت سے طویل مدت کی یاداشت میں منتقل کرتا ہے۔''
لندن میں 2017ء میں پہلا ماڈل اسکول کھولا جائے گا جہاں طالب علموں کو کمپیوٹر پر قابل ذکر معلومات حاصل کر سکیں گے۔ سائمن میسن ایسیکس میں ہنی وڈ اسکول کے ہیڈ ٹیچر ہیں۔ اس اسکول کے تمام طالب علموں کو آن لائن معلومات بہم پہنچانے کے لیے آئی پیڈ فراہم کیا گیا ہے۔ سائمن میسن کا کہنا تھا کہ، نوجوانوں کو دس منٹ سے کہیں زیادہ دیر تک متوجہ رکھا جا سکتا ہے، اگر وہ کچھ ایسا سیکھنے میں ملوث ہو رہے ہیں جہاں معلومات حاصل کرنے کے لیے ان کے پاس مستند انتخاب موجود ہے
ایمز ٹی وی ( کراچی) سندھ حکومت کی غفلت کے باعث تھر میں مزید 3 بچے زندگی کی بازی ہار گئے۔جس کے بعد رواں برس ضلع بھر میں غذائی قلت اور صحت کی بنیادی سہولیات کی کمی کے باعث زندگی کی بازی ہارنے والوں کی تعداد 104 ہوگئی جن میں 101 بچے شامل ہیں۔دوسری جانب ضلع میں سندھ حکومت کی جانب سے گندم کی مفت فراہمی کے عمل میں بھی بے قاعدگی کی وجہ سے صورت حال مزید سنگین ہوگئی ہے۔
ایمز ٹی وی (بزنس) وفاقی وزیر تجارت انجینئر خرم دستگیر خان نے کہا ہے کہ وزارت تجارت اور ٹریڈنگ کارپوریشن آف پاکستان کی بروقت درآمد کے سبب رواں سال حکومت کاشتکاروں کو یوریا کی مد میں 30ارب سے زائد کی سبسڈی دے رہی ہے۔
کسانوں کیلئے ربیع کی فصل کی کاشت کے وقت وافر مقدار میں یوریا کی موجودگی کو یقینی بنایا گیا، ٹریڈنگ کارپوریشن سے متعلق بریفنگ کی دوران اظہار خیال کرتے ہوئے انہوں نے کہا کہ وزار ت تجارت بہتر معاشی فیصلوں کیلئے کابینہ کیلئے تجاویز تیار کرے گی۔
سال کے آغاز میں ہی ٹی سی پی کے ذریعے خریدی جانے والی اجناس کی خریداری یا درآمد کا مناسب ترین وقت واضح کیا جائے گا ،اور بروقت فیصلے کئے جائیں گے۔کاشتکاروں کو براہ راست سپورٹ ملے گی اور ملک کو قیمتی زرمبادلہ کی بچت ہو گی، وفاقی وزیر کو بتایا گیا کہ ای سی سی کے 29اکتوبر کے فیصلے کے مطابق ٹی سی پی نے انتہائی قلیل عرصے میں عالمی منڈی سے3لاکھ 76ہزار 296میٹرک ٹن یوریا 9جنوری تک درآمد کر کے نیشنل فرٹیلائزر مارکیٹنگ لمیٹڈ کو فراہم کی۔
جبکہ سعودی عرب سے گزشتہ سال 1لاکھ25ہزار میٹرک ٹن اور اس سال 1لاکھ 24ہزار میٹرک ٹن مزید یوریا درآمد کی گئی، جس کی بدولت فصل ربیع کیلئے یوریا ملک کے طول و عرض میں دستیاب تھی ۔
ایمز ٹی وی (فارن ڈیسک) مقامی ٹی وی پر اپنے خطاب میں حزب اللہ کے سربراہ حسن نصراللہ کا کہنا تھا کہ اگر اسرائیل نے جنگ ملسط کی تو اس کا منہ توڑ جواب دیا جائے گا۔ ان کا کہنا تھا کہ جنگ نہیں چاہتے اور نہ ہی جنگ سے خوفزدہ ہیں لیکن اگر جنگی محاذ کھولا گیا تو بھرپور کارروائی کرینگے ، اسرائیل مقبوضہ بولان کی پہاڑیوں پر القاعدہ کو پروان چڑھا رہا ہے تاکہ انہیں شام ،ایران ، لبنان اور عراق میں اپنے مذموم مقاصد کیلئے استعمال کرسکے۔ حسن نصراللہ عرب لیگ پر بھی کڑی تنقید کی۔ انہوں نے اٹھارہ جنوری کو اسرائیلی حملے کی مذمت کی اور کہا کہ حزب اللہ کے قافلے کودن کی روشنی میں نشانہ بنایا گیا، جس کا جواب دن کی روشنی میں اسرائیلی فورسز کو نشانہ بناکر دیں گے
ایمز ٹی وی (لاہور) الیکشن ٹریبونل میں قومی اسمبلی کے حلقہ این اے 122 میں مبینہ دھاندلی کے خلاف دائر عذرداری کی سماعت ہوئی، سماعت کے دوران الیکشن ٹربیونل نے عمران خان کی دوبارہ لوکل کمیشن مقرر کرنے کی درخواست مسترد کردی۔ سماعت کے دوران فریقین کے وکلا نے ووٹوں کی جانچ پڑتال کرنے والے لوکل کمیشن پر جرح کی۔ سردار ایاز صادق کے وکیل نے گواہ پیش کرنے سے انکارکرتے ہوئے موقف اختیار کیا کہ سردار ایاز صادق آیندہ تاریخ پر اپنا بیان رکارڈ کرائیں گے، جس پر ٹربیونل نے اگلی سماعت میں اسپیکر قومی اسمبلی کو طلب کرکے سماعت 7فروری تک ملتوی کردی۔