Reporter SS

بلاول بھٹو اپنے والد محترم کا دور یاد کریں

ایمز ٹی وی(خیرپور)مسلم لیگ ن سندھ کے سینئر نائب صدر سید شاہ محمد شاہ نے کہاہے کہ پیپلز پارٹی والوں کو جنرل ضیاء الحق کے دور میں میاں نواز شریف کے پنجاب کے وزیر اعلٰی بننے پر اعتراض ہے۔ ذوالفقار علی بھٹو جنرل ایوب خان اور جنرل یحیٰ خان کے ساتھ رہے پیپلزپارٹی کو اس پر اعتراض کیوں نہیں۔ بلاول بھٹو زرداری کرپشن کے خلاف سندھ میں ریلیاں نکالیں سندھ 2008ء سے کرپشن کا گڑھ بنا ہوا ہے۔ وہ جیم خانہ کلب خیرپور میں صحافیوں کے ساتھ بات چیت کر رہے تھے۔ سید شاہ محمد شاہ نے کہاکہ ان کو اس طرح کی بات کرنے کی ضرورت اس لیے پیش آئی کہ پیپلزپارٹی والے میاں نواز شریف کو بار بار جنرل ضیاء الحق کے دور میں پنجاب کے وزیر اعلیٰ رہنے کے طعنے دے رہے ہیں لیکن وہ یہ بات بھو ل بیٹھے ہیں کہ پیپلزپارٹی کے بانی چیئرمین ذوالفقار علی بھٹو طویل عرصہ فیلڈ مارشل جنرل محمد ایوب خان کی کابینہ میں اہم وزارتوں پر فائض رہے جبکہ اس کے بعد وہ جنرل یحیٰ خان کے ساتھ بھی رہے اور پاکستان کے چیف مارشل لا ایڈمنسٹریٹربھی بنے۔

انہوں نے کہاکہ بلاول بھٹو زرداری کر پشن کے خلاف پنجاب میں ریلیاں نکال رہے ہیں لیکن افسوس کہ ان کو اپنے والد محترم آصف علی زرداری کا دور یاد نہیں آرہا کہ اس دور میں کیا ہوتا رہا۔ سید شاہ محمد شاہ نے کہاکہ ملک کی اعلیٰ عدالتیں اور بیشتر محب وطن رہنماء 2008ء سے سندھ کو کرپشن کا گڑھ قرار دیتے رہے ہیں جبکہ سب کو پتہ ہے کہ سندھ میں گذشتہ ساڑھے 8برس سے میرٹ کا جنازہ نکلتا رہا ہے سرکاری نوکریاں فروخت ہوتی رہی ہیں جیالوں اور افسر شاہی نے مل کر سندھ کا دیوالیہ نکال رکھا ہے لیکن بلاول بھٹو زرداری کرپشن کے خلاف ریلیاں پنجاب میں نکال رہے ہیں۔ انہوں نے کہاکہ بلاول بھٹو زرداری کرپشن کے خلاف اگر ریلیاں سندھ میں نکالیں گے تو ہمیں خوشی ہوگی اور ہم واہ واہ کریں گے انہوں نے کہاکہ عمران خان بھی کرپشن کے خلاف ڈھول بجا رہے ہیں لیکن فیصلہ 2018ء میں عوام کرےگی کہ کون کرپٹ اور کون صاف و شفاف ہے

اسد اشرف ملک نے غیر قانونی مذبحہ کا از خود نوٹس لےلیا

ایمز ٹی وی(کراچی) صوبائی محتسب سندھ اسد اشرف ملک نے شہر میں غیر قانونی مذبحہ سے پریشر گوشت کی سپلائی اور ویٹنری ڈاکٹروں کی مبینہ کرپشن کے خلاف شکایت کا از خود نوٹس لےلیا۔

ان احکامات کی روشنی میں کے ایم سی کے دو سینئر افسران محتسب کے دفتر میں رپورٹ کے ساتھ پیش ہوئے اور آگاہی دیتے ہوئے بتایا کہ وقتاً فوقتاً مہم کے دوران سال 2016ء میں 14284کلو گرام گوشت ضبط کیا گیا۔

صوبائی محتسب نے کے ایم سی کی جانب سے موقف کو غیر تسلی بخش قرار دیتے ہوئے ہدایات جاری کیں کہ آئندہ پیشی پر اس غیر قانونی کاروبار کے سدباب کے لئے ٹھوس منصوبے کے ساتھ پیش ہوں۔

عدالت عظمیٰ میں مریم نواز کے دستاویزات مسترد

ایمزٹی وی(اسلام آباد)سپریم کورٹ میں پاناما کیس کی سماعت ہوئی سماعت کے دوران جماعت اسلامی کے وکیل نے دلائل مکمل کئے جس کے بعد مریم نواز کے وکیل شاہد حامد نے اپنے دلائل کا آغاز کرتے ہوئے موکلہ کا تحریری بیان سپریم کورٹ میں جمع کرا دیا جس پر جسٹس آصف سعید کھوسہ نے استفسار کیا کہ یہ دستاویز بغیر دستخط کیسے جمع کروا رہے ہیں ؟ وکیل شاہد حامد نے جواب دیا کہ اپنے موکل کی جانب سے مکمل ذمے داری کیساتھ بیان جمع کر ا رہا ہوں ، دستاویز پر مریم نواز کے دستخط نہ ہونے کی وجہ سے سپریم کورٹ نے انہیں مسترد کر دیا ۔

ان دستاویز میں مریم نواز کا کہنا تھا کہ پاکستان آرمی کے حاضر سروس کیپٹن صفدر سے 1992ءمیں شادی ہوئی اور بعد ازاں میرے شوہر نے سول سروسز جوائن کی اور 1986ءسے ٹیکس ادا کر رہے ہیں ۔ 2000ءمیں والدین کے ساتھ سعودی عرب جلا وطن کر دیا گیا ۔

دستاویز میں مریم نواز کی جانب سے کہا گیا ہے کہ ہمارے 3بچے ہیں جن میں ایک بیٹا اور 2بیٹیاں ہیں جبکہ میرا بیٹا درہام یونیورسٹی میں پڑھ رہا ہے ۔ہم شمیم ایگریکلچر فارمز رائے ونڈ روڈ میں موجود 5میں سے ایک گھر میں رہتے ہیں ، رائے ونڈ کے تمام گھر میری دادی شمیم اختر کے ہیں ۔

مریم نواز نے اپنی دستاویز میں مزید کہا ہے کہ 2000ءمیں ہمیں جلا وطن کیا گیا اور میں والد ین کے ہمرا ہ سعودی عرب چلی گئی ۔میرے شوہر بھی میرے ہمراہ تھے ، میرے والد اور شوہر کو انتقام کا نشانہ بنایا گیا ۔2007ءمیں جلا وطنی ختم کر کے واپس آئے اور شمیم ایگریکلچر فارم میں رہائش کی ۔ میرے شوہر 2008ءاور 2013ءمیں ایم این اے منتخب ہوئے ۔ شوہر کی آمدن بطور گورنمنٹ ملازم آتی رہی جسکی تفصیلات عدالت کو فراہم کر دیں ۔ میرے والد نے مجھے بھی قیمتی تحائف دیے وہ شفقت کے تحت دیے گئے ۔مجھے دیے گئے تحفوں میں میری والدہ اور بھائیوں کی رضامندی شامل تھی۔1992ءکے بعد سے میں کبھی بھی اپنے والد کے زیر کفالت نہیں رہی ۔

دلائل مکمل سماعت ملتوی

ایمزٹی وی(اسلام آباد)سپریم کورٹ نے پاناما کیس کی سماعت کل(بدھ) تک ملتوی کردی

میڈیا رپورٹس کے مطابق جسٹس آصف سعید کھوسہ کی سربراہی میں قائم بینچ نے جماعت اسلامی کے وکیل توفیق آصف کے دلائل مکمل ہونے کے بعد مریم نواز کے وکیل شاہد حامد کے دلائل سن کر پاناما کیس کی مزید سماعت کل(بدھ) تک ملتوی کر دی۔عدالت نے جماعت اسلامی کے وکیل سے سخت سوالات کیے اور انکے دلائل پر اعتراضات بھی لگائے ۔

جماعت اسلامی کے وکیل توفیق آصف نے دلائل دیتے ہوئے وزیراعظم کو عدالت بلانے کی درخواست کی جس پر عدالت نے کہا کہ اگر ضرورت ہوئی تو نواز شریف کو طلب کریںگے ورنہ نہیں۔جماعت اسلامی کے معاون وکیل احسن الدین نے موقف پیش کیا کہ تمام ثبوت آگئے ہیں اب عدالت کے کندھوں پر بھاری ذمہ داری ہے۔اس پرعدالت نے پوچھاسارے ثبوت کون سے ہیں ، انہیں ثبوت نہیں میٹریل کہہ سکتے ہیں ، قانون شہادت کے تحت مواد پرکھ کرمعلوم ہوکہ اسکابڑاحصہ فارغ ہے توپھرکیاہوگا۔

جماعت اسلامی کے وکیل توفیق آصف نے کہا کہ شک ہے دبئی مل کی فروخت سے لندن فلیٹس خریدے گئے جس پرجسٹس آصف سعید کھوسہ نے استفسار کیا کہ شک کا فائدہ کس کو جاتا ہے؟توفیق آصف نے کہا کہ نوازشریف کوعدالت بلا کر الزامات کا جواب طلب کیا جائے۔جسٹس آصف سعید کھوسہ نے کہا کہ اگر ضرورت ہوئی تو نواز شریف کو بلائیں گے ورنہ نہیں۔

جماعت اسلامی کے وکیل توفیق آصف نے دلائل کے آغاز میں بتایا کہ نوازشریف ظفر علی شاہ کیس میں فریق تھے اور میں نے جو کہا اس پر قائم ہوں جس پر بینچ کے رکن جسٹس عظمت سعید شیخ نے ریمارکس دیے کہ کیس میں خالد انور نوازشریف کے وکیل نہیں تھے ۔ وکیل نے بتایا کہ میں خالد انور کے عدالت میں دیے گئے دلائل بیان کرنا چاہتا ہوں ۔ میں ثابت کرونگا کہ خالد انور نوازشریف کی وکالت کرتے رہے جس پر بینچ کے سربراہ جسٹس آصف سعید کھوسہ نے استفسار کیا کہ عدالتی فیصلے کی فائنڈنگ بتائیں ،وکیل کی کیا استدعا تھی یہ نہیں ۔توفیق آصف نے جواب دیا کہ ظفر علی شاہ کیس میں نوازشریف کو فریق بنایا گیا تھا اور اس پر عدالت نے اعتراض کیا تھا مگر بات درست تھی ۔ جسٹس عظمت سعید شیخ نے کہا آپ کی درخواست میں بھی لکھا گیا تھا کہ خالد انور وکیل تھے ۔دیکھنا ہے کہ جماعت اسلامی نے اپنی درخواست میں غلط بیانی تو نہیں کی ۔ اس عدالت میں غلطی کی گنجائش نہیں فیصلے میں دیکھ لیں گے ۔عدالت نے فیصلے میں مبینہ کرپشن کا ذکر کیا ، مبینہ کرپشن کو فیصلہ نہیں کہہ سکتے ۔آپ نے فیصلہ بھی نہیں پڑھا اور حوالہ دے رہے ہیں ۔

جماعت اسلامی کے وکیل نے جوا ب دیا کہ ”ظفر علی شاہ کے فیصلے کو پڑھوں گا “۔فیصلے میں ذکر ہے کہ لندن فلیٹس شریف خاندان کے تھے ۔ مجھے پیرا گراف 127پڑھنے کی اجاز ت دیں جس پر جسٹس عظمت سعید شیخ نے اظہار برہمی کرتے ہوئے ریمارکس دیے کہ جو دل کرتا ہے وہ پڑھتے رہیں ۔ فیصلے میں کہا گیا ایک آدمی کی حکومت تھی اور پھر مشرف کی جمہوریت آگئی تھی جس پر جماعت اسلامی کے وکیل نے جواب دیا کہ یہ تو اس عدالت نے قوم پر بڑا احسان کیا ہے تو جسٹس عظمت سعید شیخ نے مکالمہ کرتے ہوئے کہا جی ہاں ایسا ہی ہے ۔ آپ نے فائل دیکھی نہ فیصلہ پڑھا، وکیل صاحب آپ نے بے بس کر دیا ۔ توفیق آصف نے موقف اپنایا کہ خالد انور ظفر علی شاہ کے وکیل تھے جس پر جسٹس عظمت سعید شیخ نے استفسار کیا کہ آپ نے بلکل مذاق بنا لیا ہے کچھ تو پڑھ لیا ہوتا جس پر وکیل توفیق آصف نے جواب دیا کہ 5منٹ دیں درستگی کرتا ہوں ۔ بینچ کے رکن جسٹس عظمت سعید شیخ نے وکیل سے مکالمہ کرتے ہوئے جواب دیا کہ پڑھیں جو آپ کا دل کرتا ہے۔ جسٹس اعجاز افضل نے ریمارکس دیے کہ فیصلے میں کہا گیا کہ نوازشریف گڈ گورننس میں ناکام ہوئے ۔ جسٹس اعجاز الاحسن نے جماعت اسلامی کے وکیل کو مخاطب کرتے ہوئے کہا کہ آپ نے کیس کو مذاق بنا کر رکھ دیا ہے ۔ خالد انور نوازشریف کے نہیں درخواست گزار کے وکیل تھے ۔ جسٹس عظمت سعید شیخ نے ایڈوکیٹ توفیق آصف سے کہا کہ آپ قانون کے بنیاد اصولوں کو نظر انداز کر رہے ہیں ۔

جماعت اسلامی کے وکیل نے جواب دیا کہ خالد انور نے نوازشریف کا دفاع کیا جس پر بینچ کے رکن جسٹس اعجاز افضل نے ریمارکس دیے کہ خالد انور کے پاس نوازشریف کا وکالت نامہ نہیں تھا ۔ وکیل نے جواب میں کہا کہ لندن فلیٹس التوفیق کیس میں گروی رکھے گئے ۔ جسٹس عظمت سعید شیخ نے استفسار کیا کہ آپ نے اپنے موکل کو جتنا نقصان پہنچانا تھا پہنچا دیا ۔ بینچ کے سربراہ جسٹس آصف سعید کھوسہ نے ریمارکس دیے ”جج صاحب نے ہلکی پھلکے اندا میں بات کی تھی جس پر جماعت اسلامی کے وکیل نے جواب میں کہا کہ ہلکی پھلکی بات کا مجھے بھاری نقصان اٹھانا پڑتا ہے ۔ جسٹس عظمت سعید شیخ نے کہا کہ فیصلے میں لکھیں گے کہ بات ہلکی تھی یا بھاری ۔جماعت اسلامی کے وکیل نے موقف اپنایا کہ لگتا ہے آج مجھے عدالت سننا ہی نہیں چاہتی جس پر جسٹس عظمت سعید شیخ نے ریمارکس دیے کہ آپ چاہیں تو 11سال تک دلائل دیں لیکن اپنی بات دہرائیں نہیں ۔ وقفے سے قبل جماعت اسلامی کے وکیل نے اپنے دلائل مکمل کر لیے اور جیسے ہی وقفہ ختم ہوا طارق اسد ایڈوکیٹ نے اپنے دلائل کا آغاز کرتے ہوئے عدالت سے استدعا کی کہ انکی درخواست الگ بینچ میں منتقل کی جائے ۔

انہوں نے عدالت سے استدعا کی کہ معاملے پر کمیشن بنانے کی درخواستوں و یکجا کر کے ایک ساتھ سماعت کیلئے الگ بینچ مقررکیا جائے جس پر عدالت نے معاملے پر کمیشن بنانے کی درخواستوں کو یکجا کر کے سماعت کیلئے الگ بینچ مقرر کرنے کا فیصلہ سنا دیا جبکہ کمیشن بنانے کی پہلی درخواست اور درخواست گزار کی درخواستوں کو یکجا کر دیا گیا ۔ بینچ کے سربراہ جسٹس آصف سعید کھوسہ نے پاناما لیکس پر جوڈیشل کمیشن بنانے کی درخواستیں الگ کر نے کا حکم سناتے ہوئے ریمارکس دیے کہ درخواستیں مختلف نوعیت کی ہیں انہیں الگ سنا جائے گا تاہم کمیشن بنانے کی 2درخواستوں کی سماعت غیر معینہ مدت کیلئے ملتوی کر دی گئی ۔

دنیا میں تباہی مچانے والی خطرناک توپ تیار

ایمزٹی وی(مانیٹرنگ ڈیسک)روس نے دنیا کی ایسی خطرناک ترین توپ تیار کرلی ہے جو بجلی استعمال کرتے ہوئے آواز کے مقابلے میں 10 گنا زیادہ رفتار سے گولا داغ کر مضبوط سے مضبوط ہدف کو بھی پلک جھپکتے ہی راکھ کا ڈھیر بناسکتی ہے۔

روسی ویب سائٹ ’’سائنٹفک رشیا‘‘ کے مطابق گزشتہ دنوں اس ’’بجلی بھری توپ‘‘ (الیکٹرومیگنیٹک ریل گن) سے تجرباتی طور پر 3 کلومیٹر فی سیکنڈ کی زبردست رفتار سے پلاسٹک کے گولے داغے گئے جنہوں نے المونیم کی موٹی چادر کے پرخچے اُڑا دیئے۔ روسی ذرائع کا کہنا ہے کہ اس وقت دنیا میں کوئی بنکر یا فولادی بکتر ایسا نہیں جو 3 کلومیٹر فی سیکنڈ کی رفتار سے ٹکرانے والے گولے کے سامنے ٹھہر سکے۔

گزشتہ 40 سال کے دوران فرانس اور امریکا میں بھی الیکٹرومیگنیٹک ریل گن کے منصوبوں پر بہت کام ہوچکا ہے جن سے کچھ اچھے نتائج بھی سامنے آئے ہیں لیکن اب تک ایسی کوئی بجلی بھری توپ نہیں بنائی جاسکی جو خلاء میں براہِ راست کوئی چیز پہنچا سکے۔ ان کے مقابلے میں روس کا منصوبہ ابھی بالکل ابتدائی مرحلے پر ہے کیونکہ اس کے ذریعے داغے گئے گولوں کا وزن خاصا کم ہے۔

رپورٹ کے مطابق ممکنہ طور پر اس بجلی بھری توپ کو ابتداء میں روسی بحری بیڑے کا حصہ بنایا جائے گا البتہ اس کے زیادہ طاقتور ماڈلز کے ذریعے چھوٹی جسامت والے مصنوعی سیارچوں اور مختلف ساز و سامان کو بغیر راکٹ کے خلاء میں بھی پہنچایا جاسکے گا۔

دفاعی ماہرین کا کہنا ہے کہ روسی ساختہ الیکٹرومیگنیٹک ریل گن کے منصوبے کو پختہ ہوکر قابلِ استعمال بننے میں ابھی مزید کئی سالہ تحقیق کی ضرورت ہے۔ البتہ کم فاصلے پر موجود اہداف کو تباہ کرنے کے لیے اس منصوبے کی تکمیل میں زیادہ وقت نہیں لگنا چاہیے۔

جوئے مینی سڈنی سکسرزٹریننگ سیشن سےاسپتال منتقل

ایمز ٹی وی(اسپورٹس) آسٹریلوی بالر جوئے مینی سر پر گیند لگنے کی وجہ سے نیٹ سےاسپتال پہنچ گئے۔ جوئے مینی سڈنی سکسرز ٹریننگ سیشن میں شریک تھے اسی دوران گیند ان کے سر پر لگی اور وہ نیچے گر گئے۔

ٗ انہیں برسبین کے گابا اسٹیڈیم سے فوری طور پر قریبی اسپتال میں لے جایا گیا اگرچہ ان کے سر پر کوئی زخم نہیں تھا مگر احتیاط کے طور پر ٹیسٹ ہوئے جو بعد میں کلیئر آئے ٗ مینی کی یادداشت کا ٹیسٹ بھی کلیئر آیا۔

کامیاب ترین ٹیسٹ باؤلر بننے کیلئے 5 وکٹیں درکار

ایمز ٹی وی(اسپورٹس) جنوبی افریقن ٹیم کے اسٹار فاسٹ باؤلر ڈیل اسٹین نے کہا ہے کہ انجری سے مکمل نجات حاصل کرنے کیلئے سخت محنت کر رہے ہیں اور رواں برس جون میں ٹیم میں واپسی ہدف ہے۔ اسٹین گزشتہ سال آسٹریلیا کے خلاف پرتھ ٹیسٹ کے دوسرے روز کندھے کی ہڈی تڑوا بیٹھے تھے جس کے بعد ان کے کندھے کی کامیاب سرجری کی گئی اور ڈاکٹرز نے انکو قریباً چھ ماہ تک کرکٹ میدانوں سے دور رہنے کا مشورہ دیا تھا۔

اسٹین کو جنوبی افریقہ کا کامیاب ترین ٹیسٹ باؤلر بننے کیلئے 5 وکٹیں درکار ہیں۔ سٹین نے 417 وکٹیں لے رکھی ہیں جبکہ شان پولاک 421 وکٹیں لے کر سرفہرست ہیں۔ مایہ ناز فاسٹ باؤلر نے اپنے بیان میں کہا کہ بحالی صحت کا عمل تیزی سے جاری ہے اور مجھے یقین ہے کہ آئندہ ماہ فروری کے آخر تک میں دوبارہ ٹریننگ شروع کرنے کے قابل ہو جاؤں گا۔

انہوں نے کہا کہ اب میں سو فیصد فٹ ہونے کے بعد ہی دوبارہ میدان کا رخ کروں گا تاہم جون میں ٹیم میں کم بیک کرنا ہدف ہے اور اس کیلئے میں سرتوڑ کوشش کروں گا۔

پاک چائنہ میڈیکل ایسوسی ایشن کانفرنس 2018میں ہو گی

ایمز ٹی وی (صحت /کراچی )پاکستان میڈیکل ایسوسی ایشن سینٹر کے صدر پروفیسر ایم اشرف نظامی ، سیکریٹری جنرل ڈاکٹر ایس ایم قیصر سجاد اورسابق سیکریٹری ڈاکٹر مرزا علی اظہر پر مشتمل پی ایم اے کے اعلیٰ سطحی وفد نے چائنیز میڈیکل ایسوسی ایشن (سی ایم اے) کی سالانہ سائنٹفک میٹنگ 2017میں شرکت کی جو 13سے 18 جنوری تک چین کے شہر نانجنگ میں منعقد ہوئی۔ پی ایم اے کراچی کے جاری کر دہ اعلامیے کے مطابق کانفرنس میں ورلڈ میڈیکل ایسوسی ایشن ، بریٹش میڈیکل ایسوسی ایشن ، امریکن میڈیکل ایسوسی ایشن، سری لنکن میڈیکل ایسوسی ایشن، انڈین میڈیکل ایسوسی ایشن ، ہانگ کانگ میڈیکل ایسوسی ایشن ، مکائو میڈیکل ایسوسی ایشن ، تھائی لینڈ میڈیکل ایسوسی ایشن سمیت دیگر کئی ممالک کی میڈیکل ایسوسی ایشن کے نمائندوں نے شرکت کی جن سے پی ایم اے پاکستان کے وفد نے ملاقاتیں کیں ۔ پی ایم اے اور چائنیز میڈیکل ایسوسی ایشن اپنی دوسری مشترکہ پاک ۔ چائنا میڈکونگ کا انعقاد جنوری2018 میں چائنا میں کریں گے ۔ طب کے مختلف شعبوں پر مشتمل ماہر ڈاکٹروں کا ایک بڑا وفد پاکستان میڈیکل ایسوسی ایشن کی جانب سے اس کانفرنس میں شرکت کرنے کیلئے چائنا جائے گا

ڈیوڈ وارنربارڈرمیڈل اعزاز پانے والے چوتھے آسٹریلوی کھلاڑی

ایمز ٹی وی (انٹرٹینمنٹ) آسٹریلیا کے اوپنر ڈیوڈ وارنر نے لگاتار دوسرے سال ایلن بارڈر میڈل حاصل کرکے یہ اعزاز پانے والے چوتھے آسٹریلوی کھلاڑی بن گئے ہیں ٗ30 سالہ ڈیوڈ وارنر کو سال کے بہترین آسٹریلوی کھلاڑی کے ایوارڈ کے علاوہ آسٹریلیا کی ایک روزہ کرکٹ کے سال کا بہترین کھلاڑی بھی قرار دیا گیا۔ڈیوڈ وارنر نے 2016 میں بہترین کارکردگی کا مظاہرہ کرتے ہوئے تمام طرز میں 2 ہزار 420 رنز بنائے اور لگاتاردوسری مرتبہ ایلن بارڈر ایوارڈ حاصل کرکے رکی پونٹنگ، شین واٹسن اور مائیکل کلارک کی فہرست میں شامل ہوگئے ہیں۔

ایلن بارڈر ایوارڈ کیلئے وارنر کا مقابلہ اپنے کپتان اسٹیواسمتھ سے تھا جنھیں 248 ووٹ ملے تھے تاہم وارنر 269ووٹ کے ساتھ ان سے یہ ایوارڈ چھیننے میں کامیاب ہوئے۔آسٹریلوی بورڈ کے اعلامیے کے مطابق وارنر نے اس موقع پر کہا کہ ساتھی کھلاڑیوں کا شکریہ اور کپتان اسٹیو اسمتھ، آپ سب کے بغیر میں یہاں نہیں ہوتا کیونکہ یہ ٹیم گیم ہے۔انھوں نے سابق کھلاڑیوں کا شکریہ ادا کرتے ہوئے کہا کہ سابق کھلاڑیوں کا بھی شکریہ کیونکہ آپ نے جوکچھ ماضی میں کیا ہے اس کے بغیر ہم اپنے خواب کی تعبیر حاصل کرنے کے قابل نہیں ہوتے۔فاسٹ باؤلر مچل اسٹارک کو ٹیسٹ کرکٹ میں شاندار کارکردگی پر سال کا بہترین آسٹریلوی کھلاڑی قرار دیا گیا۔آل راؤنڈر شین واٹسن نے ٹی ٹوئنٹی میں 150.51 کی اسٹرائیک ریٹ سے 298 رنز بنائے ٗ 9 وکٹیں بھی حاصل کیں جس پر انھیں ریکارڈ تیسری مرتبہ ٹی ٹوئنٹی کا سال کا بہترین کھلاڑی قرار دیا گیا۔

پاکستان کے خلاف ٹیسٹ کرکٹ میں ڈیبیو کرنے والے ویسٹرن آسٹریلیا کے آل راؤنڈر ہلٹن کیٹررائٹ کو بریڈ مین نوجوان کرکٹر کا ایوارڈ دیا گیا۔یاد رہے کہ اس سے قبل یہ ایوارڈ گلین مک گرا، اسٹیووا، ایڈم گلکرسٹ اور موجودہ کپتان اسٹیو اسمتھ کو دیا گیا تھا۔

’کنگ آرتھر لیجنڈ آف دی سورڈ‘ کی پہلی انٹری

ایمز ٹی وی(انٹرٹینمنٹ) ایکشن سے بھرپور ہالی ووڈ کی نئی ایڈونچر ڈرامہ فلم ’کنگ آرتھر لیجنڈ آف دی سورڈ‘ کا پہلا ٹیزر ٹریلر جاری کر دیا گیا ہے۔

ہدایتکار گائے ریٹچی کی اس سنسنی خیز فلم کی کہانی ایک ایسے جانباز جنگجو نوجوان پر مبنی ہے جو چٹان میں دھنسی ایک طلسماتی تلوار کو بزورِ بازو کھینچ نکالتا ہے اور پھر ایسے ایسے کارنامے انجام دیتا ہے کہ بادشاہ، اور رعایا سمیت تمام سلطنت حیران رہ جاتی ہے۔

اسٹیو کلارک، جوبی ہیرولڈ اور ٹوری ٹنل کی مشترکہ پروڈیوس کردہ اس فلم میں مرکزی کردار ہالی اوڈ اداکار و پروڈیوسر چارلی ہننام نبھا رہے ہیں۔

جن کے علاوہ اینا بیل ویلیس، اینڈریئن گیلن، کیٹی مارگریٹ، جیوڈ لاء، ٹام وو، ایلن پاؤل اور مشہورِ زمانہ فٹ بالر اسٹار ڈیوڈ بیکھم بھی جلوۂ گر ہو رہے ہیں۔

102ملین ڈالر لاگت سے تیارہونیوالی ایکشن، ایڈونچر اور ڈرامے کا مکس تڑکا لِئے یہ سنسنی خیز فلم وارنر بروس پکچرز کے تحت 24مارچ کو سینما گھروں میں دھوم مچانے آرہی ہے۔

Page 2006 of 2387