کراچی: محکمہ موسمیات نے آج سے کراچی میں موسم سرما کی سرد ترین لہر کی پیش گوئی کردی۔

محکمہ موسمیات کے مطابق کراچی میں ٓآج سے سردی میں اضافہ ہوگا اور موسم سرما کی سرد ترین لہر کے دوران درجہ حرارت 10 ڈگری سے نیچے جا سکتا ہے۔

شہر قائد میں سردی کی یہ لہر ایک ہفتے تک جاری رہ سکتی ہے، 15 اور17جنوری کی رات کراچی کا درجہ حرارت 5 سے 6 ڈگری سینٹی گریڈ تک گرسکتا ہے۔

دوسری جانب کراچی میں سائیبریا کی یخ بستہ ہواؤں کے باعث موسم مزید سرد ہوگیا ہے جب کہ اتوار کے روزشہر کے مختلف علاقوں میں بوندا باندی اور ہلکی بارش کے باعث سردی کی شدت میں اضافہ ہوگیا ہے

کوئٹہ : کوئٹہ سمیت بلوچستان کے مختلف علاقوں میں شدید بارشوں اور برفباری کے باعث 8 افراد جاں بحق اور درجن سے زائد زخمی ہوگئے۔کوئٹہ سمیت صوبے کے مختلف علاقوں علاقوں میں شدید بارشوں اور برفباری کے باعث گھروں کی چھتیں گرنے سے اب تک بچوں سمیت 8 افراد جاں بحق جبکہ درجن بھر زخمی ہو گئے ہیں۔
مختلف پہاڑی علاقوں سے گزرنے والی قومی شاہراہوں کی بندش سے مسافروں کے پھنس جانے کی بھی اطلاعات مل رہی ہیں۔ صوبائی حکومت اور پراونشل ڈیزاسٹر منیجمنٹ اتھارٹی نے شہریوں کو سفر سے گریز کرنے کی ہدایت کرتے ہوئے کہا ہے کہ پھسلن کے باعث قومی شاہراہوں پر سفر خطرناک ہے۔
شدید برفباری کی وجہ سے صوبائی دارالحکومت کوئٹہ میں بجلی کا طویل ترین بریک ڈاون ہے بلکہ مختلف اضلاع میں تو گزشتہ روز سے ہی بجلی کی سپلائی بند کر دی گئی ہے۔ رہی سہی کسر گیس پریشر کی کمی اور انٹرنیٹ نظام کی خرابی نے پوری کر دی ہیں۔
اداروں کی اعداد و شمار کے مطابق سرحدی علاقے چمن کے کلی لقمان میں شادی گھر میں ایک کمرے کی چھت گرنے سے خواتین اور بچوں سمیت 5 افراد جان بحق جبکہ 6 زخمی ہو گئے۔ زخمی ہونے والے افراد کو فوری طور پر سول اسپتال چمن منتقل کر دیا گیا ہے جہاں سے خاتون اور ایک شدید زخمی بچی کو کوئٹہ ریفر کر دیا گیا ہے مگر کوئٹہ منتقل کرنے کے لئے بھی لواحقین کو مشکل کا سامنا ہے کیونکہ خوجک ٹاپ گزشتہ روز سے جاری برفباری سے بند ہے جسے کھولنے کے لئے ضلعی انتظامیہ کوشاں ہیں۔
اس کے علاوہ ضلع پشین کے علاقے چوکل میں کمرے کی چھت گرنے سے 2 بچیاں جان کی بازی ہار گئی ہیں جبکہ 2 افراد زخمی ہو گئے ہیں جنہیں قریبی اسپتال منتقل کر دیا گیا ہے۔ زخمیوں میں ایک خاتون بھی ہیں۔
برشور میں چھت گرنے سے ایک خاتون جاں بحق جبکہ 2 بچوں کے زخمی ہونے کی اطلاعات ملی ہیں۔ زخمیوں اور جاں بحق افراد کو تحصیل ہیڈ کوارٹر اسپتال منتقل کر دیا گیا ہے۔ ضلعی انتظامیہ کے مطابق زخمیوں کی حالت خطرے سے باہر بتائی جا رہی ہے۔
واشک سے رکن اسمبلی زابد ریکی کے مطابق ماشکیل کی ندی بگ میں سیلابی پانی میں 20 افراد پھنس چکے ہیں۔ اس سلسلے میں انہوں نے وزیر اعلی بلوچستان سے رابطے کی کوشش کی جو کامیاب نہیں ہو پائی۔ انہوں نے وزیر داخلہ اور پراونشل ڈیزاسٹر منیجمنٹ اتھارٹی کے حکام کو صورتحال سے آگاہ کرتے ہوئے پھنسے ہوئے افراد کو نکالنے کے لئے ہیلی کاپٹر بھجوانے کی درخواست کی ہے۔
شدید برفباری اور بارشوں کے باعث صوبے کے مختلف علاقوں کے ایک دوسرے سے رابطے بھی منقطع ہو چکے ہیں۔ خوجک ٹاپ، مچھ کولپور، کوئٹہ کراچی شاہراہ، کچلاک، کان مہترزئی شاہراہ، کوئٹہ ڑوب شاہراہ و دیگر کی بھی بندش کی اطلاعات مل رہی ہیں بلکہ وہاں سینکڑوں گاڑیوں میں سوار افراد کی پھنس جانے کی بھی اطلاعات ہیں۔
بعض مقامات پر پھنسے افراد نے سوشل میڈیا پر ویڈیوز میں مدد کی اپیل کی ہے۔ متعدد نے میڈیا نمائندوں اور منتخب نمائندوں کے ذریعے امدادی ٹیموں تک اطلاعات پہنچانے کی کوششیں کی۔
ڈپٹی کمشنر کوئٹہ کے حکم پر سیکرٹری آر ٹی اے کوئٹہ نے تمام پبلک ٹرانسپورٹ و گڈز ٹرانسپورٹ کو ہدایت کی ہے کہ وہ کوئٹہ سے کراچی، کوئٹہ چمن، کوئٹہ سبی نیشنل ہائی ویز پر برف جمنے کی وجہ سے سفر کرنے سے گریز کریں۔
مستونگ سے ملنے والی اطلاعات کے مطابق کوئٹہ کراچی این 25 اور کوئٹہ سبی این 65 شاہراہوں پر کل سے شدید برفباری کے باعث برف جم گئی ہے۔ سڑکیں صاف کرنے کے لئے ایف ڈبلیو او، این ایچ اے، پی ڈی ایم اے اور ضلعی انتظامیہ متحرک ہے۔
انتظامیہ نے کوئٹہ کراچی شاہراہ پر سفر کرنے والوں کو کانک نوحصار روٹ استعمال کرنے کا مشورہ دیا ہے تاکہ وہ لکپاس کے دشوار گزار علاقے میں مشکلات سے بچ سکیں۔
کچلاک سے ملنے والی اطلاعات کے مطابق کوئٹہ چمن شاہراہ کو سملی ملازئی کے مقام پر بند کر کے سفر کرنے والوں کو بائی پاس کا راستہ استعمال کرنے کی ہدایت کی گئی ہے۔ادھر ڈپٹی کمشنر کوئٹہ نے شہر میں برفباری کے پیش نظر کسی ناخوشگوار واقعہ سے بچنے کے لئے شہریوں کو بیرونی راستوں پر غیر ضروری سفر سے گریز کی ہدایت کی ہے۔ کوئٹہ میں شدید برفباری کے باعث جہاں مختلف شاہراہیں دریا کا منظر پیش کر رہی تھی وہی بجلی کی طویل ترین لوڈ شیڈنگ، گیس پریشر کی کمی، ٹیلی فونز کی خرابی نے شہریوں کی زندگی اجیرن بنادی ہے۔

ڈھاکا: بنگلادیش کرکٹ بورڈ نے پاکستان میں ٹیسٹ سیریز کھیلنے سے انکار کردیا۔

صدر بنگلا دیشی کرکٹ بورڈ نظم الحسن نے پاکستان میں ٹیسٹ سیریز کھیلنے سے انکار کرتے ہوئے کہا کہ فیصلہ مشرق وسطیٰ کے حالات کی وجہ سے کیا، بنگلا دیش کرکٹ ٹیم پاکستان میں مختصر قیام کر سکتی ہے لہذا سیکورٹی ایڈوائز پر صرف 3 ٹی 20 کھیل سکتے ہیں۔تاہم اس حوالے سے بنگلا دیشی کرکٹ بورڈ پی سی بی کو باضابطہ طور پر آگاہ کرے گا۔

دوسری جانب پاکستان کرکٹ بورڈ کا کہنا ہے کہ میڈیا کے ذریعے بنگلا دیش کرکٹ بورڈ کے انکار کا پتا چلا، بنگلا دیشی بورڈ حکام  رابطہ کریں پھر جواب دیں گے۔

کراچی: متنازع ٹک ٹاک اسٹار حریم شاہ کی مفتی عبدالقوی کے ساتھ وائرل ہونے والی تصویر نے سوشل میڈیا پر ہنگامہ مچادیا۔

پاکستان کی متنازع سوشل میڈیا اسٹار قندیل بلوچ کے ساتھ اسکینڈل کے بعد مفتی عبدالقوی کی اب ٹک ٹاک اسٹار حریم شاہ کے ساتھ تصویر سوشل میڈیا پر وائرل ہورہی ہے۔ تصویر میں دونوں ایک ساتھ کھڑے ہوئے ہیں۔

سوشل میڈیا پر چلنے والی خبروں کے مطابق مفتی قوی کا اس تصویر کے حوالے سے کہنا ہے کہ ان کی حریم سے ملاقات اسلام آباد میں ہوئی تھی جہاں حریم نے ان کے ساتھ سیلفی لینے کی خواہش ظاہر کی جس پر انہوں نے اجازت دے دی تھی
سوشل میڈیا پر اس تصویر کو لے کر ہنگامہ مچاہوا ہے۔ لوگ حریم شاہ اور مفتی قوی کی تصویرپر تشویش کا اظہار کرتے ہوئے حریم شاہ کو قندیل بلوچ سے منسلک کررہے ہیں

واضح رہے کہ پاکستان کی متنازع ترین سوشل میڈیا اسٹار قندیل بلوچ کی مفتی قوی کے ساتھ سیلفی نے سوشل میڈیا پر ہنگامہ مچادیا تھا تاہم وہ قندیل بلوچ کی آخری سیلفی ثابت ہوئی تھی۔اس واقعے کے بعد قندیل بلوچ کو اس کے بھائی نے قتل کردیا تھا۔ قندیل بلوچ قتل کیس میں دیگر ملزمان کے ساتھ مذہبی اسکالر مفتی عبدالقوی کو بھی گرفتار کیا گیا تھا تاہم گزشتہ برس ستمبر میں عدالت کی جانب سے مفتی قوی کو بری کردیا گیا تھا۔