Reporter SS
کراچی:حکومتی اقدامات کے باعث رواں مالی سال کے ابتدائی 4 ماہ کے دوران ملک کے تجارتی خسارے میں 33.5 فیصد کمی دیکھی گئی ہے۔
وفاقی ادارہ شماریات کی جانب سے جاری کردہ اعداد و شمار کے مطابق رواں مال پہلے 4 ماہ (جولائی تا اکتوبر 2019) کے دوران ملک کی برآمدات گزشتہ مالی سال کے اسی دورانیے کے مقابلے میں 3.6 فیصد اضافے کے ساتھ 7.53 ارب ڈالر رہی جب کہ اسی دوران درآمدات کی مالیت 19.3 فیصد کمی سے 15.30 ارب ڈالر رہی۔
لاہور:آسٹریلیا کے خلاف دو ٹیسٹ میچوں کی سیریز میں شرکت کے لیے کپتان اظہر علی سمیت 10 کھلاڑی سڈنی روانہ ہوگئے۔
آسٹریلیا روانگی کے پہلے مرحلے میں کرکٹرز چند گھنٹے دبئی میں قیام کریں گے جس کے بعد ان کی سڈنی کی فلائیٹ طے ہے۔ اظہر علی،عابد علی، کاشف بھٹی، نسیم شاہ،محمد عباس،شاہین شاہ آآفریدی،عمران خآن سینیئر،اسد شفیق،شان مسعود، یاسرشاہ ٹیسٹ سکواڈ کاحصہ ہیں، دوسرے پانچ کرکٹرز امام الحق، بابراعظم، موسی خان، حارث سہیل، افختار احمد اور محمد رضوان پہلے سے ٹی ٹوئنٹی سیریز کے لیے وہاں موجود ہیں۔
پاکستانی ٹیم ٹیسٹ میچز سے پہلے وہاں دو پریکٹس میچز بھی کھیلے گی۔ پاکستان اور آسٹریلیا کے درمیان پہلا ٹیسٹ اکیس نومبر سے کھیلا جائے گا۔
کراچی : سندھ حکومت نے بلدیہ عظمیٰ کراچی سے ترقیاتی کاموں کے اختیارات واپس لے کر شہری انتظامیہ کے سپردکرنے کی تیاریاں کرلیں ہیں۔
سندھ کے دیگر اضلاع کی طرح ڈسٹرکٹ اے ڈی پی میں کراچی کا ساڑھے 3 ارب روپے کا ترقیاتی فنڈکے ایم سی کے بجائے کمشنراورڈپٹی کمشنرزکے حوالے کیا جائے گا جس کے بعد بلدیہ عظمیٰ کے اختیارات مزید محدود ہو جائیں گے، شہرکی جاری اورنئی ترقیاتی اسکیمیں ڈپٹی کمشنرزکو منتقل کی جائیں گی،بلدیہ عظمیٰ کراچی کو گزشتہ مالی سال کی چوتھی اوررواں مالی سال کی دوسری سہ ماہی کے فنڈزتاحال ریلیز نہیں کیے گئے۔
ذرائع کا کہنا ہے کہ سندھ بھر کے تمام ڈسڑکٹ میں اے ڈی پی فنڈز کی ریلیز ڈپٹی کمشنرز کو ہی جاری کی جاتی ہے جبکہ کراچی کے 6 اضلاع ہے جس میں ڈپٹی کمشنرز کے بجائے بلدیہ کراچی اے ڈی پی فنڈز کی ریلیز جاری ہوتی ہے اور اس پر عملدر آمد سابق گورنرڈاکٹر عشرت العبادکی ہدایت اور ان کی کاوشوں سے شروع ہوا تھا۔
ذرائع کا مزیدکہنا ہے کہ کے ایم سی کو گزشتہ مالی سال کی چوتھی اور آخری سہہ ماہی کی قسط ادا نہیں کی گئی جواسی سلسلے کی کڑی بتائی جارہی ہے اورنئے مالی سال کا پانچواں ماہ شروع ہونے کے باوجود ایک بھی سہہ ماہی کی قسط جاری نہیں ہوئی ہے جس کی وجہ سے شہر بھر میں اے ڈی پی فنڈز سے جاری تمام ترقیاتی منصوبے ادائیگیاں نہ ہونے کے باعث بند پڑے ہیں۔
ذرائع کا کہنا ہے کہ سندھ حکومت نے اس حوالے حکمت عملی مرتب کر لی ہے جس کیلیے حالیہ دنوں 21ستمبر سے 21 اکتوبر کی کراچی میں سندھ حکومت کی صفائی مہم کیلیے مختص 30 کروڑ روپے بھی سندھ حکومت نے بلدیاتی اداروں کے بجائے شہر کے تمام ڈپٹی کمشنرز میں یکساں 5 کروڑ روپے فی کس جاری کیے تھے۔
لاہور: جے یوآئی (ف) کے سربراہ مولانا فضل الرحمان کی گرفتاری کے لیے ہائی کورٹ میں درخواست دائرکردی گئی ہے۔
جے یوآئی (ف) کے سربراہ مولانا فضل الرحمان کی گرفتاری اوران کے خلاف بغاوت کی کارروائی کرنے کے لیے لاہور ہائی کورٹ میں ندیم سرور ایڈووکیٹ نے درخواست دائرکردی۔ درخواست میں موقف اختیارکیا گیا کہ مولانا فضل الرحمان اپنی تقاریر سے لوگوں کو اکسا رہے ہیں جس سے ملک انتشار پھیلنے کا خدشہ ہے۔
موقف میں مزید کہا گیا کہ مولانا فضل الرحمان نے بیان دیا کہ آزادی مارچ کے شرکا وزیر اعظم ہاؤس جا کرعمران خان کو گرفتار کر سکتے ہیں، لوگوں کو ریاست کے خلاف اکسانا بغاوت کے زمرے میں آتا ہے ، اس لیے مولانا فضل الرحمان کو گرفتار کر کے ان کے خلاف بغاوت کی کارروائی کا حکم دیا جائے۔
راولپنڈی: اعلیٰ عدلیہ کیلیے آئندہ ماہ بہت اہم ہے، سپریم کورٹ اور ملک کے سب سے بڑے صوبے پنجاب کے چیف جسٹس صاحبان رٹائر ہوجائیں گے، دونوں اعلیٰ عدلیہ کی نئی سنیارٹی لسٹیں بھی جاری ہوںگی۔
چیف جسٹس پاکستان آصف سعید کھوسہ 20 دسمبر کو رٹائر ہوجائیں گے، ان کی جگہ سینئر ترین جج جسٹس گلزار احمد21 دسمبر کو ایوان صدر میں حلف اٹھائیں گے، چیف جسٹس لاہور ہائیکورٹ سردار شمیم31 دسمبر کو رٹائر ہوں گے اور یکم جنوری 2020 کو سینئر ترین جج جسٹس مامون الرشید شیخ گورنر ہاؤس لاہور میں حلف اٹھائیں گے، ان کے ساتھ دوسرے جج جسٹس شاہد مبین بھی31 دسمبر کو ہی رٹائر ہوںگے ان دونوں کی رٹائرمنٹ سے لاہور ہائیکورٹ میں ججز کی خالی سیٹوں کی تعداد بڑھ کر18ہوجائے گی۔
لاہور ہائیکورٹ میں نئے ججز کی تعیناتی کیلیے10سینئر موسٹ ڈسٹرکٹ اینڈ سیشن ججز کی ترقی ہوگی اور 8 براہ راست وکلا میں سے لیے جائیں گے، سپریم کورٹ میں چیف جسٹس آصف سعید کھوسہ کی رٹائرمنٹ کے بعد پنجاب سے سینئر ترین ججز جسٹس قاسم خان یا جسٹس مظاہر علی اکبر نقوی میں سے ایک جج کو جنوری 2020 میں سپریم کورٹ کے جج کی حیثیت سے ترقی دے دی جائے گی۔
اسلام آباد: اسلام آباد ہائی کورٹ نے الیکشن کمیشن کے دو نئے ارکان کی تعیناتی کا صدارتی نوٹیفکیشن معطل کردیا۔
سرکاری وکیل نے کہا کہ چار ہفتے کا مزید وقت دے دیا جائے، تین میٹنگز ہوئی ہیں لیکن حالات خراب ہونے کی وجہ سے پیش رفت نہیں ہو سکی۔ چیف جسٹس نے دھرنے کی اشارہ کرتے ہوئے کہا کہ جس معاملے کا آپ حوالہ دے رہے ہیں اس کو بھی پارلیمنٹ میں حل ہونا چاہیے۔ کیس کی مزید سماعت پانچ دسمبر تک ملتوی کردی گئی۔
اسلام آباد: پاکستان نے بھارت کی جانب سے جاری کردہ نئے سیاسی نقشے کو مسترد کرتے ہوئے نئی دہلی کے اقدام کو اقوام متحدہ کی سلامتی کونسل کی منظورکردہ قراردادوں کی مکمل خلاف ورزی قرار دیدیا۔
ترجمان دفتر خارجہ نے کہا ہے کہ ہندوستانی وزارت داخلہ کے 2 نومبرکو جاری کردہ سیاسی نقشے میں جموں وکشمیرکو بھارت کا حصہ دکھایا گیا، نقشے میں گلگت بلتستان اور آزاد جموں وکشمیرکے کچھ حصے بھی بھارت میں شامل کرنے کی کوشش کی گئی، بھارت کی غلط نقشے ناقابل قبول اور سلامتی کونسل کی قراردادوںکی خلاف ورزی ہے۔
ترجمان دفتر خارجہ کاکہنا ہے کہ پاکستان ان سیاسی نقشوںکو مسترد کرتا ہے جو اقوام متحدہ کے نقشوں سے متضاد ہیں، ہندوستان کاکوئی بھی قدم اقوام متحدہ میں تسلیم شدہ جموں وکشمیرکی ’’متنازعہ‘‘ حیثیت کو تبدیل نہیں کر سکتا۔ حکومت ہندکے اقدامات مقبوضہ کشمیرکے عوام کے حق خود ارادیت کوغصب نہیں کر سکتے، پاکستا ن مقبوضہ جموں وکشمیرکے عوام کی جائزجدوجہدکی حمایت کرتا رہے گا۔
کراچی: داخلہ کمیٹی کے اعلامیہ کے مطابق مارننگ پروگرامز میں چار سالہ بی ایس پرگرامز جن میں کمپیوٹرسائنس، انفارمیشن ٹیکنالوجی، بی بی اے، ڈی فارم میسی، کامرس، اکاونٹنگ و فنانس، انگلش، ایجوکیشن، بی ایڈ کے ڈیڑھ وڈھائی سالہ پروگرام، بی ایڈ آنرزچارسالہ پروگرام، ایم فل ایجکویشن میں داخلہ جاری ہیں جبکہ ماسٹرز پروگرامز میں ایم بی اے 5۔3 سالہ پرگرامز، ایم کام، ایم اےانگلش، ایم اے ایجوکیشن میں داخلے دیئے جائیں گے۔
جبکہ ایوننگ پروگرام میں چار سالہ بی ایس پرگرامز جن میں کمپیوٹرسائنس، انفارمیشن ٹیکنالوجی، بی بی اے، ڈی فارم میسی، کامرس، اکاونٹنگ و فنانس، انگلش، ایم بی اے ڈھائی سالہ پرگرامز،ایم کام، ایم اے انگلش، ایم اےایجوکیشن میں داخلے ہونگے۔
اس حوالےسے داخلہ کمیٹی نےیہ بھی کہا ہے ہفتہ وار پروگرام میں داخلہ لینےوالے خواہشمند امیدوارایم بی اے ڈیڑھ سالہ، ایم بی اے ساڑھےتین سالہ اور ایم کام میں داخلہ لےسکتے ہیں۔
جاری کردہ اعلامیہ کےمطابق داخلہ فارم جمع کرانےکی آخری تاریخ 22نومبر2019 مقررکی گئی ہے۔ داخلہ ٹیسٹ یکم دسمبر2019 کومنعقدکیاجائےگا جبکہ میرٹ لسٹ 6دسمبرکوجاری کردی جائے گی جامعہ کی جانب سے فیس جمع کرانے کی آخری تاریخ 13 دسمبر مقرر کی گئی ہے۔ تاہم کسی بھی شکایت کے لئے اپنا کلیم فارم طلبا و طالبات 9دسمبرکو جمع کراسکیں گے بعدازاں کلیم فارم کے بعد داخلہ فیس 20دسمبرتک وصول کی جائےگی جبکہ طلبا و طالبات کےلئےاستقبالیہ تقریب یکم جنوری 2020 کو منعقد ہوگی
داخلہ لینے والےخواہشمندطلباوطالبات آن لائن فارم www.bbsul.edu.pk جمع کراسکتےہیں ۔
اسلام آباد:مولانا فضل الرحمان کی جانب سے وزیراعظم عمران خان کو مستعفی ہونے کے لیے دی گئی ڈیڈ لائن ختم ہونے میں چند گھنٹے باقی ہیں اور جے یو آئی کے امیر نے آزادی مارچ کے پلان بی پر غور شروع کردیا ہے۔
ذرائع کے مطابق مولانا فضل الرحمان کی زیر صدارت پارٹی کا طویل مشاورتی اجلاس ہوا جس میں وزیراعظم کو مستعفی ہونے کے لیے دی گئی 2 روزہ مہلت کے بعد آئندہ کی حکمت عملی پر تفصیلی تبادلہ خیال کیا گیا۔ دوران اجلاس مولانا فضل الرحمان نے سینیٹر طلحہ محمود اور کامران مرتضی کو طلب کیا گیا۔
ذرائع کا کہنا ہے کہ مولانا فضل الرحمان نے آزادی مارچ کے پلان بی پر غور شروع کردیا جس کے مطابق اسلام آباد لاک ڈاون، ملک گیر پہیہ جام اور ملک گیر شٹر ڈاون شامل ہے جب کہ مولانا فضل الرحمان نے ناکامی کے ساتھ واپس جانے کا آپشن مسترد کردیا ہے۔ اجلاس میں ڈی چوک جانے اور چند روز بعد واپسی کا آپشن بھی زیر غورآیا۔
اجلاس میں کارکنوں میں پائے جانے والے جذبات سے متعلق بھی امور پر غور کیا گیا، گزشتہ روز مولانا فضل الرحمان کی ہدایت پر پارٹی رہنماوں نے دھرنے کے شرکاء میں وقت گزرا تھا اور دھرنے میں پائے جانے والے کارکنوں کے جذبات پر صوبائی امراء کو تفصیل سے آگاہ کیا تھا۔