لاہور: فٹنس مسائل سے دوچار فاسٹ بولر حسن علی آسٹریلیا کے خلاف سیریز سے باہر ہوگئے۔

سری لنکا کے خلاف سیریز سے کمردرد کا شکار ہونے والے بائیں ہاتھ کے پیسر کو ڈاکٹرز نے مزید تین ہفتے آرام کی ہدایت کی ہے، وہ فیصل آباد میں جاری قومی ٹی ٹوئنٹی میں سینٹرل پنجاب کی جانب سے صرف ایک میچ سدرن پنجاب کے خلاف کھیلے ہیں جس میں انہوں نے تین کھلاڑیوں کو آوٹ کیا تھا،

حسن علی  کا نیشنل کرکٹ اکیڈمی میں پی سی بی میڈیکل اسٹاف کی نگرانی میں ری ہیب کا عمل جاری رہے گا تاہم وہ آسٹریلیا کے خلاف ٹی ٹوئنٹی سیریز سے باہر ہوگئے ہیں اور ٹیسٹ میچوں میں بھی فاسٹ بولر کی شمولیت کے امکانات بہت معدوم دکھائَی دے رہے ہیں۔

کراچی : ضیاء الدین یونیورسٹی ایگزامینشن بورڈ کے ایگزیکٹیو ڈائریکٹر پروفیسر انوار احمد زئی نے اعلان کیا ہے کہ2020ء کے سالانہ امتحانات کے لیے نویں اور گیارہویں جماعت کے ریگولر طلبہ کے انرولمنٹ اور پرائیوٹ امیدواروں کے رجسٹریشن فارم جمع کروانے کی آخری تاریخ31اکتوبر 2019ء ہے۔ طلباء و طالبات جلد از جلد اپنے فارم جمع کرائیں۔ انرولمنٹ اور رجسٹریشن فارم ضیاء الدین یونیورسٹی ایگزامنیشن بورڈ کی ویب سائٹ www.zueb.edu.comسے ڈاؤن لوڈ کرسکتے ہیں۔

 کراچی: سرفراز احمد نے کیریئر میں پہلی بار بورڈ حکام کو ’’ناں ‘‘ کہہ دی، انھوں نے ازخود قیادت چھوڑنے کے حوالے سے وسیم خان کی پیشکش کو قبول نہ کیا۔

سرفراز احمد پر ہمیشہ یہ الزام لگا کہ وہ اپنے یا پلیئرز کیلیے بورڈ سے بات نہیں کرتے،کوچزاور سلیکٹرز کے سامنے بھی دفاعی انداز اپناتے ہیں، مگر گذشتہ روز وہ مختلف روپ میں دکھائی دیے۔

ذرائع نے بتایا کہ فیصل آباد میں پی سی بی کے سی ای او وسیم خان نے سرفراز سے ملاقات میں انھیں ازخود قیادت چھوڑنے کا کہا، ان کا کہنا تھا کہ اس سے انھیں  برطرفی کی رسوائی سے بچنے کا موقع مل جائے گا،البتہ سرفراز نے یہ تجویز نہیں مانی، انھوں نے وسیم سے کہا کہ اگر بورڈ کپتانی سے ہٹانا چاہتا ہے تو خود پریس ریلیز جاری کر دے وہ مستعفی نہیں ہوں گے۔

ذرائع نے بتایا کہ سرفراز سمجھ رہے تھے کہ صرف ٹیسٹ میں کپتانی  چھنے گی مگر گذشتہ چند روز سے بورڈ کے رویے نے ان کی رائے تبدیل کر دی تھی۔ مصباح الحق پہلے ہی انھیں پسند نہیں کرتے تھے اور انھیں سرفراز نے سری لنکا سے سیریز میں شکست کی صورت میں موقع بھی فراہم کر دیا، ایک ہی ہوٹل میں قیام کے باوجود کوچ نے سرفراز سے ملاقات بھی نہیں کی تھی۔

بورڈ نے مختصر طرز میں شعیب ملک اور محمد حفیظ کو بھی ذمہ داری سونپنے کا سوچا مگر چونکہ شعیب  ورلڈکپ کے بعد ریٹائرمنٹ کا اعلان کر چکے اور حفیظ کی حالیہ کارکردگی اچھی نہیں اس لیے تجویز پر عمل نہ ہوا، مصباح سمیت  بورڈ حکام کو اس حقیقت کا اندازہ ہے کہ آسٹریلیا میں جیتنا آسان نہ ہوگا اس لیے وہ چند نوجوانوں کو شامل کر کے  اچھے نتائج نہ آنے پر تشکیل نو کے دور سے گذرنے کا نعرہ لگا دیں گے۔

 اسلام آباد: مولانا فضل الرحمان کے آزادی مارچ سے نمٹنے کے لیے حکومت نے منصوبہ بندی شروع کردی۔

ذرائع کے مطابق جے یو آئی (ف) کے سربراہ مولانا فضل الرحمان کے آزادی مارچ سے نمٹنے کے لیے حکومت نے منصوبہ بندی شروع کردی۔ ذرائع کے مطابق آرٹیکل 245 کے تحت سول انتظامیہ کی مدد کے لیے فوج طلب کی جا سکتی ہے۔

ذرائع کے مطابق امن و امان کی صورتحال کے پیش نظرسرکاری عمارتوں اور اہم تنصیبات پر فوج تعینات کرنے پر غوربھی کیا جارہا ہے جب کہ فوج طلبی کا حتمی فیصلہ وزارت داخلہ کرے گی۔