Reporter SS

بھارتی ہائی کمیشن کےعملےمیں ایل اوسی جانےکی اخلاقی جرات نہیں

راولپنڈی: ڈی جی آئی ایس پی آر میجر جنرل آصف غفورکا کہنا ہے کہ بھارتی ہائی کمیشن اپنے آرمی چیف کے دعوے پر کھڑا نہیں رہ سکا۔

ڈی جی آئی ایس پی آرمیجرجنرل آصف غفور نے جاری بیان میں کہا کہ غیرملکی سفارتکار اور میڈیا گروپ لائن آف کنٹرول کے دورے پر روانہ ہوگئے لیکن بھارتی ہائی کمیشن کا کوئی اہلکار، سفارتکار ایل او سی جانے کے لیے نہیں پہنچا، بھارتی ہائی کمیشن اپنے آرمی چیف کے دعوے پرکھڑا نہیں رہ سکا۔

آئی ایس پی آر کے مطابق بھارتی ہائی کمیشن کے عملے میں سفارتکاروں کے ساتھ ایل اوسی جانے کی اخلاقی جرات نہیں، غیر ملکی سفارتکاراورمیڈیا ارکان کا گروپ ایل اوسی پر سچ سامنے لائیں گے۔

واضح رہے کہ پاکستان میں تعینات غیر ملکی سفیروں نے لائن آف کنٹرول کا دورہ کیا جبکہ بھارتی نمائندوں نے اپنے جھوٹ کا پردہ چاک ہونے کے ڈر سے اس دورے میں شرکت نہیں کی۔

کینیڈاکانیاوزیراعظم کون ہوگا؟

اوٹاوا: کینیڈا کے عام انتخابات میں وزیراعظم جسٹن ٹروڈو کی جماعت لبرل پارٹی نے نمایاں کامیابی حاصل کرلی۔

کینیڈا میں جنرل الیکشن ہوئے جس میں دو بڑی جماعتوں لبرل پارٹی اور کنزرویٹو کے درمیان کانٹے کا مقابلہ ہوا۔ انتخابی نتائج کے مطابق جسٹن ٹروڈو کی جماعت نے 338میں سے 156 نشستیں جیت لی ہیں جبکہ ان کی حریف کنزویٹیو پارٹی 100 نشستوں کے ساتھ دوسرے نمبر پر ہے۔

جسٹن ٹروڈو نے اعتماد کا مظاہرہ کرنے پر عوام کا شکریہ ادا کرتے ہوئے کہا کہ کینیڈاکےعوام نےترقی پسند ایجنڈے کےحق میں ووٹ دیے۔

اکثریتی حکومت بنانے کے لیے کسی بھی جماعت کو 338 کے ایوان میں 170 نشستیں درکار ہیں۔ اس لیے لبرل پارٹی کو حکومت سازی کے لیے کم نشستیں حاصل کرنے والی دیگر چھوٹی جماعتوں پر انحصار کرنا ہوگا۔

امریکی صدر ڈونلڈ ٹرمپ نے جسٹن ٹروڈو کو واضح کامیابی پر مبارکباد دیتے ہوئے کہا کہ زبردست اور سخت مقابلے کے بعد کامیابی پر مبارکباد پیش کرتا ہوں، آپ نے کینیڈا کی خدمت کی ہے اور میں امریکا و کینیڈا کی ترقی کے لیے آپ کے ساتھ مل کر کام کرنے کے لیے تیار ہوں۔

کھلاڑیوں کےانتخاب پرمصباح کی وضاحتیں

کراچی: ہیڈ کوچ و چیف سلیکٹر مصباح الحق کا کہنا ہے کہ دورہ آسٹریلیا کیلیے ٹیموں کا انتخاب کرتے ہوئے کارکردگی کو مدنظر رکھا گیا۔

لاہور میں پریس کانفرنس کے دوران مصباح الحق نے کہا کہ عثمان قادر کی وائٹ بال سے کارکردگی اچھی ہے اور انہیں بگ بیش کا تجربہ بھی ہے اس لیے انہیں منتخب کیا گیا ہے اور انہیں شاداب کے بیک اپ کے طور پر رکھا گیا ہے، شاداب خان کی فارم اور ایکشن پر کام ہورہا ہے جس میں بہتری آرہی ہے۔

چیف سلیکٹر نے کہا کہ آصف علی اور فخرزمان 140 کا اسٹرائیک ریٹ رکھنے والے بیٹسمین اور ٹیم کی ضرورت ہے، نسیم شاہ اور محمد موسی اچھی ڈومیسٹک کرکٹ کھیل رہے ہیں تاہم محمد حسنین کی فٹنس پر مزید کام کرنا ہوگا۔ انہوں نے کہا کہ افتخار احمد لیفٹ ہینڈ بیٹسمینوں کیخلاف کار آمد ثابت ہوسکتے ہیں اس لیے انہیں فواد عالم پر ترجیح دی، محمد نواز آسٹریلیا کی کنڈیشنز میں زیادہ مفید ثابت نہیں ہوسکتے تھے، اس لئے ان کی بجائے ایک اضافی پیسر شامل کیا۔

ایک سوال کے جواب میں مصباح الحق کا کہنا تھا کہ احمد شہزاد، شعیب ملک اور محمد حفیظ سمیت کسی کیلیے دروازے بند نہیں ہیں اور شرجیل کو ابھی کلب کرکٹ کھیلنے کی اجازت ملی ہے، آگے چل کر ان کا معاملہ دیکھیں گے، راحت علی سلیکشن کے بہت قریب تھے لیکن ہمارے پاس ایک اور پیسر ساتھ لے جانے کی گنجائش نہیں تھی۔

بی اےسال اول و دوئم کےنتائج کااعلان

کراچی: بی اے پرائیوٹ سال دوئم اور سال اول ودوئم باہم سالانہ امتحانات برائے 2018 ءکے نتائج کا اعلان کردیا

ناظم امتحانات جامعہ کراچی پروفیسر ڈاکٹر ارشد عظمی کے مطابق بی اے پرائیوٹ سال دوئم اور سال اول ودوئم باہم سالانہ امتحانات برائے 2018 ءکے نتائج کا اعلان کردیا گیا ہے ۔نتائج کے مطابق امتحانات میں6243 طلبہ شریک ہوئے، 508 طلبہ کو فرسٹ ڈویژن،1691 طلبہ کو سیکنڈ ڈویژن جبکہ 07 طلبہ کو تھرڈ ڈویژن میں کامیاب قراردیا گیا ۔ کامیاب طلبہ کا تناسب% 35.45 رہا۔

عاطف اسلم کودبئی میں بہترین اعزازسےنوازا گیا

دبئی: دبئی میں حال کے چمکتے ہوئے فنکاروں کے لیے ایک پروقار تقریب کا انعقاد کیا گیا جہاں ان فنکاروں کو ’دبئی اسٹار ایوارڈ‘ سے نوازا گیا۔ پاکستان سے جس فنکار کو یہ اعزازنصیب ہوا وہ کوئی اورنہیں گلوکار عاطف اسلم ہیں۔

ایوارڈ حاصل کرنے کے بعد عاطف اسلم نے کہا کہ دبئی ایک بہت متحرک شہر ہے ، یہ وہ واحد شہر ہے جہاں میں سڑکوں پر چلتے ہوئے خود بہت محظوظ ہوتا ہوں، میں نے یہاں ڈیڑھ لاکھ لوگوں کے لیے بھی گایا۔ ہم سب خاص طور پر پاکستانی اور بھارتی ہرجگہ موجود ہوتے ہیں لیکن یہ ایک ایسی جگہ ہے جہاں ہم بڑی تعداد میں ہیں ۔ لہذا مجھے یہ بات پسند ہے کہ میری موسیقی یہاں بہت سنی جاتی ہے۔

مذیدکہا کہ یہ ایوارڈ بالکل ’ہالی ووڈ واک آف فیم‘ کی طرح ہے۔ میں بہت سارے فنکاروں میں سے پسند کیا گیا ہوں جس پرمجھے بے انتہا خوشی ہے۔ گلوکارنے کہا کہ میوزک نے دنیا بھرمیں ہمیشہ سب کوجوڑکررکھا ہے اور ثقافتوں کو پروان چڑھایا ہے، بلکل ایسے جیسے میں نے میوزک پاکستان سے شروع کیا، پھربھارت گیا اورساتھ ساتھ دنیا بھر میں مشہور ہوگیا۔

صنم ماروی پڑوسی کےگھرجاکرتماشہ بنادیا

معروف لوک فنکارہ صنم ماروی کا ایک مرتبہ پھر اپنے شوہر سے جھگڑا ہوگیا ہے اور اب انہوں نے الزام لگایا ہے کہ ان کے شوہر کا پڑوس میں مقیم سابق ماڈل نائرہ کے گھر آنا جانا ہے۔

گلوکارہ صنم ماروی نے لاہور میں اپنے گھر کے سامنے رہنے والی سابق ماڈل نائرہ کے گھر میں گھس کرگھر سر پر اُٹھا لیا، ان کا کہنا تھا کہ ان کے شوہر حامد کا وہاں آنا جانا ہے، اس بات پر دونوں کے درمیان شدید جھگڑا بھی ہوا۔ نوبت پولیس تھانے تک آن پہنچتی اس سے پہلے ہی کچھ لوگوں نے دونوں کو سمجھایا اور اس حوالے سے ثبوت سامنے آنے تک انتظارکرنے کو کہا۔

صنم اور شوہر کے درمیان تعلقات کے حوالے سے شوبز حلقوں کا کہنا ہے کہ صنم ماروی اور حامد کے درمیان اختلافات اور لڑائی جھگڑے ہوتے رہتے ہیں لیکن اس وقت کوک اسٹوڈیو کے نئے سیزن میں شامل گیت کی پروموشن کے لئے ایسا کیا گیا ہے، جس کا مقصد میڈیا کے ذریعے لوگوں کی توجہ حاصل کرنے کے سوا کچھ نہیں ہے، شوبز سے وابستہ لوگ شہرت حاصل کرنے کے لیےمنفی ہتھکنڈےاختیار کرتےرہتے ہیں

آسٹریلیا کےخلاف پاکستانی اسکواڈمیں کون کون شامل

لاہور: چیف سلیکٹر اور ہیڈ کوچ مصباح الحق نے دورہ آسٹریلیا کے لیے ٹی ٹوئنٹی اور ٹیسٹ ٹیم کا اعلان کردیا ۔

لاہور میں پریس کانفرنس کرتے ہوئے چیف سلیکٹر مصباح الحق کا کہنا تھا کہ ٹی 20 ورلڈ کپ آسٹریلیا میں ہے، کوشش کریں گے اس ٹور سے فائدہ اٹھائیں، دونوں ٹیموں میں نوجوان کھلاڑی شامل کیے ہیں، آسٹریلیا کے دورے کے لیے سرپرائز پیکج رکھا ہے۔

مصباح الحق نے کہا کہ خواہس ہے ٹیم آسٹریلیا میں جا کر جارحانہ کرکٹ کھیلے اور ہر کھلاڑی کی خواہش ہوتی ہے آسٹریلیا میں جا کر پرفارم کریں جب کہ کپتانی پر چیئرمین، ایم ڈی اور میرے درمیان بہت بات چیت ہوئی، کپتانی کا حتمی فیصلہ چیئرمین پی سی بی نے کرنا ہوتا ہے۔

ٹی ٹوئنٹی کی قیادت بابراعظم کریں گے اور دیگر کھلاڑیوں میں آصف علی، فخرزمان، حارث سہیل، افتخار احمد، عماد وسیم، امام الحق، خوشدل شاہ، محمد عامر، محمد حسنین، محمد عرفان، محمد رضوان(وکٹ کیپر)، موسی خان، شاداب خان، عثمان قادر اور وہاب ریاض شامل ہیں۔

ٹیسٹ ٹیم کی قیادت اظہر علی کریں گے اور دیگر کھلاڑیوں میں عابد علی، اسد شفیق، بابراعظم، حارث سہیل، امام الحق، عمران خان (سینئر)، افتخار احمد، کاشف بھٹی، محمد عباس، محمد رضوان (وکٹ کیپر)، موسی خان، نسیم شاہ، شاہین شاہ آفریدی، شان مسعود اور یاسر شاہ شامل ہیں۔

ماضی میں کراچی کی عوام اور کراچی کےمسائل کونظراندازکیا گیا

کراچی:وزیر اعظم عمران خان نے کہا ہے کہ کراچی کے مسائل کو حل کرنا صوبائی حکومت کا کام ہے لیکن وفاق اپنے وسائل کے مطابق کراچی کے مسائل کے حل میں اپنا حصہ ڈال رہا ہے۔

گورنر ہاؤس کراچی میں وزیراعظم عمران خان سے تحریک انصاف کے ارکان اسمبلی نے ملاقات کی، اس موقع پر ارکان اسمبلی نے اپنے حلقوں میں ہونے والے ترقیاتی کاموں اور مسائل سے آگاہ کیا۔ وفاقی وزیر منصوبہ بندی مخدوم خسرو بختیار نے ممبران سندھ اسمبلی کو کراچی میں جاری اور زیر غور وفاقی منصوبوں پر بریفنگ دی۔ وزیر اعظم نے وفاقی وزراء کو ہدایت کی کہ وہ کراچی کے ممبران اسمبلی سے رابطے مزید بڑھائیں۔

وزیراعظم نے کہا کہ کراچی ملک کا معاشی حب ہے۔ وفاقی حکومت کو کراچی میں پانی ، ٹرانسپورٹ، ویسٹ منیجمنٹ اور عوام کو درپیش دیگر مسائل کا مکمل ادارک ہے۔ بدقسمتی سے ماضی میں کراچی کی عوام اور کراچی کے مسائل کو نظر انداز کیا گیا، کراچی کے مسائل کو حل کرنا صوبائی حکومت کا کام ہے لیکن عوامی فلاح و بہبود کو مد نظر رکھتے ہوئے وفاق اپنے وسائل کے مطابق کراچی کے مسائل کے حل میں اپنا حصہ ڈال رہا ہے۔ بلدیاتی نظام کراچی کے مسائل کا حل نکالنے میں معاون ثابت ہوگا۔

وزیر اعظم نے کہا کہ ہماری حکومت کو تاریخ کا سب سے بڑا معاشی خسارہ ورثے میں ملا لیکن اب ملک کی معاشی صورتحال بہت حد تک بہتر ہوچکی ہے۔ صوبہ سندھ کے معاشی حالات کرپشن کی وجہ سے ابتر ہوئے۔

کتےکے بعد سانپوں نےبھی سندھ کی عوام کونہ چھوڑا

کراچی: بدین ٹھٹھہ، تھر پارکر، خیرپور ، سمیت دیگر اضلاع میں 5 ہزار525 افراد سانپ کا شکار بنے ۔محکمہ صحت نے رواں سال اگست تک کے اعداد و شمار جاری کردیئے۔

سندھ میں کتے کے کاٹنے کے بعدسانپ کے کاٹنے کے کیسز رپورٹ ہوئے ۔بدین میں 964 تھر پارکر میں 623 خیرپور میں 471 عمر کوٹ میں 250 اور سانگھڑ میں215 افراد سانپ کے کاٹنے کا شکار بنے۔کئی مریضوں کو سندھ کے مختلف ہسپتال میں لایا گیا اور کچھ کو کراچی کے جناح ہسپتال میں لایا گیا۔

فیس بک پرسیاہی چھاگئی

سان فرانسسكو: اس سال فروری میں فیس بک کی ری ڈیزائننگ اور اسکرین میں تبدیلیوں کا اعلان کیا گیا تھا۔ اب کئی ماہ کی محنت کے بعد فیس بک اینڈروئیڈ ایپ استعمال کرنے والے بعض صارفین نے ڈارک موڈ کو دیکھا ہے۔ اس میں اسکرین کا غالب حصہ آپ کو سیاہ دکھائی دے گا۔

فیس بک نے کہا تھا یہ تبدیلیاں ایپ کی بجائے ویب کےلیے کی جائیں گی لیکن یورپ کے کچھ صارفین نے بتایا ہے کہ انہیں چند دنوں سے نئے انٹرفیس کی پیشکش کی جارہی تھی جس میں ڈارک موڈ بھی شامل تھا۔ اس کے بعد صارفین نے فیس بک کا انٹرفیس ڈارک دیکھا اور اسے پسند کیا ہے۔ لیکن یہ تبدیلی ایپ میں بھی نمایاں ہے۔

تاہم بعض صارفین نے اسے پسند نہیں کیا کیونکہ یوٹیوب کے بجائے فیس بک پر پڑھنے کا کام زیادہ ہوتا ہے اور سیاہ پس منظر میں سفید ٹیکسٹ کو پڑھنے میں بہت مشکل پیش آتی ہے۔ اگر یہ تبدیلی پسند کی گئی ہے تو اگلے چند ماہ میں فیس بک کے تمام صارفین اسے دیکھ سکیں گے۔

فیس بک نے کہا ہے کہ اس سال مزید تبدیلیاں کی جائیں گی جن میں انٹرفیس سمیت کئی ترامیم شامل ہیں۔

Page 665 of 2388