اسلام آباد: احتساب عدالت نے ایون فیلڈ ریفرنس میں جعلی ٹرسٹ ڈیڈ کے معاملے پر مسلم لیگ (ن) کی نائب صدر مریم نواز کو نوٹس جاری کردیا۔

نیب نے مریم نواز کے خلاف احتساب عدالت میں درخواست دائر کی جس میں مؤقف اختیار کیا گیا ہےکہ ان (مریم نواز) کی ایون فیلڈ ریفرنس میں پیش کردہ ٹرسٹ ڈیڈ جعلی ثابت ہوئی ہے لہٰذا جعلی دستاویزات پر ٹرائل کیا جائے,نیب کی درخواست پر احتساب عدالت کے جج محمد بشیر نے مریم نواز کو نوٹس جاری کرتے ہوئے انہیں 19 جولائی کو طلب کرلیا۔

یاد رہے کہ گزشتہ برس اسلام آباد ہائیکورٹ نے ایون فیلڈ ریفرنس میں احتساب عدالت کی جانب سے سابق وزیراعظم نواز شریف، ان کی صاحبزادی مریم نواز اور داماد کیپٹن (ر) صفدر کو سنائی گئی سزا معطل کرتے ہوئے تینوں کی رہائی کا حکم دیا جس کے بعد انہیں اڈیالہ جیل سے رہا کردیا گیا۔

بعدازاں نواز شریف کو العزیزیہ اسٹیل ملز کیس میں گرفتار کرلیا گیا اور وہ کوٹ لکھپت جیل میں گزارے۔

مقبوضہ کشمیر کی صورتحال پر اقوام متحدہ کمشنر برائے انسانی حقوق نے نئی رپورٹ جاری کردی۔

جنیوا سے شائع شدہ رپورٹ کے مطابق مقبوضہ کشمیر میں 2018 میں 160 افراد کو قتل اور 1253 افراد کو بیلٹ گن کے ذریعے بینائی سے محروم کردیا گیا۔

رپورٹ کے مطابق بھارت نے اپنے زیرِ انتظام کشمیر میں 1990 کی پرتشدد پالیسی کو دوبارہ متعارف کرایا ہے جس کے ذریعے بھارتی قابض فوج غیر قانونی حراست، تشدد اور دیگر جبری ہتھکنڈے استعمال کر رہی ہے۔

اقوام متحدہ کو تجویز دی گئی ہے کہ وہ اس رپورٹ میں پیش کردہ اعداد و شمار کی روشنی میں ایک بین الاقوامی کمیشن آف انکوائری قائم کرے تاکہ انسانی حقوق کی خلاف ورزیوں کی آزادانہ تحقیقات کی جا سکے۔

واضح رہے کہ اس رپورٹ کی تیاری میں مقبوضہ کشمیر کی سول سوسائٹی خصوصی طور پر JKCCS نامی تنظیم نے اہم کردار ادا کیا ہے۔

گوگل کی جانب سے 2016 سے اپنے تیار کردہ اسمارٹ فونز پکسل متعارف کرائے جارہے ہیں مگر ایسا لگتا ہے کہ اسے دیگر کمپنیوں کے مقابلے میں اپنی ڈیوائسز کو زیادہ نمایاں بنانے میں کوئی دلچسپی نہیں۔ گزشتہ سال پکسل 3 فون بھی اس کے 2 سال پرانے پکسل جیسے ڈیزائن سے لیس تھا جس میں بہت بڑے بیزل دیئے گئے ہیں جبکہ پکسل 3 ایکس ایل میں ایک بہت بڑا نوچ دیا گیا تھا۔ اب اس کے نئے پکسل 4 ایکس ایل کے خاکے لیک ہوکر سامنے آئے ہیں اور ان کودیکھ کر معلوم ہوتا ہے کہ فرنٹ پر یہ فون دیکھنے میں پکسل تھری جیسا ہے جبکہ بیک پر رواں سال متعارف کرائے جانے والے آئی فون 11 کی نقل کی گئی ہے۔ گوگل پکسل فور سیریز اکتوبر میں متعارف کرائے جانے کا امکان ہے مگر آن لیکس نامی ٹوئٹر صارف نے اس کے رینڈرز لیک کردیئے ہیں۔ ان لیکس کے مطابق پکسل 4 ایکس ایل میں 6.25 انچ ڈسپلے دیا جائے گا اور چونکہ اس میں بیزل کافی زیادہ ہیں تو یہ کافی بڑا فون محسوس ہوگا۔ گوگل نے بھی اپنے نئے فون کی جھلک خود جاری کی تھی، جن میں بیک پر کیمروں کے لیے چوکور خانہ سا بنا ہوا تھا۔ مگر پہلی بار اس سیریز میں بیک پر 2 یا اس سے زائد کیمرے دیئے جارہے ہیں، اس سے قبل گزشتہ سال پکسل تھری ایکس ایل کے فرنٹ پر تو 2 کیمرے تھے مگر بیک پر ایک ہی کیمرا دیا گیا تھا۔ ویسے نئی لیک تصاویر سے تو عندیہ ملتا ہے کہ پکسل 4 ایکس ایل کے بیک پر 3 کیمروں کا سیٹ اپ ہوگا جبکہ فنگرپرنٹ سنسر ڈسپلے کے اندر منتقل کردیا جائے گا۔ گوگل کی جانب سے پکسل 4 اور پکسل 4 ایکس ایل رواں سال اکتوبر میں متعارف کرائے جاسکتے ہیں جن میں ٹرو ٹون جیسا ڈسپلے اور جیسٹر کنٹرولز دیئے جانے کا بھی امکان ہے۔

کرکٹ ورلڈکپ 2019 ءاختتام کی جانب گامزن ہے۔ ٹرافی کس ملک جائے گی،تین میچوں کے بعد فیصلہ ہو جائےگا۔ پہلےسیمی فائنل میں آج بھارت اور نیوزی لینڈ کا مقابلہ ہوگا۔میچ پاکستانی وقت کے مطابق دوپہرڈھائی بجےمانچسٹر میں کھیلا جائے گا۔

ورلڈکپ کے پہلے راؤنڈ میں دونوں ٹیموں نے 8،8 میچ کھیلے تھے۔جبکہ ایک ایک میچ بارش کی نذر ہوا تھا۔ بھارت نے 7 میں کامیابی حاصل کی تھی جبکہ ایک میچ میں اسے شکست ہوئی تھی۔

ورلڈ کپ کا پہلاراؤنڈ بھارت نے پہلی اورنیوزی لینڈ نے چوتھی پوزیشن پر ختم کیا تھا۔

دوسرا سیمی فائنل دفاعی چیمپئن آسٹریلیا اور انگلینڈ کے درمیان 11 جولائی کو برمنگھم میں کھیلا جائے گا۔

پہلے اور دوسرے سیمی فائنل کی فاتح ٹیموں کےدرمیان ورلڈکپ کا فائنل اتوار کو لارڈز میں کھیلا جائے گا۔

فیڈرل بورڈ آف ریونیو (ایف بی آر) نے پراپرٹی کی قیمتوں کے تعین کا کام روکنے سے متعلق خبروں کی تردید کر دی۔

ترجمان ایف بی آر کا کہنا ہے کہ پراپرٹی مارکیٹ کے اسٹیک ہولڈرز کے ساتھ اس کے مذاکرات کا عمل تیزی سے جاری ہے۔

ایف بی آر کے ترجمان کا یہ بھی کہنا ہے کہ نئے نوٹیفکیشن کے جاری ہونے تک پراپرٹی کا لین دین جنوری میں جاری کیے گئے ریٹس پر ہو گا۔