ایمزٹی وی (انٹرٹینمنٹ)عامر خان کی فلم دنگل کامیابی کے نئے ریکارڈ بناتے ہوئے صرف چین میں 1000 کروڑ روپے کمانے والی پہلی بھارتی فلم بن گئی ہے۔ چینی ویب سائٹ مایویان کے مطابق فلم ’دنگل‘ چین میں 1000 کروڑ کمانے کے بعد ملکی سینما کی تاریخ میں سب سے زیادہ پیسے کمانے والی فلموں میں شامل ہو گئی ہے، چین میں بھارتی فلموں کی نمائش کے کاروبار سے منسلک پرساد شیٹھی کا کہنا ہے کہ ’ چین میں فلم کی غیر معمولی کامیابی بے مثال ہے‘۔ دنگل کو 5 مئی کو چین میں 7 ہزار اسکرینز پر نمائش کیلئے پیش کیا گیا تھا اور اسے خصوصی طور پر چینی زبان میں ڈب کیا گیا ہے۔ ریلیز سے اب تک دنگل نے چینی باکس آفس پردوسری پوزیشن برقرار رکھی ہوئی ہے جبکہ پہلے نمبر پر ہالی ووڈ فلم پائریٹس آف دی کیریبین موجود ہے۔ واضح رہے کہ اس سے قبل اداکار عامر خان کی2014 میں ریلیز ہوئی فلم’ پی کے‘ بھی چائنا میں بہترین بزنس کرنے میں کامیاب رہی تھی لیکن دنگل نے پی کے کو بہت پیچھے چھوڑ دیا ہے۔

ایمزٹی وی (صحت)عالمی ادارہ صحت (ڈبلیوایچ او) نے خبردار کیا ہے کہ تمباکو نوشی ہرسال 70 لاکھ افراد کی جان لے رہی ہے اور یہ شرح سال 2000 کے مقابلے میں اب دوگنا ہوچکی ہے۔ اقوامِ متحدہ کے ذیلی ادارے نے ترقی پذیر ممالک پر سخت قانون سازی اور قواعد پر زور دیا ہے کیونکہ 80 فیصد اموات ان ہی ممالک میں ہورہی ہے۔ تاہم عالمی ادارے نے کئی ممالک میں مہنگی سگریٹ کے اقدامات کو سراہا ہے جس سے سگریٹ کی لت میں کمی واقع ہوئی ہے۔ رپورٹ میں ڈبلیو ایچ او نے خبردار کیا ہے کہ اس صدی کے آخر تک ایک ارب افراد تمباکو نوشی کی بھینٹ چڑھ جائیں گے جو ایک خوفناک رحجان ہے۔ ڈبلیو ایچ او کی سربراہ مارگریٹ چین نے کہا ہے کہ تمباکو نوشی ایک خطرناک عادت ہے جو امراضِ قلب سے لے کر پھیپھڑوں کے سرطان کی وجہ بھی ہے اور اطراف کے تمام افراد کو یکساں طور پر متاثر کرتی ہے۔ دوسری جانب تمباکو نوشی غربت اور پسماندگی کی بنیادی وجہ ہے کہ کیونکہ سگریٹ نوش اپنی رقم کا ایک بڑا حصہ اس پر خرچ کرتے ہیں اور اس سے وابستہ بیماریوں پر بھی بجٹ کا بڑا حصہ خرچ ہوجاتا ہے۔ ایک ماہ قبل طبی جریدے لینسٹ میں شائع ایک رپورٹ میں کہا گیا تھا کہ سال 2016 میں 64 لاکھ افراد ہلاک ہوئے تھے جبکہ 2030 تک ہلاکتوں میں تین گنا اضافہ ہوجائے گا۔ عالمی ادارہ صحت نے یہ بھی کہا ہے کہ تمباکو نوشی سے ہونے والے صحت کے نقصانات پر پوری دنیا کے لوگ ڈیڑھ ٹریلین ڈالر کے برابر رقم خرچ کررہے ہیں جو عالمی جی ڈی پی کا دو فیصد ہے۔

ایمزٹی وی (مانیٹرنگ ڈیسک) پانی زندگی ہے اور پودے ان تک پہنچنے کا کوئی نہ کوئی راستہ ڈھونڈ لیتےہیں یعنی پودے اور جاندار خود کو پانی کی تلاش کے لیے تبدیل کرتے رہتے ہیں۔ یہ تحقیق ایک ریسرچ جرنل اوئکولوگیا میں شائع ہوئی ہے۔ لیکن ماہرین اس کا جواب نہیں دے سکے کہ آخر یہ سارا عمل کس وجہ سے ہوتا ہے۔ پودے کیڑوں کی بھنبھناہٹ، سنڈیوں کے پتے کھانے کی آواز اور درختوں میں سیٹیاں بجاتی ہوئی ہواؤں کےلیے بھی کان رکھتے ہیں۔ اس تحقیق سے یہ معمہ حل ہوگیا ہے کہ آخرخشک ترین علاقوں میں بھی پودے ، شجر اور گھاس پھوس کس طرح پانی تلاش کرکے زندہ رہتے ہیں۔ اس کے لیے یونیورسٹی آف ویسٹرن آسٹریلیا کے ماہر مونیکا گیگلیانو اور ان کے ساتھیوں نے مٹر کے پودے کو ایک ایسے گملے میں الٹے لگائے جو انگریزی حروف وائے کی شکل کے تھے۔ گملے کا ایک سرا پانی میں اور دوسرا خشک مٹی میں رکھا گیا ۔ معلوم ہوا کہ پلاسٹک میں لپیٹنے اور چھپانے کے باوجود بھی پودے کی جڑیں پانی کی جانب مڑیں گویا انہیں معلوم تھا کہ اس طرف پانی ہے اور پانی بھی پلاسٹک کے پانی میں بند تھا جس سے معلوم ہوتا ہے کہ جڑیں بہنے والے پانی کی صرف آواز ہی سن رہی تھیں۔ اس تحقیق سے سائنسداں اس نتیجے پر پہنچے ہیں کہ جب پودوں کے قریب آبی بخارات نہ ہوں اور پانی بہت دور بہہ رہا ہو تو وہ صرف اس کے بہنے کی ہلکی آواز سے پانی کو پہچان لیتےہیں۔ پانی سے قریب موجود پودے اس کی آواز کی بجائے اس کی نمی کو محسوس کرکے اپنی جڑوں کو اس جانب سرکاتے ہیں لیکن ان میں پانی سے ہونے والے معمولی ارتعاش کو پہچاننے کی سہولت بھی ہوتی ہے۔ اس سے قبل 2014 میں یونیورسٹی آف میسوری کے سائنسدانوں نے معلوم کیا تھا کہ پودے اردگرد کی آوازیں مثلاً کھانے اور کترنے کی آوازیں سن سکتے ہیں اور اس خطرے کا احساس کرسکتے ہیں۔ ان آوازوں کو محسوس کرکے پودے اپنے دفاعی نظام کو مزید بہتر بناتے ہوئے خاص کیمیکل خارج کرتے ہیں تاکہ وہ ان کے دشمن کیڑوں مثلاً سنڈیوں ( کیٹرپلر) کو دور بھگاسکیں۔