ایمز ٹی وی(لاہور) لاہور سمیت پنجاب کے پانچ اضلاع میں حکومت پنجاب نے سکوٹی فار ورکنگ ویمن منصوبے میں تبدیلی کر دی ہے اور اب ورکنگ خواتین کو سکوٹی کے بجائے اٹلس ہنڈا موٹر سائیکلیں دی جائیں گی ۔ صوبائی محکمہ پلاننگ اینڈ ڈویلپمنٹ کے صوبائی ترقیاتی فورم نے خواتین کو موٹر سائیکلیں دینے کیلئے 90 ملین روپے کی منظوری دے دی ہے۔ سکوٹی کو در آمد کرنے پر زیادہ اخراجات آنے کی وجہ سے حکومت نے ہنڈا موٹر سائیکل دینے کا منصوبہ بنایا ہے۔منصوبے کے مطابق پنجاب کے پانچ اضلاع جن میں لاہور فیصل آباد، راولپنڈی ، ملتان اور گوجرانوالہ شامل ہیں میں بیس ہزار خواتین کو گلابی رنگ کی موٹر سائیکلیں دی جائیں گی ۔ حکومت پنجاب کے اس قدم سے جہاں ورکنگ خواتین کو سفری سہولیات میسر ہونگی وہیں پر عدم تحفظ کا شکار خواتین کی مشکلات میں بھی کمی واقع ہو گی۔ مختلف شعبہ جات میں کام کرنے والی خواتین کو موٹر سائیکلیں ملنے کی صورت میں انہیں کام کی جگہ پر آنے اور جانے میں آسانی رہے گی اور خود انحصار و تحفظ میں بھی اضافہ ہو گا۔ حکومت نے خواتین کیلئے مختص اس منصوبے میں موٹرسائیکلوں کا رنگ خصوصی طور پر گلابی رکھا ہے جبکہ اب رقم کی منظوری کے بعد اس پر جلد عملدرآمد ممکن ہو گا 

 ایمز ٹی وی(لاہور) وزیراعلی پنجاب میاں شہباز شریف نے کہا ہے کہ ہم جب تک شہدا کے قیمتی خون کا بدلہ نہیں لے لیتے اس وقت تک چین سے نہیں بیٹھیں گے ،ہم اپنی اتحادی قوت کے سر پر امن کے دشمنوں کو شکست دیں گے ۔ وزیراعلی پنجاب کا میڈیاسے گفتگو کرتے ہوئے کہنا تھا کہ پاکستان اس وقت انتہائی نازک دور سے گزر رہا ہے،ہمیں چاہیے کہ ہم سماج دشمن عناصر پر کڑی نظر رکھیں اور کسی بھی مشکوک سرگرمی کی صورت میں انتظامیہ سے تعاون کریں ۔ہمارے لئے عوام کے جان و مال سے بڑھ کرکوئی ترجیح نہیں ہوسکتی ، ہم ہر قیمت پر عوام کے تحفظ کو یقینی بنائیں گے 

ایمز ٹی وی(تہران) ایران اور پاکستان نے کہا ہے کہ دونوں برادر ملک مشترکہ تاریخی، دینی ثقافتی اقدار اور طویل مشترکہ سرحدوں کے ساتھ بندھے ہوئے اور دونوں ملکوں کی سیکیورٹی ایک دوسرے کے ساتھ جڑی ہوئی ہے ،پاک ایران دو طرفہ تعلقات کے فروغ کی ضرورت ہے ، ایران پاکستان کے ساتھ دفاعی اور فوجی تعاون میں کسی حد کا قائل نہیں ۔ تہران میں پاکستان کے مشیر خارجہ سینیٹر سرتاج عزیز کے ساتھ ہونے والی ملاقات میں ایرانی وزیر دفاع بریگیڈیر جنرل حسین دہقان نے دو طرفہ امور ،عالمی اور علاقائی صورتحال اور دہشت گردی سے نبٹنے کے لئے مشترکہ حکمت عملی ترتیب دینے کے لئے تفصیلی تبادلہ خیال کیا ۔ایران کے وزیر دفاع بریگیڈیر جنرل حسین دہقان نے دونوں ملکوں کی طویل مشترکہ سرحدوں اور دونوں ممالک کے مشترکہ تاریخی، دینی اور ثقافتی اقدار کی طرف اشارہ کرتے ہوئے کہا کہ ایران اور پاکستان کی سیکیورٹی ایک دوسرے سے جڑی ہوئی ہے اور اسی بنا پر ایران، پاکستان کے ساتھ فوجی اور دفاعی تعاون کی توسیع میں کسی حد کا قائل نہیں۔انھوں نے دہشت گردی اور فرقہ واریت کے مقابلے کے لئے علاقے کے ملکوں کے درمیان ہمہ جہتی تعاون کی ضرورت کی طرف اشارہ کرتے ہوئے پاک ایران مشترکہ تعاون کو اہم قرار دیا۔ انھوں نے علاقے میں دہشت گردی کے بحران کا ذکر کرتے ہوئے کہا کہ شام، عراق، یمن اور افغانستان کے مسائل کو فوجی طریقے سے حل نہیں کیا جاسکتا۔ مشیر خارجہ سینیٹر سرتاج عزیز کا دونوں ملکوں کی مشترکہ اقدار کو دو طرفہ تعلقات کی توسیع کے بہترین ذرائع قرار دیتے ہوئے کہنا تھا کہ ایران کے ساتھ تعلقات کے فروغ اور اچھی ہمسائیگی کو پاکستان کی خارجہ پالیسی کے اصول سے تعبیر کیا اور امید ظاہر کی کہ دفاعی شعبے میں دونوں ملکوں کے تعلقات ماضی سے زیادہ فروغ پائیں گے۔واضح رہے کہ پاکستان کے مشیر خارجہ سرتاج عزیز، ایران کے ساتھ مختلف شعبوں اور خاص طور سے دفاعی شعبے میں تعلقات و تعاون کی توسیع کے مقصد سے ایران کے دورے پر تہران پہنچے ہیں

 ایمز ٹی وی(واشنگٹن) امریکی صدر ڈونلڈ ٹرمپ کی انتظامیہ نے غیر قانونی تارکین وطن کو امریکہ سے نکالنے کے عمل کو تیز کرنے کے لیے نئی ہدایات جاری کی ہیں۔ ان نئی ہدایات میں کہا گیا ہے کہ ایسے غیر قانونی تارکین وطن کو جن کے پاس دستاویزات نہیں ہیں اور ان کا مجرمانہ ریکارڈ بھی ہے ان کو انھیں لوگوں کے ساتھ ہی ہدف بنایا جائے گا جو کہ امریکی سکیورٹی کے لیے خطرہ ہیں اور یا بینیفٹ سسٹم کا غلط فائدہ اٹھا رہے ہیں۔ نئے حکمنامے کے مطابق کم عمر بچے اور نوجوان جنھیں امریکہ غیر قانونی طور پر لایا گیا، انھیں امریکہ میں رہنے کی اجازت ہو گی، اس اقدام سے ہزاروں نوجوانوں کو فائدہ پہنچے گا۔ ڈیپارٹمنٹ آف ہوم لینڈ سکیورٹی کا کہنا ہے کہ کہ وہ نئے اقدامات پر عمل درآمد کے لیے دس ہزار مزید آفیسرز کو تعنیات کرے گی،ان گائیڈ لائنز کا مقصد صدر ٹرمپ کی جانب سے گزشتہ ماہ متعارف کروائے گئے بارڈر سکیورٹی اور امیگریشن کے ایگزکٹو آرڈرز پر عمل درآمد کروانا ہے، ہوم لینڈ سکیورٹی نے اس بارے میں جو دو میموز جاری کیے ان میں حکام سے یہ بھی کہا گیا کہ ان والدین کو بھی سزا دی جائے جو کہ اپنے بچوں کی امریکہ سمگل ہونے میں مدد کرتے ہیں۔ ان میموز میں امیگریشن افسران کو اس بات کی اجازت دی گئی ہے کہ غیر قانونی تارکین وطن کو دیکھتے ہی گرفتار کریں۔ وہ امریکی پالیسی بھی ختم کرنے کا تذکرہ میمو میں شامل ہے جس میں غیر قانونی تارکین وطن کو پکڑ کر چھوڑ دیا جاتا ہے بلکہ اب ان کے کیس کے فیصلے تک انہیں ڈیٹنشن سنٹر میں ہی رکھا جائے گا،میمو میں میکسیکو کی سرحد پر دیوار کی تعمیر کے لیے منصوبہ بندی کی اجازت کی بات بھی کی گئی ہے۔ واضح رہے ریپبلکن ڈونلڈ ٹرمپ نے صدارتی انتخابات کی مہم کے دوران گیارہ ملین غیر قانونی تارکین وطن کے ساتھ سختی سے نمٹنے اور ممکنہ دہشتگردوں کو ملک میں داخل ہونے سے روکنے لے لیے میکسیکو کی سرحد پر دیوار بنانے کے وعدے کیے تھے