ایمزٹی وی(کراچی/ تعلیم) وزیراعلیٰ سندھ مراد علی شاہ نے کیڈٹ کالج لاڑکانہ کے طالبِ علم احمد کے امریکا میں علاج کی منظوری دے دی ہے۔

ذرائع کے مطابق میڈیکل بورڈ نے لاڑکانہ کیڈٹ کالج میں تشد کا شکار بننے والے طالب علم احمد کو علاج کے لیے بیرون ملک بھیجنے کی سفارش کی تھی، جس کے بعد اب وزیراعلیٰ سندھ مراد علی شاہ نے طالبِ علم کے امریکا میں علاج کی منظوری دے دی ہے۔ وزیراعلی کی جانب سے محکمہ صحت کو بچے اوراس کے والد کے پاسپورٹ بنانے سمیت محکمہ فائنانس کوبچے کے علاج کے اخراجات کے لیے رقم جاری کرنے کی ہدایت کردی گئی ہے۔

سیکریٹری صحت ڈاکٹرعثمان چاچڑکا کہنا ہے کہ بچے کے ساتھ اس کے والد کو امریکا بھیجا جائے گا، دونوں کوائر ایمبولینس کے بجائے عام فلائیٹ سے بھیجا جائے گا، بچے کا علاج سن سنارٹی چلڈرن اسپتال اوہائیو میں ممکن ہے جہاں بچے کا علاج ماہرامراضِ اطفال ڈاکٹررابن ٹی کارٹن کریں گے جب کہ بچے کی صحت یابی میں 3 سے 6 ماہ لگیں گے۔
واضح رہے کیڈٹ کالج لاڑکانہ کے 14 سالہ طالب علم محمد احمد کو استاد نے تشدد کا نشانہ بنایا جس
کے باعث طالب علم کی گردن کی ہڈی ٹوٹ گئی اور وہ ذہنی صلاحیت سے بھی محروم ہوگیا ہے۔

ایمزٹی وی(تعلیم/ لاہور)لاہور ہائی کورٹ میں پاک ترک سکولز کے اساتذہ کی ملک بدری کے حکومتی حکم نامے کے خلاف دائر درخواست کی سماعت ہوئی جہاں عدالت نے فریقین کے دلائل سننے کے بعد اساتذہ کی ملک بدری روکنے کا حکم سناتے ہوئے وفاقی حکومت سے 17جنوری تک جواب طلب کر لیا ۔
درخواست گزار نے موقف اختیار کیا تھا کہ وفاقی حکومت کا اقدام غیر آئینی ہے جسے کالعدم قرار دیا جائے جس پر آج عدالت نے فیصلہ سنایا ہے۔
یاد رہے وفاقی حکومت نے ترک صدر رجب طیب اردوان کی پاکستان آمد سے 2روز قبل فتخ اللہ گولن کے زیر سرپرستی چلنے والے پاک ترک آرگنائزیشن کو تین روز کے اندر ملک چھوڑنے کا حکم دیا تھا جبکہ وفاقی وزارت داخلہ نے 400ملازمین کے ویزے بھی منسوخ کر دیے تھے تاہم اس حکومتی فیصلے کیخلاف پشاور ہائی کورٹ نے بھی چند روز قبل فیصلہ سناتے ہوئے اساتذہ کی ملک بدری کو روک دیا تھا ۔

ایمزٹی وی(راولپنڈی) سابق آرمی چیف جنرل ریٹائرڈ راحیل شریف نے کمان سنبھالنے کی تقریب میں سربراہ پاک فوج کو زبردست خراج تحسین پیش کیا ہے۔

جنرل ہیڈ کوارٹرز راولپنڈی میں پاک فوج کی کمان سنبھالنے کی تقریب سے خطاب کرتے ہوئے جنرل ریٹائرڈ راحیل شریف نے آرمی چیف جنرل قمر باجوہ کو زبردست خراج تحسین پیش کیا، تقریب کے بعد سابق آرمی چیف کو فوجیوں نے زندہ باد کا نعرہ لگا کر خدا حافظ کہا جب کہ آرمی چیف جنرل قمرجاوید باجوہ جب انہیں رخصت کرنے پہنچے تو جنرل ریٹائرڈ راحیل شریف نے گاڑی میں بیٹھتے ہوئے کہا کہ او کے جنرل باجوہ بیسٹ آف لک۔

اس سے قبل تقریب سے خطاب کرتے ہوئے سابق آمی چیف جنرل ریٹائرڈ راحیل شریف کا کہنا تھا کہ پاک فوج کے نئے سربراہ مضبوط قوت فیصلے کے حامل ہیں اور جو اعتماد ان پر کیا گیا ہے وہ اس پر پورا اتریں گے۔

ایمزٹی وی(آزاد کشمیر) مظفرآباد سینٹرل بار ایسوسی ایشن میں اپنے اعزاز میں منعقدہ تقریب سے خطاب کرتے ہوئے وزیرا عظم آزادکشمیر راجہ فاروق حیدر نے کہا ہے کہ عوام کے حقوق کا تحفظ ریاست کی ذمہ داری ہے ،کسی کو عام آدمی کا حق مارنے کی اجازت نہیں دیں گے ،کرپشن کا خاتمہ کر کے حرام کو حلال سے الگ کر کے دم لوں گا،ریاستی عدلیہ پر فخر ہے جس نے ہمیشہ مشکل وقت میں اچھے اور میرٹ پر مبنی فیصلے کئے ،ہائی کورٹ کے ججز کی تعداد میں اضافہ کریں گے ،آزادکشمیر کو سی پیک کا حصہ بنایا گیاہے جس کے تحت میرپور اور مظفرآباد میں صنعتی زون قائم کئے جائیں گے.

اس موقع پر صدر بارراجہ آفتاب نے بھی خطاب کیا، تقریب میں ڈسٹرکٹ وسیشن ججز ، ایڈووکیٹ جنرل رضا علی خان، بارکونسل اور ہائی کورٹ بار کے عہدیدار وں اور وکلاء کی بڑی تعداد موجود تھی۔وزیرا عظم آزادکشمیر نے اس موقع پر وکلاء کوگزٹیڈ آفیسرز کے برابر میڈیکل کی سہولت کی فراہمی ،سینٹر ل بارکے لئے 10لاکھ روپے دینے اور وکلاء کی ہائوسنگ سوسائٹی کے لئے مختص جگہ کو واگزار کرانے کا اعلان بھی کیا،وزیرا عظم آزادکشمیر نے کہا کہ کشمیریوں کے حوصلے بلند ہیں وہ بھارت کے ظلم کے سامنے جھکنے والے نہیں ہیں،بھارتی فائرنگ سے متاثرہونے والوں کی بحالی اور انہیں تمام ممکنہ سہولیات کی فراہمی کے لئے اقدامات کر رہے ہیں۔

انہوں نے کہا کہ آزادکشمیر کو کرپشن فری اسٹیٹ بنا کر دم لیں گے ، کرپشن کسی صورت برداشت نہیں کریں گے ،عوام کے حقوق کا تحفظ ہماری ذمہ داری ہے جس پر کوئی کمپرومائز نہیں کریں گے ،محکمہ تعلیم سے کالی بھیڑوں کا خاتمہ کیا جائیگا، این ٹی ایس کا نظام رائج کر کے محکمہ تعلیم سے سفارشی کلچر کے خاتمہ کے لئے پہلا قدم رکھ دیا ہے ،کوالٹی آف ایجوکیشن پر کوئی سمجھوتہ نہیں ہوگا،آزادکشمیر میں بلدیاتی انتخابات کا انعقاد اپریل میں ہوگا اور گراس روٹ لیول سے لیڈرشپ کو آگے آنے کا موقع ملے گا تاکہ ریاست کو تربیت یافتہ لیڈرشپ میسر آسکے۔

ایمزٹی وی(کراچی/ تعلیم) کراچی میں وزیراعلی سندھ مراد علی شاہ کی زیرِ صدارت محکمہ تعلیم کا اجلاس ہوا، اجلاس میں وزیرِ تعلیم، چیف سیکریٹری، اے سی ایس ڈیولپمنٹ، سیکریٹری ایجوکیشن سمیت دیگر نے شرکت کی۔
اجلاس کے دوران وزیر اعلی سندھ کا کہنا تھا کہ ہمیں تعلیم کے شعبے میں بہت کام کرنا ہے۔ شرح خواندگی بڑھانی ہے۔ اس لئے اب باتیں ختم اور عمل چاہیے۔ گھوسٹ ٹیچرز کی باتیں ابھی بھی ہورہی ہیں، ان کے سخت ایکشن لیا جائے اور انہیں فارغ کیا جائے۔

جن اسکولوں میں اساتذہ زیادہ ہیں انہیں وہاں بھیجا جائے جہاں ان کی ضرورت ہے، اساتذہ کی تربیت کو بہتر کریں کیونکہ اگر اساتذہ بچوں کو پڑھا نہیں پائیں گے تو ایسے اساتذہ کا کوئی فائدہ نہیں۔ انہوں نے آئندہ اجلاس میں متعلقہ حکام سے محکمہ تعلیم میں نئی بھرتیوں پر بریفنگ طلب کرلی۔

اس سے قبل کراچی سرکلر ٹرین منصوبے سے متعلق اجلاس کی صدارت کرتے ہوئے وزیر اعلٰی سندھ نے کہا کہ وہ اس منصوبے کو پاک چین اقتصادی راہداری منصوبے میں شامل کرنے کے لیے وفاقی حکومت اور چین سے بات کریں گے۔

ایمزٹی وی (کراچی/ تعلیم)وفاقی اردو یونیورسٹی کے ناظم امتحانات غیاث الدین احمد کے مطابق بی اے ، بی کام، معادلہ(مدارس اورہومیو پیتھک)پرائیویٹ کے امتحانی فارم جمع کرانے کی تایخ میں بغیر لیٹ فیس کے 29نومبرسے5دسمبر 2016تک توسیع کردی گئی ہے۔

امتحانی فارم الائیڈ بینک یونیورسٹی روڈگلشن اقبال اور عسکری بینک بوہرہ پیر روڈبرانچوںسے حاصل اور جمع کرائے جاسکتے ہیں۔ بی اے،بی کام(سال اول و دوم) مدارس، ہومیو پیتھک کی امتحانی فیس 3ہزار3سو روپے جبکہ بی اے ، بی کام (مشترکہ) کی امتحانی فیس5ہزارروپے اوراا امتحانی فارم کی قیمت 200 روپے مقرر کی گئی ہے۔

ایمزٹی وی (لاہور) پنجاب حکومت نے گزشتہ روز حلف اٹھانے والے نئے وزراءکے محکموں کا اعلان کر دیا ہے ، مجتبیٰ شجاع الرحمان کو 3اور ندیم کامران کو 2 محکمے سونپ دیے گئے۔

پنجاب حکومت کے اعلامیے میں کہا گیا ہے کہ میاں مجتبیٰ شجاع الرحمان کو ایکسائزاینڈ ٹیکسیشن کے علاوہ اطلاعات اور ثقافت کا اضافی چارج بھی سونپ دیا گیا جبکہ ملک ندیم کامران کے پاس پلاننگ اینڈ ڈویلپمنٹ اورشہری ترقی کے علاوہ پبلک ہیلتھ انجینئرنگ کا اضافی چارج بھی ہوگا ۔

اس کے علاوہ ترجمان پنجاب حکومت زعیم قادری کو اوقاف اورمذہبی امور کی وزارت دے دی گئی۔
پنجاب حکومت کی جانب سے امانت اللہ شادی خیل کے پاس آبپاشی، محمد نعیم اختربھابھا کے پاس زراعت کا قلمدان ہوگا۔

میاں یاورزمان جنگلات،جنگلی حیات اورفشریز، عطاءمحمد مانیکا محصولات اور تنویراسلم ملک کمیونیکیشن اینڈ ورکس کے وزیرمقررہوگئے جبکہ آصف سعید منیس لائیوسٹاک اینڈ ڈیری ڈویلپمنٹ، محمد آصف ملک کو محکمہ آثارقدیمہ کی وزارت دی گئی ہے۔

میاں منشاءاللہ بٹ کو لوکل گورنمنٹ اینڈ کمیونٹی ڈویلپمنٹ کا وزیر مقرر کیا گیا ہے جبکہ خواجہ
سلمان رفیق کے پاس میڈیکل ایجوکیشن اور صحت کی وزارت ہوگی جبکہ خواجہ عمران نذیر بنیادی صحت کے وزیر ہونگے۔

اس کے علاوہ چودھری محمد شفیق کو خصوصی تعلیم، ڈاکٹرفرخ جاوید کو لٹریسی اورغیررسمی تعلیم اور رضاعلی گیلانی کوہائرایجوکیش کی وزارت سونپ دی گئی۔
جہانگیرخانزادہ کے پاس امورنوجوانان وکھیل اور نغمہ مشتاق کے پاس زکوت اورعشرکاقلمدان ہوگا۔شیخ علاﺅالدین کو وزیر صنعت وتجارت اور سرمایہ کاری ،مہر اعجاز اچلانہ وزیر قدرتی آفات اور ملک احمدیار ہنجرا کو وزیرجیل خانہ جات مقرر کردیا گیا۔

اعلامیے کے مطابق تین صوبائی مشیروں کے محکموں کا بھی اعلان کردیا گیا ہے، ملک محمد احمد خان اطلاعات اور ثقافت، رانامقبول احمد پبلک پراسیکیوشن اور رائے حیدرعلی خان سیاحت کے مشیر مقرر ہوگئے۔

ایمزٹی وی(اسلام آباد)چینی سفیر سن وی ڈونگ نے جنرل زبیر محمود حیات کو چیئرمین جوائنٹ چیفس آف اسٹاف اورجنرل قمر جاوید باجوہ کو چیف آف آرمی اسٹاف کا عہدہ سنبھالنے پر مبارکباد دیتے ہوئے اس امید کا اظہار کیاہے کہ مستقبل میں دونوں ممالک اوران کی افواج کے مابین خوشگوار تعلقات مزید فروغ پائیں گے۔

چینی سفارتخانے کی جانب سے پیر کو جاری کردہ بیان میں کہا گیا ہے کہ چینی سفیر نے جنرل زبیر محمود حیات اور جنرل قمر جاوید باجوہ کی کامیابی کے لئے نیک تمناﺅں کا اظہار کرتے ہوئے کہا ہے کہ مستقبل میں دونوں ممالک اور افواج کے مابین خوشگوار تعلقات مزید فروغ پائیں گے۔انہوں نے چیف آف آرمی اسٹاف جنرل راحیل شریف کو بے شمار کامیابیوں اور ملک میں امن واستحکام کے فروغ کیلئے کردار ادا کرنے پر بھی مبارکباد دی۔

دونوں ممالک اور افواج کے مابین دوستانہ تعلقات کو فروغ دینے کے لئے جنرل راحیل شریف کی جانب سے اہم کردار ادا کئے جانے کی کاوشوں کو بھی سراہا۔

ایمزٹی وی(راولپنڈی)نئے آرمی چیف جنرل قمر جاوید باجوہ نے کہا ہے کہ مجھ پر بھاری ذمہ داریاں ہیں اللہ کے فضل سے ان ذمہ داریوں کو پورا کرونگا ۔

پاک فوج کی کمان سنبھالنے کے بعد میڈیا سے گفتگو کرتے ہوئے آرمی چیف کا کہنا تھا کہ ایل او سی پر صورت حال جلد ٹھیک ہو جائے گی تاہم میڈیا مثبت کوریج کرے ۔

کمان کی تبدیلی کے بعد جنرل قمر جاوید باجوہ نے جنرل راحیل شریف کو رخصت کیا جبکہ مشیر خارجہ سرتاج عزیز سلامی کے چبوترے پر جا کر آرمی چیف جنرل قمر جاوید باجووہ سے ملے اورانہیں مبارکباد دی جس کے بعد وفاقی وزیر دفاع خواجہ آصف نے بھی سلامی کے چبوترے پر جا کر سپہ سالار کو مبارکباد پیش کی ۔

ایمزٹی وی(راولپنڈی)جنرل راحیل شریف نے پاک فوج کی کمان نئے آرمی چیف جنرل قمر جاوید باجوہ کے سپرد کر دی ۔میڈیا رپورٹس کے مطابق جنرل راحیل شریف اور نئے آرمی چیف جنرل قمر جاوید باجوہ نے یاد گار شہداءپر حاضری دی اور پھول چڑھائے جہاں اعزازی گارڈز کے دستے نے جنرل راحیل شریف کو سلامی پیش کی جس کے بعد جی ایچ کیو سے ملحقہ ہاکی گراﺅنڈ میں پاک فوج کی کمان کی تبدیلی کی پروقار تقریب منعقد ہوئی جہاں جنرل راحیل شریف کو ان کی فرنٹئیر فورس رجمنٹ کے دستے جبکہ جنرل قمر باجوہ کو ان کی بلوچ رجمنٹ کا دستے نے سلامی پیش کی ۔

جنرل راحیل شریف نے نئے آرمی چیف جنرل قمر جاوید باجوہ کو علامتی چھڑی سونپی کرپاک فوج کی کمان انکے سپرد کر دی ہے

۔ تین سال قبل آج کے روز ہی جنرل اشفاق پرویز کیانی نے یہ علامتی چھڑی جنرل راحیل شریف کے سپرد کی تھی جسے آج انہوں نے اپنی مدت ملازمت ختم ہونے کے بعد وزیر اعظم پاکستان کی جانب سے نامزد کردہ آرمی چیف جنرل قمر جاوید باوجوہ کے سپرد کر کے تاریخ رقم کر دی ۔جنرل قمر جاوید باجوہ کا تعلق بلوچ رجمنٹ سے ہے ، وہ بلوچ رجمنٹ سے پاکستان کیلئے منتخب ہونے والے چوتھے اور مجموعی طور پر 16ویں آرمی چیف ہیں ۔

کمان کی تبدیلی کی تقریب میں سابق آرمی چیفس، اعلیٰ عسکری حکام، وفاقی وزراء، فضائیہ اور بحریہ کے سربراہان ، چیئرمین جوائنٹ چیف آف اسٹاف کمیٹی جنرل زبیر حیات،اور غیر ملکی سفارتکاربھی موجود تھے ۔