ایمزٹی وی(کوئٹہ) نواب اکبر بگٹی قتل کیس میں سابق صدر پرویز مشرف کے وارنٹ گرفتاری جاری کر دئیے گئے ہیں۔ تفصیلات کے مطابق بلوچستان ہائیکورٹ میں نواب اکبر بگٹی قتل کیس کی سماعت ہوئی جس دوران عدالت نے سابق صدر پرویز مشرف کی عدم پیشی پر برہمی کا اظہار کیا۔ عدالت نے پرویز مشرف کے وکیل اخترشاہ سے مکالمہ کرتے ہوئے کہا کہ ہم نے ابھی تک ملزم کو اشتہاری قرار نہیں دیا، انہیں قصوروار نہیں ٹھہرایا گیا اور اشتہار شائع نہیں کرایا۔

پرویز مشرف کے وکیل نے کہا کہ میرا موکل مفرورکی تعریف پر پورا نہیں اترتا جبکہ وہ عدالت میں پیش ہونا چاہتے ہیں لیکن انہیں سیکیورٹی خدشات ہیں جس پر عدالت نے کہا کہ پہلے آپ کو یہ ثابت کرنا ہو گا کہ ان کی غیر موجودگی میں آپ پیش ہو سکتے ہیں، تو وکیل نے کہا کہ میں اپنے وکالت نامے کی بنیاد پرعدالت میں پیش ہونے کا مجاز ہوں تاہم ایسا کوئی قانون نہیں کہ میں ملزم کی غیر موجودگی میں پیش ہو جاﺅں۔

جسٹس جمال مندوخیل نے کہا کہ کیس کے مرکزی ملزم کو متعدد نوٹسز بھجوائے لیکن وہ پیش نہیں ہوئے جس پر ان کا کہنا تھا کہ سیکیورٹی خدشات کے باعث ہی وہ پیش نہیں ہو رہے تو جسٹس جمال مندوخیل نے استفسار کیا کہ آپ کو کس قسم کی سیکیورٹی چاہئے، آپ پرویز مشرف کی آمد کی گارنٹی دیں ہم سیکیورٹی کا لکھ دیتے ہیں۔

عدالت کا کہنا تھا کہ مشرف یہاں آ کر تسلیم کر لیں، بلوچستان کے لوگ فراخ دل ہیں، معاف کر دیں گے۔ عدالت نے پرویز مشرف کے وکیل اختر شاہ سے کہا کہ آپ ہمت کریں مشرف کے آنے کی یقین دہانی کرائیں اور ان کے آنے کی تاریخ اور سیکیورٹی بھی آپ کی مرضی کی ہو گی جس پر وکیل نے کہا کہ ایک ہفتے کی مہلت دیں، اپنے موکل سے پوچھ لوں کہ وہ کب آ سکتے ہیں۔

جسٹس مندوخیل نے کہا کہ ہم وکلاءکا احترام کرتے ہیں اس لئے آپ کو مہلت دی گئی ہے اور اس کے ساتھ ہی انہوں نے عدالتی عملے کو ہدایت بھی کی کہ مشرف کے وکلاءجب تحریری طور پر لکھیں تب ان کی سیکیورٹی کے انتظامات کئے جائیں۔ ذرائع کے مطابق عدالت نے پرویز مشرف کے قابل ضمانت وارنٹ گرفتاری جاری کرتے ہوئے کیس کی سماعت 30 دسمبر تک ملتوی کر دی ہے۔

ایمزٹی وی(پنجاب)چنبہ ہاوس لاہور میں ایم این اے چودھری اشرف کے کمرے سے مسلم لیگ ن کی خاتون ورکر سمعیہ چوہدری کی لاش ملی جس کی ابتدائی پوسٹمارٹم رپورٹ میں کہا گیا ہے کہ سمعیہ کے جسم پر تشدد کا کوئی نشان نہیں، موت نشے کی زیادتی یا زہریلی چیز پینے سے ہوئی۔دوسری جانب چودھری اشرف کا کہنا ہے کہ سمعیہ منشیات کی عادی تھی ۔

تفصیل کے مطابق ہفتے کی رات چنبہ ہاوس لاہور سے ایم این نے چوہدری اشرف کے کمرے سے سمعیہ کی لاش برآمد ہوئی جس کی پوسٹمارٹم رپورٹ میں کہا گیا کہ سمعیہ کی موت نشے کی زیادتی یا زہریلی چیز کھانے سے ہوئی ۔

دوسری جانب چودھری اشرف کا کہنا ہے کہ ہو سکتا ہے کہ سمعیہ چوہدری کی موت ہارٹ اٹیک سے ہوئی ہو کیونکہ وہ منشیات کی بھی عادی تھی ۔انہوں نے مزید بتا یا کہ سمعیہ ناک کے ذریعے کوکین کا استعمال کرتی تھی ۔واضح رہے کہ چنبہ ہائوس کا کمرہ نمبر 26 ایم این اے اشرف چودھری کے نام الاٹ ہے لیکن ان کا کہنا ہے کہ وہاں کسی کو نہیں ٹھہرایا، خاتون حلقے کی رہائشی ہے، معلوم نہیں کمرہ کس کے کہنے پر دیا گیا۔

ایمزٹی وی(لاہور)اپوزیشن لیڈر خورشید شاہ نے کہا ہے کہ قطری شہزادے کے خط کے بعد شکوک و شبہات سو فیصد بڑھ گئے ہیں تاہم جواب دینا وزیر اعظم کی ذمہ داری ہے اور اب بال انکے کورٹ میں ہے ۔ اگر ہم نے دھرنے میں عمران خان کا ساتھ دیا ہوتا تو نظام ختم ہو جاتا ۔ نواز شریف پاکستان کے وزیر اعظم ہیں تاہم اپنے آپ کو بچانے کیلئے ایک چھوٹے سے ملک کا خط پیش کر دینا شرم اور افسوس کی بات ہے ۔پیپلز پارٹی کو آج بھی اسٹیبلشمنٹ مخالف جماعت سمجھا جاتا ہے ۔

فیصل آباد میں میڈیا سے گفتگو کرتے ہوئے انکا کہنا تھا کہ وزیر اعظم نے پارلیمنٹ میں خطاب کیا اور ٹی وی پر بھی قوم سے مخاطب ہوئے مگر پوری داستان میں قطری شہزادے کا تو ذکر ہی نہیں تھا، جانےو الے آرمی چیف کو اچھے حالات نہیں ملے اور نہ ہی آنے والے آرمی چیف کو اچھے حالات ملے ہیں تاہم آرمی چیف کی تبدیلی نارمل چیز ہے ۔ انکے ہمراہ قمر الزمان قائرہ بھی موجود تھے ۔ اپوزیشن لیڈر نے کہا کہ پیپلز پارٹی نے چار چھوٹے سے مطالبات پیش کیے ہیں ”حکومت ہمارے چار مطالبات تسلیم کرے اور باقی ڈیڑھ سال کا عرصہ بھی آرام سے گزارے “۔حکومت کے لاڈلے وزیر وہی بیانات دے رہے ہیں جو بینظیر بھٹو کے خلاف دیے جاتے تھے ۔”نواز شریف بولے گا تو جواب میں خود دونگا “۔

ایک سوال پر خورشید شاہ نے کہا کہ دیکھنا یہ ہے نواز شیرف اب 90 کی دہائی سے بچنا چاہتا ہے اور پارلیمنٹ میں اکر کوئی ثبوت دینا چاہتا ہے یا نہیں کیونکہ بال اب انکے کورٹ میں ہے اور دیکھنا ہے وہ کیا فیصلہ کرتے ہیں تاہم ہم نے 90کی سیاست چھوڑ دی مگر نواز لیگ نے نہیں چھوڑی ۔”پیپلز پارٹی نے ہمیشہ پارلیمنٹ کی بالادستی کو ترجیخ دی“۔ ایک وقت تھا جب حکومت کو ھکا دینے کی بھی ضرورت نہیں تھی بس خاموش رہنے کی ضرورت تھی تو حکومت چلی جاتی مگر ہم نے جمہوریت کا ساتھ دیا۔

انہوں نے مزید کہا کہ بلاول پارلیمنٹ میں نہیں ہیں تو جمہوریت مکمل نہیں تاہم سابق صدر آصف علی زرداری بھی جلد وطن واپس آئیں گے ۔ ہم 24ویں ترمیم کی حمایت نہیں کریں گے کیونکہ اگر ہم نے ایسی ترمیم کی حمایت کرنی ہے تو پھر توہمیں سیاست چھوڑ دینی چاہئے۔ قمرالزمان قائر ہ کا اس موقع پر کہنا تھا کہ ہم 90کی دہائی کی سیاست کی طرف نہیں جانا چاہتے تاہم اگر مجبور کیا گیا تو ہم سے زیادہ تاریخ کوئی نہیں جانتا ۔

ایمزٹی وی(کراچی)متحدہ قومی موومنٹ پاکستان کے رہنما خواجہ اظہار الحسن نے کہا ہے کہ صوبائی وزیر بلدیات سے وزارت نہیں سنبھالی جارہی ،پوری وزارت چین کو دے دیں تاکہ وہاں سے بہتر طریقے سے کام کر کے دکھا سکیں ۔
میڈ یا سے گفتگو کرتے ہوئے انہوں نے کہا کہ وزیر بلدیات سے بلدیہ کی وزارت نہیں سنبھل پائے گی ،تھوڑا تھوڑا دینے کے بجائے پوری وزارت ہی چین کو کیو ں نہیں دے دیتے ۔

ان کا کہنا تھا کہ وزارت بلدیات چین کو کنٹریکٹ پر دی جائے ،کوئی چینی آکر سندھ میں وزارت بلدیات کا قلمدان سنبھالے ۔انہوں نے کہا کہ آج بھی گلستان جوہر اورسرجانی ٹاون میں چائنہ کٹنگ ہو رہی ہے ،وزیر بلدیات کو پتہ ہی نہیں ہے ۔

ان کا کہنا تھا کہ چا ئنا کٹنگ کی کی تحقیقات پی پی اپنے وزرا سے شروع کرے اور ایم کیو ایم پر ختم کرے ،ہم چائنا کٹنگ کرنے والوں کو سماج کا دشمن سمجھتے ہیں ۔

ایمزٹی وی(اسلام آباد) چیئرمین تحریک انصاف عمران خان نے شریف خاندان کے لندن فلیٹس کی دستاویزات سپریم کورٹ میں جمع کرادیں ۔

تفصیلات کے مطابق عمران خان نے سپریم کورٹ میں زیر سماعت ملکی تاریخ کے اہم ترین پاناما کیس میں شواہد کے طور پر شریف خاندان کے لندن فلیٹس کی دستاویز ات جمع کرادی ہیں ۔
ذرائع کا کہنا ہے کہ دستاویز متفرق درخواست کے ذریعے سپریم کورٹ میں جمع کرائی گئی ہیں جو التوفیق کیس کو شریف خانداد سے منسلک کرنے کے متعلق ہیں۔
یاد رہے شریف خاندان کا نام پاناما لیکس میں آنے کے بعد وزیر اعظم نواز شریف اور انکے خاندان کے خلاف پی ٹی آئی ، عوامی مسلم لیگ ،جماعت اسلامی ا وردیگر افراد نے سپریم کورٹ سے رجوع کر رکھا ہے جہاں پاناما لیکس کیس زیر سماعت ہے اور اس سلسلے میں عمران خان نے اب لندن میں شریف خاندان کے فلیٹس کا ریکارڈ بھی سپریم کورٹ میں جمع کرادیا ہے ۔

سپریم کورٹ اب تک اس کیس کی چھ سماعتیں کر چکا ہے تاہم اگلی سماعت 30نومبر ہو ہونے جا رہی ہے جس کیلئے تحریک انصاف نے حامد خان کی جگہ نعیم بخاری کو دلائل دینے کیلئے وکیل مقرر کیا ہے ۔

تحریک انصاف کا موقف ہے کہ پاناما لیکس میں آنے والی وزیر اعظم کے بچوں کی آف شور کمپنیوں او ر دیگر جائیدادوں کیلئے پیسے پاکستان سے بھیجے گئے جس کیلئے منی لانڈرنگ اور دیگر خفیہ ذرائع استعمال کیے گئے تاہم وزیر اعظم نے ان اثاثوں کا زکر نہ ہی اپنے گوشواروں میں کیا اور قومی اسمبلی میں اپنے خطاب کے دوران بھی اس حوالے سے متضاد بیانات دیے جس پر انہیں نااہل قرار دیا جائے ۔

عوامی مسلم لیگ کے سربراہ شیخ رشید اپنی درخواست کی پیروی خود کر رہے ہیں جبکہ جماعت اسلامی نے بھی وزیر اعظم نواز شریف اور انکے بچوں کے خلاف درخواست دائر کر رکھی ہے تاہم عدالت نے ان تمام درخواستوں کو یکجا کر کے سماعت کا آغاز کر رکھاہے جس کے لئے چیف جسٹس انور ظہیر جمالی کی سربراہی میں پانچ رکنی لارجر بینچ تشکیل دیا گیا ہے ۔

یاد رہے عمران خان گزشتہ دنوں لندن میں اپنے دوست کی ہمشیرہ کی شادی میں شرکت کیلئے گئے تھے جہاں انہوں نے شریف خاندان کے فلیٹس کے ثبوت اور شواہد اکٹھے کیے جنہیں آج سپریم کورٹ کے حوالے کر دیا گیا ہے ۔ عمران خان کے ہمراہ عوامی مسلم لیگ کے سربراہ شیخ رشید احمد بھی بیرون ملک پہنچے تھے ۔

ایمزٹی وی (اسپورٹس)اے سی سی ٹوئنٹی 20 ویمنز کپ میں پاکستان نے سری لنکا کو8 وکٹ سے مات دے دی، گرین شرٹس نے 113 کا ہدف 18.2 اوورز میں دو وکٹ کھو کر حاصل کرلیا، جویریہ خان 51 گیندوں پر 56رنز ناٹ آؤٹ بناکر میچ کی بہترین کھلاڑی کا اعزاز پانے میں بھی کامیاب رہیں، پانچ باؤنڈریز بھی ان کی اننگز کا حصہ رہیں، نین عابدی 28 پر ناٹ آؤٹ رہیں، انھوں نے 24 گیندوں کا سامنا کیا، اوپنر عائشہ ظفر 7 اور ون ڈاؤن بسمہ معروف 17رنز بناکر پویلین واپس ہوگئیں، اس سے قبل ٹاس جیتنے والی سری لنکن ٹیم نے8 وکٹ پر112رنزاسکورکیے، چماری اتاپتو نے36 گیندوں پر31 رنزاسکور کیے، ان کی اننگز میں 2 چوکے اور2 سکسرشامل رہے، ڈیلانی مینڈورا نے 24 رنزبنانے کیلیے23 گیندوں کا سامنا کیا۔

ان کی اننگز میں 3 باؤنڈریز شامل رہیں، پراساڈینی ویراکوڈی نے21 رنز بنائے، پاکستان کی جانب سے ناہیدہ خان نے17رنزکے عوض 2 کھلاڑیوں کو آؤٹ کیا جبکہ ایک ایک وکٹ انعم امین، ثنامیر اور بسمہ معروف کے حصے میں آئی۔دن کے دوسرے مقابلے میں بھارت نے تھائی لینڈ کو 9وکٹ سے زیرکرلیا، ناکام سائیڈ نے پہلے کھیل کر 5 وکٹ پر 69رنز بنائے، بھارت نے آسان ہدف 11.1 اوورز میں ایک وکٹ کھوکر حاصل کرلیا، ایس میگھنا نے 30 گیندوں پر ناقابل شکست 29 رنز بٹورے، سشما ورما 11 گیندوں پر 3رنز بناکر ناٹ آؤٹ رہیں، ویدا کرشنا مورتھی نے 26 بالز کا سامناکرتے ہوئے 35 رنز بناکر پویلین کی راہ لی، انھوں نے میگھنا کے ہمراہ پہلی وکٹ کیلیے 49 کی شراکت بھی بنائی۔

ایمزٹی وی(کھیل)ہیملٹن کے سیڈن پارک میں کھیلے جا رہے ٹیسٹ میں نیوزی لینڈ کی جانب سے دیئے گئے 369 رنز کے ہدف کے تعاقب میں پاکستان نے بغیر کسی وکٹ کے نقصان کے ایک رن بنا لیا ہے جب کہ جیت کے لئے اسے مزید 368 رنز درکار ہیں۔

کھیل کے چوتھے روز نیوزی لینڈ نے اپنی دوسری اننگز 313 رنز 5 کھلاڑی آؤٹ پر ڈکلیئر کر دی۔ نیوزی لینڈ کی جانب سے دوسری اننگز میں روس ٹیلر نے 102 رنز ناٹ آؤٹ جب کہ ٹام لیتھم نے 80 رنز اسکور کئے۔ پاکستان کی جانب سے عمران خان نے 3 جب کہ عامر اور وہاب ریاض نے ایک ایک وکٹ حاصل کی۔

نیوزی لینڈ نے اپنی پہلی اننگز میں 271 رنز اسکور کئے تھے جس کے جواب میں پاکستانی ٹیم پہلی اننگز میں 216 رنز بنا کر آؤٹ ہو گئی تھی اور میزبان ٹیم کو پہلی اننگز میں 55 رنز کی سبقت حاصل ہو گئی تھی۔ پاکستان کی جانب سے پہلی اننگز میں سہیل خان نے 4، عمران خان نے 3 اور محمد عامر نے 2 وکٹیں حاصل کی تھیں جب کہ نیوزی لینڈ کی جانب سے پہلی اننگز میں ٹم ساؤتھی نے 6 اور نیل ویگنر نے 3 کھلاڑیوں کو آؤٹ کیا۔

ایمزٹی وی(کراچی)سابق چیف جسٹس سعید الزمان صدیقی کی بطور گورنر سندھ تعیناتی اسلام آباد ہائیکورٹ میں چیلنج کر دی گئی ہے۔
ذرائع کے مطابق سعید الزمان صدیقی کی بطو رگورنر سندھ تعیناتی کو چیلنج کرتے ہوئے درخواست گزار نے کہا کہ آئین پاکستان کے مطابق سابق چیف جسٹس رکن قومی اسمبلی نہیں بن سکتا ۔
درخواست میں موقف اختیار کیا گیا ہے کہ جو شخص قومی اسمبلی کا رکن نہیں بن سکتا، وہ گورنر کیسے بن سکتا ہے۔

ایمزٹی وی(نئی دہلی)سابق بھارتی آرمی چیف جنرل بکرم سنگھ پاک فوج کے نئے سربراہ جنرل قمر جاوید باجوہ کی کارکردگی کے معترف نظر آتے ہیں اور ان کا کہنا ہے کہ جنرل قمر جاوید انتہائی شاندار اور پیشہ ورانہ فوجی افسر ہیں۔

سابق بھارتی آرمی چیف جنرل بکرم سنگھ کا کہنا ہے کہ پاکستان کے نئے آرمی چیف جنرل قمر جاوید باجوہ کی کارکردگی انتہائی پیشہ ورانہ اور شاندار رہی ہے، جنرل قمر جاوید باجوہ نے کانگو میں اقوام متحدہ کے امن مشن میں میرے ساتھ کام کیا تھا جہاں ان کی کارکردگی ناقابل بیان رہی تاہم ایک فوجی آفسر ملک سے باہر مختلف انداز میں کام کرتا ہے کیونکہ وہ وہاں اپنے ملک کی نمائندگی کر رہا ہوتا ہے اور جب بات ملک کے مفاد کی ہوتو اس کا طرز عمل الگ ہوتا ہے لہذا اب بھارت کو صبر سے کام لینا ہو گا۔

سابق بھارتی آرمی چیف کا کہنا تھا کہ جنرل قمر جاوید باجوہ پاک فوج کی سب سے بڑی 10 ویں کور کے کورپس کمانڈر کے عہدوں پر فائز رہ چکے ہیں اور اسی وجہ سے وہ پاکستان کی بھارت کے حوالے سے پالیسی کے بارے میں مکمل طور پر آگاہ ہیں اور جہاں تک پاک فوج کی کشمیر کے حوالے سے پالیسی ہے کا تعلق ہے تو جنرل باجوہ اس پر کبھی سمجھوتہ نہیں کریں گے۔

واضح رہے کہ گزشتہ روز لیفٹیننٹ جنرل قمرجاوید باجوہ کو جنرل کے عہدے پر ترقی دے کر پاک فوج کا نیا سربراہ مقرر کردیا گیا ہے جب کہ لیفٹیننٹ جنرل زبیر محمود حیات کو بھی جنرل کے عہدے پر ترقی دے کر چیرمین جوائنٹ چیفس آف اسٹاف کمیٹی بنا دیا گیا ہے۔

ایمزٹی وی(ممبئی) معروف اسلامی اسکالر، محقق اوراسلامی تحقیقی ادارے اسلامک ریسرچ فاؤنڈیشن کے سربراہ ڈاکٹرذاکرنائیک نے کہاہے کہ آئی آرایف پر5 سالہ پابندی مسلمانوں، امن، جمہوریت اورانصاف پر حملہ ہے، بھارت میں تمام کالے قوانین صرف مسلمانوں کیلیے ہیں، ہندو مذہبی رہنماؤں کو اسلام پرحملوں کی کھلی چھوٹ دی جارہی ہے۔

ہفتے کوجاری ایک کھلے خط میں انھوں نے کہاکہ بھارت میں بینکوں کوآئی آرایف سے وابستہ تمام افرادکے کھاتے منجمد کرنے کی ہدایت دی گئی ہے جوظلم کی بدترین مثال ہے، یہ پابندی کرنسی بحران کے دوران لگائی گئی تاکہ اس کے خلاف مزاحمت کو روکا جاسکے اور میڈیا کی توجہ اس سے ہٹالی جائے۔
ذاکر نائیک نے جواس وقت بھارت سے باہر ہیں، کہاہے کہ وہ پابندی کے خلاف عدالت جائیں گے اورعدالت وزیراعظم مودی کے منصوبے ناکام بنادے گی۔