پاکستان سپر لیگ کے 10ویں ایڈیشن میں قومی ٹیم کے دو سابق کپتانوں سرفراز احمد اور شعیب ملک کو ڈائمنڈ کیٹیگری کے کھلاڑیوں میں شامل کرلیا گیا۔
گزشتہ دنوں پی ایس ایل 10 کیلئے تمام 6 فرنچائزز نے ایونٹ کیلئے برقرار رکھے جانے والے کھلاڑیوں کے ناموں کا اعلان کیا تو کوئٹہ گلیڈی ایٹرز نے 8 کھلاڑیوں کو ریٹین کیا تاہم اس میں فرنچائز کو چیمپئین بنوانے والے سرفراز احمد کا نام نہیں تھا۔
کوئٹہ گلیڈی ایٹرز نے سرفراز احمد کو 9 برس بعد ریلیز کیا اور اب وہ 2016 کے پہلے ایڈیشن کے بعد ڈرافٹ کا حصہ بنیں گے۔
دوسری جانب آل راؤنڈر شعیب ملک نے سوشل میڈیا سائٹ پر سابق فرنچائز کراچی کنگز کو چھوڑنے کا اعلان کیا تھا، انہوں نے 2020 میں ٹیم کو جوائن کیا اور 4 سیزن کھیلے۔پی ایس ایل کے 10ویں ایڈیشن کی ڈائمنڈ کیٹیگری میں سرفراز احمد اور شعیب ملک کے علاوہ محمد نواز، عامر جمال، عباس آفریدی، خوشدل شاہ، محمد علی اور محمد حسنین بھی شامل ہیں۔
ڈائمنڈ کیٹیگری میں آسٹریلیا، افغانستان، بنگلادیش، انگلینڈ، نیوزی لینڈ، جنوبی افریقا، سری لنکا، ویسٹ انڈیز اور زمبابوے کے علاوہ ایسوی ایٹ ممالک کے کھلاڑی بھی شامل ہیں۔
پاک فوج کی پہلی خاتون لیفٹیننٹ جنرل نگار جوہرنے کہا ہے کہ پڑھی لکھی خواتین معاشرے میں ترقی کی ضامن ہیں ،خواتین کو با اختیار بنانا وقت کی ضرورت ہے
مسلم معاشروں میں لڑکیوں کی تعلیم کے موضوع پر 2روزہ بین الاقوامی کانفرنس سے خطاب کرتے ہوئے پاک فوج کی پہلی خاتون لیفٹیننٹ جنرل نگار جوہر نے کہا کہ تعلیم کا موضوع میرے دل کے قریب ہے ۔ پڑھی لکھی خواتین معاشرے میں ترقی کی ضامن ہیں ۔ خواتین کو با اختیار بنانا وقت کی ضرورت ہے ۔
انہوں نے کہا کہ خواتین کی تعلیم کے حوالے سے چیلنجز ضرور ہیں مگر موجود مواقع سے فائدہ اٹھانا چاہیے ۔ نیشنل پالیسی اور بجٹ میں خواتین کی تعلیم کے حوالے سے اقدامات کیے جانے چاہیئے۔ خواتین کی تعیم کے حوالے سے معاشرے میں آگاہی مہم چلانے کی ضرورت ہے کیوں کہ آج کی پڑھی لکھی خاتون معاشرے میں کردار ادا کرے گی۔
لیفٹیننٹ جنرل نگار جوہر کا کہنا تھا کہ میں ایسے معاشرے میں پلی بڑھی جہاں صنفی تفریق عام تھی۔ لڑکیوں کی تعلیم کو اکثر نظرانداز کیا جاتا تھا۔ تعلیم نے میری زندگی میں انقلاب برپا کیا اور آج اس مقام پر ہوں جہاں ملک کی خدمت کر رہی ہوں۔
انہوں نے کہا کہ بطور فوجی، ایسے علاقے بھی دیکھے جہاں گرلز اسکول تباہ ہو چکے تھے اور لڑکیوں کو زبردستی تعلیم سے محروم کر دیا گیا تھا۔ ان بہادر لڑکیوں کو بھی دیکھا جو اپنی تعلیم کے حق کے لیے کھڑی ہوئیں اور جدوجہد کی۔
تقریب سے خطاب کرتے ہوئے انہوں نے مزید کہا کہ ہمیں لڑکیوں کی تعلیم کے لیے معاشرتی رویوں کو چیلنج کرنا ہوگا۔ فیصلہ سازی و پالیسی سازی میں لڑکیوں کی شمولیت کو یقینی بنانا ہوگا۔
وزیراعظم شہباز شریف نے کہا ہے کہ تعلیم حاصل کرنا ہر معاشرے کی بنیادی ضرورت ہے اور اس شعبے میں سامنے آنے والے چیلنجز کا مقابلہ کرنا ہوگا۔
لڑکیوں کی تعلیم وقت کا بڑا چیلنج ہے، مسلم ممالک کو اس حوالے سے بڑے پیمانے پر کام کرنا ہوگا۔
وفاقی دارالحکومت میں ’’مسلم معاشروں لڑکیوں کی تعلیم، چیلنجز اور مواقع‘‘ کے عنوان سے منعقدہ 2 روزہ بین الاقوامی کانفرنس کی افتتاحی تقریب سے خطاب کرتے ہوئے وزیراعظم شہباز شریف نے کہا کہ موجودہ وقت میں درپیش چیلنجز میں ایک اہم لڑکیوں کی تعلیم بھی ہے۔ مسلم ممالک کو اس سے نمٹنے کے لیے بڑے پیمانے پر کام کرنے کی ضرورت ہے۔
بین الاقوامی کانفرنس میں 47 ممالک کے وزرا، اہم شخصیات اور کئی اداروں و تنظیموں کے نمائندے بھی شریک ہوئے۔
تقریب سے خطاب کرتے ہوئے وزیراعظم کا مزید کہنا تھا کہ حکومت پاکستان میں لڑکیوں کی تعلیم کو فروغ دینے کے لیے تمام اقدامات کرنے کے ساتھ تمام وسائل بروئے کار لا رہی ہے۔ انہوں نے کہا کہ تعلیم حاصل کرنا ہر معاشرے کی بنیادی ضرورت ہے اور اس شعبے میں سامنے آنے والے چیلنجز کا مقابلہ کرنا ہوگا۔ مشترکہ اقدامات سے غریب ملکوں میں لڑکیوں کی تعلیم تک رسائی کو ممکن بنانا ہوگا۔
انہوں نے کہا کہ اسلام نے خواتین سمیت معاشرے کے تمام طبقات کے لیے علم حاصل کرنے کی اہمیت بتائی ہے۔ وزیراعظم نے اسلام کے ابتدائی دور میں اس حوالے سے حضرت خدیجہ کی خدمات کا بھی حوالہ دیا۔ انہوں نے کہا کہ بانی پاکستان کی بہن محترمہ فاطمہ جناح نے بھی قیام پاکستان کی جدوجہد میں بھرپور ساتھ دیا۔ اسی طرح بے نظیر بھٹو اسلامی دنیا کی پہلی خاتون وزیراعظم بنیں، ہم انہیں خراج عقیدت پیش کرتے ہیں۔ آج مریم نواز پاکستان کی پہلی خاتون وزیراعلیٰ ہیں۔
شہباز شریف کا کہنا تھا کہ ہماری خواتین قابل اور ہر شعبے میں اپنی صلاحیتوں کا لوہا منوا رہی ہیں۔ ہماری خواتین بہادر ہیں۔ ارفع کریم نے انفارمیشن ٹیکنالوجی کے شعبے میں پاکستان کا نام روشن کیا، عالمی کانفرنس کا انعقاد ہمارے لیے اعزاز ہے اور اس میں ملالہ یوسف زئی کا شریک ہونا بھی فخر کا باعث ہے۔ وہ ہمت اور عزم کی علامت ہیں۔
دورانِ خطاب وزیر اعظم شہباز شریف نے عربی زبان میں میں بھی کچھ جملے ادا کیے، جس پر شرکا نے تالیاں بجا کر انہیں سراہا۔
مشہور زمانہ فلم پشپا کی اداکارہ رشمیکا مندنا وزرش کے دوران حادثہ پیش آنے کے باعث زخمی ہوگئیں۔
بھارتی میڈیا کے مطابق رشمیکا کو جِم میں دوران فٹنس سیشن چوٹ لگنے کے باعث سلمان خان اور وکی کوشل کی فلموں کی شوٹنگ عارضی طور پر روک دی ہے جس میں اداکارہ بھی شامل تھیں۔
یاد رہے کہ ’اینمل‘ اور ’پشپا‘ جیسی شاندار کامیاب فلموں کے بعد رشمیکا مندانا شہرت کی بلندیوں پر ہیں۔ ان کی آنے والی فلموں میں سلمان خان کے ساتھ ’سکندر‘ اور وکی کوشل کے ساتھ ’چھاوا‘ شامل ہیں۔
تاہم 28 سالہ اداکارہ کے جم میں حادثے کا شکار ہونے کے باعث ان کی تینوں بڑی فلموں کی شوٹنگ کا شیڈول متاثر ہوگیا ہے۔
اداکارہ کے قریبی ذرائع نے تصدیق کی ہے کہ وہ آرام کر رہی ہیں، وہ پہلے سے بہتر محسوس کر رہی ہیں اور جلد ہی فلم سیٹس پر واپس آئیں گی۔
ڈاکٹرز نے رشمیکا کو مکمل صحت یابی کے لیے مختصر وقفہ لینے کا مشورہ دیا ہے تاکہ وہ اپنی مصروف شوٹنگ شیڈول کو بہتر انداز میں انجام دے سکیں۔
پاکستان کی معروف اداکارہ کبریٰ خان اور گوہر رشید کے ساتھ شادی کے بندھن میں بندھنے والی ہیں جن کی اب شادی کی تاریخ بھی سامنے آچکی ہے۔
رپورٹ کے مطابق کبریٰ اور گوہر 22 فروری کو رشتہ ازدواج میں منسلک ہوں گے۔ ان کی شادی کی تقریبات کراچی میں منعقد ہوں گی جس میں ان کے قریبی دوست اور اہل خانہ شریک ہوں گے۔
رپورٹ کے مطابق کبریٰ اور گوہر 22 فروری کو رشتہ ازدواج میں منسلک ہوں گے۔ ان کی شادی کی تقریبات کراچی میں منعقد ہوں گی جس میں ان کے قریبی دوست اور اہل خانہ شریک ہوں گے۔
اس جوڑی کی شادی سے متعلق افواہیں کئی دنوں سے سوشل میڈیا پر گردش کر رہی تھیں، جن کی اب تصدیق ہو چکی ہے تاہم اب تک کبریٰ خان اور گوہر رشید نے ان خبروں پر کوئی تبصرہ نہیں کیا ہے۔
سوشل میڈیا پر متحرک ہونے کے باوجود، دونوں نے ان افواہوں کی نہ تو تصدیق کی ہے اور نہ ہی تردید۔ البتہ گوہر رشید اپنے انسٹاگرام اکاؤنٹ پر شادی کی تیاریوں اور ڈانس پریکٹس کی مختلف ویڈیوز پوسٹ کر رہے ہیں جو ان افواہوں کو مزید ہوا دے رہی ہیں۔
پاکستان کی مشہور گلوکارہ شے گل، جو اپنے عالمی مقبول گانے ’پسوڑی‘ کے لیے جانی جاتی ہیں، نے حال ہی میں اپنے نام سے متعلق انکشاف کیا ہے۔
اداکارہ دنانیر مبین کے پروگرام میں شے گل نے انکشاف کیا ہے کہ ان کا اصل نام انوشے بابر گل ہے تاہم انہیں میوزک انڈسٹری میں شے گل نام سے جانا جاتا ہے۔
گلوکارہ نے بتایا کہ ’شے‘ کا نِک نام ان کے یونیورسٹی کے دنوں میں وجود میں آیا، جب ان کے ایک دوست نے ان کی مشابہت مشہور ڈرامہ سیریز ’گیم آف تھرونز‘ کے ایک کردار سے کی اور انہیں ’شے‘ کہنا شروع کر دیا۔
یاد رہے کہ شے گل نے اپنی منفرد گائیکی اور ’پسوڑی‘ جیسے ہٹ گانے کی بدولت مقامی اور بین الاقوامی سطح پر شہرت حاصل کی۔ ان کی آواز اور انداز نے موسیقی نے شائقین کو بےحد متاثر کیا ہے۔ شے گل اپنے منفرد اسلوب کی بدولت پاکستانی موسیقی میں ایک نمایاں مقام رکھتی ہیں۔
یونیورسٹی آف ہوم اکنامکس نے تحقیق کو فروغ دینے کے لیے اپنا نیا ریسرچ جرنل لانچ کر دیا ہے۔ وائس چانسلر پروفیسر ڈاکٹر فلیحہ زہرا کاظمی نے ریسرچ جرنل کا افتتاح کیا۔
جرنل آف جینڈر اینڈ سوشل انکوائری شعبہ سوشیالوجی اینڈ جینڈر سٹڈیز اور ویمن ڈویلپمنٹ سنٹر کے تحت شائع کیا گیا ہے ۔
وائس چانسلر نے ریسرچ جرنل کا افتتاح کرتے ہوئے بتایا کہ ریسرچ جرنل کی پہلی اشاعت میں امریکا کی یونیورسٹیوں کے پروفیسرز کے تحقیقی مقالہ جات بھی شامل ہیں۔
انہوں نے کہا کہ ریسرچ جرنل کے اجرا سے یونیورسٹی میں تحقیقی کام کو فروغ ملے گا۔
کراچی: اعلیٰ ثانوی تعلیمی بورڈ کراچی کے متنازع نتائج کے خلاف سوشل ورکرز بھی میدان میں آگئے ۔ متاثرہ طلبہ کے مسائل حل نہ ہونے تک احتجاج کا اعلان کردیا۔سوشل ورکر نبیل صدیقی نے اپنے مطالبات پیش کردیے ۔
اسکروٹنی کے عمل میں شامل کیا جائے یا نتائج کو منسوخ کردیا جائے ۔ اعلیٰ ثانوی تعلیمی بورڈ کراچی کے گیارہویں جماعت کے متنازع نتائج پر جہاں طلبہ و والدین کے بعد سیاسی جماعتوںکے بعد سوشل ور کرز بھی طلبہ کے حق میں بول پڑے ۔
سوشل ورکر نبیل صدیقی نے گیارہویں جماعت کے حالیہ نتائج میں مبینہ بے قاعدگی کے خلاف پریس کانفرنس کے دوران کہا کہ تین، چار سال سے انٹر میں کراچی طلبہ کے ساتھ زیادتی ہورہی ہے ۔ میٹرک میں اچھے نمبرز سے کامیاب ہونے والے طلبہ کے نمبرز اعلیٰ ثانوی تعلیمی بورڈ کراچی میں گر جاتے ہیں۔ نبیل صدیقی کا کہنا تھا کہ طلبہ کی جانب سے سوشل میڈیا پر شور مچانے کے بعد سیاسی لوگ حرکت میں آتے ہیں لیکن طلبہ کو انصاف دلانے کے لیے کچھ نہیں کیا جاتا۔
لاڑکانہ بورڈ میں پری انجینئرنگ کے نتائج 75فیصد جبکہ کراچی میں 35فیصد ہے ،یہ کراچی کے طلبہ کے ساتھ زیادتی کی جارہی ہے ۔انٹر بورڈ اسکروٹنی کرانے جاتے ہیں تو انٹر بورڈ عملہ زیادہ نمبرز پیسوں کے عوض بڑھانے کا کہتے ہیں۔ نبیل صدیقی کا مطالبہ تھا کہ اسکروٹنی کمیٹی کے عمل میں طلبہ کو شریک کیا جائے یا پھر گیارہویں کے نتائج کو کالعدم قرار دیا جائے اور نئے نتائج جاری کئے جائیں۔ انہوں نے مزید کہا کہ یہ بات سرا سر غلط ہے کہ طلبہ پیپرز میں گانے لکھ کر آتے ہیں جو ویڈیو سوشل میڈیا پر گھوم رہی ہے وہ پرانی ہے ۔ انہوں نے اعلان کیا کہ طلبہ کو انصاف کی فراہمی تک احتجاج کریں گے ۔
پی ایس ایل کے لیے ڈرافٹنگ کی تاریخ اور وینیو تبدیل کردیا گیا ہے۔
ذرائع کا بتانا ہے کہ پی ایس ایل 10 کی ڈرافٹنگ اب 11 کے بجائے 13 جنوری کو لاہور میں ہوگی۔
ذرائع کا کہنا ہے کہ پی ایس ایل ڈرافٹنگ کی وینیو کی تبدیلی لاجسٹک مسائل کے باعث کی گئی۔
اس سے قبل پاکستان کرکٹ بورڈ نے پاکستان سپر لیگ کے دسویں ایڈیشن کا پلیئر ڈرافٹ گوادر میں کروانے کا اعلان کیا تھا۔
پاکستانی اداکار گوہر رشید اور اداکارہ کبریٰ خان کی شادی کی تیاریاں شروع ہونے کی خبریں سامنے آرہی ہیں۔
سوشل میڈیا پر شوبز شخصیات کے حوالے سے خبریں شیئر کرنے والے انسٹاگرام پیج پر گوہر رشید اور اداکارہ کبریٰ خان کی شادی کی تیاریاں شروع ہونے کا دعویٰ کیا گیا ہے۔
دونوں اداکاروں کی شادی کا دعویٰ گوہر رشید کے انسٹاگرام پر ایک ویڈیو پوسٹ کرنے کے بعد سامنے آیا ۔گوہر رشید نے انسٹاگرام پر ایک ویڈیو پوسٹ کرتے ہوئے ’بسم اللہ 2025‘لکھا، ویڈیو میں شازیہ وجاہت، وجاہت رؤف اور ان کے دیگر دوست اداکار بھی موجود ہیں۔
پیج پر ذرائع کا حوالہ دیتے ہوئے دعویٰ کیا گیا ہےکہ اداکارہ کبریٰ خان اور مرزا گوہر رشید کی شادی کی تیاریاں کراچی میں جاری ہیں، دونوں اداکاروں کی شادی نہایت دھوم دھام سے ہوگی جس کیلئے گزشتہ رات اداکاروں نے ڈانس پریکٹس بھی کی۔
یاد رہے کہ کبریٰ خان اور گوہر رشید کی گہری دوستی اور قریبی تعلقات سے مداح بخوبی واقف ہیں۔
چند ماہ قبل گوہر رشید نے ایک انٹرویو کے دوران سنگل نہ ہونے کا اعتراف کرتے ہوئے کہا تھاکہ اب میں ان کے بغیر اپنی زندگی کا تصور نہیں کر سکتا، ان کے بارے میں اتنی باتیں کرسکتا ہوں کہ اس پر پورا شو ہو سکتا ہے۔