ایمز ٹی وی ( اسلام آباد) وزیراعظم نواز شریف یمن کی صورتحال پر سعودی قیادت سے تبادلہ خیال کے لیے ایک روزہ دورے پر سعودی عرب پہنچ گئے ہیں۔ایئرپورٹ پر وزیراعظم کا استقبال سعودی وزیر داخلہ نائب ولی عہد نیاف السعود اور وزیر دفاع پرنس محمد بن سلمان السعود نے کیا۔وزیراعظم کے ہمراہ آرمی چیف جنرل راحیل شریف، وفاقی وزیر دفاع خواجہ آصف، وزیراعظم کے معاون خصوصی طارق فاطمی اور سیکریٹری خارجہ اعزاز چوہدری بھی سعودی عرب گئے ہیں۔دوران سفر طیارے میں وزیراعظم نواز شریف نے ایک اہم اجلاس کی صدارت بھی کی، جس میں یمن کے معاملے پر تبادلہ خیال کیا گیا۔ایک روزہ دورے کے دوران وزیراعظم نواز شریف سعودی عرب کے شاہ سلمان بن عبد العزیز اور ولی عہد مقرن بن عبدالعزیز سے ملاقات کریں گے۔واضح رہے کہ وزیراعظم نواز شریف کے دورہ سعودی عرب کا فیصلہ گزشتہ روز یمن کی صورتحال کا جائزہ لینے کے لیے ایک اعلیٰ سطحی اجلاس کے دوران کیا گیا۔

ایمز ٹی وی (کراچی) ایم کیو ایم کے مرکز نائن زیرو سے گرفتار 16 ملزمان کا چالان عدالت میں پیش کردیا گیا ۔ نائن زیرو سے گرفتار دھماکا خیز مواد رکھنے کے الزام میں سولہ ملزمان کے چالان عدالت میں منظور ہونے کے بعد باقاعدہ سماعت کا حکم دے دیا گیا ہے۔گیارہ مارچ کو نائن زیرو سے حراست میں لئے گئےسولہ ملزمان کا چالان انسداد دہشت گردی کی عدالت میں پیش کردیا گیا۔پولیس ذرائع کے مطابق ملزمان پر دھماکا خیز مواد اور ناجائز اسلحہ رکھنے سے متعلق دفعات لگائی گئی ہیں۔ملزمان میں عامرسرکٹا، فیصل موٹا، عبید کےٹو، نادرشاہ ، رشید احمد، عبدالقادر ہنگورو، ندیم احمد، امتیاز احمد اور عامر رضا، رضوان علی، توفیق، فیضان، ساجد، نعمان، آصف اور حسیب الرحیم شامل ہیں۔واضح رہے کہ مذکورہ ملزمان کو گیارہ مارچ دو ہزار پندرہ کو نائن زیرو پر چھاپے کے دوران گرفتار کیا گیا تھا 

ایمز ٹی وی (کراچی) متحدہ قومی مومنٹ کے رہنماء ڈاکٹر فاروق ستار کا کہنا ہے کہ این اے 246 میں ایم کیو ایم کی جیت واضح ہے لیکن مختلف حیلے بہانوں سے ایم کیو ایم کی لید کم کی جارہی ہے ۔انہوں نے کہا کہ این اے 246 میں انتخابات جاری ہیں اور خلاف تواقع ووٹرز کی لمبی قطاریں لگی ہوئی ہیں ،فاروق ستار نے کہا کہ الیکشن کمیشن سے مطالبہ کیا جاتا ہے کہ انتخابی سست روی کی وجہ سے ووٹرز حق رائے دہی سے محروم نا رہ جائیں اس لیئے اس ووٹنگ کے ٹائم میں تین گھنٹے اضافہ کیا جائے ۔انہوں نے مزید کہا کہ سخت گرمی میں ووٹروں کو مجبور کیا جارہا ہے کہ وہ واپس گھر لوٹ جائیں ۔ فاروق ستار کا مزید کہنا تھا کہ ایک ووٹ ایک گھنٹے میں کاسٹ کیا جارہا ہے اس کا مطلب یہ ہے کہ کہیں نہ کہیں کوئی غلطی ہوئی ہے ۔انہوں نے کہا کہ قانون نافذ کرنے والے ادارے ووٹرز کی شناخت میں کافی وقت ضائع کررہے ہیں۔فاروق ستار نے کہا کہ الیکشن کمیشن آف پاکستان، ریٹرنگ آفیسر، انتظامیہ، رینجرزاورپولیس ایم کیو ایم کے کامیابی کے مارجن کو کم نا کرے اور ووٹر کے حقِ رائے دہی کو یقینی بنا یاجائے۔انہوں نے یہ بھی کہا کہ ووٹرز کی حوصلہ افزائی کی جائے اسے مختلف حیلے بہانوں سے نہ روکا جائے۔ووٹروں کو آزادی کے ساتھ حق رائے دہی استعمال کرنے کو یقینی بنانے کی مکمل ذمے داری الیکشن کمیشن پرہے لیکن ڈی جی رینجرز سے بھی اپیل کی ہے کہ اس معاملے کا نوٹس لیا جائے   

ایمز ٹی وی (اسلام آباد) چین کے صدر شی چن پنگ کے دورہ پاکستان کو دفتر خارجہ نے خوش آئند قرار دیتے ہوئے کہا چین خطے میں امن کا باعث بنے گا ۔  جمعرات کو ہفتہ وار بریفنگ کے دوران ترجمان دفتر خارجہ تسنیم اسلم کا کہنا تھا کہ چینی صدر کے دورہ پاکستان پر ہندوستانی میڈیا کی منفی رپورٹس پر کوئی 'تبصرہ' نہیں کیا جائے گا۔ایک سوال کے جواب میں انھوں نے کہا کہ خطے کے ممالک کو اس بات کا احساس ہونا چاہیے کہ پاک چین اقتصادی راہداری منصوبے کی جلد از جلد تکمیل خود ان کے مفاد میں بھی ہوگی۔واضح رہے کہ چین کے صدر شی جن پنگ 20 اپریل کو دو روزہ دورے پر پاکستان پہنچے تھے جبکہ 21 اپریل کو انھوں نے پاکستانی پارلیمنٹ کے مشترکہ اجلاس سے خطاب بھی کیا۔صدر شی جن پنگ کے دورے کے دوران پاکستان اور چین کےمابین کئی ارب ڈالر کے معاہدوں پر دستخط کیے گئے، جس کے حوالے سے ہندوستانی میڈیا نے کافی شور مچایا، حتیٰ کہ یہاں تک کہا گیا کہ چین ہندوستان کی پیٹھ میں چھرا گھونپ رہا ہے۔وزیراعظم نواز شریف کے دورہ سعودی عرب کے حوالے سے ترجمان دفتر خارجہ کا کہنا تھا کہ اس دورے کے دوران سعودی قیادت کے ساتھ یمن کی صورتحال پر مشاورت کی جائے گی۔