Reporter SS
کراچی: ایران سے بارش برسانے والا سسٹم کراچی میں داخل ہونے کے بعد شہر قائد کے مختلف علاقوں میں بارشوں کا سلسلہ شروع ہو گیا ہے، کے الیکٹرک نے شہریوں کو احتیاطی تدابیر اختیار کرنے کا مشورہ دے دیا ہے۔
تفصیلات کے مطابق ترجمان کے الیکٹرک نے کہا ہے کہ بارش کی صورت میں احتیاط کی جائے، غیر قانونی ذرائع سے بجلی کا حصول ہرگز نہ کیا جائے، شہری ٹوٹے ہوئے تاروں، بجلی کے کھمبوں اور پی ایم ٹیز سے دور رہیں۔
ترجمان کے الیکٹرک کے مطابق بارش کی صورت میں بچوں کا خاص خیال رکھا جائے اور احتیاط برتیں، برقی آلات ننگے پاؤں یاگیلے ہاتھ کے ساتھ نہ چھوئیں، بارش اور کھڑے پانی میں پانی کی موٹر جیسے برقی آلات کا غیر محفوظ استعمال حادثات کا سبب بن سکتا ہے۔
ترجمان نے بتایا کہ کسی بھی شکایت کی صورت میں 118 پر فوری رابطہ کیا جائے۔
خیال رہے کہ گزشتہ روز چیف میٹر و لوجسٹ نے کہا تھا کہ ایران سے بارش برسانے والا سسٹم کراچی میں داخل ہو چکا ہے، سسٹم بلوچستان سے کراچی میں داخل ہوا، سسٹم کے تحت آج دن بھر شہر کے مختلف علاقوں میں ہلکی بارش کی توقع ہے۔
چیف میٹرولوجسٹ کے مطابق سسٹم سے تیز بارش کی کوئی توقع نہیں ہے، بارش برسانے والاسسٹم سندھ سے پنجاب، پھر شمالی علاقہ جات جائے گا، بوندا باندی کی وجہ سے آج دن خصوصاً رات میں ٹھنڈ ہوگی۔
کراچی: بدھ کی شام شہر قائد کے مختلف علاقوں میں بوندا باندی سے موسم خوشگوار ہوگیا اور ٹھنڈی ہوائیں چلنے کے سبب سردی کی شدت میں اضافہ ہوگیا۔
تفصیلات کے مطابق کراچی کے مختلف علاقوں میں بوندا باندی سے موسم خوشگوار ہوگیا اور ٹھنڈی ہوائیں چلنے کے سبب سردی کی شدت میں اضافہ ریکارڈ کیا گیا ہے۔
محکمہ موسمیات کے مطابق کراچی کے علاقے لائنز ایریا، صدر، گارڈن، کورنگی، بلدیہ ٹاؤن، گڈاپ ٹاؤن، قائد آباد اور سرجانی ٹاؤن میں ہلکی بارش ہوئی، بارش کے بعد شہر میں ٹھنڈی ہوائی چل پڑیں۔
چیف میٹرولوجسٹ کا کہنا ہے کہ بارش برسانے والا سسٹم بلوچستان سے کراچی میں داخل ہوا ہے، سسٹم کے تحت بدھ جمعرات کی درمیانی رات اور پھر جمعرات کو دن بھر ہلکی بارش کی توقع ہے۔
چیف میٹرولوجسٹ نے کہا کہ شہر کے مختلف علاقوں میں ہلکی بارش اور بوندا باندی کا امکان ہے، سسٹم سے تیز بارش کی کوئی توقع نہیں ہے۔انہوں نے کہا کہ بارش برسانے والا سسٹم سندھ سے پنجاب، پھر شمالی علاقہ جات جائے گا۔
اسلام آباد: کامسیٹس یونیورسٹی اسلام آباد کے لاہور کیمپس میں واقع ’ اںٹر ڈسپلنری ریسرچ سینٹر برائے بائیو میڈیکل مٹیریلز‘ کے زیرِ اہتمام، ساتویں بین الاقوامی برائے بایومیڈیکل مٹیریلز کا افتتاح پنجاب کی وزیرِ صحت ڈاکٹر یاسمین راشد صاحبہ نے کیا ۔ اس کانفرنس میں دو سو سے زائد ملکی اور غیرملکی ماہرین و مندوب نے شرکت کی۔
اس سال سمپوزیم کا مرکزی موضوع (تھیم) ’سائنس و ٹٰیکنالوجی میں ایجادات اور علمی معیشت‘ کو فروغ دینے پر ہے۔
کانفرنس میں برطانیہ، جرمنی، امریکہ، ترکی، نیوزی لینڈ اور ایران سمیت کئی ممالک سے ماہرین نے شرکت کی۔ ان میں برطانیہ کی معروف پروفیسر شیلہ میکلین بھی نمایاں ہیں۔ وزیرِ صحت ڈاکٹر یاسمین راشد نے اپنے خطاب میں کامسیٹس یونیورسٹٰی اسلام آباد کے اعلیٰ علمی اور تحقیقی معیار کو سراہا۔
انہوں نے سینٹر برائے بایومٹریلز کی پیش رفت کو ملک میں صحت کے شعبے میں اہم سنگِ میل قرار دیا۔
افتتاحی تقریب سے مرکز کے بانی ڈاکٹر احتشام الرحمان ، کیمپس کے ڈائریکٹر قیصرعباس، برطانیہ کی پروفیسر شیلہ میکلین، اور کامسیٹس کے ریکٹر ڈاکٹر راحیل قمر نے بھی خطاب کیا۔
سینٹر کے ناظم ڈاکٹر عاقف انور نے سمپوزیم اور سینٹر کےبارے میں تفیصلات فراہم کرتے ہوئے تمام مندوبین کو خوش آمدید کہا۔
