ایمز ٹی وی (ہیلتھ ڈیسک) طبی آلات بنانے والی ایک امریکن کمپنی نے قبض کے علاج کے لئے وائبریٹنگ (تھرتھراتا) کیپسول بنا ڈالا۔
نظام انہضام سے متعلق ایک امریکی جریدےکے مطابق گزشتہ دنوں پیٹ اورمعدے کے امراض سے وابستہ ڈاکٹرز اور سرجنز کی ایک سالانہ میٹنگ ہوئی، جس میں ماہرین کا کہنا تھا کہ وائبریٹنگ کیپسول قبض کی دیرینہ بیماری کے علاج میں نہایت معاون ثابت ہو سکتا ہے۔میٹنگ میں بتایا گیا کہ قبض کی بیماری میں مبتلا 26 افراد کو یہ کیپسول ہفتہ میں دو بار استعمال کرنے کی ہدایت کی گئی۔ماہرین کا کہنا ہے کہ اس کیپسول کے استعمال سے ان مریضوں کو سخت بیماری میں نہ صرف سکون ملابلکہ دیگرطریقہ علاج کے نسبت اس کے سائیڈافیکٹس (مضر اثرات) بھی نہایت کم تھے۔
ایک طبی ماہر ڈاکٹر یشائی رون کا کہنا ہے کہ ’’وائبریٹنگ کیپسول ایک موٹر یا انجن کی طرح کام کرتا ہے،جو معدے میں پہنچ کر فضلہ کو آگے کی طرف دھکیلتا ہے‘‘۔ تاہم ماہرین کی طرف سے اس کیپسول کے بارے میں ابھی حتمی رائے نہیں دی گئی ہے کیوںکہ اسے بھی صرف محدود لوگوں پر آزمایا گیا ہے۔ کیپسول پر مزید تحقیقات کا سلسلہ ابھی جاری ہے۔
ایمز ٹی وی (راولپنڈی) محکمہ داخلہ پنجاب نے ممبئی حملہ کیس کے ملزم ذکی الرحمان لکھوی کی ایک ماہ نظربندی کے احکامات جاری کردیئے۔
ذرائع کے مطابق اسلام آباد ہائیکورٹ نےگزشتہ روز ممبئی حملہ کیس کے ملزم ذکی الرحمان لکھوی کی نظربندی کو کالعدم قرار دیتے ہوئے انہیں فوری رہاکرنے کا حکم دیا تھا اور آج انہیں اڈیالہ جیل سے رہاکیا جانا تھا تاہم محکمہ داخلہ پنجاب نے ملزم کو مزید ایک ماہ نظر بندکرنے کے احکامات جاری کردیئے۔
واضح رہے کہ انسداد دہشت گردی عدالت نے ممبئی حملہ کیس کے ملزم ذکی الرحمان لکھوی کو ضمانت پر رہا کر رکھا تھا تاہم حکومت نے نقص امن کے تحت انہیں نظربند کردیاتھا۔
لاہور: وزیراعلی پنجاب شہباز شریف نے سانحہ ماڈل ٹاؤن کی جوائنٹ انویسٹی گیشن ٹیم کے سامنے پیش ہوکر اپنا بیان قلمبند کرادیا۔
ذرائع کے مطابق وزیراعلی پنجاب شہباز شریف سانحہ ماڈل ٹاؤن سے متعلق اپنا بیان ریکارڈ کرانے خود جے آئی ٹی دفتر گئے اور اپنا بیان ریکارڈ کرادیا۔ اپنے بیان میں وزیراعلی پنجاب نے موقف اختیار کیا کہ 17 جون کو ماڈل ٹاؤن میں ضلعی انتظامیہ کی جانب سے آپریشن کیا گیا اور اس حوالے سے وہ لاعلم تھے جب ٹی وی آن کیا تو پتہ چلا کہ ماڈل ٹاؤن میں فائرنگ ہو رہی ہے۔ انہوں نے پولیس کو پولیس کو فائرنگ کے احکامات کی تردید کرتے ہوئے کہا کہ پولیس کو ماڈل ٹاؤن میں فائرنگ کرنے کا کوئی حکم نہیں دیا۔
واضح رہے کہ 17 جون 2014 کو تحریک منہاج القرآن کے سربراہ ڈاکٹرطاہرالقادری کی رہائش گاہ کے باہرسے رکاوٹیں ہٹانے کےلئے ضلعی انتظامیہ نے کارروائی کی اور اس دوران مزاحمت کے بعد پولیس کی فائرنگ سے منہاج القرآن کے 14 کارکن جاں بحق اور 80 سے زائد زخمی ہوگئے تھے۔
ایمز ٹی وی (کراچی) متحدہ قومی موومنٹ کے قائدالطاف حسین نے انسانی حقوق کی تنظیموں، سول سوسائٹی اور وکلا برادری سے اپیل کہ ہے کہ وہ ایم کیوایم کے گرفتار کارکنان پرانسانیت سوز تشدد کے خلاف صدائے احتجاج بلند کریں۔
ایم کیو ایم کے مرکز نائن زیرو پر آئینی وقانونی ماہرین اور ایم کیوایم لیگل ایڈ کمیٹی کے وکلا کے اجلاس سے ٹیلی فونک خطاب کرتے ہوئے الطاف حسین کا کہنا تھا کہ موجودہ صورتحال میں ایم کیوایم نے شہر قائد میں امن وامان کے قیام اور جرائم پیشہ عناصر کے خلاف آپریشن کی حمایت کی لیکن مجرموں کی گرفتاری کی آڑ میں کراچی میں رینجرز کے آپریشن کا رخ ایم کیوایم کی جانب موڑ دیا گیا ہے۔ انہوں نے کہا کہ حراست کے دوران گرفتار شدگان کو بدترین تشدد کانشانہ بنایاجارہا ہے، ان پر تھرڈ ڈگری استعمال کی جارہی ہے ، ان کے جسم کے نازک اعضاء پر تشدد کیاجارہا ہے جس کے باعث گرفتارشدگان کے گردے اورجسم کے دیگر اعضاء شدید متاثر ہورہے ہیں جس کا وکلاء برادری اور عاصمہ جہانگیر سمیت انسانی حقوق کی تنظیموں کوفوری نوٹس لینا چاہیے۔
الطاف حسین نے تمام وکلاء سے کہاکہ وہ انسانی حقوق کی تنظیموں کے نمائندوں کے وفد کے ہمراہ گرفتار شدگان سے ملاقات کریں اور خود مشاہدہ کریں کہ گرفتار شدگان کو کس طرح وحشیانہ تشدد کا نشانہ بنایاجارہا ہے ۔انہوں نے رابطہ کمیٹی ، حق پرست ارکان سینیٹ ، قومی وصوبائی اسمبلی کو ہدایت کی کہ اپنے اپنے ایوان کی انسانی حقوق کی کمیٹیوں کے ہمراہ گرفتارشدگان سے ملاقات کرکے ان پر ہونے والے بدترین تشدد کا جائزہ لیں اور اس کے خلاف ہرسطح پر آواز بلند کریں۔
ایمز ٹی وی (کراچی) محکمہ داخلہ سندھ نے رینجرز سندھ کے خصوصی اختیارات میں مزید4 ماہ کی توسیع کر دی ہے ۔
ذرائع کے مطابق محکمہ داخلہ سندھ نے رینجرز کے خصوصی اختیارات میں مزید 4 ماہ کی توسیع کر دی ہے، ان خصوصی اختیارات کے تحت رینجرز کو چھاپوں، گرفتاریوں ، مشتبہ افراد کو حراست میں لینے اور تفتیش کے اختیارات حاصل ہونگے ۔
ایمز ٹی وی (کوئٹہ) صولت مرزاکی پھانسی سزا پر عملدرآمد کے عدالتی احکام کے بعد مچھ جیل کی سیکیورٹی سخت کردی گئی ہے۔
ڈپٹی سپرنٹنڈنٹ مچھ جیل سکندرخان کاکڑ نے کہا ہے کہ اس وقت مچھ جیل کی سیکیورٹی پر3 سوایف سی پولیس اور لیویز اہلکاروں کو تعینات کیاگیاہے۔مچھ میں کسی بھی ناخوشگوار واقعے سے نمٹنے کیلیے مچھ شہرکے داخلی وخارجی راستوں پرسیکیورٹی سخت کردی گئی ہے اورتمام آنے جانے والوں کی تلاشی لی جارہی ہے۔
ایمز ٹی وی (لاہور) سپریم کورٹ کے ڈویژن بینچ نے بھٹو کیس ری اوپن کرنے سے متعلق درخواست خارج کر دی۔
غازی علم الدین ایڈووکیٹ کی جانب سے دائر درخواست میں موقف اختیار کیا گیا تھا کہ ذوالفقارعلی بھٹوکا عدالتی قتل کیا گیا، ملک کے پہلے منتخب وزیراعظم کا ٹرائل ری اوپن کرنے کاحکم دیاجائے۔ عدالت نے ریمارکس دیے کہ درخواست گزارمتاثرہ فریق نہیں، صرف متاثرہ فریق ہی بھٹوکیس ری اوپن کرنے سے متعلق درخواست دائر کرسکتا ہے جس کے بعد سپریم کورٹ نے درخواست خارج کردی۔
ایمز ٹی وی (اسلام آباد) پاکستان تحریک انصاف کے چیئرمین عمران خان نے کہاہے کہ تحریک انصاف کے نواجوان کمربستہ ہوجائیں اگلامیدان جلد لاہور میں لگے گا،جس کے لیے آزادی بس کو تیاری کا کہہ دیا گیا ہے، ملک کے نوجوان اب تحریک انصاف کی طرف دیکھ رہے ہیں۔
بنی گالا میں نومنتخب سینیٹرزاور خیبر پختونخوا سے تعلق رکھنے والے ایم پی ایز کے اعزاز میں منعقدہ ظہرانے سے خطاب کرتے ہوئے انھوں نے کہاکہ سینیٹ انتخابات میں دولت کے اثر ورسوخ کو پس پشت ڈال کر پارٹی پالیسی کے مطابق ووٹ دینے پر خیبرپختونخوا کے اراکین زبردست خراج تحسین کے مستحق ہیں ان کایہ اقدام نئے پاکستان کا پیش خیمہ ثابت ہوگا۔
عمران خان نے کہاکہ قوم کی توقع تحریک انصاف سے وابستہ ہے جبکہ نوجوان تبدیلی کیلیے منتظر ہیں،تحریک انصاف ہی واحد جماعت ہے جو ملک وقوم کومایوسیوں سے نکال کر ترقی و خوشحالی کی راہ پر ڈالنے کی اہلیت رکھتی ہے،عوام نیا پاکستان دیکھنا چاہتے ہیں چنانچہ تحریک انصاف کے کارکنان ایک نئی جدوجہد کیلیے کمربستہ ہو جائیں، تحریک انصاف مئی 2013 کے انتخابات میں کی جانے والی دھاندلی کی تحقیقات کیلیے پوری طرح پرعزم ہے،اگر حکومت معاملے کو مزید تاخیر کا شکار کرنے کی کوشش کرتی ہے تو ایک مرتہ پھر سڑکوں پر نکلیں گے اور اب کی بار لاہور کا رخ کریں گے۔
ایمز ٹی وی(اسلام آباد )23 مارچ کو یوم پاکستان کے موقع پر سیکیورٹی کو موثر بنانے کے لیے ایک ماہ کے لیے دفعہ 144 نافذ کرنے کے ساتھ ساتھ پتنگ بازی پر بھی پابندی لگا دی گئی۔
ذرائع کے مطابق اسلام آباد کی ضلعی انتظامیہ نے دارالحکومت میں ایک ماہ کے لیے دفعہ 144 فوری طور پر نافذ کر دی ہے۔ جس کے تحت پانچ یا پانچ سے زائد افراد کے اجتماع پر پابندی ہو گی۔ اس کے علاوہ شہر میں ممکنہ طور پر بسنت منانے سے روکنے کے لیے بھی پتنگ بازی پر ایک ماہ کی پابندی عائد کردی گئی ہے۔ انتظامیہ کا کہنا ہے کہ مسلح افواج کی پریڈ کے موقع پر 41 میں سے 7 مدارس کی انتظامیہ نے ایک ہفتہ کے لیے مدارس کو عارضی طور پر بند کرنے کی یقین دہانی کرا دی ہے۔
ایمز ٹی وی(کراچی)کراچی میں قانون نافذ کرنے والے اداروں نے جرائم پیشہ افراد کے خلاف کارروائی کر کے گینگ وار کے دو گینگسٹرز کو ہلاک کر دیا ۔ ملزمان کے قبضے سے اسلحہ اور بھتے کی پرچیاں برآمد کرلی گئی ہیں ۔ لیاری کے علاقے دریا آباد میں پولیس نے گینگ وار کارندوں کی موجودگی کی اطلاع پر چھاپہ مار کارروائی کی ۔ کارروائی کے دوران ملزمان نے پولیس اہلکاروں پر فائرنگ کر دی ۔ مقابلے کے نتیجے میں گینگ وار کے دو کارندے جبار دادا اور حافظ چونی مارے گئے ۔ ایس ایس پی سٹی فدا حسین کے مطابق ہلاک ملزمان ٹارگٹ کلنگ ، بھتہ خوری اور اغوا برائے تاوان کی چوبیس وارداتوں میں ملوث تھے ۔ کارروائی کے دوران ملزمان کے قبضے سے اسلحہ اور بھتے کی پرچیاں برآمد کر لی گئی ہیں -